1. Mungu dhó ro si ná nyodyu ká kodhó lo ji addudho? (Mezali 4:7)

 NJATI rie b’lo ni vʉrie bbo na mana kʉ ná lo nanga ro ri ró, bbʉbbʉ dhé ni nzingʉe nga nja ni ba nyodyu dhonalo ni chungʉeri ni dho lo jiri ji. (Yak. 1:5) Pi Sulemani ndingʉeri: “Nyodyu kʉ bbo pli na mana kʉ ná ritsi.” (Azø Mezali 4:7.) Bbʉbbʉ dhé, Sulemani nzɨ ngʉ loti nyodyu krʉ djo ri. Ro ke ngʉ loti djo nari kʉ Yova Mungu dhó ro adi si ná nyodyu. (Mez. 2:6) Nde Mungu dhó ro si ná nyodyu ká ka ndi kó ko tsotso ko hwini njʉ ko adi bani na ná kpakpa lo na ddi? I lo nǎ ko si rinja nari bbai, ri ka ndi kó ko tsotso ngbà.

2. Bbʉbbʉ nyodyu ko ka ko ba na ná ddikpa ri ká kʉ ngbá chu?

² Ko ka ko é bbʉbbʉ nyodyu na ná ddikpa chu kʉ, bbo ngʉe nyodyu na ná aro kʉ ná kpetsi kpa ddingʉe ná lo ko jifunza ndirigoti ri na ko njínji nari chulu. Ya kwanza, ko si loti Sulemani djo. Biblia ripo “Mungu bbʉngʉe Sulemani dho nyodyu ndirigoti bbo pli kʉ ná lo utso d’idha.” (1 Fa. 4:29) Ya pili, ko si loti Yesu djo, ke bbai ngʉe nyodyu na ná ndrǔ ro nga ngʉe ri. (Mt. 12:42) Yesu djo unabi pongʉeri: “Yova dzá roho sie ke djó, nyodyu dhi ndirigoti akili dhi roho.”​—Isa. 11:2.

3. I lo nǎ ka ko si loti ngbá lo djo?

³ Mungu bbʉngʉe Sulemani ma, Yesu ma na dho nyodyu bbo, føri dho kpa ka ndima bbʉ ko dho bblo kʉ ná shauri bbo na mana kʉ ná ritsi djo. I lo nǎ, ko si fø ritsi kana gbo kʉ ná ri nja: Ringani ko é blo kʉ ná nganjadha na mbø djo, kimwili nǎ njí djo, ndirigoti ko djo.

4. Sulemani ma, Yesu ma na dhó hali tso ká njungʉe ngbaribbai?

⁴ Sulemani dhó ngʉe mali, ké ka ndi ke le nga ná ngatsi, ndirigoti ke ngʉ di bblo kʉ ná maisha nǎ ndirigoti ke ngʉ di bblo kʉ ná dza nǎ. (1 Fa. 10:7, 14, 15) Ro Yesu dhó nga ritsi dja ngʉeri ndirigoti ke bbá nga ro ma ngaddi ngʉeri. (Mt. 8:20) Nì mai ri kʉ fø ro, aro kʉ ná fø kpetsi kpa ngʉe bblo kʉ ná nganjadha na kimwili nǎ ritsi djo dhonalo, kpadhó nyodyu ngʉ si ddikpa ke dhó ro, føri ngʉe Yova Mungu.

5. Sulemani ká ngʉe ngbá bblo kʉ ná nganjadha na mbø djo?

⁵ Sulemani pongʉeri nari kʉ mbø “adi le ronga b’o b’o.” (Muh. 7:12) Njati kodhó é mbø ró, ko ka ko dzi kodhó lo u ná ritsi ndirigoti ko ji ná ritsi. Nì mai Sulemani dhó mali ngʉe bbo ro, ke chungʉeri chu nari kʉ bbo na mana kʉ mbø djolu ná ddikpa ritsi ro kʉ thé. Loroji na, ke ndingʉeri: “Bblo dho [inga “bblo nyi” maelezo ya chini] kʉ bblo pli bbo kʉ ná mali djolu.” (Mez. 22:1) Sulemani pongʉeri mbø ji ná ndrŭ nanga ro nzɨ adi jini ndima kʉ na ná ritsi dho ri. (Muh. 5:10, 12) Ndirigoti ke pongʉeri, ri nzá ngani ko nja mbø bbo na mana kʉ ná ritsi ri, dhonalo njati kodhó mbø é ngbá ngatsi ma ro ri ka ndi sini tse.​—Mez. 23:4, 5.

