1. Yova ká jirieri ngbá njí njini njʉ?

 NJɄ Mungu jiri Pidhinga dzá hwè lo-i d’rani dz’ djolu gble. (Mk. 13:10; 1 Ti. 2:3, 4) Føri kʉ, Yova dzá njí ndirigoti ri na mana kʉ bbo ke dho nari dho, ke li ndi dhi Ddù na bbo ndi jingʉe ná ke nja ndi nja fø njí djó nga d’e. Ko ka ko churi chu nari kʉ, Yesu chutso ddá ko dho bblo nari dho, lod’radha dhi njí si njini Yova jiri rie nari nganga bbai i dz’ dzá mwisho si nari njí.​—Mt. 24:14.

2. I lo nǎ ká ko si loti addu djo?

² I lo nǎ ko si loti djo nari kʉ, ngbaribbai ma Yesu njínji “chi njí dhi no ke” chulu ndiro ndi bbʉ kiroho nǎ nyo ndirigoti ndi kpé ndi unakpa lod’radha dhi bblo pli kʉ ná njí dho nja ri njini nzá ri ro d’erie njini historia nǎ nari bbai d’e. (Mt. 24:45) Ko si ki nja nari kʉ, ko kana nja le ddiro ka ndi njí ná lo ndiro ndi kó Yesu ma, chi njí dhi noke ma na tsotso d’e.

3. Yesu dho ká ngbá bbonga bbʉngʉeni?

³ Yesu adi lod’radha dhi njí djó nga nja. Nde, føri ká ko chu ngbaribbai? Ra nǎ Yesu ngʉ nari njí, ke ma njungʉeni ndi una chi tøni ná kpa ma na Galilaya nǎ ddikpa ngøtsɨ djo. Ndirigoti ke pongʉeri kpa dho: “Krʉ kʉ ná bbonga bbʉni madhó ra nǎ ndirigoti dz’ djó.” Anja føri goti ke jangʉe kpa dho ná i lo: “Nde, anira ndirigoti aninji ndrŭ wanafunzi krʉ ndrŭ tsɨ kana ro.” (Mt. 28:18, 19) Føri dzá lo dho, Yesu dho le bbʉngʉe ná bbonga kana ddiri ngʉe ke ddá chutso lod’radha dhi njí dho.

4. Lod’radha dhi njí djó nga Yesu adi nja ná føri ká ko chu addu ró?

 ⁴ Yesu pongʉeri lod’radha dhi njí ndirigoti ndrŭ le nji ndima é wanafunzi ná fø njí ka ndi njieni “ndrŭ tsɨ krʉ kalu” ndirigoti ke ka ndi sie ndi unakpa na “krʉ ddo ró kpø nga sini ná saa si ndidzá mwisho na ná nga djo.” (Mt. 28:20) Pʉlʉpʉlʉ kʉ ná fø lojadha ridho nari kʉ, lod’radha dhi njí ka ndi rá e anzi Yesu dhó bbonga tsena kpø njʉ nga djo.

5. Zaburi 110:3 nǎ kʉ ná unabi njini nari tsotso ká ko kó ngbaribbai?

⁵ Yesu nanga ro nzɨ i dz’ dzá mwisho na lod’ra ná ndrŭ sie sese nari ngʉ d’o ri. Ke chungʉeri chu nari kʉ, mutunga zaburi d’rangʉe unabi chulu ná lo si njini nji: “Nidzá ndrŭ si ndima bbʉ ndima ndima ro, ji ndima nanga jini ro nidzá kpakpanga na kʉ ná bbasødda dhó ddo dyi nǎ.” (Zb. 110:3) Njati rie nì ni adi lod’radha dhi njínji ri ró, ni Yesu ma, chi njí dhi no ke ma na tsotso kó ndirigoti ni fø unabi tsotso kó ndi njini d’e. Nì mai njí ra anzi ro kpakpalo ma kʉ ddi.

