1. Ko kana bí kʉ ná ndrŭ ká adi bani ngbá kpakpalo na?

 NI KÁ lirie kiroho nǎ muradi ro ni nji b’lo, ro ri djo ni si nari i si ni dho kpakpa? b Rie fø ró ni nga kʉ ddiro ri. Loroji na, Philip jingʉeri ndi thɨ ngbaribbai ma ndi adi sala nji nari thika ndirigoti ndi di sala nji bí ina, ro sala njidha dho ke saa ba nari ngʉ adi si ke dho kpakpa. Erika lingʉe ndi nji ná muradi kʉ, nzɨ ndi di si retar lod’radha dhi njudha na, ro le ngʉ adi si retar dhé chøchø krʉ kʉ ná njudha na. Tomáš mbungʉeri bí ina ndi zø Bibla lu. Ke pori: “Ma nanga ro dhé nzɨ ngʉ adi jini Biblia zødha dho ri, ma mbungʉeri gbo ina, ro ma tso ngʉ adi si Walawi djo dhé ndirigoti ma ngʉ adi ri zødha tso bbabba.”

2. Ká addudho ri nzá ngani ko thí bʉni rie nzá ma ko tso d’e si ko lie kiroho nǎ ná muradi djó ri ró?

² Njati rie nzá ni tso d’e si ni lie ni njí ná muradi djó ri ró, nzɨ bbari ni thí bʉni. Bí ina sʉsʉ kʉ ná muradi djo ko tso si nari maddi adi saa u ndirigoti kpakpanga u. Ni riji ni tso si ni lie ná muradi djo ná føri ridho nari kʉ ni nja ni kana e Yova na ná kau mana na bbo ndirigoti ni jiri ni njinjí bbo ke dho. Yova adi ni nji ná fø kpakpanga nja mana na. Bbbbʉ dhé, Yova nzɨ rine ni njí ritsi nzá ka ndi ka ni dho ná ngatsi ri. (Zb. 103:14; Mik. 6:8) Føri dho rie muradi ni li ni nji ró, ali ngbà djo ni tso ka ndi si ná ri. Nde, b’lo ni li muradi nari goti ká ni ka ni njí addu ndiro ni tso si ri djo d’e? Akotilo ni ka ni njí ná lo ro djo.

3. Muradi djo sidha dhi ù na le kʉ bbo nari na mana ká kʉ bbo addudho?

³ Ri kʉ bbo na mana kʉ ná lo ni é nidhó muradi djo sidha dhi ù na bbo. Ddikpa ritsi dhi ù na kʉ ná ke adi kpakpanga nji bbo inga ke adi riji ndi njí klø ndiro ndi tso si ndidhó muradi djo d’e. Ddikpa muradi djo sidha dhi ù na le kʉ nari ko ka ko ddi bbú tsotso adi ko ndi si ndi rá ná ngana d’e ná vʉvʉ na. Nga di vʉ ná saa na bbú dya ná ke ka ndi sisi ndi e ra ná ngana. Ndirigoti nga di vʉ bbo ró ke ka ndi si tse. Føri bbai ko é ù na bbo ró ko ka ko si kodhó muradi djo lele. El Salvador nǎ David ró dho kʉ ná le-djo pori ɨ: “Njati ni é nì ddikpa ritsi njidha dhi ù na ró ni adi kpakpanga nji bbo, ni adi rine nzɨ ddikpa ritsi ma cho ni tso ro ddi nidhó muradi djo ni tso si nari ró.” Nde, ni ká ka ni njíri ngbǎ ndiro ni é fø ù na bbo d’e?

