1-2. (a) Ø chi ndoa ná nrŭ dho ká ringani ndima li ndima thí Yova djo addudho? (Zaburi 37:3, 4) (b) I lo nǎ ká ko si loti ngba lo djo?

NI KÁ riji ni chi ndoa inga ni ká kʉ ø chi ndoa ná le? Njati rie fø ró, ko churi nari kʉ ni ri b’o bbo ù na ni di hwè na bbo ni ji ná le na. Bbʉbbʉ dhé, ndoa nǎ kpakpalo adi ngaba ni, ndirigoti ø chi ndoa ná kpa ka ndima vʉ nanga nalo kʉ bí. Ngbaribbai ma ni hwini kpakpalo tso ró, ndirigoti ni nanga vʉ nalo i ka ndi dho ri ni ká sie hwè na ni ma inga nga ma nidhó maisha nǎ nari. Njati ni li ni thí Yova djo ró ni ka ni vʉ lo nanga bblo, nidhó ndoa ka ndi ngʉ kpakpa ndirigoti ni ka nie hwè na bbo. Njati ni di njínji Mungu dhó shauri na nzá ró, ni ka ni ba kpakpalo bbo nidhó ndoa nǎ ndirigoti ni ro nga sie hwè na ri.​—Azø Zaburi 37:3, 4.

² Ni mai i lo nǎ le loti ø chi ndoa ná nrŭ djo ro, ri si loti ndoa chi ná nrŭ ka ndima hwini na ná kpakpalo djo. Kosi loti Biblia nǎ chí tøngʉeni ná kpetsikpa ma, isɨ nrŭ ma na dhó loroji nǎ ro ko ka ko ba ná somo djo. Biblia nǎ kʉ ná loroji bí kʉ ná somo bbʉ ko dho. Fø somo ka ndi kó ko tsotso kodhó maisha nǎ ndirigoti ndoa kana maddi. Ko si i ddoro chi ndoa ná nrŭ dhó loroji nǎ ro ko ka ko ba ná somo ma nja ddi.

3-4. Ø chi ndoa ná nrŭ ká ka ndima bani ngba kpakpalo na?

³ Nja nrŭ adi ø chi ndoa ná nrŭ li kpakpa ndiro kpadhó maisha di i ddo ró bí kʉ ná nrŭ dhó maisha kʉ naribbai  d‘e. Loroji na, nja kʉ ná gødhi nrŭ ma familia nǎ nja nrŭ ma na adi ø chi ndoa ná nrŭ cho ndiro kpa ba nzø lele. Inga ø chi ndoa ná nrŭ dhó kau ma, kpadhó familia nǎ nrŭ ma na ka ndima si kpa cho kpakpanga na ndiro kpa chi ø dza ma ndirigoti kpa dzi bbo ro dzi kʉ ná ritsi ndima dhó dza nǎ d’e.

⁴ Njati kpa e nyodyu na nga ró, kpa vʉ nanga nalo ka ndi liri kpa nǎ deni tsu bbo. Fø lo ka ndi liri kpa aro ro krʉ njinjí kpakpanga na ndiro kpa tu ndima nǎ deni d’e. Kpa njínji bbo naridho, kpa nzá ka ndima ba saa Biblia zødha dho, ibada ya familia dho, ndirigoti lod’radha dho ri. Nja saa na nzá kpa ka ndima si njudha dhi ngana ri dhonalo kpa njínji bbo ndiro ndima ba mbø bbo d’e inga nzɨ ndima vi ndima dhó njí ró. Njati kpa di rinji fø ró, kpa nzá ka ndima ba Yova dho le njínji le thí nǎ ro krʉ nari nǎ ro adi si ná hwè ro ri.

5. Klaus ma Marisa ma na dhó loroji nǎ ro ká ni ba ngba somo?

⁵ Bí kʉ ná loroji ridho nari kʉ njati ko di le ndí ronga dhi ritsi ne bbo ró, føri nzá ka ndi bbʉ hwè ro ko dho ri. Akonja Klaus ma, Marisa ma na ba fø lo nǎ ro ná somo. * Kpa chingʉe ndoa ná saa na, kpa ngʉ adi njínji bbo ndirigoti kpadhó ritsi ma ngʉe bbo ddi. Ro kpa nzá bangʉe bbʉbbʉ hwè ro ri. Klaus pori: “Kodhó ritsi dangʉe da kodhó lo jieri nanga djolu, føri dzá lodho ko nzá lingʉe miradi ro ko nji ndiro ko njinjí bbo Yova dho d’e ri. Ro kodhó maisha ro ngangʉe hwè na ri ndirigoti ri njengʉe ko nje.” Njaro ni ma njarie ri ddi nari kʉ le ndí ronga dhi ritsi nzɨ adi bbʉbbʉ kʉ ná hwè bbʉ ri. Njati rie fø ró nzɨ bbari ni thí bbʉ ni. Ni di nja nrŭ dhó bblo kʉ ná loroji nja ró, ri ka ndi kó ni tsotso ndiro ni ø nidhó lo thika fø lo djo d’e. Ya kwanza akonja kpetsikpa ka ndima ba Pi Yehoshafati dhó lo nǎ ro ná somo.

