1. Yesu ká bbʉ nja ngbá kado ko dho?

 ESU korie ndrŭ tsotso ná ngatsi nzá ie ma d’erie ndrŭ tsotso ro ko ddi ri. Dz’ djó ke ngʉe ná saa na ke ngʉ adi ndrŭ tsotso kó bí ina ndi nji ná ddù chulu. (Lu. 9:12-17) Ke bbʉngʉe bbo pli kʉ ná kado ndidhó shinga ndi bbʉ ko djotsina nari na. (Yoh. 15:13) Ke ga nari goti ma ke adi ra ko tsotsokodha na anzi dhe. Ke tso ngʉeni ko dho nari bbai ke adi ri nzi Yova bbʉ roho takatifu ko dho longaddidha dho ndirigoti ndi pɨ ko iso d’e. (Yoh. 14:16, 17, maelezo ya chini; 16:13) Ndirigoti kutaniko nǎ njudha chulu Yesu adi kodhó lo u ná ritsi bbʉ ko dho, ndiro ko ddi longa dz’ djolu gble kʉ ná ndrŭ dho ndirigoti ko njí kpa wanafunzi d’e.​—Mt. 28:18-20.

2. Waefeso 4:7, 8 ridho nari bbai “kado kʉ ná kpetsi kpa” kana ká kʉ ie ro mai?

² Yesu bbʉ ko dho ná nja kado ma kʉ ddi. Mutume Paulo ndingʉeri ra na Yesu dji nari goti “ke lingʉe kado kʉ ná kpetsi kpa.” (Azø Waefeso 4:7, 8.) Paulo ngʉ ripo Yesu bbʉngʉe kado kʉ ná fø kpetsi kpa nja ndima kó kutaniko tsotso njonjo kʉ ná chu nǎ d’e. (Efe. 1:22, 23; 4:11-13) Njʉ “kado kʉ ná kpetsi kpa” kʉ watumishi wa huduma ma, wazee ma, wangalizi wa muzunguko ma na. a Bbʉbbʉ dhé, fø kpetsi kpa nzá karie ka ri nari dho kpa adi kosa ro ma nji ddi. (Yak. 3:2) Ro, kodhi Bboke Yesu adi ko tsotso kó bbo na mana kʉ ná fø kpetsi kpa chulu.

3. Akodho ngbaribbai ma ko krʉ ka ko kó “kado kʉ ná kpetsi kpa” tsotso nari.

³ Yesu bbʉ “kado kʉ ná kpetsi kpa” dhó ná njí kʉ kpa li kutaniko kpakpa. (Efe. 4:12) Ro, ko krʉ ka ko kó kpa tsotso  ngbà bbo nǎ mana kʉ ná fø njí kpa nji nari kana. Loroji na, ko ka ko ddi fø njí Pidhinga dzá dza chidha dhi njí na. Fø njí dhi kpa tsotso nja ndrŭ adi ko nyo na ma, njí dhi ritsi d’udha na ma ndirigoti nja d’i chu nǎ. Føri bbai, ko krʉ ka ko kó watumishi wa huduma ma, wazee ma, wangalizi ma na tsotso ko ti ná lo ma, ko nji ná lo ma na chulu ndiro kpa li kutaniko kpakpa d’e. Akonja ngbaribbai ma ko adi faida ba kpakpanga na kpa nji ná njí nǎ ro nari. Ndirigoti ngbaribbai ma ko ka ko dhǒ ko nanga jini ngbà nari “kado kʉ ná kpetsi kpa” ma, kpa lingʉe ná ke Yesu ma na dho nari.

WATUMISHI WA HUDUMA ADI “NJA NDRŬ TSOTSO KÓ”

4. Karne ya kwanza na ká watumishi wa huduma ngʉ adi “nja ndrŭ tsotso kó” ngbaribbai?

⁴ Karne ya kwanza nǎ le lingʉe nja le-djoi ndima é watumishi wa huduma. (1 Ti. 3:8) Ri njani nari kʉ, kpa i ngʉ adi “nja ndrŭ tsotso kó” Paulo ndingʉeri nari bbai. (1 Ko. 12:28) Bbʉbbʉ dhé, watumishi wa huduma ngʉ adi bbo na mana kʉ ná njínji ndiro wazee li ndima thí longaddidha ma, ndrŭ ronga b’odha ma na djo d’e. Loroji na, watumishi wa huduma ngʉ adi maandiko nanga ki ndi inga kpa ngʉ adi ra ri le ndí djo ná ritsi dzi.