4. Ni ká ka ni nzinga ngbá lo djo? (Wafilipi 2:13) (Anja ji maddi.)

⁴ Anziri ni é nidhó muradi djo sidha dhi ù na bbo. Yova ka ndi liri ndidhó roho takatifu chulu ni é ù na bbo ni si nidhó muradi djo d’e. (Azø Wafilipi 2:13.) Nja saa na ko adi muradi li dho nari kʉ ko churi chu ringani ko njiri fø ndirigoti fø ko njiri nari kʉ bblo. Ro, njaro ko nga ka ko é ri djo sidha dhi ù na ri. Føri kʉ Uganda nǎ Norina ró dho kʉ ná le-ve bangʉeni na ná lo. Le lingʉe ndi nji ná muradi ngʉe ndi di Biblia nǎ longaddi, ro le ro nga ngʉe fø lo djo sidha dhi ù na bbo ri, dhonalo le ngʉ riddi ndi nga kʉ bblo kʉ ná mwalimu ri. Nde, le tsotso ká addu kongʉe? Le pori ɨ: “Ma ngʉ adi rinzi krʉ ddo ró Yova kó ma tsotso ma ndri Biblia nǎ longa ma ddi nari dhi ù ma na. Madhó sala nǎ ma nzingʉeri nari bbai, ma njingʉe kpakanga ma thɨ madhó longaddidha dhi ufundi thika. Sese bi ro da nari goti, ma rangʉe ri utso d’i nari kʉ Biblia nǎ longaddidha dhi ù ndrini bbo ma nǎ. Fø cho nǎ dhé ma ngangʉe Biblia nǎ longaddidha tso aro kʉ ná ndrŭ dho.”

5. Ko ká ka ko ddinga bbo ngbá lo djo ndiro ko nǎ ù dhidhi d’e?

⁵ Addinga b’lo Yova nji ni dho ná lo djo. (Zb. 143:5) Mutume Paulo ngʉ adi ngaddi bbo ndi dho Yova dhongʉe nzá tso ka ndi koe ndi djo ná bblonga nari djo, ná føri chongʉe ke ronga ke njinjí bbo Yova dho. (1 Ko. 15:9, 10; 1 Ti. 1:12-14) Føri bbai ni di ngaddi bbo b’lo Yova nji ni dho ná lo djo ró, ni ka ni é nidhó muradi djo ni si nari dhi ù na bbo. (Zb. 116:12) Akonja addu ma kongʉe Honduras nǎ ngʉe ná le-ve tsotso ndiro ndi tso si ndi lingʉe muradi ndi ngʉ painia nari djo d’e nari. Le pori: “Ma ddingʉenga ngbá ngatsi ma Yova ji ma nari djo. Ke lingʉeri ma tsu ndidzá ndrŭ kana. Ke adi ngaddi ma djo ndirigoti ke adi ma ronga b’ob’o. Fø lo djo ma ngaddi nari lingʉeri ma ji ke bbo ndirigoti ma njí kpakpanga ma ngʉ painia d’e.”

6. Ko tsotso ka ndi kó ndiro ko na ù dhidhi d’e ná nja ri ká kʉ ngbá lo?

 ⁶ Adi ngaddi nidhó muradi djo ni tso si ró ni si ba ná faida djo. Anja anziro ko tielo djo ná le-ve Erika tsotso kongʉe ná lo ndiro nzɨ ndi di si retar ró. Le pori: “Ma rangʉe ri utso d’i nari kʉ, ma bí kʉ ná ritsi kosa lod’radha dhi njudha na ma si retar nari na. Ro, tse ma si nari ka ndi liri ma zʉ le-djoi ma, le-vei ma na ronga ndirigoti ko di ddinga kpa na. Føri goti ma ka ma ba bblo kʉ ná shauri ndiri kó ma tsotso ma ba hwè lod’radha nǎ ro ndirigoti ma thɨ madhó lod’radha dhi chu thika d’e.” Erika lingʉe ndi thí tse ndi si nari nǎ ro ndi ka ndi ba ná faida djo ndirigoti le singʉe si ndidhó muradi djo. Ni ká ka ni ddinga ro ngbá faida djo mai? Njati rie nidhó muradi kʉ ni thɨ Biblia zødha inga sala njidha dhi chu thika ri ró, addinga ngbaribbai ma fø lo ka ndi liri ni kana kau ngʉ kpakpa Yova na nari djo. (Zb. 145:18, 19) Njati rie nidhó muradi kʉ ni é Wakristo e na ná sifa na ri ró, addinga ngbaribbai ma fø lo ka ndi liri ni kana kau ngʉ bblo nja ndrŭ na nari djo. (Kol. 3:14) Akpe nidhó muradi djo ni ji ni si dho ná lo krʉ liste djo. Adi fø liste djonga nja bí ina. Anziro ko tielo djo ná Tomáš pori ɨ: “Madhó muradi djo ma si dho ná lo bani bí ná saa na, ma adi kpakpanga nji bbo ma si ri djo d’e.”

