1. Dhe ndi dhe nari njí ká Yesu pongʉe addu ndi kuso ngʉe ná bandi dho? (Luka 23:39-43)

 YESU ma, ndi kuso aro kʉ ná bbabandi ma na nzani nza ndima si cheni nari ndima b’o ro. (Lu. 23:32, 33) Fø bbabandi aro ro krʉ ngʉ chelo ti Yesu djo dhonalo kpa ngangʉe ke unakpa ri. (Mt. 27:44; Mk. 15:32) Ro, luti kpa kana ddi ke lengʉe ndidhó ngaddidha thika le. Ke pongʉeri: “Bbʉbbʉ dhé ma ripo ni dho njʉ, ni sie ma na Paradiso nǎ.” (Azø Luka 23:39-43.) “Ra nǎ Pidhinga” djo Yesu ngʉ d’ra ná lo fø bandi ungʉe u nari ro nzá ddikpa lo ma dho ddi ri. Ndirigoti Yesu nzá pongʉeri ro fø ke dho ndima sie ke na, ra nǎ Pidhinga nǎ ri. (Mt. 4:17) Yesu ngʉ loti gosi ná saa na si e dz’ djó ná Paradiso djo. Fø ká ko ripo addudho?

2. Le lengʉeni ná bandi ngʉe Muyaudi nari ká addu dhǒ?

² Ri njani nari kʉ le lengʉeni ná bandi ngʉe Muyaudi nari bbai. Dhonalo fø bandi pongʉeri ndi lai ke ni: “Ni ká adi Mungu do ro nji karrnø ma nzɨ ddi, dhonalo ni djó ma lod’ini føri bbai i ró?” (Lu. 23:40) Wayaudi ngʉ adi ddikpa Mungu má, ro kpa kuso lú ngʉe ná ndrŭ tsɨ ngʉ adi bí kʉ ná miungu má. (Kut. 20:2, 3; 1 Ko. 8:5, 6) Njati fø bbabandi ée nga Wayaudi ró kpa ka ndima dhueri i, “Ni ká adi miungu do ro nji karrnø ma nzɨ ddi?” Føri kina Yesu le chongʉe “Izraeli bbá dza nǎ vivi ná chembø dho” nga nja ngʉe ná ndrŭ tsɨ dho ri. (Mt. 15:24) Waizraeli chungʉeri chu nari kʉ Mungu si dhedhe ná ndrŭ gaga. Le lengʉeni ná bandi ka ndi ée chu ndi chungʉe fø lo ro dhonalo ke tso nǎ lo ridho nari kʉ, Yova si Yesu gaga nja ndi é Mungu dhó Pidhinga nǎ Pi d’e. Føri kina, ke nganga ngʉe na ná ngab’odha kʉ, Mungu si ndi gaga.

3. Paradiso djo Yesu ngʉ loti le lengʉe ná bandi dho ro, ká ngbá lo ka ndi sie fø bandi djǒ na? Aturinga. (Mwanzo 2:15)

³ Muyaudi ndi ngʉe nari dho, le lengʉeni ná bandi ka ndi ée chu ndi chungʉe lo ro Adamu ma, Eva ma na djo ro,  ndirigoti Yova lingʉe kpa nǎ ná Paradiso djo ro. Føri dzá lo dho fø bandi ka ndi ée bblo ndi famungʉe lo ro Yesu ngʉ loti ndidho djo ná paradiso djo ro, nari kʉ ri sie i dz’ djó bblo kʉ ná í.​—Azø Mwanzo 2:15.

4. Yesu pongʉe bandi kana ddi ke dho ná lo ká adi ko cho ko ddinga addu djo?

⁴ Yesu pongʉe fø bandi dho ná lo ka ndi cho ko, ko ddinga ngbaribbai ma maisha sie Paradiso nǎ nari djo. Bbʉbbʉ dhé, Pi Sulemani dhó pidhinga tsena ngʉe ná ngoi ka ndi kó ko tsotso ko chu nja lo Paradiso djo. Ndirigoti Biblia ripo nari kʉ, Yesu kʉ bbonga na Sulemani djolu nari dho, ke ma, ndi lai ndi si pinyo na ná kpa ma na si rili i dz’ djó nga é bblo pli. (Mt. 12:42) Bbʉbbʉ dhé, “nja chembø” nyǒ ndima chu ndima dhó lo ká u addu ndiro ndima tsu Paradiso na d’e ná fø lo ka ndi tho bbo.​—Yoh. 10:16.

