LONGANEDHA DHI RI 4
Ukumbusho njidha dho ko adi nji ná kpakpanga ronga Yova adi lele
“Anidi ri nji fø nja ni nó na ma nga d’e.”—LU. 22:19.
DYI 19 Bboke dzá ngasdjo nyo
RI NǍ LE SI CHU NÁ LO a
1-2. Ko ká adi si Ukumbusho dhi ngana krʉ cho ró addudho?
CHO da chøchø 2 000 b’lo, Yesu bbʉngʉe ndidhó shinga ko djotsina ná nga djo ró, ná føri na ke klø chutso kodho ndiro ko ba choro nŭnŭ di ná shinga d’e. Ndi dhe nari njí dangʉe na kuna Yesu pongʉeri ndi unakpa dho kpa di ndi dhó fø jidha ngano, ddikpa karr seremoni nø kpa nji ndidho nari chulu. Ná fø seremoni nǎ e divai ma, mukati ma na.—1 Ko. 11:23-26.
2 Ko adi ngarr Yesu jangʉe ná fø lo dho ko jirie ke bbo nari dho. (Yoh. 14:15) Krʉ cho ró Ukumbusho ddo kana, ko adi ko nanga jini ngbà ke njingʉe ná fø lo dho nari dhǒ, ko saa ba ko di ngaddi kedhó dhe djo nari chulu. Føri kina ko adi lod’ra kpakpanga na ndirigoti ko adi nja ndrŭ nzǐ ndiro ndima si pekee kʉ ná fø njudha dhi ngana ko ma na d’e. Ndirigoti ko nzɨ adi ribba ddikpa ritsi ma cho ko ronga tso ro ddi Ukumbusho dhi ngana ko si nari ró ri.
3. I lo nǎ ká ko si loti addu djo?
3 I lo nǎ ko si loti Yova dzá ndrŭ adi nji ná kpakpanga djo nja ndima nó Yesu dzá dhe nga d’e, ná gbo kʉ ná chu djo: (1) Yesu ddingʉeri nari bbai ndima Ukumbusho nji nari na, (2) nja ndrŭ ndima nzǐ nja ndima si Ukumbusho dhi ngana nari na ndirigoti (3) Ukumbusho ndima nji nì mai ndima kʉ kpakpalo kana ro nari na.
YESU DDINGɄERI LE DI UKUMBUSHO NJI NARI BBAI LE RI NJI NARI
4. Krʉ cho ró ká le adi ngbá ngadhudha goti ngʉ Ukumbusho dhi ngana, ndirigoti ká addudho ri nzá ngani ko di fø bbʉbbʉ lo be pá ri? (Luka 22:19, 20)
4 Krʉ cho ró Ukumbusho nǎ, ko adi Biblia ró dyʉ ndi ná hotuba rr, ná fø hutuba adi wazi kʉ ná jibu bbʉ bí kʉ ná ngadhudha djo. Ko adi addudho ma ndrŭ tsi dho lo ungʉe le ødha dhi be nari ma chu ndirigoti ddikpa kedhó dhe ká ka ndi lieri krʉ ndrŭ dhó chenga zø njini njí ngbaribbai nari ma na chu. Ko dho le adi divai ma, mukati ma na nǎ mana ka kʉ addu ma nari nga tú, ndirigoti ie ma ká ka ndima nyó ri nari nanga tú. (Azø Luka 22:19, 20.) Ndirigoti ko adi ngaddi dz’ djó si di choro nŭnŭ na ndrŭ dhó bblo pli kʉ ná gosi ná saa djo. (Isa. 35:5, 6; 65:17, 21-23) Ri nzá ngani ko di fø bbʉbbʉ lo be pá ri. Bí kʉ ná ndrŭ nzá chu fø lo ro ri, ndirigoti kpa nzá chue Yesu bbʉngʉe ná fø bbʉdha na mana ká kʉ ngbá ngatsi ma nari ro ri. Føri kina kpa nzɨ adi Ukumbusho ro nji Yesu ddingʉeri le di rinji nari bbai ri. Nde, fø ká kpa adi rinji addudho?
