1. Bí kʉ ná ndrŭ ká adi Biblia nǎ nyodyu dhi shauri nja ngbaribbai? (Mezali 1:20, 21)

 BÍ KɄ ná ngø lú, ko adi rinja ko djoi ma, ko vei ma na lod’ra bí ndrŭ kʉ ná nga lú ma, kpa zødha dhi ritsi ma na bbʉ ndrŭ dho hwè na ndima kʉ ro. Ni ká ngarie bí ndrŭ kʉ ná nga lú ni lod’ra ná ritso b’lo? Njati rie b’loo ró, føri ka ndi liri ni ddinga Mezali dzá buku na bani ná i lo djo, nyodyu ndi nanga jø bí ndrŭ kʉ ná nga lú ndiro ndrŭ rr ndi nǎ shauri d’e. (Azø Mezali 1:20, 21.) Biblia ma, kodhó vichapo ma na nǎ kʉ Yova dhó ro si ná “bbʉbbʉ nyodyu.” Føri kʉ, ndrŭ dho ringani ndima rr ná lo ndiro ndima ba nŭnŭ di ná shinga d’e. Ko nanga adi jini bbo ddikpa le u kodhó vichapo ná saa na. Ro ri nga e ndrŭ krʉ adi kodhó vichapo u ri. Nja ndrŭ nzɨ adi riji ndima u Biblia po ná lo ri. Nja ndrŭ adi ko gbogbo. Kpa adi riddi nari kʉ Biblia kʉ b’lo cho da ná buku. Godhé nja ndrŭ adi che loti Biblia nǎ mafundisho djo, kpa adi riddi ri na njínji nari kʉ, bbo tsɨ sani ná ndrŭ ndirigoti chølo dhiri ndima nja nja ndrŭ djolu ná ndrŭ. Ro jidha dzá lo dho, Yova adi rili krʉ kʉ ná ndrŭ ba ndidzá bbʉbbʉ nyodyu. Ká ngbaribbai?

2. Bbʉbbʉ kʉ ná nyodyu ká ko ka ko ba ngbaga ro njʉ, ro bí kʉ ná ndrŭ ká vʉrieri ndima njiri ngbǎ?

² Yova adi rili krʉ kʉ ná ndrŭ rr ndidzá bbʉbbʉ kʉ ná nyodyu Biblia chulu. Fø buku kʉ chøchø krʉ kʉ ná ndrŭ dhó. Nde, ko ká ka ko po ngbá lo kodhó Biblia ró dyʉ ndi ná vichapo djo? Apo mbai Yova dhó ledha dho, dhonalo ke liri fø vichapo bani 1000 djolu da ná luga nǎ. Nì ri rr ndirigoti nì ri zø ndima njinjí ri na ná ndrŭ si faida ba bbo. Nì mai ri kʉ føro, bí kʉ ná ndrŭ vʉri nzɨ ndima rrnga Yova dho.  Kpa di lonanga vʉ ná saa na, kpa adi rine ndima njí ndima ji ná lo inga ndima rr ndima lai ndrŭ po ndima dho ná lo. Kpa ka ndima be ko pá, dhonalo ko vʉri ko njinjí Biblia po ná lo na. I lo nǎ ko si loti addudho ma ndrŭ adi njini fø nari djo. Ya kwanza akonja ngbaribbai ma ko ka ko ba Yova dhó ro si ná nyodyu nari.

3. Ko ká ka ko nji addu ndiro ko ba bbʉbbʉ kʉ ná nyodyu d’e?

³ Nyodyu le nzǐ nari kʉ, ngbaribbai ma ko njínji ko chu ná lo na nari ndiro ko vʉ lonanga bblo d’e. Nì mai ri kʉ føro, bbʉbbʉ kʉ ná nyodyu tsu bí kʉ ná lo ndi nǎ. Biblia ripo ɨ: “Yova do le nji nari kʉ nyodyu tso ngani ná nga ndirigoti Bbo pli kʉ takatifu ná ke le chu nari kʉ lo le famu nari.” (Mez. 9:10) Føri dho ko di bbo na mana kʉ ná lonanga vʉ ná saa na, ringani ko “chu Bbo pli kʉ takatifu ná kedhó” ngaddidha ká kʉ ngbaribbai ma fø lo djo nari. Ko ka ko njiri fø Biblia ma, ri ró dyʉ ndi ná vichapo ma na ko zø nari chulu. Njati ko njiri fø ró, ko si bbʉbbʉ kʉ ná nyodyu ba.​—Mez. 2:5-7.

