1. Mutume Paulo ká ngʉ adi ndi mbu ngbaribbai watumishi wa huduma dhi lo dho?

 WATUMISHI wa huduma adi bbo nǎ mana kʉ ná njínji kutaniko nǎ. Mutume Paulo ngʉ adi chi tøni ná fø le-djoi nja mana na. Loroji na, Filipi nǎ Wakristo dho ke ndingʉe ná barua nǎ, ke zʉngʉe watumishi wa huduma ma, wazee ma na ronga.​—Flp. 1:1.

2. Luis ró dho kʉ ná le-djo ká adi ndi mbu ngbǎ mutumishi wa huduma ndi kʉ nari dho?

² Jadda inga ngó kʉ ná b’lo ba batiso ná le-djoi adi hwè ba bbo ndima kʉ watumishi wa huduma nari dho. Loroji na, Devan ngʉngʉe mutumishi wa huduma 18 ndidhó cho ngʉe ro. Ro, Luis ngʉngʉe mutumishi wa huduma b’lo ndidhó cho si 50 ro. Ke tu ngbaribbai ma bí kʉ ná le-djoi adi ndima mbu fø njí dho nari nanga ɨ, “Ma e hwè na bbo fø chu nǎ má ma djoi ma, ma vei ma na tsotso kó nari dho.” Kpa dhongʉe jidha ma dho bbo, kpadjo ma ka ma dhǒ jidha kpa dho. Bí kʉ ná watumishi wa huduma adi ndima mbu føri bbai.

3. Ko ká si loti ngbá ngadhudha djo?

³ Njati ni é b’lo ba batiso ná le-djo ro ni d’e ngʉ mutumishi wa huduma nzá ró, ni ká ka ni li fø muradi ro ni nji ngbà? Ni ronga ká ngbá lo ka ndi cho ni njiri fø d’e? Ri ká ngani ni é maandiko dhǒ ná ngbá sifa na nja ni ngʉ mutumishi wa huduma d’e? I lo nǎ ko si fø ngadhudha dhi jibu ba. Ro, ya kwanza akochu watumishi wa huduma dhó njí i vi.

 WATUMISHI WA HUDUMA KÁ ADI KUTANIKO TSOTSO KÓ NGBARIBBAI?

4. Watumishi wa huduma dhó njí ká e addu? (Anja ji maddi.)

⁴ Watumishi wa huduma kʉ b’lo ba batiso ndirigoti roho takatifu chulu le li ndiro ndima kó wazee tsotso bí kʉ ná njí na kutaniko nǎ d’e ná le-djoi. Nja watumishi wa huduma adi eneo bbʉ wahubiri dho ndirigoti vichapo bbʉ lod’radha dhi njí dho. Nja kpa adi Pidhinga dzá dza nanga ma, ri ronga ma na thɨ. Føri kina nja watumishi wa huduma adi njínji ndrŭ kodha dhi ngana ndirigoti kpa adi njínji sonorizasio dhi ritsi na njudha dhi ngana. Watumishi wa huduma dhó njí ró bí nga kpa adi nji ndima ronga na. Bbo pli na mana kʉ nari kʉ, kpa jirie Yova ndirigoti kpa adi kedhó yadha dyø ndima dhó maisha nǎ nari. Føri kina, kpa jirie ndima djoi ma, ndima vei ma na bbo. (Mt. 22:37-39) B’lo ba batiso ná le-djo ká ka ndi njiri ngbǎ nja ndi ngʉ mutumishi wa huduma d’e?

5. Le-djo ká ka ndi njiri ngbǎ ndiro ndi ngʉ mutumishi wa huduma d’e?

⁵ Biblia tilo watumishi wa huduma ji ndima ngʉ ná kpa dho ringani ndima é na ná sifa djo. (1 Ti. 3:8-10, 12, 13) Njati ni ji ni ngʉ mutumishi wa huduma ró, anjiri ni chu fø sifa ndirigoti ni dhǒ ri. Ro, ya kwanza ringani ni ddinga ni ronga cho ni ngʉ mutumishi wa huduma d’e ná lo djo.

NI RONGA KÁ NGBÁ LO CHO NJA NI NGɄ MUTUMISHI WA HUDUMA D’E?