6. Pi Yehoshafati ká njingʉe njí ngbaribbai Mezali 3:5, 6 nǎ kʉ ná shauri na bí kʉ ná bbasødda singʉe lɨ ta ndi tsoro ná saa na?

⁶ Dza bai, nja saa na ká ni adi ni mbu bbo djǒ ró lo kʉ naribbai? Njati rie fø ró ni ka ni ba faida bbo Pi Yehoshafati dhó loroji nǎ ro. Pi, Yehoshafati dho ringangʉeni ndi nja Yuda nǎ nrŭ krʉ dhó salama djó nga! Ke ká njingʉe addu ndiro ndi b’o kpa ronga d’e? Yehoshafati njingʉe ngba ndi ka ndi nji nalo fø nrŭ tsɨ ronga b’odha dho. Ke chingʉe Yuda nǎ bba ndirigoti ke gbangʉe bbasødda tso 1 160 000 djolu. (2 Ny. 17:12-19) Luti, Yehoshafati bangʉeni bbo kpakpalo na. Waamoni ma, Wamoabu ma, Seiri dhi ngø tsɨ djó nrŭ ma na singʉe lɨ ta ke ma tsoro ndibbá nrŭ ma na ndirigoti ke dhó pidhinga tsena kʉ ná nrŭ ma na tso ro. (2 Ny. 20:1, 2) Pi Yehoshafati ká njingʉeri ngba?  Ke nzingʉeri Yova kó ndi tsotso ndirigoti ke li ndi kpakpa. Ke njingʉe nalo njunju Mezali 3:5, 6 (Azø) nǎ kʉ ná shauri na. Yehoshafati dhó nyenyenga dhi sala bani 2 Nyakati 20:5-12 nǎ. Fø sala ridho ke lingʉe ndi thí bbo Yova djo. Yova ká ngʉngʉe Yehoshafati dhó sala goti ngbaribbai?

7. Yova ká ngʉngʉe Yehoshafati dhó sala goti ngbaribbai?

⁷ Yova tingʉe lo Yehoshafati na Yahazieli ró dho kʉ ná mulawi chulu. Yova pongʉeri: “Nzɨ ni nji do, nzɨ ni bbari ni ronga ja ndirigoti aninja Yova dzá gødha nidhi lo dho.” (2 Ny. 20:13-17) Føri nga ngʉe vita le ngʉ adi nji ná chu ri! Føri nga ngʉe nrŭ ja nalo ri, ro ri singʉe Yova dhó ro. Yehoshafati lingʉe ndi thí Yova djo nari dho ke rrngʉe nga rr. Ke ma rangʉe nju ndima dhó mbubai na ná saa na, anziro nzá ke lingʉe kpakpa kʉ ná bbasødda ri, ro ke lingʉe nga dhó sø kʉ ná dyi ngo ná kpa. Yova nzá bbangʉe Yehoshafati ro ri; ro ke singʉe si ndima dhó mbubai djó.​—2 Ny. 20:18-23.