5. Njʉ ká watumishi wa huduma adi bbo na mana kʉ ná ngbá njínji?

⁵ Addinga watumishi wa huduma adi nji ná bbo na mana kʉ ná njí djo di. (1 Pe. 4:10) Kpa adi kutaniko nǎ mbø dhi lo ma, mahubiri dhi eneo ma na kpe. Kpa adi vichapo kó nari kpa adi ndo wahubiri dho, kpa adi njínji sonorizasio dhi ngana ma, ndrŭ ma ko, ndirigoti Pidhinga dzá dza ronga thɨdha dhi njí tsotso ko. Fø njí krʉ na mana e bbo dho ná lo ri adi rili kutaniko nǎ lo bbi bblo. (1 Ko. 14:40) Føri kina nja watumishi wa huduma adi Maisha ndirigoti Lod’radha dhi njí dhi Njudha nǎ nja sehemu nji ndirigoti ndrŭ krʉ dhó hotuba bbʉ. Nja mutumishi wa huduma le ka le li nja ndi kó lod’radha dhi kikundi djonga nja ná muzee tsotso d’e. Nja saa djo, muzee ka ndi nzi mutumishi wa huduma ndima ra na kutaniko nǎ nja ndrŭ li kpakpa d’e.

6. Ko ká adi mbai po kpakpanga na njínji ná watumishi wa huduma dho addudho?

⁶ Kutaniko ká adi faida ba ngbaribbai watumishi wa huduma adi nji ná njí nǎ ro? Bolivie nǎ di ná le-ve Berberly b pori “Watumishi wa huduma dhó njí dzá lo dho ma adi njudha dyø b’lo, ma adi dyi ngo, ma adi komatere bbʉ, ma adi hotuba rr ndirigoti ma adi video ma, ji ma na nja. Kpa adi njudha dhi ngana si ná ndrŭ ronga b’o ndirigoti kpa adi rili zoom djó kʉ ná ndrŭ dyø njudha bblo. Njudha goti, kpa adi ngatsotso kó ngathɨdha ma, mbø dhi lo ma na na ndirigoti kpa adi kodhó lo u ná vichapo bbʉ ko dho. Ma nanga adi jini bbo kpadhó njí dho!” Colombie nǎ di ná le-ve Leslie ndirigoti muzee ndibbá ke kʉ ro, pori: “Mabbá ke tsotso watumishi wa huduma adi kó bbo. Nga kpa e ró ke ró njí ka ndi é bbo, føri dho ma adi mbai po bbo kpa dhi njí ma, kpa e tayari nga tsotsokodha dho nari ma na dho.” Bbʉbbʉ dhé, ko krʉ adi mbai po bbo kpadhó njí dho.​—1 Ti. 3:13.

7. Ko ká ka ko dhǒ ko nanga jini ngbà watumishi wa huduma dho nari ngbaribbai? (Anja ji maddi.)

⁷ Nì mai ko nanga adi jini ji watumishi wa huduma dhi lo dho ro, Biblia ripo: “Anidi  mbai po ná ndrŭ.” (Kol. 3:15) Filand nǎ Krzysztof ró dho kʉ ná muzee adi ndi nanga jini nari dhǒ kpa dho iri bbai, ke pori: “Ma adi barua inga mesaje chó nari na ma adi ddikpa andiko ndi. Ndirigoti ma adi mutumishi wa huduma lie ma kpakpa na  ná lo inga addudho ma ma mbai po kedhó njí dho nari ndi.” Nouvelle Caledonie nǎ di ná Pascal ma, Jael ma na adi sala nji bí ina watumishi wa huduma dho. Pascal pori, “Ø da ná ddo kana ko nji e sala bí ina watumishi wa huduma dho, ko e mbai po Yova dho kpa dhi lo dho, ko e ripo ke é kpa na ndirigoti ke kó kpa tsotso.” Yova adi fø di ná sala rr ndirigoti ri adi kutaniko tsotso ko ko.​—2 Ko. 1:11.

