Beteli nǎ le-djoi njingʉe njí chøchø cho ddi ndiro ndima chi radio WBBR Staten Island na, New York na d’e. B’lo ndima krr tsu nari goti kpa chingʉe ddikpa bbò dza njí ngʉ nji ná ndrŭ di ddo nǎ ndirigoti kpa chingʉe nja dza ki njí dhi ritsi dho. Fø njí tso ndima dya nari goti le-djoi ngangʉe njí dhi ritsi tso gbadha tso ndiro Radio nga njí tso d’e, ro kpa bangʉeni bí kʉ ná kpakpalo na.

Radio dhi bbò ateni le chi nari ngʉe kpakpa bbo. Ringangʉeni le chi metre 91 dhi ateni metre 61 kʉ ná dadá aro kʉ ná tsu kana. Ya kwanza nzá fø lo njingʉeni ri. Ro, kpa lingʉe ndima thí Yova dhó le tsotsokodha djo nari dho kpa vengʉe ra ri chi te. Fø njí ngʉ nji ná kpa kana ddike Calvin Prosser pori: “Njati ko sie føri chi thei ya kwanza d’ʉ ró, ko ka ko die ko ngbengbe ri djotsina.” Føri rɨngana le-djoi mangʉe Yova ke ko ndima tsotso nari dho. nja kpakpalo ma ngʉe ddi.

Radio ngʉe ø go ndirigoti njí dhi ritsi le ba nari ro nga ngʉe sʉsʉ ri. Nì mai ri ngʉe fø ro, le-djoi bangʉe b’lo na ndrŭ njinjí ná ritsi ro fø eneo na, ndiri kó ndima tsotso d’e. Ø mikro ndima dzie nari rɨngana, kpa njingʉe njí telefone nǎ mikro na. Ddikpa cha Bi 2 na kuna, le-djoi vʉngʉeri ndima mbu fø ritsi ká njínji nì ma nari. Kpa ngʉ ndima ká loti addu djo ma nari ne, føri dho le-djoi ngongʉe Pidhinga dzá dyi. Kpa ngʉ njínji na ná ddikpa ke Ernest Lowe d’ra fø dyi njingʉeni ná lo. Ke pori, dyi kpa ngʉ ngo ro juji Rutherford b nzingʉe  nga, ke rrngʉe fø radio Brooklyn nǎ ro, ná fønga ngʉe kilometre 25 djó.

Le-djo Rutherford pongʉeri. “Anibba makelele ni nji føga nari tso, dhonalo ni chu o makelele nji ná pusu chu bbai!” Le-djoi djo do pangʉe ndirigoti kpa bbangʉe fø programu tso thei, ro kpa chungʉe radio njínji nì nari chu ndirigoti kpa ngʉe tayari ndima ngá d’i programu tso.

Cho 1924 nǎ Bi 2 ddo 24 na, ya kwanza ndi tilo fø radio nǎ ro, le-djo Rutherford pongʉeri fø radio nǎ ndima di Pi Kristo pongʉe ndima di nji ná njí dhé nji. Ke pongʉeri ki fø radio dhó kusudi kʉ ndi “kó ndrŭ tsotso ndima famu Biblia ma, ko di ná i saa nǎ mana kʉ bbo nari ma na.”

Ya kwanza progamu bbingʉe bblo pli fø radio nǎ. Fø radio njingʉe njí cho 33 kana, Yova dzá ndrŭ djo ndi loti ro.

Cho 1924 nǎ Bi 7 na, wanafunzi wa Biblia njingʉe ddikpa asamble Columbus, Ohio nǎ. Dz’ djó krʉ ngalu ro singʉe ná ndrŭ rrngʉe hotuba Arabe ma, Anglais ma, Français ma, Allemand ma, Grec ma, Hongrois ma, Italien ma, Lituanien ma, Polonais ma, Russe ma, Scandinave dhi luga ma, Ukrainien ma na nǎ. Ndrŭ rrngʉe nja hotuba radio nǎ ndirigoti le-djoi pongʉeri jurnaliste ndi nja lo ndi fø asamble nǎ ngʉ njini krʉ ddo ró ná lo djo.

Thonjí dyi, Bi 7 ddo 24 na, asamble na singʉe ná dada 5 000 djolu ná le-djoi ma, le-vei ma na rangʉe lod’ra fø bba gʉ ndrŭ dho. Ndrŭ bbʉngʉe buku 30 000 djolu ndirigoti ndrŭ ddingʉe Biblia nǎ longa bí kʉ ná ndrŭ dho. Dzamu dhi Munara nzingʉe fø ddo “asamble nǎ bbo bbʉngʉe hwè ná sehemu.”

