1-2. (a) Nja kʉ ná guvernema ká adi ddani Yova dzá ndrŭ tso ró ngbá lo djó, ro kedzá ndrŭ ká adi fø lo nja ngbaribbai? (b) Njati rie upinzani na ma ko bani ri ró, ká ko ka ko é hwè na dhé addudho? (Ndirigoti atilo ri chuti ji djo maddi.)

 NJɄ, 30 djolu da ná ngø lú kodhó njí gʉrieni gʉ. Fø ngø kana nja kʉ ná ngø lú bbobbonga na kʉ ná kpa ko djoi ma, ko vei ma na sʉ prizo na. Nde, kpa ká nji ngbá kosa? Kpa nzá nji kosa ro ri, Yova ma nzá ddi nja kpa ro chelo nji ná kpa ri. Kpa nji nari kʉ kpa Biblia zø nari ma, kpa Biblia jifunza nari ma, kpa ndima chu ná lo ro d’ra nja ndrŭ dho nari ma ndirigoti kpa njuni ndima lai ndrŭ ma na Mungu madha dho nari ma na. Godhé kpa gʉri gʉ ndima nzɨ tsu ndima tso ro politike nǎ ngbá lo na maddi ri. Nì mai ndima bani bbo pli kʉ ná upinzani na ro, Mungu dzá fø njí dhi kpa tøni chi * dhé Yova dho. Ndirigoti føri adi hwè bbʉ kpa dho!

² Ji djó ni njari nari bbai, nja kʉ ná Yova dzá Dimu kʉ ngana do ro ndirigoti kpa kʉ hwè na dhé. Kpa kʉ hwè na dhonalo kpa churi chu ndima dhi lo hwè bbʉ Yova dho chi ndima kʉ ke dho nari dho. (1 Ny. 29:17a) Yesu pongʉeri: “Hwè na kʉ nari kʉ chølo djó nzani ná ndrŭ . . . Aninji hwè, ni é ji ni nanga jini ro dhonalo ni kobe kʉ bbo.”​—Mt. 5:10-12.

3. Matendo 4:19, 20 nǎ le pori nari bbai, karne ya kwanza nǎ ngʉe ná mitume ká njingʉeri ngbǎ, ndima ngʉ bani upinzani na ná saa na ndirigoti fø ká kpa njingʉeri addudho?

³ Ko djoi ma, ko vei ma na tso ve nari kʉ, ngbà tso mitume ma vengʉe ddi karne ya kwanza nǎ ná lo, kpa ngʉ lod’ra Yesu ró dho djo ná saa na. Bí ina, Wayaudi bbá tribinali nǎ ngʉ adi lod’i ná bbajuji ngʉ adi “ripo nzɨ kpa d’ralo Yesu ró dho djo.” (Mdo 4:18; 5:27, 28, 40) Mitume ká njingʉeri ngbǎ? Azø Matendo 4:19, 20.) Kpa chungʉeri nari kʉ, ndima dho ‘bbʉ rusha ndima d’ralo ndrŭ dho ndirigoti Kristo djo’ nari kʉ bbo pli kʉ bbonga na ná ke. (Mdo. 10:42) Føri dho mitume djó lo ngʉ ti ná kpa, Petro ma, Yohana ma na pongʉeri nga nǎ do ro nari kʉ, ringani ndima rrnga Mungu dho i pli bbajuji dho ndima ngarr nari djolu, ndirigoti kpa pongʉeri ndima nzɨ bba Yesu djo ndima loti nari tso ro ri. Ri njani ɨ kpa dhungʉeri bbajuji tsó nari bbai, ‘Ni ká ripo nidhó yadha dada Mungu dhó yadha djolu?’

4. Matendo 5:27-29 ridho nari bbai, mitume ká bba ngbá loroji bbʉbbʉ kʉ ná Wakristo krʉ dho ndirigoti ko ká ka ko dyø kpadhó loroji ngbaribbai?

⁴ Mitume bba bblo pli kʉ ná loroji bbʉbbʉ kʉ ná Wakristo dho, dhonalo kpa vʉngʉeri “ndima rrnga Mungu dho i pli ndrŭ dho ndima ngarr nari djolu.” (Azø Matendo 5:27-29.) B’lo le nji ndima ndima tøni chi dhé nari djotsina ro, nari goti mitume rangʉe Wayaudi dhó tribinali nǎ ro, “hwè na dhonalo kpa zøngʉeni kaka nzá dho le ka le bbʉ heshima ná kpa [Yesu] ró dho djotsina,” ndirigoti kpa rangʉe anzi Yesu ró dho djo ndima lod’ra nari na!​—Mdo. 5:40-42.