7. Julio ma, ndibbá le ma na tsotso ká addu kongʉe ndima si ndima dhó muradi djo d’e?

⁷ Adi saa ba ni di ngbà ka ndima li ni kpakpa ná ndrŭ na. (Mez. 13:20) Anja Julio ma, ndibbá le ma na tsotso kongʉe ná lo nja ndima di lod’ra bbo d’e. Ke pori: “Ko vʉngʉe nì ko li kpakpa ná bbakau ndirigoti ko ngʉ adi loti kodhó muradi djo kpa ma na. Kpa kana bí kʉ ná kpa ngʉe b’lo ndima tso ro si fø di ná muradi djo ro, føri dho kpa ka ndima bbʉe nyodyu dhi shauri ko dho. Føri goti kodhó bbakau ngʉ adi ko tso ká si ngbaga ma kodhó muradi na nari dhudhu ko tso ndirigoti kpa ngʉ adi ko li kpakpa ri uri ná saa na.”

8. Ko di rine ko si kodhó muradi djo ri dhi ù na ko kʉ ná saa na dhé ró ká ngbá lo ka ndi njini? (Anja ji maddi.)

⁸ Nja saa na ko ka ko mbu ko nga kʉ muradi djo sidha dhi ù na nari bbai. Nde, føri ká pori ko tso nzá ka ko si kodhó muradi djo ri? Ri nga kʉ fø ri. Loroji na: Ddikpa bbú bbo pli kʉ ná vʉvʉ ka ndi di dze ndiro ri rá ri e ra ná ngana d’e. Ro, vʉvʉ dhó kpakpanga nga ka ndi é krʉ saa ró ddiddi ri ndirigoti nja dyi nga dhé vʉvʉ ro ka ndi é ri. Nde, føri na mana ká kʉ bbú dyá ná ke ka ndi rá anzi nzá? Ri nga ka ndi é fø dhé ri. Loroji na, nja bbú e ndi ró motere na ndirigoti njari e ndi dhi ngai na. Føri dho bbú dyá ná ke ka ndi njinjí motere na inga ngai na ndiro ndi si ndi e ra ná ngana d’e. Kodhó muradi djo ko si d’e ko ronga cho ná lo le ka le ddi vʉvʉ na; nja dyi ko nǎ ù e bbo ndirigoti nja dyi ri e sese. Ndirigoti nja dyi ko ka ko mbu ko nga kʉ kodhó  muradi djo sidha dhi ù na nari bbai. Føri dho ko di kpakpanga nji ko si kodhó muradi djo ri dhi ù na ko kʉ ná dyi dhé ró, ko ro nzá ka ko si ri djo ri. Ddiddi bbú dyá ná ke adi nja chu ne ndi si ndi ra ná ngana d’e nari bbai, ko ka ko njí kpakpanga dhé ko si kodhó muradi djo, rie nga ma ko kʉ ri njidha dhi ù na ri ró. Nga mai ri ka ndi é sʉsʉ nja saa na ro, ni sie hwè na ri djo ni tso si ró. Ko ka ko njí ná lo djo ko loti nari njí, akotilo fø lo ka ndi bbʉ ná ngadhudha djo.