Mbʉnjí dyi Bi 7 ddo 25 na, ndidhó hotuba ndi ngʉ bbʉ ro, le-djo Rutherford zøngʉe ddikpa barua nga nǎ do ro, fø barua nyangʉe dini nǎ bbobbonga dhó kali djó nga pʉlʉpʉlʉ. Ke pongʉeri dini ma, politiki ma, turusa dhi kpa ma na “rili nzɨ ndrŭ chu bbʉbbʉlo ndrŭ ronga si leni chulu ná Mungu dhó Pidhinga djo.” Føri kina, ke pongʉeri, fø kpa kali sha dhonalo “kpa gba ndima thó tso Société des Nations na, ndirigoti kpa ripo, ‘føri kʉ Mungu pinyo dz’ djo ná chu.’” Wanafunzi wa Biblia dhó lo ungʉeri ndima é nga nǎ do ro ndima d’ra fø lo nja ndrŭ dho d’e.

 Luti, Dzamu dhi Munara pongʉeri: “Columbus nǎ dangʉe ná fø asamble lingʉe le-djoi ma, le-vei ma na dhó udha kpakpa ndirigoti ri lingʉeri kpa d’ralo nga nǎ do ro nì mai upinzani ngʉe ro.” Fø asamble na singʉe ná le-djo Leo Claus pori: “Asamble goti ko ngʉe ù na bbo ko d’ralo kodhó eneo lu.”

Bi 10 na, wanafunzi wa Biblia ngangʉe le-djo Rutherford zøngʉe asamble nǎ ná fø lo ngʉe djó ná trakte ndodha tso ndrŭ dho. États-Unis nǎ Oklahoma na, Frank Johnson ndongʉe ndidhó ngʉe ná trakte miniti 20 kana, nja wahubiri ndi ngʉ b’o ro. Føri goti ke rungʉeni ru dhonalo fø bba gʉ kpetsi kpa nanga kangʉeni bbo ke ngʉ d’ra ná fø lo djotsina ndirigoti kpa ngʉ rine ndima lø ke lø. Le-djo Johnson vʉngʉeri ndi ra runi chøchø ngʉe føga ná kanisa na. Ke nzá singʉe ndrŭ ro føga ri, føri dho ke lingʉe fø trakte lo ngʉ adi d’ra føga ná ke dhó Biblia na ndirigoti ke lingʉe nja ri ndrŭ ngʉ adi di djó ná ba krʉ djolu. Ke njingʉeri lele ndirigoti ke dho saa ro ngʉe go nari dho ke rangʉe fø lo ki nji aro kʉ ná nja kanisa lu.

Føri goti Frank ngʉngʉe le-djoi na ndima ngʉ si nju ná ngana. Ke rungʉeni esas nanga ndrŭ ngʉ dzi ná ngana ndiro ndi nja ndi ne ná kpa ká kʉ go ma nari d’e. Kpa dangʉe føga lu dhé ro kpa nzá njangʉe ke ro ri. Kpa da nari goti, Frank ma ngʉ lod’ra na ná le-djoi ma, le-vei ma na singʉe ke d’u ndirigoti kpa rangʉe d’i ngana.

Le-djoi kana ddikpa ke pori, “fø bba kana ro ko ngʉ ra ro, gbo kʉ ná fø kanisa tso ro lu ndrŭ ngʉe chøchø 50 fø trakte ndima zø ro. Nja ndrŭ ngʉ ri zøzø ndirigoti nja ndrŭ ngʉ ri dhǒ ndima dho adi lod’ra ná ke dho. Ko rangʉe føga ro thei nzɨ ko ba kpakpalo ró! Ndirigoti ko pongʉe mbai kodhi Mungu Yova dho ke kongʉe ko tsotso ndiro ko chu ngbaribbai ma ko ka ko d’ra fø lo nzá ndrŭ lø ko ro nari dho.”

Wanafunzi wa Biblia ngʉ lod’ra nga nǎ do ro nja ngø lu maddi. France nǎ angønga laidjó Józef Krett d’rangʉe lo Polande nǎ ro singʉe ná kpa dho. Ke kpengʉeri ndi bbʉ ná hotuba djǒ ngʉe, “Checheni ná ndrŭ dhó gadha kʉ chøchø.” Le-djoi ma, le-vei ma na bbʉngʉe evitasio ndrŭ dho ro, fø eneo nǎ ddikpa mupe pongʉeri nzɨ ndidhó dini nǎ ndrŭ ro ra følu. Ndrŭ nzá rrngʉe nga ke dho ri. Dada 5 000 djolu ná ndrŭ singʉe hotuba dhi ngana, fø mupe ma ngʉe ndrŭ kana ddi! Føri goti le-djo Krett nzingʉe fø mupe ndi tilo ndidhó udha djo ro ke nyingʉeri nyi. Hotuba goti le-djo Krett bbʉngʉe ndidhó ngʉe ná vichapo krʉ ndrŭ dho, dhonalo ndrŭ jingʉeri ndima chulo bbo Mungu dzá lo djo.​—Amo. 8:11.

