Akonja ngbaribbai ma Biblia ngʉ fø ngadhudha goti nari.

Matendo 24:15 ripo ko dho nari kʉ, “chølo dhi ndrŭ ma, nga kʉ chølo dhi ri ná ndrŭ ma na dhó gadha si kʉ e thé.” Chølo dhi ndrŭ kʉ, dhe ndima dhe nari nji rrngʉe nga Mungu dho ná ndrŭ, ná fø ndrŭ ró dho le ndi shinga dhi buku nǎ. (Mal. 3:16) Nga kʉ chølo dhi ri ná ndrŭ tsu ndi nǎ nzá bangʉe chu kaka ná ngatsi nja ndima chu lo Yova djo d’e ná ndrŭ, ná fø ndrŭ ró dho nzá le ndi shinga dhi buku nǎ ri.

Yohana 5:28, 29 loti Matendo 24:15 nǎ kʉ ná fø aro kikundi djo. Yesu pori “bblo lo njingʉe ná ndrŭ” si vʉ “shinga dhi gadha dho ndirigoti chelo njingʉe ná ndrŭ si ga lod’idha dhi gadha dho.” Chølo dhi ndrŭ njingʉe bblo lo ndima dhe nari njí. Fø ndrŭ si ga shinga dhi gadha dho, dhonalo kpa ró dho le ndingʉe ndi shinga dhi buku nǎ. Ro nga kʉ chølo dhi ri ná ndrŭ njingʉe chelo dhe ndima dhe nari njí. Fø ndrŭ si vʉ lod’idha dhi gadha dho. Fø ndrŭ ró dho nzá le ndi shinga dhi buku nǎ ri, ndirigoti kpa si ga lod’idha dhi wakati na. Fø saa na le si saa bba kpa dho kpa chu lo Yova djo ndirigoti kpa liri ndima ró dho ndini shinga dhi buku na.

Ufunuo 20:12, 13 pori nari kʉ gaga ná ndrŭ krʉ dho ri si ngani ndima rrnga “kú nanga le ku ná kitabu nǎ le ndingʉe ná lo” dho, føri kʉ ø dz’ djo Mungu si bbʉ ko dho ná ø yadha. Nzá si ngarr fø yadha dho ná ndrŭ le si sasa.​—Isa. 65:20.

Danieli 12:2 pori nari kʉ dhe nǎ ddo ná nja ndrŭ si dani “cho ró nŭnŭ shinga badha dho, ndirigoti nja ndrŭ dopadha ma, cho ró nŭnŭ pábedha ma na dho.” Fø andiko loti gadha nǎ ro si si ná ya mwisho matokeo djo, føri kʉ “choro nŭnŭ shinga” inga “choro nŭnŭ pábedha.” Føri dho, cho 1000 tso si dyani ná saa djo, nja ndrŭ si cho ró nŭnŭ shinga ba ndirigoti nja ndrŭ si cho ró nŭnŭ sadha ba.​—Ufu. 20:15; 21:3, 4.

Akonja ddikpa loroji. Ga si ga ná aro kʉ ná fø ndrŭ dhó kikundi le ka le ddi d’i ngø nǎ ji ndima ra di ná kpa na. Chølo dhi ndrŭ kʉ njí dhi viza ma, ddikpa ke ngʉ ddikpa ngø nǎ raia nari dhǒ ná viza ma na le bbʉ dhó ná ndrŭ bbai, ná føri fø ndrŭ tso uni ngbà inga fø ndrŭ kʉ huru nari dhǒ. Føri dzá njonjonga kʉ, nga kʉ chølo dhi ri ná ndrŭ kʉ d’i ngø nǎ ro si ná ndrŭ bbai, sese ddo dhi viza inga lʉ kʉ ná ndrŭ dhǒ ná viza ndima ba ro. Ro fø aro kʉ ná kikundi nǎ ndrŭ krʉ dho ringani ndima rrnga fø ngø nǎ sheria dho ndiro ndima tso uni fø bbagʉ raia d’e. Føri bbai ga si ga ná nga kʉ chølo dhi ri ná ndrŭ dho ri si ngani ndima rrnga Yova dhó yadha dho ndirigoti ndima dhori dhǒ ndima kʉ chølo dhi ndrŭ ndiro ndima má Paradiso na d’e. Føri dho, rie ngbá viza ma d’i ngø nǎ ro sie ná ndrŭ bae ndiro ndima di d’i ngø nǎ ri ró, kpa kana nja kpa tso ka ndi uni u fø ngø na raia ndirigoti nja kpa i nzá. Lonangavʉdha ya mwisho le si vʉ kpa si kʉ nji fø ngø nǎ ná lo ró ro. Føri bbai, krʉ si ga ná ndrŭ djo le si lod’i ø dz’ djó kpa si tøni chi ndirigoti kpa si nji ná lo ró ro.

Yova nga kʉ jidha dhi Mungu dhé ri, ro ke kʉ chølo adi nji ná Mungu maddi. (Kum. 32:4; Zb. 33:5) Ke si ndi kʉ jidha na nari dho chølo dhi ndrŭ ma, nga kʉ chølo dhi ri ná ndrŭ ma na ndi si ga nari chulu. Ro kpa krʉ tso i ke si rinzi kpa rrnga ndidhó yadha dho. Ngbà ji ke ndirigoti nì ngarr ke dho ná ndrŭ tso dhé ke si u ndima di ø dz’ djó.