4. Ká addudho Yova dhé kʉ bbʉbbʉ kʉ ná nyodyu ka ndi bbʉ ko dho ná ke?

⁴ Yova ddiro dhé kʉ, bbʉbbʉ kʉ ná nyodyu ka ndi bbʉ ko dho ná ke. (Ro. 16:27) Ká addudho ko ripo bbʉbbʉ kʉ ná nyodyu Si Yova dho ro? Ya kwanza, Yova kʉ ngano ná ke ndirigoti ke chu krʉ kʉ ná lo ndi no ná ritsi djo. (Zb. 104:24) Ya pili, Yova nji ná krʉ kʉ ná ritsi ridho ke kʉ nyodyu dhi ke. (Ro. 11:33) Ya tatu, Yova dhó nyodyu dhi shauri adi faida bbʉ nì njínji ri na ná ndrŭ dho. (Mez. 2:10-12) Njati ko jiri ko é nyodyu na ró, ringani ko u kedzá bbʉbbʉlo ndirigoti ko bbari ri ddá chutso ko dho lonanga ko vʉ nari kana ndirigoti ko nji ná lo kana.

5. Njati ndrŭ di bbʉbbʉ kʉ ná nyodyu Si Yova dhó ro nari u nzá ró, føri ká ka ndi bbʉ ngbá matokeo?

⁵ Lod’radha dhi njí kana ko adi njú na ná bí kʉ ná ndrŭ adi nononi ná ritsi ma nja ddi; ro kpa adi ngano ná ke kʉ nì nari gʉgʉ ndirigoti kpa urie mageuzi. Ko adi njú na ná nja ndrŭ adi ndima nzǐ Mungu u ri, ro kpa adi Biblia nǎ kʉ ná kanuni nja b’lo cho da ri ndirigoti kpa adi rivʉ ndima njí ndima ji ná lo. Føri ká adi ngbá matokeo bbʉ? Ndrŭ ndima thí li ndima nganga dhó nyodyu djo, Mungu dhó nyodyu djo ndima lie ndima thí nari rɨngana nari dho ká dz’ djó lo kʉ bblo bbʉbbʉ? Kpa ká ba bbʉbbʉ kʉ ná hwè ndirigoti bbʉbbʉ kʉ ná ngab’odha ngbà gosi ná ddo djo? Ko kuso lú njini ná lo ko nja nari rili ko u bbʉbbʉ kʉ ná ɨ lo: “Nyodyu ma, lo utso d’idha ma, shauri ro ma nga ddi kʉ, njati le di ddani Yova na ró ri.” (Mez. 21:30) Føri adi ko ronga cho nja ko nzi bbʉbbʉ kʉ ná nyodyu Yova dhó ro d’e! Njedha dhi lo kʉ, nja ndrŭ nzɨ adi rinji fø ri. Ká addudho?

6. Mezali 1:22-25 ridho nari bbai, nzɨ adi riji ndima rr bbʉbbʉ kʉ ná nyodyu dhi lo nari ká kʉ ngbà di ná ndrŭ?

⁶ Bí kʉ ná ndrŭ adi riji nzɨ ndima rr bbʉbbʉ kʉ ná nyodyu “bbobbo ndi chu na ri ndi nanga jø chu lú” ná saa na. Biblia ripo gʉ nyodyu dhi lo gʉ ná ndrŭ dhó aina kʉ gbo, føri kʉ: “nzá chu lo ná ndrŭ ma, pá lo be ná ndrŭ ma, ndirigoti rr chu ná ndrŭ ma na.” (Azø Mezali 1:22-25.) Kpadjo akonja addudho ma, nja kʉ ná ndrŭ adi Mungu dhó ro si ná nyodyu be pá nari ndirigoti godhé akonja ngbaribbai ma ko ka ko pʉ fø di ná lo ko ró ro nari.