5. Yesu dhó wanafunzi ró bí nga cheni nari goti, ká ndrŭ ngangʉe Yesu dzá dhe nga nodha tso ngbaribbai?
5 Yesu dhó wanafunzi cheni nari goti tse, kali dhi Wakristo ngangʉe tsudha tso kutaniko na. (Mt. 13:24-27, 37-39) Kpa ngangʉe “kali dhi lo ddidha tso nja ndima drr na ndrŭ ndima una d’e.” (Mdo. 20:29, 30) Kpa ngangʉe ddidha tso ná “kali dhi lo” kana ddi ri ro ngʉe nari kʉ, Yesu nzá bbʉngʉe ndi “ddikpa ina ndi ri na ndi sa ndrŭ krʉ dhó chenga” ddiddi Biblia adi riddi nari bbai ri, ro fø bbʉdha dho ringani le di ndi bbʉ krʉ saa ró. (Ebr. 9:27, 28) Njʉ bí kʉ ná ndrŭ urie fø kali dhi mafundisho u. Kpa adi ndima tso gba ndima dhó kanisa na krʉ ddo ró nja ndima nji “Bbʉdha dhi Misa” ndima nzǐ nari d’e. b Nja kpa nzɨ adi Yesu dzá dhe nga ro no bí ina maddi ri, ro kpadhó dini nǎ bí kʉ ná ndrŭ dhé nzá famurie Yesu bbʉngʉe ná fø bbʉdha na mana ka kʉ addu ma nari ro ri. Nja ndrŭ adi ridhu ndima tso, ‘Yesu dzá dhe ká ka ndi sa madhó chenga bbʉbbʉ dhé?’ Fø ká kpa adi ridhu addudho? Dhonalo kpa adi cho nari kʉ i ripo ná ndrŭ chenga zø ro nzá ka ndi njini Yesu dzá dhe chulu ri. Nde, Yesu dhó bbʉbbʉ wanafunzi ká adi ndrŭ tsotso kó nja ndima famu Yesu dzá fø bbʉdha na mana ndirigoti le ka le nó kedzá dhe nga lú ná chu nga ndrŭ dho ngbaribbai?
6. Cho 1872 na ká wanafunzi wa Biblia rangʉe ngbá lo famu?
6 Karne 19 nǎ Charles Taze Russell ngʉ adi chutso ddá dho ná wanafunzi wa Biblia ngangʉe bbo ndima Biblia nǎ longane nari tso. Kpa ngʉ rine ndima chu bbʉbbʉ lo Yesu bbʉngʉe ná fø bbʉdha djo, ndirigoti ngbaribbai ma ringani le nó kedzá dhe nga nari djo. Ro, cho 1872 na kpa rangʉe ri famu nari kʉ, Yesu bbʉngʉe le ødha dhi be ndrŭ tsɨ krʉ dhi bblonga dho. Ndima ba ná fø lo ronga nzá kpa b’ongʉe ndima dho dhé ri. Ro, kpa ngangʉe fø lo nanga plidha tso buku ma, nja vichapo ma na chulu. Føro théi karne ya Kwanza nǎ Wakristo bbai kpa ngangʉe Ukumbusho njidha tso cho ddi kana ddikpa ina.
7. Wanafunzi wa Biblia nengʉe Biblia nǎ longa bbo nari nǎ ro ká ko adi faida ba ngbaribbai?
7 Njʉ ko adi faida ba fø Wakristo famungʉe ná fø lo nǎ ro ngbà mai cho da bí fø nga djó ro ro. Ká ngbaribbai? Yova ko ko tsotso ko famu Yesu dhó bbʉdha na mana, ndirigoti addu ma fø bbʉdha si nji ko ma krʉ kʉ ná ndrŭ tsɨ ma na dho nari d’e. (1 Yo. 2:1, 2) Føri kina ko ra ri famu nari kʉ, Biblia bbʉ aro kʉ ná ngab’odha ni ngarr Mungu dho ná ndrŭ dho, nja kpa si choro nŭnŭ di ná shinga ba ra nǎ ndirigoti nja bí kʉ ná ndrŭ si ri ba i dz’ djó. Ngbá ngatsi ma Yova jirie ko ndirigoti ngbá ngatsi ma Yesu dhó bbʉdha nǎ ro ko ka ko ba faida nari djo ko di ngaddi ró, ko kana nga adi ngʉ chøchø Yova na. (1 Pe. 3:18; 1 Yo. 4:9) Føri dzalodho chi ngʉ tøni drrdrr ná le-djoi bbai, ko adi nja ndrŭ nzǐ nja ndima si Ukumbusho dhi ngana ko ma na Yesu ddingʉeri le di ri nji nari bbai d’e.