KUTANIKO NǍ WAZEE ADI “KPAKPA NJÍNJI NI KANA”

8. Paulo ká pongʉeri ndi lai wazee “kpakpa njínji” addudho? (1 Watesalonike 5:12, 13)

⁸ Karne ya kwanza nǎ wazee ngʉ adi kpakpa njínji kutaniko nǎ. (Azø 1 Watesalonike 5:12, 13; 1 Ti. 5:17) Kpa ngʉ adi “chutso ddá” kutaniko dho njudha ndima ongoza nari chulu ndirigoti kpa ngʉ adi lo nanga vʉ kutaniko dho. Føri kina, kpa ngʉ adi jidha dhi shauri bbʉ le-djoi ma, le-vei ma na dho ndiro kpa tøni kpakpa udha kana d’e. (1 Te. 2:11, 12; 2 Ti. 4:2) Bbʉbbʉ dhé, wazee adi kpakpanga nji nja ndima gba ndima dhó familia dhó lo tso ndirigoti ndima li ndima dhó udha ma, ndima kana kau ma na kpakpa Yova na d’e.​—1 Ti. 3:2, 4; Tit. 1:6-9.

9. Wazee ká adi ngbá njí mai nji njʉ?

⁹ Wazee ró njí kʉ bí njʉ. Kpa adi hwè lo-i d’radha dhi njínji (2 Ti. 4:5) Kpa adi bblo loroji dhǒ nja ndrŭ dho kpakpanga na ndima lod’ra nari ma, lod’radha dhi njí ndima kpe ndima dhó eneo nǎ nari ma, mazoezi ndima bbʉ ko dho ko d’ra lo bblo ndirigoti ko ddi longa bblo d’e nari ma na chulu. Føri kina, kpa adi lod’i zølo na nzɨ ndima ndrŭ nanga krø ro. Njati ddikpa Mukristo nji bbò chenga ró, wazee adi rine ndima kó ke tsotso ndiro ke ma kana kau ngʉ bblo Yova na d’e. Fø ndima rinji nari kana kpa e krr, ndiro ndima b’o kutaniko ronga tse ndi tse ro d’e. (1 Ko. 5:12, 13; Gal. 6:1) Føri djolu pli, wazee kʉ miya ró rø ná kpa. (1 Pe. 5:1-3) Kpa adi Biblia ró dyʉ ndi ná hotuba bbʉ, kpa adi ndima dho ka ná lo nji krʉ nja ndima chu kutaniko nǎ ndrŭ ddiddi ro ndirigoti kpa adi ndrŭ ronga b’o. Nja wazee adi Pidhinga dzá dza chidha dhi njí ma, ri ronga thɨdha dhi njí ma na nji. Kpa adi asamble ma kpe, kpa adi njínji Hopitali dhi lo djonga nja ná Komite ma, dhe dhi ndrŭ ronga adi be ná kikundi ma na nǎ ndirigoti nja njí nji. Wazee adi kpakpa njínji.

10. Ko ká adi mbai po kpakpanga na njínji ná wazee dho addudho?

¹⁰ Yova pongʉeri miya ró rø ná fø kpa ka ndima b’oe ko ronga bblo ndirigoti kpa “nzɨ si rili do njí ko inga ko ronga tata ri.” (Yer. 23:4) Finland nǎ Johanna ró dho kʉ ná le-ve njangʉe fø lo dzá bbʉbbʉnga ndidzá mama che bbo kʉ ná dhe kongʉe ná saa na. Le pori: “Ri nga e sʉsʉ ma d’ra ma nanga d’o ná lo nja ndrŭ dho ri. Ro, nzá ma chu bblo ná ddikpa muzee rrngʉe ma ngatsovedha na ndirigoti ke njingʉe sala ma na ndirigoti ke pongʉeri Yova ji ma ji. D’ʉ ká ke pongʉe ngbá lo ma nari nga ro nzɨ ma adi no ri, ro ma adi ngano nari kʉ ma nanga ri ngʉ d’o nari singʉeni si nari i nì. Ma u ri u nari kʉ Yova cho ngʉe ke madhó lo ungʉe nga tsotsokodha ná saa djo.” Nde, ni tsotso ro ká nidhó kutaniko nǎ wazee korie ngbaribbai?