5. Kodhó ká ringani ko ba ngbá logoti?

⁵ Mitume bbangʉe ná loroji rili ko dhú nja kʉ ná lo ro ko tsó. Loroji na, mitume ká ka ndima rr e nga ngbaribbai Mungu dho, ndrŭ dho ndima rr é nga nari rɨngana ndirigoti ndima “djøni bbobbonga na kʉ ná kpa dho” Biblia rija nari bbai? (Ro. 13:1) Mutume Paulo pongʉeri nari bbai, ko ká ka ko “rrnga ngbaribbai guvernema dho ndirigoti bbobbonga na kʉ ná kpa  dho,” ndirigoti ko é chi bbo pli kʉ ná Pi Mungu dho?​—Tit. 3:1.

6. (a) Waroma 13:1 nǎ le tilo djo ná “bbobbonga na kʉ ná kpa” ká kʉ ie ma ndirigoti ko dho ká ringani ko njini kpa na ngbaribbai? (b) Ndrŭ djo pinyo ná pikpa djo ká ko ka ko po ngbá lo?

⁶ Azø Waroma 13:1. I verse nǎ, “bbobbonga na kʉ ná kpa” le nzǐ nari kʉ dz’ djó pikpa, nja ndrŭ djo ndima kʉ bbonga na ro. Wakristo dho ringani ndima rrnga dz’ djó fø pikpa dho. Kpa adi ngoi li, kpa adi ndrŭ dho ringani ndima rrnga dho ná yadha li ndirigoti nja saa na kpa adi Yova dzá ndrŭ ronga ma b’o ddi. (Ufu. 12:16) Føri dho, kodho ringani ko dzí kitas ma, ko ø palata ma, ko njí kpa do ndirigoti ko bbʉ heshima kpa ja ná lo dho. (Ro. 13:7) Nì mai ri kʉ føro, guvernema kʉ bbonga na, kpa dho Yova bbanga nari dho dhé. Yesu dhongʉe fø lo pʉlʉpʉlʉ Roma nǎ guvernere Pontio Pilato ngʉ ngadhu ndi tsó ná saa na. Pilato pongʉeri ndi kʉ bbonga na ndi b’o Yesu dhó shinga ronga inga ndi hwi ke hwi ná saa na, Yesu pongʉeri ke dho: “Ni ro nga ka ni ée bbonga na ma djo ri, rie nga røna ro dhé ri bbʉni ni dho ri ró.” (Yoh. 19:11) Pilato dhó lo ridho nari bbai, ndrŭ djo kʉ bbonga na ná pikpa ma, politiki nǎ kpa ma na kʉ ndima dhó mupaka na.

7. Dz’ djó pikpa dho ká ringani ko rrnga nzá ngbá saa na ndirigoti kpa dho ká ringani ndima no ngbá lo nga?

⁷ Wakristo dho ringani ndima rrnga ndrŭ dhó guvernema ja ná lo dho njati rie nzɨ ri ddani dda Mungu dzá yadha na ri ró. Ro ko nzá ka ko rrnga ndrŭ dho ri njati kpa di rinzi ko njí gʉ Mungu gʉ ná lo ndirigoti kpa di ko tso chocho Mungu ji ko njí ná lo ró ro. Loroji na, kpa ka ndima nziri jadda kpa tsu sødda dzá njí na. * Inga kpa ka ndima gʉ Biblia ndirigoti Biblia ró dyʉ ndi ná vichapo na ko njínji nari ndirigoti kpa ka ndima gʉ lo ko d’ra nari ma, ddinga na ko njuni Mungu madha dho nari ma na. Bbobbonga na kʉ ná kpa di Kristo unakpa nzánza ndima dhó bbonga chulu ró, kpa djo Mungu si lod’i. Yova kpa nja nì!​—Muh. 5:8.

8. “Bbonga na le kʉ” ndirigoti “bbo pli le kʉ bbonga na” nari ma kana ká kʉ ngbá njonjonga ndirigoti fø lo na mana ká kʉ bbo addudho?