5. Ni ká riddi Paradiso nǎ maisha sie ngbaribbai?

⁵ Paradiso nǎ maisha sie nari djo ni di ngaddi ró, ká addu adi si ni djǒ na? Njaro, ni adi ngaddi bblo pli kʉ Edeni dhi í bbai ná nga djo. (Mwa. 2:7-9) Njaro ni djǒ na Mika dhó unabi pongʉeri Mungu dzá ndrŭ si di “ndima dhó mizabibu tsu tsena ndirigoti ndima dhó figi tsu tsena nari adi si.” (Mik. 4:3, 4) Njaro ni djǒ na Biblia pori nyo si kʉ e bbo nari adi si. (Zb. 72:16; Isa. 65:21, 22) Njaro ni ka ni ddi ni bblo pli kʉ ná fø í nǎ, pi djó bblo pli kʉ ná nyo kʉ djó ná mesa tso ró ni di ro. Ni ka ni ddi ni bblo pli kʉ ná hewa nǎ, bblo kʉ ná tsó ma, maua ma na ni ngø ro. Bbʉbbʉ dhé, føri kina ni ka ni ddi nidhó familia ma, bbakau ma, gaga ná ndrŭ ma na ddinga ni nga gbo ro. Ro, føri krʉ kʉ nyo dhé. Bbʉbbʉ dhé, fø ritsi si njini nji i dz’ djo. Føri kina, Paradiso nǎ ko sie hwè ko ba dho ná njí na.

6. Paradiso nǎ ká ko si ngbá njínji? (Anja ji.)

⁶ Yova nongʉe ko ndiro ko di hwè ba kodhó njí dho d’e. (Muh. 2:24) Bbʉbbʉ dhé, cho løfu ddi Kristo si pinyo nari kana ko sie njí na bí. Bbo mbudha ka lú si da ná ndrŭ ma, gaga ná mamilioni sie ná ndrŭ ma na dhó lo si nyo ma, ru ma, didha dhi nga ma na u. Nja ko bbʉ fø ritsi fø ndrŭ dho d’e, ri si ngani ko é hwè na ko nji ná bí kʉ ná njí dho. Adamu ma ngʉ Paradiso nanga bbɨ nari bbai, ko maddi sie paradiso nanga bbɨdha dhi pendeleo na. Føri kina addinga gaga ná mamilioni kʉ ná ndrŭ dho le longaddi nzá ndima chulo bbo Yova ma, ndidhó kusudi ma na djo ndirigoti chechengʉeni ná chi tøngʉeni Yesu njí ná kpa dho le longaddi Yesu djo, ná fø lo nǎ ro ko si kʉ ba ná hwè djo.

7. Ko ká ka ko u ngbá lo ndirigoti addudho?

 ⁷ Ko ka ko uri u nari kʉ, Paradiso nǎ ko si kʉ di ngoi na, ko sie kodhó lo u ná ritsi na krʉ ndirigoti lo si kpeni bblo. Ká addudho? Dhonalo Yova ngbaribbai ma, kodhó maisha sie le Ddù dhó pidhinga tsena ná lo dhǒ ko dho. Ko ka ko nja fø lo Pi Sulemani dhó pidhinga djo tilo ná lo nǎ.

8. Daudi ndingʉe Zaburi 37:10, 11, 29 nari goti, ká ri nǎ lo njingʉeni ngbaribbai? (Anja i gazeti nǎ “Kodhó lo adi zø ná kpa dhu ná lo.”)