6. Yesu ká ngʉe ngbá bblo kʉ ná nganjadha na kimwili nǎ ritsi djo? (Matayo 6:31-33)

⁶ Yesu ngʉe bblo kʉ ná nganjadha na kimwili nǎ ritsi djo. Ke ngʉ adi nganyo ndirigoti jødha dhi ritsi ma jø ddi. (Lu. 19:2, 6, 7) Ddikpa saa na, ke thɨngʉe bblo pli kʉ ná wa, ya kwanza ddù ndi njingʉe ro. (Yoh. 2:10, 11) Ndirigoti dhe ke dhe ná dyi ke thongʉe bbo ro dzi kʉ ná ru. (Yoh. 19:23, 24) Ro Yesu nzá njangʉe kimwili nǎ ritsi bbo na mana kʉ ri ndidhó maisha nǎ ri. Ke pongʉeri ndi unakpa dho: “Ddikpa le ro ma nzá ddi ka ndi njinjí aro kʉ ná bbobbo kpa dho ri . . . Ni nzá ka ni njinjí ro nokpa bbai Mungu dho ndirigoti mbø dho ri.” (Mt. 6:24) Yesu pongʉeri njati ko li  pidhinga anziro ro ró, Yova si ngaddi nì ko kʉ dhi lazima na ná ritsi djo.​—Azø Matayo 6:31-33.

7. Mbø djo le kʉ bblo nganjadha na nari nǎ ro ká ddikpa le-djo bangʉe ngbá faida?

⁷ Ko djoi ma, ko vei ma kana bí kʉ ná kpa adi faida ba Mungu dhó ro si ná nyodyu na ndima njinjí mbø dhi lo kana nari nǎ ro. Akonja nzá d’e dhi kø ná Danieli ró dho kʉ ná le-djo dhó loroji. Ke pori: “Go ma ngʉe jadda ro ma lingʉe kiroho nǎ ritsi bbo na mana kʉ madhó maisha nǎ na ritsi kana.” Ke ngʉngʉe ndidhó maisha tso dhʉdhʉ nari dho, ke dho ri kangʉe ka ndi njí bí kʉ ná njonjo kʉ ná njí Yova dzá njí kana. Ke pori ki: “Ma ka ma pori ma thí nǎ ro krʉ nari kʉ, ma nanga ro nzɨ ma vʉngʉe nanga ná lo adi d’o karnø maddi ri. Bbʉbbʉ dhé, ma ka ma bae mbø bbo njati ma lie ma thí bbo na mana kʉ madhó maisha na ná ritsi djo ró. Ro mbø nzá ka ndi lieri ma é bblo pli kʉ ná bbakau na njʉ ma kʉ na nari bbai ri. Ndirigoti Pidhinga le li anziro nari nǎ ro le ba ná bblonga ro ma nzaddi ma ka ma bae ri. Bbʉbbʉ dhé, Yova bbʉ ma dho ná ledha nzá ma ka ma ddi mbø ka ndi bbʉe ma dho nari na ri.” Ko njari pʉlʉpʉlʉ nari kʉ, ko adi faida ba njati ko li ko thí kiroho nǎ ritsi djo, nga mbø djo ri ró.