8. Dza bai ka ká ndima ba ngba somo Yehoshafati dhó loroji nǎ ro?

⁸ Dza bai, ni ka ni ba somo Yehoshafati dhó loroji nǎ ro. Ni dhó bbʉni ná daraka kʉ ni gba nibbá dza na nrŭ dhó lo tso, føri dho ni dho ringani ni njinjí kpakpanga na nja ni b’o nibbá familia ronga d’e. Nja saa na kpakpalo na ni bani ró, ni ka nidi riddi ni ka ni hwini fø lo tso ró ni ni ro. Ro nzɨ ni di ni thí li nidhó kpakpanga djo dhé. Fø nga ringana anidi rinzi Yova kó ni tsotso. Føri djolu pli, anidi sala nji ni thí nǎ ro krʉ nibbá le ma na. Anidi Yova dhó chutso ddadha ne Biblia ni zø ndirigoti kedzá tengenezo bbʉ ná vichapo ni zø nari chulu, ndirigoti aninjinjí ri nǎ ro ni ba ná shauri na. Nja nrŭ nanga nzá ka ndi jini ri njati ni vʉ nanga nalo tso nju Biblia nǎ lo na ró, ndirigoti kpa ka ndima pori ni djo nga ngbʉni ngbʉ. Kpa ka ndima pori mbø ka ndi liri nibbá familia ronga b’onib’o. Ro addinga Yehoshafati dhó loroji djo. Ke lingʉe ndi thí Yova djo ndirigoti ke dhongʉeri ndidhó njí ró. Yova nzá bbangʉe chí tøni ndi dho ná fø ke ro ri, ndirigoti ke nzá ka ndibbá ni ro maddi ri. (Zb. 37:28; Ebr. 13:5) Dza dhi nrŭ dho ká ringani ndima njí ngba lo ki ndiro ndima e hwè na d’e?

9. Isaya ma, kebbá le ma na djo ká ko ka ko po ngba lo?

⁹ Nabi Isaya ma ndibbá le ma na lingʉe Yova dzá njí anziro ndima dhó maisha nǎ. Isaya ngʉe nabi, ndirigoti ri njani nari kʉ kebbá le ma ngʉ fø njí ro nji ddi naribbai, dhonalo le ngʉ nzini “nabi.” (Isa. 8:1-4) Isaya ma ndibbá le ma na lingʉe Yova dho le madha bbʉ nari anziro ndima dhó maisha nǎ. Kpa bba bblo kʉ ná loroji i ddoro kʉ ná dza dhi nrŭ dho!

10. Biblia nǎ unabi dza dhi nrŭ zø nari ká ka ndi kó kpa tsotso ngbaribbai ndiro kpa njinjí bbo Yova d’e?

¹⁰ I ddoro kʉ ná dza dhi nrŭ ka ndima dyø Isaya ma ndibbá le ma na dhó loroji kpakpanga na ndima njínji Yova dho nari chulu. Kpa ka ndima li ndima thí Yova djo, Biblia nǎ unabi ndima zø ddinga nari chulu ndirigoti ri njini nari ndima nja nari chulu. * (Tit. 1:2) Kpa ka ndima ddinga ndima ka ndima nji nalo djo  ndiri na ndima kó Biblia nǎ unabi njini nari tsotso d’e. Loroji na, kpa ka ndima kó Yesu dhó unabi tsotso ndiro ri njini d’e, føri kʉ le d’ra pidhinga dzá hwè lo i dz’ djó nrŭ krʉ dho mwisho si nari nji. (Mt. 24:14) Dza dhi nrŭ di Biblia nǎ unabi njini nari nja ró, kpa ka ndima vʉri ndima njinjí bbo Yova dho.

11. Prisila ma Akila ma na ká ngʉ adi ngba njínji, ndirigoti addudho?

¹¹ Jadda kʉ ná dza dhi nrŭ ka ndima ba somo Prisila ma Akila ma na dhó loroji nǎ ro, føri ngʉe Roma nǎ ngʉ di ná wayaudi. Kpa rrngʉe hwè lo i Yesu djo nari goti kpa ngʉngʉe Wakristo. Kpa nanga jingʉeni ji ndima ngʉe na ná maisha dho. Ni mai ringʉe fø ro kpadhó maisha thika øngʉeni chʉ, Pi Klaudio pongʉeri Wayaudi krʉ rárá Roma nǎ ro ná saa na. Anja ngbaribbai ma fø lo ka ndi nzáe Akila ma Prisila ma na thí nari. Kpa ka ndima bbae ndima dhó familia ma, ndima dhó dza ma, ndirigoti ndima rá di ø dza na. Fø kpakpalo ká chongʉe kpa ronga tso nzɨ kpa njinjí bbo Yova dho? Ni churi naribbai, fø lo nzá chongʉe kpa ronga tso ro ri. Korintho na Akila ma Prisila ma na singʉe saa na, kpa ngangʉe ndima singʉe nǎ ná ø kutaniko nǎ nrŭ tsotso kodha tso, ndirigoti kpa ngʉ njinjí ddinga Paulo ma na ndiro ndima li Korintho nǎ le-djoi kpakpa d’e. Luti kpa rangʉe ra d’inga na ndiro ndima rá lod’ra uhitaji dhi ngana d’e. (Mdo. 18:18-21; Ro. 16:3-5) Kpa ngʉ njínji bbo Yova dho nari dho kpa ngʉe hwè na.