⁸ Pi Daudi dho roho ddangʉe chutso nja ndi ndí ngbaribbai ma, maisha sie nyodyu dhi chi tøni ná pi si di pi dhi kiti djo ná saa na nari djo. (Azø Zaburi 37:10, 11, 29.) Bí ina ko adi Zaburi 37:11 zø, nja ko tilo nja ndrŭ dho gosi ná saa na sie ná Paradiso djo d’e. Ko kʉ bblo kʉ ná sababu na ko tilo fø andiko djo dhonalo Yesu dhó Ngøtsi djó Mahubiri nǎ ma ke tingʉe lo ddi fø andiko djo, ke dhongʉeri fø andiko si njini gosi ná saa djo. (Mt. 5:5) Ro, Daudi dhó lo maddi ngʉ ngbaribai ma, maisha sie Pi Sulemani dhó pidhinga tsena nari dhǒ. Sulemani ngʉ pinyo Izraeli djo ná saa na, Mungu dzá ndrŭ ngʉe pekee kʉ ná ngoi na ndirigoti ndrŭ ngʉe hwè na “tsiba ma, tiidda ma na ngʉ d’a” nǎ ná ngø nǎ. Mungu pongʉeri: “Njati ni rá anzi madhó sheria chulu ni bbi nari na ró . . . , ma si rili ngoi é ngø nǎ, ni si ddo nzá ddikpa ie ma ta do ni na ddi ro. (Law. 20:24; 26:3, 6) Fø tsodha njingʉeni nji Sulemani dhó pidhinga tsena. (1 Ny. 22:9; 29:26-28) Ndirigoti Yova tsongʉeni d’i miungu má ná che kʉ ná ndrŭ ki ro “nga sie ri.” (Zb. 37:10) Føri dzá lo dho Zaburi 37:10, 11, 29 njingʉeni nji drrdrr ndirigoti ri ki si njini gosi ná saa djo.

9. Pi Sulemani dhó Pidhinga djo ká Sheba nǎ isɨ pi pongʉe addu?

⁹ Sheba nǎ ngʉe ná isɨ pi rrngʉe lo Sulemani ngʉe pi ná saa na ngʉe Izraeli nǎ ná ngoi ma, ndrŭ tsɨ ngʉ di bblo nari ma na djo. Fø pi tungʉeni ndi ngʉe ná nga nǎ ro, ndi rá kpø Yerusalemu na ndiro ndi nja fø lo ndi ndi ro d’e. (1 Fa. 10:1) B’lo ndi nja  Sulemani dhó pidhinga tsena kʉ ná lo krʉ nari goti le pongʉeri: “Ma dho nzá ndrŭ d’rari ndi lai ró ri . . . Hwè dhi ri kʉ nidzá ndrŭ ma, nidhó njí dhi kpa ma na krʉ saa ró ndima tøni ni njí ró ndirigoti nidhó nyodyu ndima rr ro!” (1 Fa. 10:6-8) Ro, Sulemani dhó pidhinga tsena ngʉe ná fø ngoi ngʉe gosi ná saa na, Yova si bbʉ ndrŭ kpari dho ndidhi Ddùna Yesu dhó pidhinga tsena ná ngoi ró ji.

10. Yesu ká dada Sulemani djolu ngbá chu na?

¹⁰ Yesu dada Sulemani djolu krʉ chu na. Sulemani ngʉe nzá kaka ná ke nari dho, luti ke njingʉe bbo chenga nari bbʉngʉe kpakpalo Mungu dzá ndrŭ dho. Ro, Yesu kʉ kaka ná Pi nzɨ ndi adi kosa ro nji ro. (Lu. 1:32; Ebr. 4:14, 15) Ngbà mai ndi bangʉeni kpakpa bbo tso o ná lo na ro ke tøngʉeni chi dhé Mungu dho. Kristo dhongʉeri nari kʉ, ndi nzɨ ke chenga ro nji ri inga che kʉ ná lo ka ndi njí ndidhó Pidhinga tsena ndrŭ ró ná lo nji ri. Bbʉbbʉ dhé, ke kʉ bblo pli kʉ ná Pi.

11. Yesu ma ká si kʉ pinyo ie ma na?

¹¹ Yesu ma si pinyo ndi lai 144 000 kʉ ná kpa ma na nja ndima b’o ndrŭ tsɨ ronga ndirigoti ndima liri Yova dhó kusudi njini dz’ djo d’e. (Ufu. 14:1-3) Føri kʉ, nzadha tso ndima vengʉe i dz’ djó ndima ngʉe ro ná kpa, føri dzá lo dho kpa dho ri sie sʉsʉ ndima famu i dz’ djó ndrŭ adi bani na ná kpakpalo. Ro, d’ʉ ká 144 000 kʉ ná kpa si addu nji?