7. Nja ndrŭ ká adi rivʉ ndima di “nzá chu lo ná ndrŭ addudho”?

 ⁷ “Nzá chu lo ná ndrŭ” kʉ, krʉ ndima rr ná lo u ná ndrŭ inga tse ribba ndima shani ná ndrŭ. (Mez. 14:15, maelezo ya chini.) Bí ina ko adi njú fø di ná ndrŭ na mahubiri na. Loroji na, achuri nari kʉ dini nǎ bbobbonga ma, politiki nǎ bbobbonga ma na sharie mamilioni kʉ ná ndrŭ b’lo. Njati nja kʉ ná ndrŭ rá ri utso d’i fø kpa sharie ndima sha ró, ndrŭ nanga adi kani bbo. Ro, Mezali 1:22 dzá buku tilo djo ná fø ndrŭ vʉri nari kʉ ndima di nzá chu lo ná ndrŭ dhonalo kpa jiri rie fø. (Yer. 5:31) Kpa adi riji ndima njí ndima ji ná lo ndirigoti nzɨ ndima nji Biblia po ná lo inga nzɨ ndima rrnga Biblia nǎ yadha dho. Bí kʉ ná ndrŭ adi ndima mbu Canada nǎ Quebec nǎ ddikpa dini nǎ le bbai, le pongʉeri ɨ ndi ronga singʉe be ná Yova dzá Dimu dho, “Njati rie sha kodhó mupe adi ko sha ri ró, føri kʉ kedhó kosa, nga kodhó kosa ri!” Ko nzɨ adi rine ko dyø ji nanga jini ndima di nzá ndima chu lo ro ná fø di ndrŭ ri!​—Mez. 1:32; 27:12.

8. Addui ká ka ndi kó ko tsotso ndiro ko ngʉ nyodyu na kʉ ná ndrŭ d’e?

⁸ Føri dho, Biblia ko li kpakpa, ndiro nzɨ ko di nzá chu lo ná ndrŭ, ro ko é “dhidhi lo [ko] famu nari kana ná ndrŭ.” (1 Ko. 14:20) “Ko adi nyodyu ba” Biblia nǎ kanuni na ko njínji kodhó maisha nǎ nari chulu. Njati ko njiri fø ró, ko si ngbaribbai ma Biblia ka ndi kó ko tsotso ko nyi kpakpalo tso ndirigoti ko vʉ lo nanga nyodyu na d’e nari nja. Ri kʉ bblo ko di ngaddi ko nanga vʉ ná lo djo. Njati rie b’lo ko nga Biblia ko zø nari tso ndirigoti njudha dhi ngana ko si nari tso ri ró, ringani ko di ngaddi ko ka ko njí ná lo djo ndiro ko bbʉ ko Yova dho ndirigoti ko ba batiso d’e. Njati rie b’lo ko ba batiso ri ró, ko ká rine ko ngʉ nì lod’ra bblo inga nì longaddi bblo ná mwalimu i nì? Ko vʉ nanga ná lo ká ridho ko njínji nì Biblia nǎ ro ko jifunza ná lo na? Ko ká adi Wakristo e na ná sifa dhǒ nì nja ndrŭ dho? Njati ko rá ri utso d’i ringani ko thɨ kodhó nja lo thika thɨ ri ró, ringani ko di ngaddi bbo Yova dhó lojadha djo, føri ka ndi liri ‘nzá chu lo ná ke ngʉ nyodyu dhi ke.’​—Zb. 19:7.

9. “Pá lo be ná ndrŭ” ká adi ndima gʉ nyodyu dhi lo gʉ nari dhǒ ngbaribbai?

