Fø lo nǎ ko chungʉeri nari kʉ, nononi ná akili dhi ritsi krʉ adi hwini tso ró nari kʉ: Mungu ró bbo pli kʉ ná dho le li ndi tsetse nari. Njati ni uri u ma inga nzá ma ró, Yova pinyo ná chu kʉ bblo pli ná føri dho ke ró dho ka ndi mani ma. Føri dho ddikpa le rá Mungu dho ndi tøni nari na anzi ma inga nzá ma ró, chi le tøni Mungu dho nari kʉ ke ró dho le li ndi tsetse ná chu ro.

Ko ká adi ko thí li bbo Yova ró dho ma, ri tse e tse nari ma na djo addudho? Akonja fø ko rinji dho ná lo ro gbo.

Ya kwanza, Shetani tingʉe che kʉ ná lo Yova ró dho djo inga ke sangʉe Yova ró dho nanga sa, Edeni na í na. Shetani dhungʉe Eva tso ná lo ngʉ ridho nari kʉ, Yova kʉ nzɨ adi ritsi bbʉ ná ke ndirigoti ke jangʉe Adamu ma, Eva ma na dho ná lo ngangʉe chø ri. Shetani lengʉe Yova pongʉe ná lo thika le. Ná føri na ke dhongʉeri nari kʉ, Mungu kʉ kali ba. Ke sangʉe Yova ró dho nanga sa. Ke ngʉngʉe “Ibilisi” ná fø dho na mana kʉ, “ndrŭ nga adi b’ø ná ke.” (Yoh. 8:44) Eva ungʉe Shetani dhó kali dhi lo nari dho le nzá rrngʉe nga Mungu dho ri, le tsangʉe tsa Mungu dhó bbonga ro. (Mwa. 3:1-6) Njʉ maddi Shetani adi kali dhi loti Mungu ró dho djo kali dhi lo nanga ndi nyá Yova djo nari chulu. Fø di ná kali dhi lo u ná ndrŭ nzɨ adi nga ro rr Yova dho ri. Føri dho kali dhi lo ndrŭ ti Yova ró takatifu dho djo nari adi Mungu dzá ndrŭ ronga lø bbo. Føri rili nzadha ma, che kʉ ná lo ma na é bbo dz’ djó.

Ya pili, ndiro nononi ná ritsi krʉ ba faida d’e, Yova si rili ndi ró dho tsetse ndirigoti ke ró dho djó tini ná chelo krʉ ke si ʉʉ. Føri kʉ bbo pli Yova adi nja mana ná lo. Føri dho ke pori: “Bbʉbbʉ dhé ma si rili ma ró bbò dho tsetse.” (Eze. 36:23) Yesu d’rangʉe Yova dzá chi tøni ná njí dhi kpa krʉ ka ndima li anziro sala na ná lo ɨ ndi pongʉeri nari na: “Abbari ni ró dho tsetse.” (Mt. 6:9) Bí ina Biblia adi ridho nari kʉ, Yova ró dho mani ma ná føri kʉ mana na bbo. Akonja sese kʉ ná loroji ro di: “Abbʉ Yova ró dho dho ka ná madha.” (1 Ny. 16:29; Zb. 96:8) “Ango dyi ke ró madha dhi dho dho.” (Zb. 66:2) “Ma si madha bbʉ ni ró dho dho theinga dho.” (Zb. 86:12) Ddikpa saa na, Yova nganga tingʉe lo ra nǎ ro Yerusalemu nǎ Hekalu na ná ngana Yesu pongʉeri: “Baba aliri ni ró dho mani.” Yova ngʉngʉe logoti: “Ma liri ri mani ma ndirigoti ma si ri ki li ri mani vi.”​—Yoh. 12:28. a

Ya tatu, Yova dhó kusudi ma ronga adi njunju ke ró dho na. Addinga ngbá ngatsi ma Yova ró dho sie mana na Yesu nyopi cho elfu ddi nari goti sie ná ya mwisho mbudha goti nari djo. Malaiká ma, ndrŭ ma na ká si ndima mbu ngbaribbai Yova ró dho djo fø saa na? Ndiro ko ba fø ngadhudha goti d’e, akotilo nju  ronga nju ná aro kʉ ná lo djo, føri kʉ ndrŭ tøni chi nari ma, dz’ djolu gble sie ná pidhinga ma na. Fø saa na nzɨ ri si ngani ndrŭ dhǒ ndima tøni chi nari ki ro vi ri. Kpa sie ka ndima ka ro ndirigoti kaka ná ngatsi ndima mbuni b’lo ro. Kpa si choro nŭnŭ di ná shinga ba. Yova kʉ bblo pinyo ná ke nari ke si dho dhonalo ki ro nga sie ri. Fø saa na malaiká ma, ndrŭ ma na tso si kʉ gbani ddi ndirigoti kpa si ri uu ke nyopi ndima djo. Nde, fø saa na ká Yova ró dho sie mana na bbo godhé kedzá ndrŭ dho?

Fø saa na, ndrŭ krʉ si bbʉbbʉlo chu Yova djo ndirigoti ke ró dho si tsetse kaka ná ngatsi. Nì mai ri kʉ føro, Yova ró dho sie mana na bbo godhé chi tøni ná malaiká ma, ndrŭ ma na dho. Ká addudho? Dhonalo kpa si rinja nari kʉ Yova ra anzi dhé ké dho le nanga keni ná ritsi ndi nji nari na. Achu i lo: Yesu si Pidhinga ngʉ Yova dhona nyenyenga na nari dho, Mungu “sie krʉ kʉ ná ritsi krʉ kʉ ná ndrŭ dho.” (1 Ko. 15:28) Føri goti, dz’ djó ndrŭ si “Mungu dzá nzø ndima kʉ nari kana kadha dhi uhuru” ba. (Ro. 8:21) Ndirigoti Yova si ndi kpengʉeri ndidzá ra nǎ nzø ma, dz djó nzø ma na tso gbani ddikpa familia bbai ná fø lo njinji.​—Efe. 1:10.

Fø lo njini nari ká si rili Yova dhó ra nǎ familia ma, dz’ djó familia ma na mbu ndima ngbaribbai? Bbʉbbʉ dhé, ko sie ù na bbo ko bbʉ madha Yova ró dho dho. Roho takatifu chulu Daudi ndingʉeri ɨ: “Abbari Yova Mungu ba madha . . . Abbari ke ró madha dhi dho mani theinga dho.” (Zb. 72:18, 19) Ko si kʉ ra anzi ø lo ko ba nari na ndirigoti ko sie fø ko rinji dho ná sababu na choro nŭnŭ.

Yova ró dho adi krʉ kʉ ná lo dhǒ ke djo. Ko di ngaddi Yova ró dho djo ná saa na ko adi ngaddi kedzá jidha djo. (1 Yo. 4:8) Krʉ ddo ró ko si ngano nari kʉ, Yova dhongʉe jidha ko dho, ke nongʉe ko ná saa na ndirigoti ke bbʉngʉe Yesu ko djotsina ná saa na. Ndirigoti krʉ ddo ró ko si ngano nari kʉ ke pinyo ná chu kʉ chi ndirigoti jidha na. Ro, ko si ngbaribbai ma Yova adi jidha dhǒ ko dho nari nja choro nŭnŭ. Ko sie ù na ko ndrini ke ro kodhi Baba bbai ndirigoti ko si madha dhi dyi ngo ke ró madha dhi dho dho choro nŭnŭ.​—Zb. 73:28.