12. Dza dhi nrŭ ká ka ndima li kiroho nǎ miradi ndima nji addudho?

¹² I ddoro kʉ ná dza dhi nrŭ ka ndima dyø Prisila ma Akila ma na dhó loroji, Pidhinga dzá njí ndima li anziro nari na. Bblo le ka le tilo miradi djo ná saa kʉ nzá le d’e ndoa chi ro. Ndoa chi ná nrŭ di longa vʉ ddinga ró ndirigoti kpa nji fø muradi ddinga ró, kpa ka ndima njari Yova ndima tsotso kó ko. (Muh. 4:9, 12) Akonja Russell ma Elizabeth ma na dhó  loroji. Russell pori: “Ndoa ko chi nari nji, ko tingʉe lo Yova dho ko ka ko nji ná njí djo.” Elizabeth pori: “Ko tingʉe lo fø lo djo anziro ndirigoti ko løngʉe mupango luti, ko ungʉeri nari kʉ ko vʉ nanga nalo nzá ka ndi cho ko tso ro kodhó miradi ró ri.” Russell ma ungʉeri ndima rá njínji Micronésie nǎ uhitaji dhi ngana Elizabeth ma na.

13. Zaburi 28:7 ripo naribbai, ko li ko thí Yova djo ró ká ngba lo ka ndi njini?

¹³ Ddiddi Russell ma Elizabeth ma na bbai, bí kʉ ná dza dhi nrŭ adi rili ndima dhó maisha e dhʉdhʉ ndiro ndima kó nja nrŭ tsotso lod’radha dhi njí kana ndirigoti lo ngaddidha dhi njí kana d’e. Njati dza dhi nrŭ li muradi ndima nji ndirigoti kpa njiri ddinga ró, kpa adi faida ba bbo ri nǎ ro. Kpa ka ndima nja ngbaribbai ma, Yova ndima tsotso kó nari, kpa ka ndima li ndima thí bbo Yova djo ndirigoti kpa ka ndima ba hwè bbo.​—Azø Zaburi 28:7.

14. Mutume Petro ma ndibbá le ma na, ká lingʉe ndima thí Matayo 6:25, 31-34 nǎ kʉ ná tsodha djo ngbaribbai?

¹⁴ Dza dhi nrŭ ka ndima ba bblo kʉ ná somo mutume Petro ma ndibbá le ma na dho loroji nǎ ro. Mutume Petro ma njungʉe Yesu ma na ya kwanza nari goti, b’lo bi da aza djolu ro, ke vʉngʉe bbo na mana kʉ nalo nanga. Petro ngʉ adi ndibbá dza nǎ nrŭ dhó lotso gba bbe pɨdha dhi njí nǎ ro. Yesu nzingʉe Petro nja ndi si krʉ saa ró le njínji nari dho ro, ke ngʉ ngaddi føri ka ndi bbʉe ndibbá familia djo ná matokeo djo. (Lu. 5:1-11) Petro vʉngʉeri ndi mba Yesu goti lod’radha dhi njí dho. Ke vʉngʉe lo nanga nyodyu na! Ko ka ko uri nari kʉ, Petro bbá le nzɨ ngʉ adi ndibbá ke vʉ nanga nalo ro gʉ ri. Biblia ripo Yesu gangʉe nari goti, Petro bbá le mbangʉe Petro goti ddikpa saa djo. (1 Ko. 9:5) Bbʉbbʉ dhé, fø isɨle ngʉe bblo kʉ ná Mukristo nari dho, Petro ka ndi tielo nga ro do ro Wakristo kʉ ná kpetsikpa ma, isɨ nrŭ ma na dho, ndi shauri bbʉ ná saa na. (1 Pe. 3:1-7) Petro ma ndibbá le ma na ungʉe Yova tsoni djo ná i tsodha u, Yova ka ndi kó ndima tsotso njati ndima li Pidhinga dzá njí anziro ndima dhó maisha na ró.​—Azø Matayo 6:25, 31-34.