6. Pidhinga dzá hwè lo-i d’ra ná ndrŭ ká adi hwini ngbá kpakpalo tso ró?

⁶ Ddikpa kpakpalo kʉ, Pidhinga dzá hwè lo-i d’ra ná ndrŭ adi bani upinzani na. Waasi imani ma, dini nǎ bbobbonga ma, politiki nǎ kpa ma na adi bí kʉ ná kali dhi loti kodhó njí djo. Njati kodhó familia ma, chu ko chu ná ndrŭ ma, ko lai njí dhi ndrŭ ma na rr kali dhi fø lo ró, kpa ka ndima cho ko ko bbá Yova dho ko njínji nari tso ndirigoti lod’radha dhi njí tso. Nja kʉ ná ngø na kodhó wapinzani adi ko djoi ma, ko vei ma na sʉ prizo na, kpa adi do mai tá kpa na inga kpa adi kpa njinji ma. Fø ndrŭ njini ko na nari nzɨ adi ko nanga ke ri, dhonalo Yesu pongʉeri: “Ndrŭ tsɨ krʉ si ni ndrondro ma ró dho djotsina.” (Mt. 24:9) Ko ndrŭ ndrondro ná føri ridho nari kʉ, ko tso uni u Yova na. (Mt. 5:11, 12) Fø upinzani dho ndrŭ cho nari kʉ Ibilisi. Ro Yesu dada kpakpanga na Shetani djolu! Yesu dhó ngatsotsokodha chulu hwè dhi lo-i d’rani ndrŭ tsɨ krʉ dho. Akonja fø lo dhǒ ná lo.

7. Ufunuo 14:6, 7 nǎ kʉ ná lo njini nji nari ká ni nja addu ró?

⁷ Pidhinga dzá hwè lo-i d’ra ná kpa hwini tso ró ná nja kpakpalo kʉ luga. Mutume Yohana dho Yesu dhongʉe ná lo nǎ ke pongʉeri hwè lo-i si kʉ sisi fø kpakpalo djolu. (Azø Ufunuo 14:6, 7.) Ká ngbaribbai? Ko adi riddi bí kʉ ná ndrŭ dho kpa rr Pidhinga dzá hwè lo-i. Njʉ dz’ djolu gble kʉ ná ndrŭ ka ndima zø Biblia ró dyʉ ndi ná vichapo kodhó site jw.org djó, dhonalo ri kʉ dada 1000 djolu ná luga nǎ! Ndirigoti Lo dho chutso ddá ná Baraza uri u nari kʉ, kodhó buku Anji Maisha hwè theinga dho! nanga tuni  700 djolu da ná luga nǎ. Ndirigoti Biblia nǎ nja lo nanga le tu video chulu nga bɨ kʉ ná ndrŭ dho ndirigoti nja vichapo le ndi Brai dhi mandishi nǎ nga nyǒ kʉ ná ndrŭ dho. Ko Biblia nǎ unabi njini nari njanja. Krʉ “luga dhi ndrŭ” ndirigoti krʉ ndrŭ tsɨ, Biblia nǎ bbʉbbʉlo dhi “tsetse ná luga” chú. (Zek. 8:23; Sef. 3:9) Fø ritsi krʉ njini Yesu Kristo dhó kaka ná bbonga tsena.

8. Kodhó lod’radha dhi njí ra anzi nari ká bbʉ ngbá matokeo?

⁸ Njʉ 240 kʉ ná ngø nǎ ro 8 000 000 djolu da ná ndrŭ gba ndima tso Yova dhó tengenezo na, ndirigoti krʉ cho ró makumi ya maelfu kʉ ná ndrŭ adi batiso ba!  Ro bbo na mana kʉ nari nga kʉ fø ndrŭ dhó hesabu ri, ro ri kʉ Mukristo dhó sifa “ø le ndi” fø ø wanafunzi ke ndi thó ro. (Kol. 3:8-10) Bí kʉ ná kpa bba chelo ndima nji nari tso ma, lɨ ndima nji nari tso ma, ndima dhó ngø ndima jie bbo nari tso ma na. Isaya 2:4 nǎ ndingʉeni ná unabi njini nji, ɨ ndi ripo ro kpa ‘nzɨ jifunza lɨ ki ro ri.’ Ko adi kpakpanga nji ko thó ø le ndí ndirigoti ko kó nja ndrŭ tsotso ndima sí Mungu dzá tengenezo na, fø ko rinji nari na ko ridho ko kodhi bbonga Kristo Yesu dyø. (Yoh. 13:35; 1 Pe. 2:12) Fø lo ká njini addudho? Dhonalo Yesu ko tsotso kó kodhó lo u ná ritsi ndi bbʉ ko dho nari na.

9. Matayo 24:45-47 nǎ, ká Yesu pongʉeri nga sini ná saa na addu si njini?

⁹ Azø Matayo 24:45-47. Yesu pongʉeri nari kʉ, nga sini ná saa na ndi si “chi njí dhi noke” li ndiro ndi di kiroho nǎ nyo bbʉ ndrŭ dho d’e. Føri dzá lo dho ko ka ko uri u nari kʉ, fø noke njínji kpakpanga na njʉ. Føri kʉ bbʉbbʉlo. Kodhi bbonga Yesu adi njínji ché na le d’ri ná sese kikundi na ndiro ndi di Mungu dzá ndrŭ dho “nyo bbʉ ngbà thonga ná saa na d’e.” Fø kpetsi kpa nzɨ adi ndima nja, nja ndrŭ dhó udha djó bbobbonga bbai ri. (2 Ko. 1:24) Føri rɨngana kpa churi nari kʉ, Yesu Kristo i kʉ “chutso ddá” ndidzá ndrŭ dho ná ke.​—Isa. 55:4.