11. Ko ká ka ko dhǒ ko nanga jini wazee dho nari ngbaribbai? (Anja ji maddi.)

¹¹ Yova adi riji ko di mbai po wazee dho “kpa nji ná njí dzá lo dho.” (1 Te. 5:12, 13) Finlande nǎ di ná Henrietta pori: “Wazee adi nja ndrŭ tsotso kó ji ndima nanga jini ro, ná føri nǎ mana nga e kpadhó saa ma, kpakpanga ma na kʉ bbo nja ndrŭ djolu inga kpadhó maisha nǎ kpakpalo ro kʉ nga  ri. Nja saa na ma adi ripo kpa dho, ‘ni ká chu ri ngbà, ni kʉ bblo pli kʉ ná wazee. Ma e riji ma d’ra fø lo ni dho.’” Türkiye nǎ Sara ró dho kʉ ná le-ve c pori: “Wazee dhó lo urieri le li ndima ‘kpakpa’ nja ndima ra anzi ndima dhó njí na d’e. Føri dho, ko ka ko ndi barua kpa dho, ko nzi kpa nyo dho inga ko ra lod’ra kpa ma na.” Nidhó kutaniko nǎ ka kʉ kpakpanga na njínji ná bbo dho ni nanga adi jini ná muzee ro ddi? Ane mbai ni ka ni po ke dho ná chu ro.​—1 Ko. 16:18.

WANGALIZI WA MUZUNGUKO ADI NDRŬ LI KPAKPA

12. Yesu ká lingʉe nja ngbá kpetsi kpa nja ndima li kutaniko kpakpa d’e? (1 Watesalonike 2:7, 8)

¹² Yesu Kristo lingʉe “kado kʉ ná kpetsi kpa” ndima kó kutaniko tsotso nja d’i chu nǎ. Fø chutso ddadha kana, Yerusalemu nǎ wazee chongʉe Paulo ma, Barnaba ma, nja kpa ma na ndima é wangalizi d’e. (Mdo. 11:22) Ká addudho? Kpa le chongʉe ndima li kutaniko kpakpa d’e, wazee ma, watumishi wa huduma ma na adi rinji nari bbai. (Mdo. 15:40, 41) Fø kpetsi kpa bbangʉe bí kʉ ná ritsi ndirigoti kpa lingʉe ndima dhó maisha hatari na ndiro ndima ddi longa ndirigoti ndima ko nja ndrŭ tsotso d’e.​—Azø 1 Watesalonike 2:7, 8.

13. Wangalizi wa muzunguko dhó ká ngbá njí ro mai bbʉrieni?

¹³ Wangalizi wa muzunguko adi bbi bbo. Nja kpa adi kilometre nji mia djolu ndima si nja kutaniko na d’e. Krʉ yenga ddo ró kpa adi hotuba bbʉ bí, kpa adi ndrŭ ronga be ndirigoti kpa adi chutso ddá painia ma, wazee ma, lod’radha dhi njudha ma na dho. Kpa adi hotuba tayarisha ndirigoti kpa adi muzunguko nǎ adi da ná asamble ma, eneo nǎ adi da nari ma na  kpe. Kpa adi painia dhó darasa ddi ndirigoti kpa adi pekee kʉ ná njudha nji ndima dhó muzunguko nǎ kʉ ná painia na. Føri kina, kpa adi nja njínji ndirigoti nja saa na kpa adi tawi bbʉ ndima dhona ná lele ringani le njí ná njí ma nji ddi.

14. Ko ká adi mbai po kpakpanga na adi njínji ná wangalizi dho addudho?

¹⁴ Wangalizi adi nji ná njí ká adi faida bbʉ kutaniko dho ngbaribbai? Turquie nǎ ddikpa le-djo pori ɨ wangalizi djo: “Kodhó kutaniko ronga kpa si be ná føri krʉ adi ma ronga cho ma kó ma djoi ma, ma vei ma na tsotso anziro nga djolu. Ma dirie wangalizi na bí b’lo, ro kpa nzá d’erie ri ro po ndima ró njí kʉ bbo nari dho ndima nzɨ tilo ma na ri.” Anziro djo ko tielo ná Johanna ma ngʉ lod’ra mwangalizi na ná saa na, kpa nzá singʉe ddikpa le ro maddi bba kana ri. Le pori: “Ma adi fø ddo ngano godhe. Ma vei aro kʉ ná ndrŭ tsɨngʉe ø ndirigoti ndrŭ dyu ngʉ adi ma hwi bbo. Fø mwangalizi lingʉe ma kpakpa ndirigoti ke pongʉeri, njʉ ri ka ndi é kpakpa ko di chøchø kodhó familia nǎ ndrŭ ma, kodhó bakau ma na na ddinga. Ro, ø dz’ djó ko si saa ba bbo ko di kpa ma na ddinga.” Bí kʉ ná ndrŭ jirie wangalizi ma, kpa ndima tsotso kó ná chu ma na ji.​—Mdo. 20:37–21:1.