8. Sulemani ngʉe bblo kʉ ná nganjadha na kimwili nǎ njí djo nari ká ko chu ngbaribbai? (Muhubiri 5:18, 19)

⁸ Kodhó kpakpa njí nǎ ro ko adi ba ná hwè Sulemani nzingʉe “Mungu dhó ro si ná kado.” (Azø Muhubiri 5:18, 19.) Ke ndingʉeri: “Kodhó kpakpa njí krʉ nǎ e faida.” (Mez. 14:23) Sulemani chungʉe ndi ká ngʉ loti addu djo ma nari chu. Ke ngʉe kpakpanga na njínji ná ke! Ke chingʉe dza kpari ma, ke zʉngʉe mizabibu kpari ma, ke bbá ngʉe bblo kʉ ná í kpari ndidhi dda dho le bbɨ ná bbù kpari ma na. Ndirigoti ke chingʉe vile kpari maddi. (1 Fa. 9:19; Muh. 2:4-6) Nì mai, føri ngʉe kpakpa njí ro, ri ngʉ adi hwè bbʉ ke dho. Ro ndiro ndi é hwè na d’e Sulemani nzɨ ngʉ adi ndi thí li fø njí djo dhé ri. Ke ngʉ adi njínji bbo Yova dho maddi. Loroji na, ke ddangʉe chutso hekalu chidha dhi njí dho cho saba kana! (1 Fa. 6:38; 9:1) B’lo ndi nji njonjo kʉ ná njí kimwili nǎ ndirigoti kiroho nǎ nari goti Sulemani rangʉe ri famu nari kʉ, kiroho nǎ njí kʉ mana na pli kimwili nǎ njí djolu. Ke ndingʉeri: “Lo tso dyadha dho, krʉ kʉ ná lo rr e ni b’lo nari kʉ: Anji bbʉbbʉ Mungu do ndirigoti arrnga kedzá yadha dho.”​—Muh. 12:13.

9. Yesu ká lingʉe kimwili nǎ njí ndidhi ngana ngbaribbai?

⁹ Yesu ngʉe kpakpanga na ngʉ adi njinjí ná ke. Ke ngʉe jadda ná saa na ke ngʉ adi mbawa dhi njínji. (Mk. 6:3) Kedzá gø dhi ndrŭ nanga ngʉ adi jini bbo ke ndima tsotso kó ndima nji ná kpakpa njí kana ndiro ndima dhó familia dhó mahitaji tso gbani d’e nari dho. Yesu ngʉe kaka ná ke nari dho, ke ka ndi njie kaka ná njí ndirigoti ndrŭ nanga ka ndi jieni ji ke e nji ná njí dho! Yesu maddi ngʉ adi hwè ba ndidhó njí dho. Nì mai ke ngʉ adi kimwili nǎ njínji kpakpanga na ro, Yesu ngʉ saa ba ndiro ndi njí Yova dzá njí d’e. (Yoh. 7:15) Luti, lod’radha dhi njí ke ngʉ nji ná saa na, ke bbʉngʉe ɨ shauri ndi rr ná ndrŭ dho: “Nzɨ ni njinjí sa ka ndi sani ná nyo dho, ro aninjinjí nŭnŭ di ná shinga dho di ná nyo dho.” (Yoh. 6:27) Ndirigoti Ngø tsi djó ke njingʉe ná Mahubiri nǎ, ke pongʉeri: “Anili nidhó mali ra nǎ.”​—Mt. 6:20.

10. Nja kpa ká ka ndima bani ngbá kpakpalo na bblo ndima kimwili nǎ njínji nari dho?

¹⁰ Mungu dhó ro si ná nyodyu adi ko tsotso  kó ndiro ko é bblo kʉ ná nganjadha na kimwili nǎ njí djo d’e. Ko kʉ Wakristo nari dho, ko dho longaddieni ko njinjí “kpakpanga na . . . , ndirigoti bblo njí.” (Efe. 4:28) Bí ina kodhó bbapatro adi ko tøni chi ndirigoti ko njínji kpakpanga na nari nja mana na bbo. Njaro føri ka ndi cho ko ronga ko njinjí bbo ndiro kodhó patro ti bblo lo Yova dzá Dimu djo d’e. Ro ko njiri føro, ko nzá ka ko ba saa bbo ndiro ko di kodhó familia na inga ko njinjí bbo Yova dzá njí kana ri. Ringani ko thɨ kodhó lo thika ndiro ko ba saa, bbo pli na mana kʉ ná ritsi dho d’e.