6. Ni ji ni kó ni djoi ma, ni vei ma na tsotso ró, ká ngbá lo ka ndi cho ni ronga? (Matayo 20:28; anja ri ji maddi.)

⁶ Addinga Yesu dhó bblo pli ngʉe ná loroji djo, ke ngʉ krʉ ritsi nji ndi ji ndidzá Baba ma, nja ndrŭ ma na ji nari dho. Jidha ngʉ adi ke ronga cho ndi njínji kpakpanga na ndirigoti ndi njí nga na mana kʉ ri nja ndrŭ ngʉ adi nja ná njí ma krʉ. (Azø Matayo 20:28; Yoh. 13:5, 14, 15) Njati ri é jidha ni ronga cho ró, Yova si ni ronga lele ndirigoti ke si ni tsotso koko nja ni ngʉ mutumishi wa huduma d’e.​—1 Ko. 16:14; 1 Pe. 5:5.

7. Ri ká nzá ngani ni ngʉ mutumishi wa huduma nja ndrŭ má ni ma dhé d’e ri addudho?

⁷ I dz’ djó ndrŭ adi kpakpanga nji nja ndrŭ di ndima má d’e. Ro, Yova dzá tengenezo nǎ nga rie fø ri. Njati ddikpa le-djo ronga jidha di cho Yesu bbai ró, fø ke nzɨ  adi ji nja ndrŭ nja ndi mana na bbo inga ndi nyó pi nja ndrŭ djo ri. Njati mǎ riji ndrŭ di ndi má ná ke le li mutumishi wa huduma kutaniko na ró, ke nzá ka ndi njí nga na mana kʉ ri njani ndi dho ná njí ri inga Yova dzá bbo na mana kʉ ná chembø ronga b’odha dho ringani le njí ná nja njí ri. Ke ka ndi di fø di ná njí nja nzá ndi ka ndi njí ná ri bbai. (Yoh. 10:12) Yova nzɨ adi nodha na ritsi nji ná ndrŭ dhó kpakpanga ronga ro le ri.​—1 Ko. 10:24, 33; 13:4, 5.

8. Yesu ká bbʉngʉe ngbá shauri ndi unakpa dho?

⁸ Nja saa djo, Yesu unakpa ma che kʉ ná ngaddidha ngʉ adi cho ddi ndiro ndima ne madaraka d’e. Addinga Yakobo ma, Yohana ma na njingʉe ná lo djo. Kpa nzingʉeri ke si ndima li bbo na mana kʉ ná ngana ndidhó pidhinga nǎ. Yesu nzá mangʉe kpa ma ndima po ná fø lo dho ri. Føri rɨngana ke pongʉeri ndi una 12 kʉ ná mitume dho ɨ: “Njati ni kana ddike jiri ndi é bbo ró, ke dho ringani ndi é nidhó njí dhi ke ndirigoti njati ni kana ddike jiri ndi é ya kwanza ró, fø ke dho ringani ndi é nidhó nokpa.” (Mk. 10:35-37, 43, 44) Nì ribba bblo kʉ ná lo cho ndima ronga ndiro ndima kó ndima djoi ma, ndima vei ma na tsotso d’e, ná fø kpa sie ledha kutaniko dho.​—1 Te. 2:8.

ADDUI KÁ KA NDI LIRI NI JIRI NI KÓ NI DJOI TSOTSO?

9. Ni ká ka ni liri ni djoi tsotsokodha dhi ù dhidhi ni na ngbaribbai?

⁹ Bbʉbbʉ dhé, ni ji Yova ndirigoti ni jiri ni kó nja ndrŭ tsotso. Ro, njaro nzá ni ka ni jiri ni njí mutumishi wa huduma adi nji ná njí ri. Ni ká ka ni liri fø ù dhidhi ni na ngbaribbai? Addinga ngbá ngatsi ma ni si hwè ba ni djoi ma, ni vei ma na tsotso ni kó nari nǎ ro nari djo. Yesu pongʉeri ɨ: “Ritsi le bbʉ nari nǎ hwè dada ritsi le ba nari djolu.” (Mdo. 20:35) Yesu ngʉ adi ribba fø kanuni i ddá chutso ndi dho ndidhó maisha nǎ. Ke ngʉ adi hwè ba bbo nja ndrŭ tsotso ndi kó nari nǎ ro ndirigoti ni ma ka ni njiri fø ddi.