15. (a) 3 Yohana 5-8 ridho nari bbai, ko ká ka ko dhǒ ko nanga jini ngbà wangalizi dhi lo dho nari ngbaribbai? (Anja ji maddi.) (b) Ri ká ngani ko bbʉ heshima kpakpanga na njínji ná le-djoi bbá dhi dho addudho ndirigoti fø ká ko ka ko njiri ngbaribbai? (Anja kisanduku “ Aniddinga kpa bbá dhi djo.”)

¹⁵ Mutume Yohana lingʉe Gayo kpakpa ndi kó kutaniko ronga si be ná le-djoi hwè na ndirigoti ke pongʉeri ke kó kpa “tsotso kpa ra ndima dhi bbi na anzi ngbà tho Mungu nyǒ nari bbai.” (Azø 3 Yohana 5-8.) Fø ko ka ko njiri ná ddikpa chu kʉ, nyo dho ko mwangalizi nzi ko bba nari ro mai. Nja chu kʉ ziara dhi saa na le kpe ná lo na ko  ko tso gba krʉ nari. Anziro djo ko tielo ná le-ve Leslie adi ndi nanga jini nari dhǒ nja d’i chu lu maddi. Le pori “Ma adi rinzi Yova bbʉ kpadhó lo u ná ritsi kpa dho. Mabbá ke ma na ko adi barua ndi kpa dho ndiro ko po ngbá ngatsi ma kpadhó ziara koe ko tsotso nari d’e.” Anonga nari kʉ, wangalizi ma adi bani kpakpalo na ddi ndirigoti kpa ma adi njeni ko bbai dhé. Nja saa djo dhe adi kpa nji, ri adi kpa nanga d’od’o ndirigoti kpa thí adi bʉni bʉ maddi. Njaro ni po kpa dho ná bblo lo inga ni bbʉ kpa dho ná ritsi dhé ka ndi é kpadhó sala goti ngʉ ná chu.​—Mez. 12:25.

KODHÓ LO URIE “KADO KɄ NÁ KPETSI KPA”

16. Mezali 3:27 ridho nari bbai, le-djoi ká ka ndima dhu ngbá lo ndima tso?

¹⁶ Dz’ djolu gble kodhó lo u le-djoi bí ndima é “kado kʉ ná kpetsi kpa” d’e. Njati ni é b’lo ba batiso ná le-djo ró, ni ká ka ni kó “nga tsotso ro nidhó kpakpanga na” fø chu nǎ nzá? (Azø Mezali 3:27.) Ni ká ka ni é tayari nì, nja ni ngʉ mutumishi wa huduma d’e? Ri é nì ni kʉ mutumishi wa huduma ró, ni ká ka ni njí kpakpanga ngbà nja ni ngʉ muzee ndiro ni kó ni djoi tsotso d’e? d Ri ká ka ndi ka nzá ni ø nidhó maisha thika ndiro ni ra Masomo ya Waeneza Enjili ya Ufalme dhi darasa na d’e? Fø darasa ka ndi kó ni tsotso ni chu lo ndiro Yesu njínji bbo ni na d’e. Njati ni di ni mbu nzá dho fø ritsi krʉ ka ndi njini nari bbai ró, anzinga Yova tso. Anziri Yova bbʉ ndidhó roho takatifu ni dho ndiro ni njí nidhó bbʉni kutaniko nǎ ná njí d’e.​—Lu. 11:13; Mdo. 20:28.

17. Kodhi Pi Yesu Kristo djo ká “kado kʉ ná kpetsi kpa” adi ngbá lo ngaddi ko dho?

¹⁷ Yesu li “kado kʉ ná kpetsi kpa” kpakpanga na ndima njínji ro, ná føri ri dhǒ ke chutso ddá ko dho ngasini ná i saa na. (Mt. 28:20) Ko adi mbai po bbo kodhi jidha na kʉ ná Pi dho dhonalo ke adi ritsi bbʉ ndirigoti ke chu kodhó lo u ná ritsi chu, godhé ke bbʉ ko djoi ndima kó ko tsotso d’e nari dho. Aneri ni dhǒ ni nanga jini ngbà nari kpakpanga na njínji ná fø kpetsi kpa dho. Ndirigoti nzɨ vi mbai ni po Yova dho nari nga, dhonalo “krʉ kʉ ná bblo kado ma, krʉ kʉ ná kaka ná ritsi “ ma na adi si ke dhó ro.​—Yak. 1:17.