9. Nga ko kʉ ddikpa muradi djo sidha dhi ù na ná saa na, ko kpakpanga nji ko tso si ri djo ngodhé nari ká kʉ che? Aturinga.

⁹ Yova jiri ko njinjí ndi dho hwè na ndirigoti ji ko nanga jini ro. (Zb. 100:2; 2 Ko. 9:7) Ri ká ngani ko si kiroho nǎ muradi djo ngodhé rie nga ma ko kʉ ri njidha dhi ù na ri ró? Akonja mutume Paulo dhó loroji. Ke pongʉeri: “Ma adi ma ndí njínji ndirigoti ma adi chutso ddá ri dho nokpa bbai.” (1 Ko. 9:25-27) Paulo ngʉ adi ndi ndí cho kpakpanga na Yova ji ná lo njidha dho rie nga ma ndi kʉ fø lo njidha dhi ù na ri ró. Yova nanga ká ngʉ adi jini ji Paulo nji ndi dho ná njí dho? Jio! Ndirigoti Yova bbʉngʉe ke kobe bbʉ ke ngʉ adi nji ná kpakpanga dho.​—2 Ti. 4:7, 8.

10. Ko é nga ma ddikpa muradi njidha dhi ù na ro ko di kpakpanga nji ngodhé ró ká ko ka ko ba ngbá faida?

¹⁰ Føri bbai, Yova nanga adi jini ji njati ko di kpakpanga nji ko si kodhó muradi djo rie nga ma ko kʉ ri dhi ù na ri ró. Ke adi hwè ba dhonalo kʉ nzɨ mai ko adi fø njí nji krʉ ddo ró ko ji ri ji nari dho ro, ke churi chu ko fø njínji ko ji ndi nari dho. Paulo ronga Yova lengʉe nari bbai, ke si kodhó kpakpanga ronga ma le ddi. (Zb. 126:5) Ndirigoti ko di Yova dhó ledha nja ná saa na ko ka ko é ù na bbo kodhó muradi njidha dho. Polande nǎ Lucyna ró dho kʉ ná le-ve pori: “Nja saa na, ma adi ma mbu nzá raé lod’ra nari bbai, bí ina rie nje ma njeni ró. Nì mai ri kʉ føro, mahubiri na ma rá ró ma adi hwè ba bbo pli.” Føri dho akonja ko kʉ na ná ù djødjø ró ko ka ko njí ná lo.

11. Yova ká ka ndi kó ko tsotso ngbaribbai ko é le ronga tso le cho ná sifa na bbo d’e?

¹¹ Anji sala nja ni é le ronga tso le cho ná sifa na d’e. Le ronga tso le cho nari kʉ ngbaribbai ma le le mbu ndirigoti ddikpa lo le njié nari tso le cho na ná kpakpanga. Fø lo na le adi njínji bí ina ndiri na le dhǒ chelo ró le le ronga tso cho nari d’e. Ro, kodhó lo u le ronga tso chodha ndiro ko njí bblo lo d’e, pli siri rie ko ddikpa kpakpa kʉ ná njí nji inga ko ko mbu nga kʉ ù na ri njidha dho nari bbai ná saa na. Anonga nari kʉ le ronga tso le cho ná føri kʉ tunda la roho kana ddiri, føri dho anziri Yova kó ni tsotso ndidhó roho takatifu na ndiro ni é bbo na mana kʉ ná fø sifa na d’e. (Lu. 11:13; Gal. 5:22, 23) Anziro ko tielo djo ná David d’ra ngbaribbai ma sala kongʉe ndi tsotso nari. Ke jingʉeri ndi di ngazø ddiro krʉ ddo ró. Ke pori: “Ma nzingʉeri Yova kó ma tsotso ndiro ma di ma ronga tso chocho d’e. Yova dhó le tsotsokodha chulu, ma ngangʉe ddiro ma ngazø nari dhi programu tso ndirigoti ma ngʉ adi ngazø krʉ ddo ró.”