⁹ Nzɨ ngarr Mungu dhó nyodyu dho ná ya pili kikundi kʉ “pá lo be ná ndrŭ.” Nja saa na, ko adi njú fø di ná ndrŭ na lod’radha dhi njí kana. Kpa nanga adi jini pá ndima nja ndrŭ be nari dho. (Zb. 123:4) Biblia pongʉeri nga sini ná saa na, bí kʉ ná ndrŭ sie pá lo be ndrŭ. (2 Pe. 3:3, 4) Chi ngʉ tøni ná ke Loti dzá sinzø bbá kpa bbai, njʉ bí kʉ ná nja ndrŭ nzɨ adi ndima thí li Mungu ja ná lo djo ri. (Mwa. 19:14) Bí kʉ ná ndrŭ adi Biblia nǎ kanuni na njínji ná ndrŭ gbogbo. Kpa adi rinji fø dhonalo kpa “adi ndima dhó tamaa ne nzɨ ndima ngarr Mungu dho nari chu lu.” (Yud. 7, 17, 18) Biblia ddi pá lo be ná fø ndrŭ waasi na ndirigoti gʉgʉ Yova ná nja kpa na!

10. Zaburi 1:1 nǎ le ndingʉeri nari bbai, ko ká ka ko pʉ pá lo be ná ndrŭ na ko ko tso gba nari ngbaribbai ko ró ro?

¹⁰ Ko ká ka ko b’o ko ronga ngbaribbai ndiro nzɨ ko ngʉ pá lo be ná ndrŭ ró? Fø ko ka ko njiri ná ddikpa chu kʉ, nzɨ ko gba ko tso ro fø dhó nyi di ná ndrŭ na. (Azø Zaburi 1:1.) Føri na mana kʉ, ri nzá ngani ko rr inga ko zø waasi dhó ro si ná lo ri. Njati ko é krr nga ró, ko ka ko gba ko tso ngadhó nyi kʉ bblo ná ndrŭ na, ko nanga ka ndi di rɨni rɨ Yova djo ndirigoti kedhó tengenezo chulu ko ba ná chutso ddadha djo. Føri dho, ringani ko dhuri ko tsó: ‘Ko ká e che kʉ ná ngaddidha na njati ko ba  ddikpa ø chutsoddadha inga ddikpa mwangaza ró? Ko ká adi chutso ddá ná kpa dhó kosa ne?’ Njati ko njiri lele ko thɨ kodhó lo thika ró, Yova nanga si jini bbo kodhi lo dho.​—Mez. 3:34, 35.

11. “Rr chu ná ndrŭ” ká adi Yova dhó kanuni nja ngbaribbai?

¹¹ Nzɨ ngarr Mungu dhó nyodyu dho ná ya tatu kikundi kʉ, “rr chu ná ndrŭ.” Kpa kʉ rr chu ná ndrŭ dhonalo kpa nzɨ rine ndima njí Mungu dhó yadha na gbani ná lo ri. Kpa rine ndima njí ndima nyǒ tho ná lo. (Mez. 12:15) Fø di ná kpa adi nyodyu Si dhó ro ná ke Yova gʉgʉ. (Zb. 53:1) Njati ko njú fø di ná kpa na mahubiri na ró, kpa adi che loti ko djo ko ngarr Biblia nǎ kanuni dho nari dho. Kpa nzá ka ndima njí bblo lo ro ko dho ri. Biblia ripo: “Rr chu ná ke nzɨ ba bbʉbbʉ nyodyu ro ri, bbo bbagʉ dzaitso ró ke po ná lo ro ma ngaddi kʉ ri.” (Mez. 24:7) Rr chu ná ke nzá ka ndi bbʉ nyodyu dhi shauri ro ddikpa maddi ri. Føri dho Yova rija ko dho ko “di da rr chu ná ke ró ro”!​—Mez. 14:7.

12. Ko tsotso ká addu ka ndi kó ndiro nzɨ ko njini rr chu ná ndrŭ bbai ró?

¹² Ko ngae ndrondro Mungu dhó shauri ná ndrŭ bbai ri. Føri rɨngana ko adi riji ko ji Mungu dhó ngaddidha, føri tsu ndi nǎ ke dhó yadha krʉ. Ko ka ko li kodhó jidha kpakpa ke dho ngarr ná ndrŭ ma, nzɨ ngarr ná ndrŭ ma na ba ná matokeo djo ko ngaddi nari chulu. Addinga Yova dhó kanuni na ndima njínji nzɨ nari dho ndrŭ adi bani na ná kpakpalo djo. Føri goti anja ngbaribbai ma nidhó maisha kʉ bblo ni ngarr Mungu dho nari dho nari.​—Zb. 32:8, 10.