Le-djo Claude Brown singʉe hwè lo-i na Afrique na, Ghana na. Ke bbʉngʉe hotuba ma, vichapo ma na bí, nari lingʉeri bbʉbbʉlo nya ndi nanga lele fø bba gʉ. John Blankson ngʉ ngazø ndi di dawa nanga dzi d’e. Ke singʉe le-djo Brown ngʉ hotuba bbʉ ná ngana ro, ke d’ingʉe ri utso thei nari kʉ ndi ba bbʉbbʉlo. John pori, “ma bangʉe hwè bbo ndirigoti ma ngʉ adi loti bí kʉ ná ndrŭ na kodhó darasa nǎ fø lo djo.”

Biblia nǎ ro John zøngʉeri Mungu nǎ nga nafsi e gbo ri. Føri dho ddikpa cha ke rangʉe loti Anglika nǎ ddikpa mupe na fø lo djo.  Mupe nanga kangʉeni bbo, ndirigoti mupe tangʉe ke djó: “Ni nga kʉ Mukristo ri ndirigoti ni kʉ Ibilisi dzá ke. Atuni iga ro!”

Abba ndi ngʉ nari goti, John ndingʉe barua mupe dho, ke nzingʉe mupe bí ndrŭ kʉ ná ngana ndiro ndima tilo Mungu nǎ ká nafsi e gbo ma nari djo d’e. Mupe chongʉe John kpadhó darasa nǎ bbo mwalimu dhi ngana ndirigoti mwalimu dhungʉeri ke tso, ni ká ndie barua mupe dho bbʉbbʉ?

John pongʉeri “Bbʉbbʉo.”

Ke pongʉeri John ndí nja barua ki ndiri nǎ ke kó zø mupe tso d’e. Føro John ndingʉeri:

“Kodhó mwalimu pori ma ndi barua ni dho ma kó nǎ zø ni tso d’e, ro ma kʉ tayari ma kó zø njati ni u ni kali ddi ko dho nari tso ngbà ró.”

Thø na, mwalimu dhungʉeri ke tso, “Blankson, iri i ká kʉ ni ndi ná lo?”

“Oo. Ma ka ma ndie ná d’ilo ro nga kʉ ri.”

“Ni le didi darasa nǎ ro. Ni ro nzɨ di iga njati ni di chelo ti guvernema dhó i darasa nǎ mupe djo ró ri.”

Blankson dhungʉeri “njati ni ddi ddikpa lo ko dho darasa nǎ . . . ro ko famu ri nzá ró, ká ko ka ko dhunga nzá?”

“Ni ka ni dhunga ngbà.”

“Føri i kʉ njinjieni ná lo. Mupe e Biblia nǎ lo ddi ko dho, ro ma dhuenga dhé ke tso. Rie ngadhudha goti ke ngʉ nari gʉe ke tso ri gʉ ró, ma nzá nja zø ma ko dho ná lo ro ri.”

Blankson ro nzá le dingʉeri. Ke nzá kongʉe zø ro maddi ri.

Fø cho kana njini ná lo djo, Dzamu dhi Munara pongʉeri: “Ko ka ko pori Daudi bbai: ‘Ni si kpakpanga bbʉ ma dho ma njí na lɨ d’e.’ (Zb. 18:39) Fø cho lie ko kpakpa dhonalo ko njangʉe ngbaribbai ma Yova ko ko tsotso ndidzá njí kana nari nja. Ndirigoti chi ngʉ tøni Yova dho ná ndrŭ rangʉe anzi hwè na ndima lod’ra nari na.”

Luti le-djoi kpengʉeri ndima chi nja radio dhi nga ki. Fø radio dhi nga kpa chingʉe États-unis na Chicago na. Ndirigoti ri ró dho ngʉe WORD. Fø radio nǎ kpa ngʉ njínji na nari ngʉe kpakpa kʉ ná ritsi, føri dho ri nǎ ndrŭ ka ndima rrngʉe Pidhinga dzá hwè lo-i dada ngalu kpø Canada nǎ angønga laidjo.

Cho 1925 na Yova kongʉe le-djoi tsotso ndima famu bbo na mana kʉ ná ddikpa ø lo Ufunuo sura 12 djo. Fø ø lo djotsina nja ndrŭ bbangʉe Yova dho ndima njínji nari tso bba. Ro, bí kʉ ná ndrŭ ngʉe hwè na ndima famu ra nǎ njini ná lo bblo pli ndirigoti ngbaribbai ma fø lo lø Mungu dzá ndrŭ ronga dz’ djó nari dho.