⁸ “Bbonga” na mana kʉ “bblo pli, bbo pli, bbo pli kʉ bbonga na ná ke.” Ro føri na mana nga kʉ le kʉ “bblo pli nja le djolu, bbo pli nja le djolu, inga bbonga na pli nja le djolu ri.” Føri na le nja kʉ ná lo na mana dhǒ, “bbo pli le kʉ bbonga na nari.” Ngbà mai le nzǐ guvernema “bbobbonga na kʉ ná kpa ro,” kpa djolu da bbonga na pli ná ke ro kʉ thé. Biblia nǎ le nzǐ, Yova Mungu “Bbo pli kʉ bbonga na ná ke” tho ina.​—Da. 7:18, 22, 25, 27.

9. Nabi Danieli ká njangʉe ngbá lo maono nǎ?

⁹ Nabi Danieli njangʉe ná maono nǎ, ke njangʉe Yova bbo pli kʉ bbonga na ná ke, krʉ kʉ bbobbonga na ná kpa djolu. Ya kwanza Danieli njangʉe bbobbo tho kʉ ná zǎ, føri ngʉ drrdrr nyongʉe pi dz’ djolu gble ná pidhinga dhǒ i ddo ró pinyo ná pidhinga ma na, føri kʉ Babiloni ma, Umedi na Uajemi ma, Ugiriki ma, Roma ma na ndirigoti i ddo ró pinyo ná Anglo-Américain ma na. (Da. 7:1-3, 17) Ndirigoti Danieli njangʉe Yova Mungu ndidhó ra nǎ Pi dhi kiti djó ndi di ro. (Da. 7:9, 10) Chi ngʉ tøni ná fø nabi njangʉe luti ná lo  kʉ lojadha ko dho njʉ pinyo dz’ djó ná kpa djo.

10. Danieli 7:13, 14, 27 ripo nari bbai, Yova ká bbʉ bbonga ie ma dho dz’ lú djo ndirigoti føri ká ridho ke kʉ ngbà di ná ke?

¹⁰ Azø Danieli 7:13, 14, 27. Mungu dzi pidhinga krʉ ndrŭ dhó ro ndirigoti ke bbʉ ri, ri ndi ka ndi bbʉ dho ná kpa dho ndirigoti bbo kʉ kpakpanga na ná kpa dho. Føri ká kʉ ie ma? Føri “kʉ ndrŭ ddù bbai di ná ke,” Yesu Kristo ndirigoti “Bbo pli kʉ bbonga na ná kedzá watakatifu kʉ ná kpa,” 144000 Yesu ma na ndima si pinyo “theinga dho ro.” (Da. 7:18) Bbʉbbʉ dhé, Yova kʉ “Bbo pli kʉ bbonga na ná ke,” dhonalo ke ddiro dhé kʉ bbonga na ndi njí fø di ná lo.

11. Danieli ndingʉe ná ngbá lo ká ridho Yova kʉ bbo pli kʉ ná bbonga na ndrŭ tsɨ krʉ djo?

¹¹ Danieli njangʉe maono nǎ ná lo ma tso njunju anziro ke pongʉe ná ddikpa lo na. Danieli pongʉeri “Ra nǎ Mungu tu pikpa, ndirigoti ke li pikpa.” Ke pongʉeri ki: “Bbo ngbeni ná ngana kʉ ná ke kʉ Pi ndrŭ dhó pidhinga djo ndirigoti ke bbʉ ri ndi ji ná ke dho.” (Da. 2:19-21; 4:17) Føri ká dhori ddikpa saa na, Yova tue pikpa ndirigoti luti ke lie kpa ki vi? Vio!