12. Yova ká si kʉ ngbá njí bbʉ 144 000 kʉ ná kpa dho?

¹² Yesu ma, pi ndima si nyo na ná kpa ma na dhó njí sie bbo Sulemani dhó njí ngʉe ná nga djolu. Sulemani ngʉ mamilioni kʉ ná ndrŭ ronga b’o ndidhó pidhinga tsena inga ndibbá ngø nǎ dhé. Ro, Mungu dhó Pidhinga nǎ si pinyo ná kpa si mamilioni djolu da ná ndrŭ ronga b’o dz’ djolu gble. Bbʉbbʉ dhé, Yova bbʉ bblo pli kʉ ná pendeleo 144 000 kʉ ná kpa dho!

13. Yesu lai pikpa dhó njí ká sie addu?

¹³ Yesu bbai, 144 000 kʉ ná fø kpa si kʉ e pikpa ndirigoti bbakuhani. (Ufu. 5:10) Musa dhó sheria tsena bbakuhani dhó bbo na mana ngʉe ná njí ngʉe ndima b’o ndrŭ ronga kimwili nǎ ndirigoti kiroho nǎ ndiro ndrŭ kana nga é chøchø Yova na d’e. Sheria ngʉe “gosi ná saa na si njini ná bblo loroji,” føri dzá lo dho ko ka ko pori gosi ná saa na, Yesu ma, pi ndima si nyo na ná kpa ma na si ndrŭ ronga b’o kimwili nǎ ndirigoti kiroho nǎ ndiro ndima kana nga é chøchø Yova na d’e. (Ebr. 10:1) Ko rib’o ko nja ngbaribbai ma fø pikpa ma, bbakuhani ma na si kʉ loti ndima dhó pidhinga tsena dz’ djó kʉ ná ndrŭ na nari. Njati rie ngbá lo ma Yova kpe ró, ko ka ko uri u nari kʉ gosi ná saa na sie i dz’ djó ná Paradiso nǎ ndrŭ si kʉ ndima dhó lo u ná chutso ddadha ba krʉ.​—Ufu. 21:3, 4.

14. Yesu djoi ma kana ká e ngbá kau “nja chembø” na?

¹⁴ Ndima si pinyo na ná kpa Yesu nzingʉe “nga bí kʉ ná mia.” (Lu. 12:32) Føri kina ke tingʉe lo nja kundi djo maddi, ná fø kpa ke nzingʉe “nja chembø.” Fø kundi aro sie ndima tso gba ddi. (Yoh. 10:16) Njʉ, fø kundi aro adi njínji ddinga, ndirigoti Paradiso ma i dz’ si ngʉ ná saa na kpa sie ddinga dhé ndima njínji ro. “Nga bí kʉ ná mia” sie ra nǎ ndirigoti “nja  chembø” si di hwè na theinga dho i dz’ djó. Ro, njʉ “nja chembø” ka ndima njí ndiro ri kaka ndima si di Paradiso nǎ d’e ná lo ro kʉ thé.

15. (a) “Nja chembø” ká adi Yesu djoi tsotso kó ngbaribbai? (b) Botiki nǎ kʉ ná le-djo dhó loroji ká ko ka ko dyø ngbaribbai? (Anja ji.)

¹⁵ Le lengʉeni ná bandi dhengʉe nzá ndi d’e saa ba nja ndi po mbai Yesu njingʉe ndi dho ná lo dho ro. Ro, njʉ ko, “nja chembø” ko e mbai ko ka ko po Yesu dho ná chu na bí. Loroji na, ko adi mbai po ke dho ke djoi ché na le d’ri ná kpa tsotso ko kó nari chulu. Yesu pongʉeri ndi si lod’i chembø djo ndi djoi ró kpa njingʉe ná lo ró ro. (Mt. 25:31-40) Ko ka ko kó Yesu djoi tsotso hwè na ko lod’ra ndirigoti wanafunzi le ndrŭ nji ná njí ko nji nari chulu. (Mt. 28:18-20) Føri dho i ko adi kpakpanga nji ko chu funzo ko ongoza na ná ritsi na njínjidha bblo, føri i kʉ buku Anji Maisha Hwè Theinga Dho! ro mai. Rie nzá ni d’e funzo ro ba ró, aliri ri é nidhó muradi ni zønga bí kʉ ná ndrŭ na, ngbà ri ka ná ngatsi.