11. Ddikpa le-djo ká bangʉe ngbá somo bblo nganjadha na le kʉ kimwili nǎ njí djo nari nǎ ro?

¹¹ William ró dho kʉ ná jadda le-djo ngʉ adi kpakpanga nji ndiro ndi li ndidhó kimwili nǎ njí ndi dhi ngana d’e. Ke bangʉe bblo kʉ ná somo ndi ngʉ adi dhó njínji ná muzee dhó loroji nǎ ro. William pori: “[Fø le-djo] kʉ bblo kʉ ná loroji dhonalo ke kʉ bblo kʉ ná nganjadha na njí djo. Ke adi njínji kpakpanga na ndirigoti bblo nari dho, ke dhó ro adi ngadzi ná ndrŭ krʉ adi bblo loti ke djo. Njí dhi ngana ro ke ngʉ nari goti, ke adi saa ba ndi kó ndidhó familia tsotso ndirigoti ndi njinjí Yova dho d’e. Ndirigoti fø ke kʉ ma churie ná hwè na e ná ndrŭ kana ddi ke!” *

12. Sulemani ngʉe bblo kʉ ná nganjadha na ndi djo nari ká ke dhongʉe ngbaribbai, ro fø bblo kʉ ná nganjadha ká ke vingʉe ngbaribbai?

¹² Go Sulemani ngʉ tøni chi Yova dho ro ke ngʉe bblo kʉ ná nganjadha na ndi djo. Jadda ke ngʉe ná saa na, ke chungʉe nari kʉ ndi dho nzá ritsi ka ndi njini krʉ ri. Ná føri dho ke nzingʉeri Yova ddá chutso ndi dho. (1 Fa. 3:7-9) Pinyodha tso Sulemani ngangʉe ná saa na, ke chungʉe nodha nǎ ro ka ndi si ná hatari chu. Ke ndingʉeri: “Bʉ le bʉni nari njí e nodha, ndirigoti che chu na le tsu nari njí e ngbe lé le ngbe  nari.” (Mez. 16:18) Njedha dhi lo kʉ, Sulemani nganga tso nga ma ndidhó fø shauri na ndi njínji nari gʉngʉe ddi luti. Pi ke nyo nari kana ke ve ngʉe ngʉ nodha ndirigoti ke bbangʉe Mungu ja ná lo dho ndi ngarr nari tso bba. Loroji na, ddikpa sheria pongʉeri ɨ: Waebrania bbá pi dho nzá ringani ndi “kø dhi bí ri, ndiro nzɨ ndi thí shani ró.” (Kum. 17:17) Sulemani nzá rrngʉe nga fø sheria dho 700 ndi kø dhi ndirigoti 300 ndibbá bbai djó dhi ngʉe nari na ri. Ndirigoti fø ndrŭ kana bí kʉ ná ndrŭ ngʉe wapagani! (1 Fa. 11:1-3) Njaro Sulemani thí ngʉ riddi nari kʉ, fø lo ro nga kʉ hatari ndi dho ri. Nì mai ringʉe føro, luti Sulemani vengʉe Yova dho le ngarr nzɨ nari nă ro si ná matokeo ba ba.​—1 Fa. 11:9-13.

