NGA. Føga Daudi ndi ná føri ngʉe bbʉbbʉ lo ndirigoti ngbà ka ndi njieni ná lo.

Addinga i verse ma, fø di ná verse ma na nǎ ke ndingʉe ná i lo djo: “Ma madha bbʉ ni ró dho dho dyi chulu theinga dho ndirigoti má, ma nji ná koddo ró njínji ddo ró nzinzi.” “Ma madha bbʉ ni dho ma thí nǎ ro krʉ, E Yova madzá Mungu, ndirigoti ma ni ró dho ma theinga dho.” “Ma si madha bbʉ ni ró dho dho theinga dho.”​—Zb. 61:8; 86:12; 145:1, 2.

Fø lo Daudi ndingʉe ná saa na, ke nzɨ ngʉ riddi ndi ro nzá ka ndi dhee ri. Ke chungʉeri chu Yova d’rangʉeri b’lo chenga dhi ndrŭ ka ndima cheeni ché, ndirigoti Daudi maddi chungʉeri chu ndi maddi kʉ chenga dhi ke. (Mwa. 3:3, 17-19; Zb. 51:4, 5) Føri goti ke chungʉeri chu, u tso Mungu ungʉe ná kpetsi kpa, føri ngʉe Abrahamu ma, Isaka ma, Yakobo ma na krʉ chengʉeni che. Føri dho Daudi chungʉeri chu ndi maddi ka ndi dhee dhe. (Zb. 37:25; 39:4) Ro, Zaburi 61:8 nǎ ke ndingʉe ná fø lo na ke ngʉ ridho ndi kʉ ù na, ndirigoti ndi vʉri vʉ ndi bbʉ madha Mungu dho theinga dho føri na mana kʉ ndidhó maisha krʉ nǎ.​—2 Sa. 7:12.

Nja saa na, Daudi ngʉ adi ngandi ndidhó maisha nganga nǎ da lo djo, ddiddi ko ka ko njari Zaburi 18, 51 ndirigoti 52 nǎ nari bbai. Zaburi 23 nǎ Daudi nzingʉe Yova chutso ddadha ma, le rongachʉdha ma, le rongab’odha ma na bbʉ ná mia ró rø ná ke. Daudi ngʉe ddiddi mia ronga b’o ná ke bbai ndirigoti ke jingʉeri ndi njinjí Mungu dho ‘ndidzá maisha krʉ nǎ.’​—Zb. 23:6.

Anonga nari kʉ, Yova i ngʉ chutso ddá Daudi dho nja ke ndi krʉ ndi ndingʉe ná lo d’e. Ke ndingʉe ná nja unabi ka ndi sie njini cho bí goti. Loroji na, Zaburi 110 nǎ, Daudi ndingʉe lo ndidzá Bboke ka “ndi sie di [Mungu] thó thadjó nga ladjó ro” ra nǎ ndirigoti ndi ba bbo kʉ ná kpakpanga nari djo. Nde, addu njidha dho? Ndiro ndi li Mungu dhó mbubai ndidhó bbonga tsena ndirigoti “ndi d’i lo dz’ djó ndrŭ tsɨ djo” d’e. Daudi ngʉe Masiya dhó tate ndirigoti Masiya ka ndi nyoe pi ra nǎ ro ndirigoti ndi ngʉ “kuhani theinga dho.” (Zb. 110:1-6) Yesu pongʉeri nari kʉ, Zaburi 110 nǎ kʉ ná fø unabi le ndingʉe ndi djo ndirigoti ri ka ndi sie njini gosi si ná saa na.​—Mt. 22:41-45.

Bbʉbbʉ dhé, Daudi dho roho ddangʉe chutso ndiro ndi ndí lo ndidhó saa djo ndirigoti gosi ná saa na ndi si kʉ ga ndiro ndi bbʉ madha Yova dho theinga dho d’e ná saa djo maddi. Fø lo ko tsotso kó ko famu Zaburi 37:10, 11, 29 nǎ le d’ra ná lo ka ndi njieni Waizraeli dhó saa na ndirigoti ri ki si kʉ njini Mungu nji ná tsodha si kʉ njini gosi ná saa na ró maddi.​—Anja i gazeti nǎ i djǒ ripo ná lo nǎ paragrafu 8 “Ni sie ma na Paradiso nǎ.”

Føri dho Zaburi 61:8 ma, fø di ná nja verse ma na ridho nari kʉ, Waizraeli dhó saa na Daudi jingʉeri ndi má Yova kpø ndidhó dhe djo. Ndirigoti ri gosi ná saa na, le si kʉ Daudi ga ró ká ke si kʉ ngbá lo nji nari nganga dhǒ.