16. Njʉ ká ko ka ko njí addu ndiro ko tayarisha ko Mungu dhó Pidhinga tsena didha dho d’e?

¹⁶ Ri nzá ngani ko b’ori Paradiso i si vi ndirigoti ko ve kodhó nyi thika le Yova ji nari bbai ri. Ringani ko njí kpakpanga ko é chi ko tso nǎ lo na, ko nji ná lo na ndirigoti ko é kiasi na kodhó maisha nǎ. Ndirigoti ringani ko di tøni chi Yova dho, ko lai ndoa dhi le dho ndirigoti ko lai Wakristo dho. Njati njʉ ko di Mungu dzá yadha dyø bblo go ko kʉ che kʉ ná i dz’ djó ro ró, Paradiso nǎ ri dyødha sie sʉsʉ ko dho. Ringani ko njí kpakpanga ko é ko ko tayarisha Paradiso nǎ nga dho nari dhǒ ná nyi na. Anja i gazeti nǎ i djǒ ripo ná lo “Ni ká kʉ tayari nì nja ‘dz’ si che’ ni dho d’e?”

17. Ri ká ngani ko bbá drrdrr ko njingʉe ná chenga di ko nanga d’o? Aturinga.

¹⁷ Ringani ko bbá kosa dhi ri ko ko mbu drrdrr ko njingʉe ná chenga djó nari tso maddi. Bbʉbbʉ dhé, ri nza ngani ko di “chenga nji ndana” le ødha dhi be dzá lo dho ko zø si njini nì nari dho maddi ri. (Ebr. 10:26-31) Ko ka ko uri u nari kʉ, njati rie bbʉbbʉ ko leeni kodhó bbo chenga  nǎ ro ri ró, ndirigoti ri é ngbà ko nzienga Yova tso ndirigoti ngbà wazee koe ko tsotso ri ró, Yova njie ko zø nji bbo chu na. (Isa. 55:7; Mdo. 3:19) Ano Wafarisayo ni Yesu pongʉe ná i lo nga: “Ma nzá si chølo dhi ndrŭ nzi ri, ro chenga dhi ndrŭ.” (Mt. 9:13) Le ødha dhi be kʉ kpakpanga na nja ndi sa kodhi krʉ kʉ ná chenga sa d’e.

18. Yesu kuso dhengʉe ná fø bandi ma na ká ni ka ni jiri ni ká si loti addu djo?

¹⁸ Addinga Yesu ma ngʉ loti na ná bandi na ni loti Paradiso nǎ nari djo. Bbʉbbʉ dhé, ni krʉ mbai po Yesu bbʉngʉe ndi le ødha dhi be nari dho. Ni ka ni dhuri ke tso ke d’ra Yesu dhó dhe njí njingʉeni ná lo ndirigoti ngbaribbai ma ke mbungʉe ndi Yesu ngʉngʉe ndidhó logoti ro nari. Ke ka ndi dhuri ni tso ngasini ná saa na ká ni ngʉ ishi ngbaribbai ma nari. Fø kpetsi ke bbai di ná ndrŭ dho le Biblia nǎ longaddi nari sie ddikpa bbo pendeleo!​—Efe. 4:22-24.

19. Paradiso nǎ ká maisha ro sie che nga addu djotsina? (Anja ri chuti ji.)

¹⁹ Paradiso nǎ nga maisha ro sie che ri. Ko kuso lú kʉ ná ndrŭ krŭ sie bblo kʉ ná ndrŭ ndirigoti ko krʉ sie bblo kʉ ná njí na. Fø lo krʉ djolu da nari kʉ ko krʉ si kodhi ra nǎ Baba chu bblo ndirigoti ko si hwè ba ke bbʉ ko dho ná ritsi nǎ ro. Krʉ ddo ró ko ka ko chulo ke djo chulu ná ritsi sie bí dhonalo nononi ná ritsi djo ko si chu ná lo ma sie bí ddi. Ko ishi ná ngatsi i kodhó jidha maddi si dhidhi Mungu djo. Ko adi mbai po bbo Yova ma, Yesu ma na dho kpa nji ko dho ná fø tsodha djotsina dhonalo kpa jiri ko si di theinga dho Paradiso nǎ!