13. Yesu ngʉe nyenyenga na nari djo ko di ngaddi ró, ká ko ka ko ba ngbá somo?

¹³ Yesu ngʉe bblo kʉ ná nganjadha na ndi djo ndirigoti nyenyenga na. Dz’ djo Yesu si nari njí, ke njingʉe bbo pli kʉ ná njí Yova dzá njí kana. “No noni, dz’ djó ma, ra nǎ ma ná ritsi krʉ nongʉeni” Yesu chulu. (Kol. 1:16) Batiso ndi ba ná dyi, Yesu nongʉe ndidzá Baba na ndima ngʉe ná saa na ndima ngʉ nji ná ritsi nga. (Mt. 3:16; Yoh. 17:5) Føri ma nzá ddi lingʉeri Yesu ngʉ nodha ri. Føri rɨngana, ddikpa cha ma nzá ddi ke ngbengʉe ndi ro nja ndrŭ djo ri. Ke pongʉeri ndi unakpa dho nari kʉ, ndi si dz’ djo “nga ndrŭ njinjí ndi dho d’e ri, ro ndi njinjí ndrŭ dho ndirigoti ndi bbʉ ndidhó shinga le ødha dhi be bí kʉ ná ndrŭ djotsina.” (Mt. 20:28) Ke pongʉeri ki, ndi nzá ka ndi njí ddikpa lo ro maddi ndi djǒ nga ri. (Yoh. 5:19) Yesu ngʉe nyenyenga dhi ke! Ke bbangʉe bblo pli kʉ ná loroji ko dho.

14. Yesu dhó loroji ká addu ddi ko dho nja ko é bblo kʉ ná nganjadha na ko djo d’e?

¹⁴ Yesu ngʉ adi riddi ndi unakpa dho kpa é bblo kʉ ná nganjadha na ndima djo. Ddikpa cha ke d’rangʉeri kpa dho: “Ni djǒ ró djoka nanga krʉ zørieni zø.” (Mt. 10:30) Føri kʉ kpakpa ka ndi li ko ná lo, njati rie che kʉ ná nganjadha na ko kʉ ko djo ri ró. Føri na mana kʉ kodhi ra nǎ Baba adi ndi dyu li bbo ko ro ndirigoti ko na mana kʉ  bbo ke nyǒ djó. Njati rie Yova ribba ko má ndi ndirigoti ke riddi ko kaka ko si di ndizá ø dz’ djó ri ró, ko nzá ka ko nja ko nzá ka føri dho nari bbai ri.

15. (a) Dzamu dhi Munara ká nzingʉeri ko tsó ko é ngbá bblo nganjadha na ko djo? (b) Paje 24 djó kʉ ná ji ridho nari bbai, njati ko di ko thí li bbo ko djo ró ká ko ka ko kosa ngbá ledha?

¹⁵ Cho da 15 b’lo, Dzamu dhi Munara pongʉeri ɨ bblo nganjadha na ko ka ko é ko djo ná nga djó ro: “Ri nzá ngani ko di ngaddi bbo ko djo ri ndiro nzɨ ko ngʉ nodha ró. Ndirigoti ri nzá ngani ko di ngaddi sese ko djo ri ndiro nzɨ ko thi bʉni ró. Føri rɨngana ringani ko njí kpakpanga ndiro ko é bblo kʉ ná nganjadha na ko djo, føri na mana kʉ, ko famu kodhó bblo kʉ ná sifa ndirigoti kodhó uzaifu maddi. Mukristo kʉ ná ddikpa isɨle tu fø longa ɨ: ‘Ma nga e bblo pli ri, ndirigoti ma nga kʉ che pli maddi ri. Ma kʉ bblo sifa na ndirigoti uzaifu na maddi ndirigoti ndrŭ krʉ e fø.’” * Ringani ko nja addu dzá lo dho ma ri kʉ bblo ko é bblo kʉ ná nganjadha na ko djo nari.

16. Yova ká nyodyu dhi shauri bbʉ ko dho addudho?

¹⁶ Yova adi nyodyu dhi shauri bbʉ ko dho ndidzá Lo chulu. Ke jirie ko ji, ndirigoti ke jirie ri ko é hwè na. (Isa. 48:17, 18) Ndiro ko vʉ longa bblo d’e, ndirigoti ko é bbʉbbʉ kʉ ná hwè na d’e, ringani ko njí Yova nyǒ tho ná lo. Njati ko njiri fø ró, ko ka ko nyi i dz’ djó bí kʉ ná mbø djo ndima thí li ná ndrŭ ma, kimwili nă njí djo ndima thí li ná ndrŭ ma, ndirigoti ndima nganga djo ndima thí li ná ndrŭ ke bani na ná kpakpa lo tso nyi. Ko krʉ dho ringani ko vʉri ko é nyodyu na ndirigoti ko bbʉ hwè Yova thí dho!​—Mez. 23:15.