13. Yova ká adi ko cho kpakpanga na nja ko rrnga ndidhó nyodyu dhi shauri dho d’e?

¹³ Yova bbʉ nyodyu krʉ kʉ ná ndrŭ dho, ro ke nzɨ adi ddikpa le ro ma cho ddi nja ndi dyø ri kpakpanga na d’e ri. Nì mai ri kʉ føro, ke d’ra nzɨ ngarr ri dho ná ndrŭ adi ba ná matokeo maddi. (Mez. 1:29-32) Nzɨ ngarr Yova dho ná ndrŭ si “ndima nji ná lo kobe baba.” Luti kpa si kpakpalo ba bbo ndirigoti kpa si nzani nza ndima vʉ ná maisha dzá lo dho ndirigoti Yova si kpa gʉ sa theinga dho. Føri ró ro njonjo, Yova dhó nyodyu dhi shauri dho ngarr ndirigoti nì njínji ri na ná ndrŭ dho ke tsoni ɨ: “Nì ngarr ma dho ná ke sie b’odidha kana ndirigoti ke ro nzɨ kpakpalo do si nji ri.”​—Mez. 1:33.

14-15. Mezali 4:23 nǎ ro ká ko ba ngbá somo?

¹⁴ Krʉ ddo ró ko di njínji Mungu dhó nyodyu na ró, ko adi faida ba. B’lo ko pori nari bbai, Yova adi liri krʉ kʉ ná ndrŭ ba nyodyu dhi shauri. Loroji na, Mezali dzá buku nǎ, Yova bbʉ krʉ ddo ró ko ka ko njínji na ná shauri. Akonja nyodyu dhi fø shauri ro tho (4) di.

¹⁵ Ab’o mufano dhi ni thí ronga. Biblia ripo: “Ab’o ni thí ronga nja krʉ kʉ ná ritsi  djolu dhonalo ri nǎ kʉ shinga tø nanga.” (Mez. 4:23) Akoddinga ko ka ko njí ná lo djo ndiro ko b’o ko thí nganga ronga d’e. Ringani ko nyó bblo dho kodhó afya ka ndi é dho ná nyo, ko njí mazoezi ndirigoti ko pʉ che kʉ ná nyi ko ró ro. Nja ko b’o ko thí mufano dhi ri ronga d’e ma ko adi fø di ná lo i nji. Ko adi ko ngu Mungu dzá Lo chulu krʉ ddo ró. Ko adi ko tayarisha ko si njudha dhi ngana ndirigoti ko bbʉ jibu ro maddi. Ko adi lod’ra bí ina. Ndirigoti ko adi che kʉ ná nyi pʉpʉ ko ró ro ndiro nzɨ ri sa kodhó ngaddidha ma, kodhó nyi ma na ró, føri kʉ che kʉ ná ritsi na le njínji le nyǒdjedha dho inga che kʉ ná kau na le le tso gba nari ma na.

16. Mezali 23:4, 5 nǎ kʉ ná lo ká ka ndi kó ko tsotso bbo njʉ addudho?

¹⁶ Adi hwè ba nidhó bani ná ritsi dho. Biblia bbʉ i shauri: “Nzɨ di ni njé mali nedha na. . . . Ni vé di ni nyǒ li ri djo ná saa na, ri ro nga kʉ fø ga ri dhonalo ri ndi hú nji ndi dho bbu bbai ndirigoti ri si ta ndi dho ra kpa ro.” (Mez. 23:4, 5) Kimwili nǎ ritsi e ndidzá mwisho na. Ro mali dhi kpa ma, njedha dhi ndrŭ ma na krʉ adi rine ndima ba mbø dhé. Ri kʉ føri dzá lo dho i kpa adi sa ka ndi sa ndima dhó sifa ma, ndima kana kau ma, ndirigoti ndima dhó afya ma na ná lo nji ri. (Mez. 28:20; 1 Ti. 6:9, 10) Føri ró ro njonjo, nyodyu adi ko tsotso kó ko é bblo kʉ ná nganjadha na mbø djo. Fø di ná nganjadha na ko kʉ nari adi ko ronga b’o ndiro nzɨ ko bani tamaa na ró, ndirigoti ri adi rili ko nanga jini kodhó bani ná ritsi dho ndirigoti ko é hwè na.​—Muh. 7:12.