12. Ngbaribbai ma Yova tungʉe anziro ngʉe ná pikpa pi dhi kiti djó ro nari dhǒ ná loroji abbʉ. (Anja ri chuti ji.)

¹² Yova dhori pʉlʉpʉlʉ nari kʉ, ndi kʉ bbo pli kʉ ná bbonga na “bbobbonga na kʉ ná kpa krʉ djo.” Akonja gbo kʉ ná loroji. Misri nǎ Farao lingʉe Yova dzá ndrŭ no tsena ndirigoti bí ina ke gʉngʉe fø ndrŭ ndi bba nari gʉ. Ro Mungu klongʉe kpa klo ndirigoti ke tingʉe Farao ma tso ndidzá ndrŭ ma na Kaka Jʉdda na. (Kut. 14:26-28; Zb. 136:15) Babiloni nǎ Pi Belshaza njingʉe ddikpa fete ndirigoti ke “mangʉe ndi [ndindiro] ra nǎ Bboke njí ndirigoti ke bbʉngʉe madha feza ndirigoti or dhi miungu dho” Yova dho ndi bbʉe madha nari rɨngana. (Da. 5:22, 23) Mungu pangʉe do fø nodha dhi ke djo. “Fø dyi kuna,” Belshaza le hwingʉe hwi ndirigoti kedhó pidhinga le bbʉngʉe Umedi ma, Uajemi nǎ kpa ma na dho. (Da. 5:28, 30, 31) Palestine nǎ Pi Herode Agripa I hwingʉe mutume Yakobo ndirigoti ke sʉngʉe mutume Petro prizo na ndiro ndi hwi ke ma hwi ddi d’e. Ro Yova chongʉe Herode pɨngʉe ná fø lo tso cho. “Mungu dhó malaika b’ingʉe ke b’i,” ndirigoti ke dhengʉe dhe.​—Mdo. 12:1-5, 21-23.

13. Abbʉ ngbaribbai Yova singʉe dz’ djó pikpa djolu nari dhǒ ná loroji.

 ¹³ Yova dhongʉe ndidhó bbo pli kʉ ná bbonga dz’ djó pikpa krʉ dho. Ke njingʉe Waizraeli djó lɨ ndirigoti ke kongʉe kpa tsotso ndiro kpa sa Kanaani nǎ 31 kʉ ná pikpa njingʉe ná koddo d’e ndirigoti kpa tsu koddo ndi kongʉe ná ngø na d’e. (Yos. 11:4-6, 20; 12:1, 7, 24) Godhé, Yova kongʉe Waizraeli tsotso ndiro kpa sisi Pi Ben-hadadi djolu ndirigoti Siria nǎ ro singʉe hwini Izraeli tso ró ná pikpa 32 djolu d’e.​—1 Fa. 20:1, 26-29.

14-15. (a) Pi Nebukadneza ma, Dario ma na ká pongʉe ngbá lo Yova dhó bbonga djo? (b) Mutunga zaburi ká pongʉe ngbá lo Yova djo ndirigoti kedzá ndrŭ tsɨ djo?

¹⁴ Bí ina Yova dhongʉeri ndi kʉ bbo pli kʉ bbonga na ná ke! Babiloni nǎ Pi Nebukadneza ngʉ nodha nji ‘ndidhó kpakpanga djotsina ndirigoti ndidhó bbonga djotsina’ Yova ddiro dho dhé ndi ka ndi bbʉe madha nari nyi ndi chué nari rɨngana ná saa na, Yova lingʉeri ke ngʉ rǐ (mazimu). B’lo Nebukadneza ró rǐ sini nari goti, ke bbʉngʉe “madha Bbo pli ngbeni ná ngana kʉ ná ke dho” ndirigoti ke famungʉeri nari kʉ “[Yova] dhó pidhinga kʉ theinga dho.” Ke pongʉeri ki: “Ke ji ndi njí ná lo ró ka ndi cho ke tso ná le ro nga kʉ ri.” (Da. 4:30, 33-35) Danieli tøni chi Mungu dho nari tsungʉe mbudha na ndirigoti Yova gøngʉe ke simba dhó bbu nǎ ro nari goti, Pi Dario pongʉeri: “Ringani ndrŭ ronga tata do dho Danieli dzá Mungu njí. Dhonalo ke kʉ shi di ná Mungu ndirigoti theinga dho. Kedhó pidhinga ro nzɨ si sani ngbá dyi maddi ri, ndirigoti kedzá bbonga kʉ theinga dho.”​—Da. 6:7-10, 19-22, 26, 27, maelezo ya chini.

¹⁵ Mutunga Zaburi njangʉeri: “Yova ngbʉ ndrŭ kpe ndima njí ná chelo nanga ngbʉ; ke d’ri ndrŭ kpe ndima njí ná lo nanga d’ri.” Ke pongʉeri ki: “Hwè na kʉ nari kʉ, Yova kʉ dhi Mungu ná ndrŭ tsɨ, ke vʉ ndi dho mali ná ndrŭ.” (Zb. 33:10, 12) Ri kʉ bbo thonga ná lo ko é chi Yova dho!