12. Muhubiri 11:4 ká ko tsotso kó ngbaribbai ko tso si kodhó muradi djo d’e?

¹² Nzɨ b’o bblo pli hali si ngʉ ná saa. I dz’ djó nzá kodhó hali ro ka ndi ngʉ bblo pli ngbá dyi maddi ri. Njati ko di bblo kʉ ná hali b’o ró, ko ro nzá ka ko si kodhó muradi djo ri. (Azø Muhubiri 11:4.) Dayniel ró dho kʉ ná le-djo pori: “Bblo pli nga hali ro e ri. Føri dho ri nzá ngani ko b’onga ri, ro ringani ko ngá ritsi njidha tso thei.” Uganda nǎ di ná Paulo ró dho kʉ ná le-djo d’ra nzá ringani ko di lo ngʉ aluti dho ná nja lo ki: “Njati ko nga ritsi njidha tso nì mai hali kʉ kpakpa ro ró, Yova ka ndi kó ko tsotso ko.”​—Mal. 3:10.

13. Ká addudho ri kʉ bblo ko nga lo tso rere muradi djó ro?

¹³ Anga ri tso rere ri djó ro. Njaro kodhó ù ka ndi djø dhonalo kʉ ko li ko njí ná muradi kʉ kpakpa bbo nari. Njati ni dho ma ri é fø i  ró ando nidhó fø muradi nanga rere. Rie ni jiri ni é ddikpa sifa na ri ró, adho fø sifa rere kʉ ná lo kana i vi. Njati rie nidhó muradi kʉ ni di Biblia zø ró, ya kwanza akperi ni di ri zø sese kʉ ná saa kana. Anziro ko tielo djo ná Tomáš dho ringʉe kpakpa ndi dya Biblia zødha tso cho ddi kana. Ke pori: “Ma rangʉe ri utso d’i ma vʉngʉe ma zø ná sehemu ngʉe bbo, føri dho ma vʉngʉeri ma mbu ri ki vi. Ro, fø saa na ma kpengʉeri ma di sura nǎ sehemu ro zø sese krʉ ddo ró ndirigoti ma di ngaddi bbo ri djo. Føri lingʉeri ma nanga di jini ji ngazødha dho.” Tomáš dhó hwè ngʉ ndrini nari bbai ke ngangʉe ngazødha tso bí kʉ ná saa kana. Mwisho, ke zøngʉe Biblia lu. c

14. Ko ká ka ko bani ngbá kpakpalo ro na mai?

¹⁴ Ko é ù na ngbabø ma, inga ko kpe kodhó lo ngbá ngatsi ma ró, ko ka ko bani ngbà dhé nzá djo ko ddienga ná kpakpalo ro na. Loroji na, “ko ka ko bani nzá djo ko ddinga ná lo na” nari ka ndi dzi kodhó lo u ko tso si kodhó muradi djo d’e ná saa dzi. (Muh. 9:11) Njaro ko ka ko bani na ná kpakpalo ka ndi liri ko thí bʉni bʉ ndirigoti kodhó klø má sese. (Mez. 24:10) Ko kʉ nzá kaka ná ndrŭ nari dho njaro ko ka ko njí ná kosa ka ndi liri ri é kpakpa bbo ko si kodhó muradi djo. (Ro. 7:23) Inga ko ka ko mbu ko nje njeni nari bbai. (Mt. 26:43) Nde, ko tsotso ká addu ka ndi kó ndiro ko sisi kpakpalo djolu d’e?

