LE RIPO “masua” Tafsiri ya Ulimwengu Mupya nǎ ná fø lo na le ka le dhǒ njonjo kʉ ná masua dhi seri. (Mdo. 8:28, 29, 38) Ro, rinjani nari kʉ fø mwetiopia ngʉ dya ná masua ngʉe bbo là ndrŭ ngʉ adi nji na inga d’a na ndrŭ ngʉ adi d’a nari djolu nari bbai. Akonja fø ko ripo dho ná lo ro di.

Mwetiopia ngʉe bbonga na kʉ ná ke da ngana ndi rangʉe ro. Ke ngʉe “bbonga na kʉ Etiopia nǎ isɨ pi Kandake bbá ndirigoti ke ngʉ adi fø ga krʉ kʉ ná mali djonga nja.” (Mdo. 8:27) Drrdrr le ngʉ adi nzi Etiopia nari kʉ Soudan ma, Misri ró agʉnga lai djó bbo sehemu ma na. Nzá mai fø ke bbi ngʉe ddikpa masua na dhé ndi njingʉe ná safari krʉ kana ro, kedho ringangʉeni ndi d’ú ndidhó lo ji safari dho ná ritsi krʉ. Karne ya kwanza nǎ ndrŭ ngʉ adi njí nji na ná masua kana ngʉe ndrŭ le ngʉ adi d’ú na ná tho kó ngʉe ná masua. “Fø di ná masua ngʉ adi rili le d’ú no bbo, ri ngʉ adi rili le njí safari bblo ndirigoti le rá da,” Matendo dzá buku ridho nari bbai​—An Exegetical Commentary.

Mwetiopia ngʉ ngazø Filipo ngʉ si ndi dhi ngana ná saa na. Ndindini ná lo ridho nari kʉ “Filipo ndringʉeni ke dhi ngana kø ndi kø ro ndirigoti ke rrngʉe mwetiopia bbobbo ndi chu na ndi Isaya dzá unabi zø ro.” (Mdo. 8:30) Safari dhi motogari nzá le thɨngʉe ndi di d’a lele ri. Fø di ná shar nzɨ ngʉ adi d’a lele ri nari dho, føri ka ndi lieri mwetiopia zø nga ndirigoti Filipo si ke ro ndi kó ná ndi bbí ro maddi.

Mwetiopia “pongʉeri ke si ndi dhi ngana ndirigoti ke di ndi kuso.” (Mdo. 8:31) D’a na le d’a ná fø di ná masua nǎ ri na d’a ná kpa ngʉ adi tøni røna. Ro, safari dho le thɨ ná masua nǎ ngʉe didha dhi nga nì mwetiopia dho ndirigoti Filipo dho.

Ndi gbani Matendo sura 8 nǎ kʉ ná lo na ndirigoti historia dho ná lo na d’e, kodhó vichapo nǎ le dho mwetiopia bbasødda adi njínji na ná masua inga safari dhi nja masua djolu da ná masua kuso.