NJA NDRŬ LE NZǏ UKUMBUSHO DHO NARI
Ni ká ka ni njiri ngbà ndiro ni nzǐ ndrŭ Ukumbusho dho d’e? (Anja paragrafu 8-10) e
8. Yova dzá ndrŭ ká njingʉe addu nja ndima nzi nja ndrŭ Ukumbusho dho d’e? (Anja ji.)
8 Drrdrr nga djó ro Yova dzá ndrŭ adi nja ndrŭ nzǐ nja ndima njí na Ukumbusho d’e. Cho 1881 na États-Unis nǎ le-djoi ma, le-vei ma na gbangʉe ndima tso ddikpa le-djo bbá dza nǎ Allegheny na, Pennsylvania nǎ, nja ndima njí pekee kʉ ná fø njudha d’e. Ro, luti kila kutaniko ngangʉe Ukumbusho njidha tso ndima kʉ ná ngana. Cho 1940 na Bi 3 na, wahubiri dho le d’rangʉeri kpa nzi ndima dhó eneo na ngbà nanga jini ná ndrŭ krʉ. Cho 1960 na i Beteli bbʉngʉe papie dhi evitasio, mara ya kwanza. Fø nga djo ró ko ndorie Ukumbusho dhi evitasio bí b’lo. Nde, fø kpakpanga krʉ ká ko adi nji nja ko nzĩ nja ndrŭ d’e addudho?
9-10. Ko ká adi ie ma nzǐ nja ndima si Ukumbusho dhi ngana d’e? (Yohana 3:16)
9 Ko adi nja ndrŭ nzǐ nja ndima si ko ma na Ukumbusho dhi ngana d’e, dho ná ddikpa sababu kʉ, ko adi riji Ukumbusho dhi ngana si ná ndrŭ chu bbʉbbʉ lo Yova ma, Yesu ma na njingʉe ko krʉ dho ná lo djo. (Azø Yohana 3:16.) Ko e na ná ngab’odha kʉ, Ukumbusho dhi ngana ndrŭ si nja ndirigoti ndrŭ si rr ná lo si ndrŭ ronga cho ndima chulo bbo ndiro ndima ngʉ Yova dzá njí dhi ndrŭ d’e. Ndirigoti ndima ba nja faida maddi d’e.
10 Ko adi djø dhó udha djø ná ndrŭ ma nzǐ ddi. Ko adi riji fø ndrŭ nonga nari kʉ, Mungu ji ndima godhé. Bí kʉ ná ndrŭ adi sisi ko nzǐ ndima ró ná føri adi hwè bbʉ ko dho bbo. Ukumbusho dhi ngana ndima si nari na kpa adi Yova dho ndima ngʉ njínji ro ndima ngʉ ba ná hwè ngano. Addinga Monica dhó loroji djo. c Le ngangʉe lod’radha tso ki vi coronavirus dhi saa djo. Ukumbusho na ndi si 2021 nǎ nari goti, le pori: “Fø Ukumbusho ngʉe pekee ma dho. Dhonalo føri kʉ cho 20 goti ma ve di lo ro d’ra ri, ndirigoti ma ve ndrŭ ro nzi ndima si Ukumbusho dhi ngana ri. Ma njie krʉ ma ka ma njí ná lo ndiro ma nzi ndrŭ Ukumbusho dho d’e dhonalo ma nanga jieni bbo Yova ma, Yesu ma na njingʉe ma dho ná lo djotsina.” (Zb. 103:1-4) Njati ndrŭ u kodhó evitasio gʉ u inga nzá ma ró, ko adi kpakpanga nji ko nzi nja ndrŭ Ukumbusho dho dhonalo ko churi chu nari kʉ, ko adi nji ná fø kpakpanga adi hwè bbʉ Yova dho.