15. Kpakpalo na ko bani nari na mana ká kʉ ko tsonga lo gʉgʉ? Aturinanga. (Zaburi 145:14)

¹⁵ Anonga nari kʉ kpakpalo na ko bani nari na mana nga kʉ ko tsonga lo gʉgʉ ri. Biblia pori ko ka ko bani kpakpalo na bí ina. Nì mai ri kʉ føro, ri dhori wazi nari kʉ ka ko mburi ki vi ko si kodhó muradi djo Yova dhó le tsotsokodha chulu. (Azø Zaburi 145:14.) Anziro ko tielo djo ná le-djo Philip pori ɨ: “Ma nzɨ adi ma thí li ma tsonga ká madhó muradi djo ma si nari gʉe thɨ ina ma nari djo ri. Føri rɨngana ma adi ma thí li ma ngae ri  njidha tso ki ná saa djo.” Anziro ko tielo djo ná David pori ɨ: “Ma adi kpakpanga nji nzɨ ma nja kpakpalo cho ka ndi cho ma tso nari bbai, ro ngbá ngatsi ma ma ji Yova nari ma ka ma dho ke dho ná chu.” Bbʉbbʉ dhé ni kpakpanga nji ni tso si nidhó muradi djo kpakpa ma ri kʉ ná saa na, ná føri chulu ni ridho Yova dho nari kʉ ni jiri ni njí ke ji ná lo. Bbʉbbʉ dhé Yova adi hwè ba bbo ndi di rinja ni kpakpanga nji ni si nidhó muradi djo ná saa na.

16. Ni ká ka ni ba ngbá somo kpakpalo na ni bani ná saa na?

¹⁶ Anja kpakpalo somo ni ka ni ba ná chu. Addinga ni bani na ná kpakpalo djo ndirigoti adhuri ni tso, ‘Ma ká ka ma njí addu ndiro nzɨ fø lo ki njini ró?’ (Mez. 27:12) Ro, nja saa na nidhó muradi djo ni si nari é kpakpa bbo ró, njaro føri ridho føri kʉ nzá ka ni dho ná muradi. Njati ni ra riba nidhó lo ma ka ndi é føri bbai i ró, addinga ki vi nidhó muradi djo ndiro ni nja ri ká ka ndi ka ni dho bbʉbbʉ ma nari d’e. d Yova nzɨ rinja nari kʉ ni tsonga lo gʉgʉ ni tso si nzá, nzá kae ni dho ná muradi djo nari dho ri.​—2 Ko. 8:12.

17. Ká addudho ringani ko no b’lo ko njie ná longa?

¹⁷ Ano b’lo ni njie ná longa. Biblia pori nari kʉ “Mungu nga kʉ nzɨ adi chølo nji ná ke ri, ndiro ndi vi ni njie ná njí nga d’e.” (Ebr. 6:10) Føri dho ni nganga ma nzá ddi ringani vi b’lo ni njie ná njí nga ri. Addinga b’lo ni njie ná lo djo, føri ka ndi é ni kana kau ngʉe kpakpa Yova na nari, nja ndrŭ na ni loti ke djo nari inga batiso ni ba nari. Ni nji maendeleo ndirigoti ni tso si anziro ni lie ná muradi djo nari bbai, ni ka ni ra anzi ni tso si kpø kpadjo ni li njí ná muradi djo.​—Flp. 3:16.

18. Ri ká ngani ko no ngbá longa kodhó muradi djo ko rine ko tso si nari kana? (Anja ji maddi.)

¹⁸ Ri ka ndi kaka ni tso si nidhó muradi djo Yova dhó le tsotsokodha chulu, ddiddi bbú na d’a ná ke si hwè na ndi e ra ná ngana nari bbai. Ro, føri kina anonga nari kʉ bbú na d’a ná bí kʉ ná kpa nanga adi jini safari ndima nji nari dho maddi. Føri bbai, ni kpakpanga nji ni tso si kiroho nǎ muradi djo nari kana nzɨ vi ngbaribbai ma Yova ni tsotso kó ndirigoti ke rili ni é hwè na muradi djo ni rine ni si nari kana nari nga. (2 Ko. 4:7) Njati ni d’i ji nzá ró, ni si kʉ ledha ba bbo pli.​—Gal. 6:9.