16. Ko ká ka ko u ngbá lo “bbo mbudha” dhi saa na si njini ná lo djo, ndirigoti addudho? (Anja ri chuti ji.)

¹⁶ Ko chu lo b’lo dangʉe ná saa na Yova njingʉe ná lo djo. Nde, ko ká ngbá lo b’o ndi si njini karrnga goti? Ko ka ko uri u nari kʉ, Yova si ndidzá chi tøni ná njí dhi kpa gøgø “bbo mbudha” dhi saa na. (Mt. 24:21; Da. 12:1) Ke si fø lo nji Gogu dhi Magogu føri kʉ, ndrŭ tsɨ gba ndima tso ná ri si lɨ ta chi tøni Yova dho ná ndrŭ tso ro ná saa na. Ngbà mai ndrŭ tsɨ gba ndima tso ná føri tsu ndi nǎ, ONU dhó 193 kʉ ná kikundi krʉ ro, kpa dho nzɨ ri ro si ka ndima hwini Bbo pli kʉ bbonga na ná ke ma, kedhó ra nǎ bbasødda ma na tso ró ri! Yova tsoni ɨ: “Ma si rili ma máni ma ndirigoti ma tsetse ndirigoti ma si rili ma nyi chuni chu bí kʉ ná ndrŭ tsɨ kpari nyǒ njí; ndirigoti kpa dho ri si ngani ndima churi nari kʉ, ma kʉ Yova.”​—Eze. 38:14-16, 23; Zb. 46:10.

17. Biblia ká d’ra ngbá lo dz’ djó pikpa si ba ná lo djo ndirigoti chi kʉ Yova dho ná ndrŭ djo?

¹⁷ Mungu dhó vita tso si ngani b’lo ró, ri tso si d’ø kpø Armagedoni djo, fø saa na ke “si dz’ lú djó kʉ ná pikpa tso d’ød’ø.” (Ufu. 16:14, 16; 19:19-21) Ro, “chølo dhi ndrŭ dhé si ma dz’ djo ndirigoti nì kʉ chi Yova dho ná ndrŭ dhé si di ri djó.”​—Mez. 2:21, maelezo ya chini.

18. Bí kʉ ná bbʉbbʉ Wakristo ká vʉri ndima njí addu, ndirigoti addudho? (Danieli 3:28)

¹⁸ Cho bí kana, bbʉbbʉ Wakristo dhó uhuru ma, kpadhó shinga ma na e hatari nǎ Bbo pli kʉ bbonga na ná Pi Yova ndima ji nari djotsina. Fø bbʉbbʉ Wakristo vʉri vʉ ndima é chi Yova dho ndirigoti kpa kʉ ddiddi chi tøngʉeni Bbo pli kʉ bbonga na ná ke dho ná gbo kʉ ná Waebrania bbai, fø kpa ke gøngʉe bbo kazz nǎ ro.​—Azø Danieli 3:28.

19. Yova ká si lod’i ndidzá ndrŭ djo ngbá lo ró ro ndirigoti ri ká ngani ko njiri ngbǎ kpadjo nga djó ro?

¹⁹ Mutunga zaburi Daudi ndingʉeri ɨ chi le kʉ Mungu dho nari dzá bblonga djo: “Yova si lod’i ndrŭ djo. Ee Yova, ad’i lo ma djo, madzá chø kʉ ná lo ró ro ndirigoti madzá chi kʉ ná lo ró ro.” (Zb. 7:8) Godhé Daudi ndingʉeri ki: “Abbari chi le kʉ nari ma, chølo ma na b’o ma ronga.” (Zb. 25:21) Bbo na mana kʉ maisha nǎ nari kʉ chi le tøni Yova dho nari, nzá le bba chi le tøni ke dho nari tso ro rie ngbǎ di ná lo na ma le bani ri ró! Føro ko ka ko mbu ko mutunga zaburi bbai ɨ ndi ndingʉeri ro: “Hwè na kʉ nari kʉ chi kʉ . . . , Yova dzá yadha nǎ ndima bbí ro ná ndrŭ.”​—Zb. 119:1, maelezo ya chini.