10. Fø ga le dhǒ ná vichapo kana ro ni tsotso ká ngbá ri kongʉe ni nga njínjidha tso Yova dho d’e?

¹⁰ Cho 1919 djó ro, chi njí dhi noke adi njonjo kʉ ná vichapo bbʉ, ná føri adi ko tsotso kó ko chú bbʉbbʉlo Mungu dzá lo nǎ ro. Ndirigoti cho 1921 na, chi njí dhi noke tayarisha ngʉe Buku La Harpe de Dieu nja ndi kó ndrŭ tsotso ndima chu Biblia nǎ mafundisho ya musingi d’e. Lo thika øni nari bbai, kpa bbʉngʉe nja vichapo  maddi. Ni tsotso ká ngbá vichapo kongʉe nja ni ji kodhi ra nǎ Baba d’e? Ri ká ngʉe “ Que Dieu soit reconnu pour vrai!,” Kweli Iongozayo Kwenye Uzima wa Milele, Unaweza Kuishi Milele Katika Paradiso Duniani, Ujuzi Uongozao Kwenye Uhai Udumuo Milele, Biblia Inafundisha Kabisa Nini, Biblia ká addu ddi ko dho? Inga ko dhó ø buku, Anji Maisha hwè theinga dho! Fø buku krʉ le thɨ ndi kó ko tsotso ndiro ko njí ndrŭ wanafunzi d’e. Ndirigoti ri le bbʉngʉe ri dhi lazima na ndrŭ kʉ ná saa nganga na.

11. Ká addudho ri kʉ bbo na mana kʉ ná lo, ko chulo Yova djo ndirigoti Biblia djo?

¹¹ Njʉ maddi ndrŭ dhó lo uri ndima chulo bbo Yova djo ndirigoti Biblia djo. Ko krʉ adi rinji fø. Mutume Paulo ndingʉeri: “Kpakpa kʉ ná nyo bbobbo ndrŭ adi nyo” Paulo ndringʉe ri ki, Biblia nǎ ro ko zø ná lo na ko njínji nari ka ndi kó ko tsotso ko ndó “che kʉ ná lo ma kana nga bblo lo na.” (Ebr. 5:14) Njʉ ri ka ndi é kpakpa ko njínji Yova dhó ro si ná yadha na dhonalo, bí kʉ ná ndrŭ kʉ che bbo. Ro Yesu adi rili ko chú kodhó lo ji ná ritsi nja kodhó udha é kpakpa d’e. Ko adi fø lojadha ba Biblia chulu. Chi njí dhi noke adi fø nyo tayarisha ndirigoti ke adi ri nga plí Yesu dhó chutsoddadha chulu.

12. Yesu bbai ko ká e ngbá nganjadha na Munga ró dho djo?

¹² Yesu bbai ko nzini Mungu ró dho na ná føri kʉ bbo kʉ ná pendeleo ko bari. (Yoh. 17:6, 26) Loroji na, 1931 nǎ ko lingʉe Biblia nǎ ro si ná dho ko ro, føri kʉ Yova dzá Dimu ndirigoti ri ridho ko nja Mungu ró dho mana na bbo. (Isa. 43:10-12) Ndirigoti fø cho na Bi 10 djó ro ko adi Mungu ró dho ndí Dzamu dhi Munara krʉ chuti lú. Føri kina, Biblia—Tafsiri ya Ulimwengu Mupya ngʉ Mungu ró dho ri le ndingʉe drdr ná nga lu krʉ. Føri kʉ njonjo pli Kristo dzá dini ndima nzǐ ná  dini ró ro, krʉ ndima tu Mungu ró dho ndima dhó bí kʉ ná Biblia nǎ roro!