10. Yesu ká dhongʉe ndi ngʉe hwè na nì nja ndrŭ tsotsokodha dho nari ngbaribbai? (Marko 6:31-34)

¹⁰ Akonja Yesu ngʉe hwè na nja ndrŭ tsotso ndi ngʉ adi kó nari dho, nari dhǒ ná lo ro di. (Azø Marko 6:31-34.) Ddikpa cha Yesu ma, mitume ma na njengʉeni bbo ndirigoti kpa ngʉ ra nga ndrŭ ro kʉ ná ngana ndiro ndima u ndima ronga chʉ d’e. Ro, birobiro kʉ ná ndrŭ dangʉe kpa nji, ndrŭ ngʉ riji ke ddi longa ndima dho. Ke ka ndi gʉngʉe føri gʉ maddi dhonalo, ke ma ndi unakpa ma na dho “nga saa ro ngʉe nga nyodha dho maddi ri.” Yesu ka ndi poeri ndrŭ rara b’lo ndi d’ra bbʉbbʉlo ro ddikpa inga aro nari goti. Ro, ke ronga jidha ngʉ adi cho nari djotsina ke ngangʉe “bí kʉ ná lo ngaddidha tso ndrŭ dho.” Ndirigoti ke ddingʉe lo ndrŭ dho kpø “nga rá tɨtɨ ná nga djo.” (Mk. 6:35) Ke nzá njingʉeri fø ndi dho ringani ndi njiri fø nari dho ri, ro “ke ronga zølo chongʉe.” Ke jingʉeri ndi ddi longa kpa dho ndi ji kpa ji nari dho. Nja ndrŭ tsotso ndi kó ná føri ngʉ adi hwè bbʉ bbo Yesu dho.

11. Yesu ká kongʉe ndidhó lo ngʉ rr ná ndrŭ tsotso ngbaribbai? (anja ji maddi.)

¹¹ Lo ndi d’ra birobiro kʉ ná ndrŭ dho nari kina, Yesu njingʉe nja lo ki maddi. Ke bbʉngʉe kpadhó lo u kimwili nǎ ná ritsi kpa dho. Ke bbʉngʉe nyo ndrŭ dho ddù chulu ndirigoti ke unakpa ndongʉe ri ndrŭ dho. (Mk. 6:41) Fø lo ndi nji nari na ke ddingʉe ngbaribbai ma le ka le kó nja ndrŭ tsotso nari nga ndi unakpa dho. Føri chulu ke dhongʉeri nari kʉ, watumishi wahuduma adi nji nari kʉ bbo na mana kʉ ná njí. Addinga ngbá ngatsi ma mitume  bangʉe hwè ddinga ndima njinjí Yesu ma na ndirigoti ddù chulu ke bbʉngʉe ná nyo ndima ndo ndrŭ nyó “kpø ndrŭ o lili nanga tsi” nari djo! (Mk. 6:42) Føri nga ngʉe ya kwanza dhé Yesu lingʉe nja ndrŭ dhó lo u na ritsi anziro, ndidhó lo u ná ritsi djolu ri. Ke njingʉeri fø dz’ djó ndi ngʉe ro ndidhó maisha nǎ lu. (Mt. 4:23; 8:16) Yesu ngʉe hwè na bbo longa ndi ddi ndirigoti nja ndrŭ dhó lo u ná ritsi ndi ngʉ bbʉ kpa dho nari dho. Ni ma si hwè ba bbo ddi, njati ni ngʉ mutumishi wa huduma ró.

12. Ká addudho nzá ringani ddikpa le ma di riddi ndi na mana ro nga kʉ kutaniko nǎ ri?

¹² Njati ni di riddi ni ro nga kʉ ddikpa ufundi na maddi kutaniko nǎ ri ró, nzɨ bbari ni thí buni. Bbʉbbʉ dhé, kutaniko tsotso ni ka ni kó na ná sifa ro na ni ka ni é nì dhé. Addinga 1 Wakorinto 12:12-30 nǎ Paulo ndingʉe ná lo djo ndirigoti anziri Yova kó ni tsotso ni njinjí ri na. Fø lo nǎ mutume Paulo dhori nari kʉ Yova dho njínji ná ndrŭ krʉ e lazima ndirigoti ndrŭ na mana e bbo kutaniko nǎ. Ri é nzá ni d’e ngʉ mutumishi wa huduma ri ró, ringani ni dhǒ nja kʉ ná sifa vi, nari dho nzɨ d’i ji. Føri rɨngana, anji ni dho ka ná lo krʉ ndiro ni na mana é bbo Yova dho ndirigoti ni djoi ma, ni vei ma na dho d’e. Ni ka ni uri u nari kʉ rié ngbá njí ma wazee bbʉ ni dhona ró, ngbǎ ma ni fø njínji nari kpa adi nja mana na.​—Ro. 12:4-8.