17. Mezali 12:18 ripo nari bbai, “nyodyu dhi le dà” ká ko ka ko ba ngbaribbai?

¹⁷ Addinga lo ni ti nari njí. Njati ko é krr nga ró, ko tso nǎ lo ka ndi vó nja ndrŭ thí ronga vó. Biblia pori: “Nzá le ddinga ro le po ná lo adi nga krr ddiddi sà bbai, ro nyodyu dhi ke dà adi le gøgø.” (Mez. 12:18) Nja ko kana nga é chøchø nja ndrŭ na d’e, ringani ko bbá kpadhó kosa djo dhé ko loti nari tso. (Mez. 20:19) Njati ko jiri ko ti ná lo pɨ ndrŭ iso ndirigoti nzɨ ri vó ndrŭ thí ronga ró, ringani ko di Mungu dzá Lo zø bí ina ndirigoti ko di ngaddi ri djo. (Lu. 6:45) Njati ko di ngaddi Biblia nǎ ro ko zø ná lo djo ró, ko tso nǎ lo ka ndi é ddiddi  “nyodyu tø ná nga bbai” ndirigoti ri ka ndi li ndrŭ kpakpa.​—Mez. 18:4.

18. Mezali 24:6 nǎ kʉ ná lo na ko njínji nari ká ka ndi kó ko tsotso ngbaribbai nja ko ba bblo kʉ ná matokeo lod’radha dhi njí kana d’e?

¹⁸ Arrnga tengenezo bbʉ ná chutsoddadha dho. Biblia ko tsotso ka ndi kó ná nyodyu dhi i shauri bbʉ ko dho: “Nyodyu dhi chutsoddadha chulu ni si nidhó vita nji ndirigoti bí kʉ ná washauri chulu lo adi njini nji.” (Mez. 24:6, maelezo ya chini.) Akonja ngbaribbbai ma, fø kanuni na ko njínji nari adi chutso ddá ko dho ndiro ko ba bblo kʉ ná matokeo lod’radha dhi njí kana ndirigoti longaddidha dhi njí kana d’e nari. Ko d’ra é lo inga ko ddi é lo ko chu nari bbai nari rɨngana ko adi njínji ko dho le bbʉ ná chutsoddadha na. Ko adi nyodyu dhi chutsoddadha ba Wakristo dhó njudha dhi ngana, Biblia ró dyʉ ndi ná hotuba le bbʉ ko dho nari chulu, ndirigoti fomasio ko ba Biblia nǎ ro longaddidha dho nari chulu. Godhé, Yova dzá tengenezo adi bí kʉ ná lod’radha dhi njí dhi no bbʉ ko dho føri kʉ, vichapo ma, video ma na. Føri adi bí kʉ ná ndrŭ tsotso kó nja ndima famu Biblia nǎ lo d’e. Nde, ni ká adi njínji lod’radha dhi njí dhi fø no na bblo i nì?

19. Yova adi bbʉ ni dho ná nyodyu dhi lo dho ká ni adi ni mbu ngbaribbai? (Mezali 3:13-18)

¹⁹ Azø Mezali 3:13-18. Ko adi mbai po bbo Mungu dzá Lo nǎ bani ná bblo kʉ ná shauri dho! Njati ri é nga ró, ká ko ka ko njieri ngbǎ? I lo nǎ ko nja Mezali dzá buku nǎ ra bani ná nyodyu dhi shauri dhi loroji. Bbʉbbʉ dhé, Yova adi nyodyu dhi shauri bbʉ ko dho ndidzá lo Biblia chulu. Føri dzá lo dho krʉ ddo ró akovʉri ko njinjí Yova bbʉ ko dho ná nyodyu dhi shauri na. Bí kʉ ná ndrŭ nzɨ adi Mungu dzá nyodyu nja mana na ri, ro ko uri u nari kʉ “ndima thí nǎ ro krʉ ngarr [nyodyu] dhi lo dho ná ndrŭ le si nzi hwè na kʉ ri.”