13. Addui ká liri ni uri nari kʉ, Yesu adi njínji njʉ “nyodyu dhi chi njí dhi noke” chulu? (Yohana 6:68)

¹³ “Nyodyu dhi chi njí dhi noke,” chulu Yesu li dz’ djó bblo pli kʉ ná tengenezo nja ndi kó ndrŭ tsotso ndima bbʉ tsetse ná madha d’e. Ni ká adi ni mbu ngbaribbai fø tengenezo dho? Njaro ni adi ni mbu mutume Petro bbai i ndi pongʉeri Yesu dho ro: “Ko ká ra ie dhi ngana? Nidhó i kʉ cho ró nŭnŭ di ná shinga dhi lo.” (Yoh. 6:68) Nzá ko tsue Yova dhó tengenezo na ró, ká njʉ ko ddiddiro krʉ ka ko é e ngbaga? Fø tengenezo chulu Kristo adi rili nari kʉ ko é kodhó lo u ná ritsi krʉ na ndiro ko tøni chi Mungu dho d’e. Ndirigoti ke adi mazoezi bbʉ ko dho nja ko njí kodhó lod’radha dhi njí bblo d’e. Føri kina, ke ko tsotso kó ko “thó ø le ndí” nja ko bbʉ hwè Yova dho d’e.​—Efe. 4:24.

14. Yova dhó tengenezo nǎ ni kʉ nari nǎ ro ká ni ba faida ngbaribbai Coronavirus dhi saa djo?

¹⁴ Yesu adi nyodyu dhi chutsoddadha bbʉ ko dho kpakpalo dhi saa djo. Fø chutsoddadha nǎ faida ko njae Coronavirus tso ngangʉeni ná saa djo nja. Nzá mai, dz’ djó bí kʉ ná ndrŭ chue ndima ká ka ndima njiri ngbà ma nari ro, Yesu lieri ko ba wazi kʉ ná chutsoddadha nja ndi b’o ko ronga d’e. Ko le lie kpakpa ko thó kash né rie ndrŭ kana ko si ri ró, ndirigoti ko kana nga di dadá ndrŭ na. Wazee dho le jaeri kpa di loti bí ina kutaniko nǎ ndrŭ na, ndirigoti kpa é waangalifu ndiro ndima chu ndrŭ dhó lo ji ná ritsi ndiro ndrŭ é bblo afya na kiroho nǎ ndirigoti kimwili nǎ d’e. (Isa. 32:1, 2) Ndirigoti  ko adi nja chutso ddadha ma, kpakpa ka ndi li le na nja lo ma na ba Lo dho chutso ddá ná Baraza dhó rapor chulu.

15. Coronavirus dhi saa djo, ká ko bae ngbá lojadha njudha ndirigoti lod’radha dhi njí djo, ndirigoti ri ká bbʉe ngbá matokeo?

¹⁵ Coronavirus dhi saa djo ko bae pʉlʉpʉlʉ kʉ ná chutsoddadha, ngbaribbai ma ko ka ko njí judha ma, lod’radha dhi njí ma na nari djo. Tsé ko ngae njudha ma, asamble ma na njidha tso video chulu. Føri kina ko ngae lod’radha tso barua chulu ndirigoti telefone chulu. Yova le e kodhó njí ronga le. Bí kʉ ná Tawi nǎ kpa pori nari kʉ, wahubiri dhó hesabu ndrieni ndri. Bbʉbbʉ dhé, bí kʉ ná ndrŭ Coronavirus dhi saa na ko njie ná lo lie kpakpa.—Anja kisanduku “ Yova le kodhó lod’radha dhi njí ronga le.”

16. Ko ká u ngbá lo u?

¹⁶ Nja ke ka ndi pori nari kʉ, tengenezo chue fø dhe si nari b’lo. Ro krʉ saa ró ko e rinja nari kʉ, ko ba ná chutsoddadha e nyodyu dhi ri dhé. (Mt. 11:19) Yesu chutso ddá jidha na ndidzá ndrŭ dho, nari djo ko di ngaddi nari ka ndi liri ko uri u nari kʉ Yova ma, ndi ddù ma na sie ko na nì dhé, njati ngbá lo ma si nga ba gosi ná saa na ró.​—Azø Waebrania 13:5, 6.

17. Ni ká adi ni mbu ngbaribbai Yesu dhó bbonga tsena?

¹⁷ Yesu kʉ ko dho chutso ddá ná ke ná føri adi hwè bbʉ ko dho bbo! Ko kʉ nǎ ná tengenezo nzá ndorie ndrŭ nanga ro ri ni é ngbá kabila ma, ngbá luga ti ná le ma ró! Ko adi bí kʉ ná lojadha ba Mungu dzá Lo nǎ ro, ndirigoti ko adi ko dhó lo u lod’radha dhi njí dho ná mazoezi krʉ ba. Ko ddiddiro krʉ dho, le ddi ko ka ko thó ø le ndí nari ddi ndirigoti ko churi nari kʉ ringani ko jini ji ko kana. Ko krʉ kʉ bblo kʉ ná sababu na ko mbu ko bblo, Yesu dhó bbonga tsena!