13. Ri ká ngani ni chu ngbá lo madaraka na kʉ ná kpetsi kpa dho ringani ndima é na ná sifa djo?

¹³ Addinga mutumishi wa huduma le ngʉ d’e ri adi ngani le é na ná sifa ringani ni dhǒ dho ná ddikpa lo ro djo: Fø sifa kana bí kʉ nari krʉ kʉ ná Wakristo adi dhǒ. Wakristo krʉ dho ringani ndima kana nga é chøchø Yova na ndiro ndima ba hwè ndrŭ dho ndima ritsi bbʉ nari nǎ ro ndirigoti ndima njí ke nyǒ tho ná lo d’e. D’ʉ ká ringani ddikpa le-djo njí addu nja ndi ngʉ mutumishi wa huduma d’e?

NI KA NI NJÍ NÁ LO NJA NI NGɄ MUTUMISHI WA HUDUMA D’E

14. “Nzɨ le lo be pa” nari na mana ká kʉ addu? (1 Timoteo 3:8-10, 12)

¹⁴ Akonja 1 Timoteo 3:8-10, 12. (Azø) tilo djo ná nja sifa ro. Mutumishi wa huduma dho ringani “nzɨ ndi di lo be pa.” Fø lo nanga le ka le tu ngbà dho ndrŭ ka ndima bbʉ “heshima” ná lo nji ná ke. Fø ri na mana nga kʉ ni ka ni gbó nga nzá inga ni ka ni ti gbo dhi lo nzá ri. (Muh. 3:1, 4) Ro,  fø ri na mana kʉ ni di ni dhona bbʉni ná njínji kpakpanga na. Njati ni di ni dhona le bbʉ ná njí nji bblo ró, kutaniko nǎ le-djoi ma, le-vei ma na ka ndima nja ni ngbà djo ndima ka ndima li ndima thí ri ndirigoti kpa ka ndima si heshima bbʉ ni dho.

15. “Nzɨ le lo ti ndi mbess na” ndirigoti “nzɨ le ndrŭ dhó mbø chi nga kʉ chi ná chu nǎ” nari na mana ká kʉ addu?

¹⁵ “Nzɨ le lo ti ndi mbess na” ná føri na mana kʉ bbʉbbʉlo le ti nari. Føri na mana kʉ ni ni po ná lo njinji nzá ni sha nja ndrŭ sha ro nari. (Mez. 3:32) “Nzɨ le ndrŭ dhó mbø chi nga kʉ chi ná chu nǎ” ná føri na mana kʉ ni nji ná njí ma, mbø dhi lo ma na kana ni bbʉbbʉlo po nari. Ri nzá ngani ni njí nga kʉ chø ná lo nidhó kutaniko nǎ bbakau ró ndiro ni ba mbø d’e ri.

16. (a) “Nzɨ le wa jø bbo” nari na mana ká kʉ addu? (b) “Nzɨ le thí lod’i le djo” nari na mana ká kʉ addu?

¹⁶ “Nzɨ le wa jø bbo” nari na mana kʉ nzɨ ni jø wa nga djolu, nzɨ di bbo adi wa jø ná ke. “Nzɨ le thí lod’i le djo” nari na mana kʉ ni nji ná lo krʉ tso nju Yova dhó kanuni na nidhó maisha nǎ. Nì mai ni kʉ nzá kaka ná ke ro, ni kana nga ka ndi é Yova na chøchø ndirigoti ke si rili ni é ngoi na.

17. “Kpadhó njí le nja vi” nari na mana ká kʉ addu? (1 Timoteo 3:10; anja ji maddi.)