15. Tiago ma Esther ma na dhó lo nǎ ro ká ni ka ni ba ngba somo?

¹⁵ Njati ni e ø chi ndoa ná nrŭ ró, ni ká ka ni rá nidhó lod’radha dhi njí na anzi ngbaribbai? Ni ka ni neri ni chulo ro nja kʉ ná dza dhi nrŭ dhó ro. Loroji na, ni ka ni zø kodhó vichapo nǎ kpakpa ka ndi li le nalo. Ri nǎ kʉ ná nja lo kongʉe Tiago ma, Esther ma na, Brésil nǎ kʉ ná ddikpa dza dhi nrŭ tsotso ndiro ndima rá nga tsotso ko bbo uhitaji kʉ ná ngana d’e. Tiago pori: “Ko di Yova ndidzá njí dhi kpa tsotso kó nari djó lo zø ró, ko maddi adi ko mbu ngba tsotso Yova ka ndi kó naribbai.” Kpa tsɨngʉe Paraguay na, kpa rangʉe lod’radha dhi njínji Portigale dhi luga nrŭ ti ná ngana 2014 djó ro. Esther pori: “bbo ko jirie ná andiko kʉ Waefeso 3:20. Bi ina ko adi fø lo dzá bbʉbbʉnga nja Yova dzá njí kana.” Paulo ndingʉe Waefeso nǎ nrŭ dho ná barua nǎ Yova tsoni ndi si kodhó lo tso gba ko nziri nanga djolu. Bi ina fø tsodha e bbʉbbʉ.

16. Ø chi ndoa ná dza dhi nrŭ ká ka ndima ba shauri ie dhó ro, ndima dhó muradi djo ndima ngaddi ná saa na?

 ¹⁶ Ø chi ndoa ná nrŭ ka ndima ba faida ni ndima thí li Yova djo ná nja nrŭ dhó lo nǎ ro. Nja kʉ ná dza dhi nrŭ ka ndima nji ddo bí krʉ saa ró le njínji Mungu dho ná njí kana. Njati rie nidhó miradi djo ni ngaddi ri ró, ako shauri fø kpa tso. Føri kʉ ni thí ni li Yova djó nari ni ka nidho ná nja chu. (Mez. 22:17, 19) Wazee ma ka ndima kó ø chi ndoa ná nrŭ tsotso ddi nja ndima li kiroho nǎ muradi ndima nji d’e.

17. Klaus ma Marisa ma na ká bangʉeni ngba lo nǎ ndirigoti ko ká ba ngba somo kpadhó loroji nǎ ro?

¹⁷ Nja saa na, ko ka ko vʉri ko njínji bbo Yova dho ddikpa chu nǎ, ro ke ka ndi ddá chutso ko dho ko njínji nja chu nǎ. Føri kʉ Klaus ma, Marisa ma na bangʉeni na nalo. B’lo kpa nji cho gbo ndoa kana nari goti, kpa rangʉe dza chidha dhi njí tsotso ko Finlande nǎ tawi na. Ni mai ringʉe fø ro, kpa dho le pongʉeri fø lu nzɨ kpa si bi ro nji 6 djolu ri. Anziro kpa mbungʉe ndima bʉ thí bʉni naribbai. Ro lo thika øngʉeni ø, le nzingʉe kpa ndima rá Arabe dhi luga jifunza, ndirigoti kpadjo kpa kʉ hwè na ndima njínji krʉ saa ró Arabe dhi luga nrŭ ti ná ngø nǎ nari dho. Njati Marisa di ngaddi njinjingʉeni nalo djo ró, le adi ripo: “Ma do ngʉ adi nji ma dho ringangʉeni ma nji nzá ro ma d’erie nji ná njí nari dho ndirigoti ma dhó lo ungʉeri ma li ma thí krʉ Yova djo. Ro ma njangʉe Yova ko tsotso kó nari nzá djo ma ddie nga ná chulu. B’lo ma nja fø lo nari goti madhó udha ngʉngʉe kpakpa Yova djo.” Fø loroji ridho naribbai, ni ka ni uri nari kʉ Yova ka ndi le ni ronga le njati ni li ni thí ke djo ni thí nǎ ro krʉ ró.

18. Dza dhi nrŭ ká ka ndima nji addu ndiro ndima dhori ndima li ndima thí Yova djó d’e?

¹⁸ Ndoa kʉ Yova dhó ro si ná zawadi. (Mt. 19:5, 6) Ke njiri ndoa chi ná nrŭ nji fø zawadi hwè. (Mez. 5:18) Ø chi ndoa ná nrŭ, anidi nidhó maisha nǎ ni nji nalo nanga nene. Ni nji nalo ká ridho ni Yova dho ró si ná fø zawadi nja mana na nia? Anidi loti Yova na sala chulu. Anidi utafiti nji kedzá lo nǎ ro ndirigoti ni njínji ri na nidhó maisha nǎ ni bani na ná njonjo kʉ ná kpakpalo kana. Anidyø Yova bbʉ nidho ná shauri. Ni ka ni uri u nari kʉ ni sie hwè na njati ni li Yova dzá njí anziro nidhó ndoa kana ró!