11. Nja ko nzi ndrŭ Ukumbusho dho d’e ko adi nji ná kpakpanga ronga ká Yova adi lé ngbaribbai? (Hagai 2:7)
11 Ko nji ko nzi ndrŭ Ukumbusho dho d’e ná kpakpanga ronga Yova adi lele. Cho 2021 na ngbà mai coronavirus choe kodhó njí ronga tso ro, Ukumbusho na sie ná ndrŭ e 21 367 603. Føri kʉ dz’ djolu gble e ná Yova dzá Dimu dhó hesabu aro na nusu ina! Bbʉbbʉ dhé, Yova nyǒ nzɨ hesabu dhé adi tho ri. Ro, ke adi ndi dyʉ li ndrŭ ro ddiddiro. (Lu. 15:7; 1 Ti. 2:3, 4) Ko churi chu nari kʉ, ko nja ndrŭ nzǐ ná saa djo Yova adi ko tsotso kó ko ndiro ko ba nì thí kʉ bblo ná ndrŭ d’e.—Azø Hagai 2:7.
NÌ MAI KPAKPALO KɄ RO LE UKUMBUSHO NJI NARI
Yova adi Ukumbusho njidha dho ko nji ná kpakpanga ronga lele (Anja paragrafu 12) f
12. Ngbá hali i ká ka ndi liri ri é kpakpa ko dho ko njí Ukumbusho? (Anja ji.)
12 Yesu pongʉeri siku za mwisho na ko si bani njonjo kʉ ná kpakpalo na, loroji na familia le pinga nari ma, nzadha ma, lɨ ma, dhe ma, nja bí kʉ ná kpakpalo ma na. (Mt. 10:36; Mk. 13:9; Lu. 21:10, 11) Nja saa na fø hali adi rili rie kpakpa ko dho ko nó Yesu dzá dhe nga. Ko djoi ma, ko vei ma na ká adi addu nji nja ndima si fø kpakpalo djolu d’e ndirigoti Yova ká adi kpa tsotso kó ngbaribbai?
13. Yova ká lengʉe Artem ronga ngbaribbai nì mai ndi kʉ prizo nǎ ro nja ndi njí Ukumbusho d’e?
13 Prizo. Prizo nǎ kʉ ndima dhó udha djó ná ko djoi ma, adi ndima dho ka ná lo nji nja ndima nó Yesu dzá dhe nga d’e. Anja Artem dhó loroji. Cho 2020 na Ukumbusho dhi saa na ke ngʉe ddikpa karr prizo nø nǎ ná ngana kpa dangʉe da mbʉ (5) djolu. Nì mai ndi ngʉe prizo nǎ ro ke bangʉe Ukumbusho ndi ka ndi njí na ná ritsi ba dhé ndirigoti ke pɨngʉe ndi njí hotuba ndi dho ndi ndi ro. Ndirigoti prizo nǎ ke ma ngʉe na ná kpa ngʉ adi dhu ma dhu, ndirigoti mbazz ma ddá. Nde, ke ká njingʉeri ngbǎ? Ke nzingʉeri kpa bbá mbazz ma, dhu ma na tso saa ddikpa kana dhé. Bbo kengʉe Artem nanga ná lo ngʉe kpa pongʉeri ndima nzɨ dda mbazz ndirigoti dhu ma nzɨ ddi ndima dhu ri kpø ke ndidhó Ukumbusho tso dya ná nga djo. Artem pori, “Ma jingʉeri ma tilo kpa dho Ukumbusho djo.” Ro, kpa pongʉeri ndima nzá ji ndima rr ddikpa lo ro maddi madhó fø lo djo ri, ro b’lo kpa nja Artem Ukumbusho ndi nji ro nari goti, kpa dhungʉe lo krʉ ri djo ke tso.
14. Nì mai coronavirus e ro Yova dzá ndrŭ ká njie Ukumbusho ngbaribbai?
14 Coronavirus. Fø dhe tso ngaeni ro Yova dzá ndrŭ nzá ka ndima si é Ukumbusho dhi ngana ndima ronga na ri. Ro, fø ri ma nzá ddi choe kpa tso ro Ukumbusho ndima nji nari ró ri. d Nì tsu eternete djo ná kutaniko njie Ukumbusho zoom chulu. Nga e kpakpangana ndima tsu eternete djo ná kutaniko ká njieri ngbà? Nja ngø nǎ le kpeeri le lø hotuba nari dá televizio nǎ inga radio nǎ. Føri kina tawi løe hutuba dada 500 djolu ná luga nǎ ndiro dadá kʉ ná ngalu kʉ ná ndrŭ nji Ukumbusho nji d’e. Ndirigoti chi tøni ná le-djoi rae fø hotuba mba ri dhi lazima na e ná kutaniko dholu.