¹⁷ “Kpadhó njí le nja vi” nari na mana kʉ wazee nja kpa dhona ndima bbʉ ná njí ká kpa nji ngbà ma nari bblo ndirigoti ndima ká ka ndima li ndima thí kpa djo ngbà ma nari. Njati wazee bbʉ njí ni dhona ró, adyø ri dho tengenezo bbʉ ná chutsoddadha ma, lojadha ma na li ni li ni dyu ro. Anji kpakpanga ni chu fø njí bblo ndirigoti ngbá saa djo ma ringani ni dya fø njí tso nari. Njati ni njí ni dhona le bbʉ ná njí kpakpanga na ró, kutaniko nǎ le-djoi ma, le-vei ma na ka ndima njari ni dhidhi. Wazee aninji kpakpanga ni ddi longa b’lo ba batiso ná le-djoi dho. (Azø 1 Timoteo 3:10.) Nidhó kutaniko nǎ ká kʉ b’lo ba batiso ná jadda kpa ro ddi? Kpa ká funzo la pekee nji nì ndirigoti kpa ká ndima tayarisha bblo njʉdha dho nì? Kpa ká adi komater bbʉ njʉdha dhi ngana ndirigoti lod’ra krʉ saa ro nì? Njati ri é fø ró, abbʉ ngbà ka kpadhó cho ma, hali ma na na ná njí kpa dhona. Fø chu nǎ ni ka “ni nja jadda le-djoi dhó njí.” Føri ka ndi liri kpa dhi kiroho nǎ nja ndima ngʉ watumishi wa huduma d’e.

18. “Ni djo le po ná lo ro kʉ nga” ná føri na mana ká kʉ addu?

 ¹⁸ “Ni djo le po ná lo ro kʉ nga” ná føri na mana kʉ ni ndrŭ ka ndima bbø na ná chelo ro nga kʉ ri. Bbʉbbʉ dhé, Wakristo ndrŭ ka ndima bbø kali dhi lo na ngbà. Yesu ma ndrŭ bbøngʉe kali dhi lo na ddi ndirigoti ke pongʉeri ndi unakpa ma si kʉ bani fø lo na ddi. (Yoh. 15:20) Nì mai ri kʉ fø ro, njati ni b’o nidhó nyi ronga bblo ngbà Yesu bbai ró, kutaniko nǎ ndrŭ si bblolo ti ni djo.​—Mt. 11:19.

19. Biblia ripo “ri é ddikpa bbá isɨle kʉ ná ke” ná føri na mana ká kʉ addu?

¹⁹ Ya kwanza Yova ngangʉe ndoa tso ro, ke pongʉeri “Ddikpa kpetsi ke dho ringani ndibbá isɨle é ddikpa.” Ndirigoti Wakristo krʉ dho ringani ndima dyø fø lo. (Mt. 19:3-9) Mukristo kʉ ná kpetsi ke dho nzá ringani ndi njí uasherati ri. (Ebr. 13:4) Føri na mana kʉ ringani ke tøni chi ndibbá le dho. Ke dho nzá ringani ndi di ji dhi loti nga kʉ ndibbá le ná le na ri.​—Yob. 31:1.

20. Le-djo ndidhó familia ronga b’o “bblo” nari na mana ká kʉ addu?

²⁰ “Ledzá nzø ma, lebbá dza nǎ ndrŭ ma na ronga le b’o bblo nari.” Njati ni é dza ba ró, ringani nzɨ ni di nidhó daraka be pa. Adi ibada ya familia ongoza krʉ ddo ró. Adi ra lod’ra nibbá le ma, nidzá nzø ma na na bí ina ngbà ri ka ná ngatsi. Ako nidzá nzø tsotso ndima kana nga é chøchø Yova na. (Efe. 6:4) Nì ndidhó familia ronga b’o ná ke adi ridho ndi ka ndi b’o kutaniko ronga maddi.​—Anja 1 Timoteo 3:5.

21. Njati ri é nzá ni d’e ngʉ mutumishi wa huduma ró ká ni ka ni njiri ngbǎ?

²¹ Nzá d’e ngʉ watumishi wa huduma ná le-djoi, anizø i lo li ni li ni dyu ro ndirigoti anidi nganzi Yova tso fø lo djo. Anizø watumishi wa huduma dho ringani ndima é na ná sifa ndirigoti aninji kpakpanga ni dhǒ ri d’e. Anidi ngaddi ngbá ngatsi ma ni ji Yova ma, ni djoi ma, ni vei ma na nari djo. Aniliri kpa tsotso ni kó nari dhi ù dhidhi ni na. (1 Pe. 4:8, 10) Watumishi wa huduma ni si ngʉ ró, ni sie hwè na bbo ndirigoti ni si ni djoi ma, ni vei ma na tsotso ko kutaniko nǎ. Yova le ni nji ná kpakpanga ronga ndiro ni ngʉ watumishi wa huduma d’e!​—Flp. 2:13.