15. Sue ró dho kʉ ná mwanafunzi wa Biblia dhó loroji nǎ ro ka ni ba ngbá somo?
15 Familia le pinga nari. Nja ndrŭ dho ri adi si kpakpa ndima nji Ukumbusho ndima dhó familia nǎ ndrŭ ndima pinga nari dho. Akonja Sue ró dho kʉ ná ddikpa mwanafunzi wa Biblia dhó loroji di. Cho 2021 na Ukumbusho dhi ddo njí, Sue pongʉeri ndidhó mwalimu dho nari kʉ, ndidhó familia nǎ ndrŭ dzá lo dho ndi si Ukumbusho dhi ngana nari ka ndi sie kpakpa. Ledhó mwalimu zøngʉe Luka 22:44 le dho. Ndirigoti le tungʉe ri nanga ndidhó mwanafunzi dho nari kʉ, kpakpalo na ko bani ná saa na ringani ko dyø Yesu dhó loroji Yova laidjo ko ko thí le sala chulu nari na ndirigoti ko thí nǎ ro krʉ ko ko thí li ke djo nari chulu. Føri goti bbʉ dyi, Sue tayarisha ngʉe mukati ma, divai ma na ndirigoti le njangʉe fø dyí bbʉtso ngadhi programu jw.org djó. Ndirigoti fø dyi ngasdjo le tsungʉe ndidhó chumba na ndirigoti le njingʉe Ukumbusho telefone chulu. Føri goti Sue ndingʉeri ndima ngʉ ngazø na ná le dho: “Ni lie ma kpakpa bbo nzinga. Ma njie ma dho ka ná lo krʉ ndiro ma njí Ukumbusho d’e ndirigoti Yova koe ma tsotso ko. Ma kʉ na ná hwè ká ma ka ma d’ra ngbaribbai ma nari nzá ma chu ri!” Ni ká riddi njati rie fø di ná kpakpalo na ni hwini ri ró, Yova ka ndi kó nì tsotso ko?
16. Nja ko si Ukumbusho dhi ngana d’e ko nji ná kpakpanga ronga Yova si lele ná føri ká ko ka ko u addudho? (Waroma 8:31, 32)
16 Yesu dzá dhe nganodha dho ko nji ná kpapkanga adi hwè bbʉ Yova dho bbo. Ko ka ko uri u nari kʉ, ke si ko ronga lele njati ko di ko nanga jini ngbà nari dhǒ ke njingʉe ko dho ná lo dho ró. (Azø Waroma 8:31, 32.) Abbari ko njí kpakpanga ko si Ukumbusho dhi ngana i cho na, ndirigoti ko njí kpakpanga ko d’ralo kpakpanga na Ukumbusho dhi saa na.
DYI 18 Mbai le ødha dhi bbʉdha dho
a Ronji dyi Bi 4 ddo 4, 2023 nǎ, mamilioni kʉ dz’ djolu gble ná ndrŭ si ndima tso gba nja ndima nó Yesu dzá dhe nga d’e. Bí kʉ ná ndrŭ dho føri sie ya kwanza ndima ro si Ukumbusho dhi ngana ri. Djø dhó udha djøngʉe ná nzá njínji ro Yova dho cho bí kana ná ndrŭ ma si si Ukumbusho dhi ngana ddi. Nja ndrŭ si si nja kpakpa bbo kʉ ná lo djolu nja ndima si fo njudha dhinga na d’e. Njati rie ngbaribbai ma nidhó lo kʉ ri ró, auri u nari kʉ, ni si hwè bbʉ bbo Yova dho kpakpanga ni nji ni si fø njudha dhi ngana nari na.
b Nja ndrŭ adi riddi nari kʉ, Yesu dzá dhe nga ndima no ná saa na mukati adi ngʉ Kristo ndí, ndirigoti divai ke ró ju. Bbʉbbʉ dhé, kpa adi riddi nari kʉ, Kristo ró ju ma, ke ndí ma na ringani le bbʉ ibada le nji ná saa krʉ ró.
c Nja dho thika øni ø.
d Føri kina anja i djǒ ripo jw.org djó ná lo “2021 Mwadhimisho wa Ukumbusho.”
