Ni ká zøe i cho dhi Dzamu dhi Munara nǎ lo bblo ngba? Anja ni ká ka ni ngʉ i logoti ngba ma nari:

Yakobo 5:11 ri po Yova kʉ “jidha na bbo” ndirigoti “zølo” na. Føri ká ko li kpakpa ngbaribbai?

Ko churi Yova kʉ zølo na nari dho, ke adi kodhó chenga zø njinji. Yakobo 5:11 rid’ra ke adi riji bbo ndi kó ko tsotso. Ko adi rinji bblo ke ko dyø nari na.​—w21.01, p. 21.

Yova ká bbʉ bbonga nja nrŭ dho addudho?

Føri ke njingʉe jidha dzá lo dho. Lo kpeni bblo ná føri rili kedzá familia e ngoi na ndirigoti utarataibu na. Ni ngarr Yova li ná bbonga dho ná familia nǎ nrŭ krʉ churie ie ma ka ndi vʉ lonanga ya mwisho nari ndiro ndi ddá chutso ndima dho d’e.​—w21.02, p. 3.

Wakristo dho ká ringani ndima e nyodyu na mesaje le adi cho na ná elektroniki dhi no na ndima njínji ná saa na addudho?

Njati ddikpa le vʉri ndi njinjí fø di ná aplikasio na ró, le dho ringani ndi vʉ ndidhó bbakau bblo. Føri le nji nari e kpakpa bí kʉ ná grupe na le é ró. (1 Tim. 5:13) Nzá chuni bblo nalo nanga le nya nrŭ kalu ndirigoti kiroho na le-djoi ma, le-vei ma le tsu turusa dhi lo kana fø aplikasio chulu nari ka ndi tsu le hatari na.​—w21.03, p. 31.

Yova bbangʉeri Yesu nzani nza ndirigoti ke dhedhe dho ná sababu ro ká kʉ addu?

Fø ke njingʉeri dho ná ddikpa lo kʉ, tsuba djo le tingʉe Yesu nari chulu ri ka ndi kae ka Wayahudi tuni wá nǎ ro. (Gal. 3:10, 13) Ya pili ri kʉ Yova ngʉ Yesu vu ndi si ngʉ bbo Kuhani. Ya tatu Yesu tøngʉeni chí nari na ke dhongʉeri nrŭ ka ndima tøni chí ngba Mungu dho njati mbudha e ngbabø ma ró. (Yob. 1:9-11)​—w21.04, p. 16-17.

Ni ká ka ni njiri ngba njati rie kpakpa ri kʉ le ba nrŭ mahubiri na ri ró?

Ni ka ni mburi ni ne nrŭ ngba nrŭ ka ndima bani abba ná saa na. Ni ka ni mburi ni d’ralo njonjo kʉ nanga lu maddi. Ndirigoti ni ka ni mburi ni nji nja lo ki maddi, loroji na, ni ka ni ndi barua ro ma i.​—w21.05, p. 15-16.

Paulo pongʉeri: “Ma dhe yadha chulu, yadha dzá lodho” ná saa na ká ke ngʉ riji ndi pori ngba”? (Gal. 2:19)

Musa dhó yadha lingʉeri le njari nari kʉ, nzá kaka ná nrŭ ro nzá ka ndima dyø yadha kaka ná ngatsi ri ndirigoti ri ngʉ Waizraeli mba Kristo dhi ngana. (Gal. 3:19, 24) Føri chongʉe Paulo ronga ndi u Kristo. Fø Paulo njingʉeri nari na ke “dhengʉe yadha dzá lodho”; ke ki ro nzá chingʉeni yadha nǎ ri.​—w21.06, p. 1.

Yova ká bba loroji ngbaribbai ko dho ngatso le ve nari kana?

Yova adi tso ve nari kʉ ndidzá bbonga nrŭ gʉ nari ma, ndidzá nja nzø tsa ndiro nari ma, Shetani kali sha ndi djo nari ma, ndidzá nrŭ nzani nza nari ma, ndima kana nga ndoni dhe chulu ndidzá kau na nari ma, ndidzá nrŭ ró nrŭ vuvu nari ma ndirigoti ndidzá nononi ná ritsi sani nari ma na.​—w21.07, p. 9-12.

Yosefu ká bbangʉe ngba bblo kʉ ná loroji ngatso le ve nari kana?

Ke vengʉe ndi djoi njingʉe ndi ró ná chelo tso. Føri goti nrŭ bbøngʉe ke kali dhi lo na ndirigoti ke le sʉngʉe prizo na Misri na cho bí dho.​—w21.08, p. 12.

Hagai 2:6-9, 20-22 tilo nrŭ nanga le si ja nari djo, føri ká kʉ ngba ri?

Nzɨ mai bí kʉ ná nrŭ tsɨ adi Pidhinga dzá hwè lo i u ro, bí kʉ ná nrŭ si bbʉbbʉlo kana ni. Karrnga goti nrŭ tsɨ kpari nanga le si jaja sadha kpa si ba ná saa na.​—w21.09, p. 15-19.

Kodho ká ringani nzɨ ko njeni addudho kodhó lod’radha dhi njí kana?

Yova adi kodhó kpakpanga nja, ndirigoti ke adi hwè ba. Njati ko njeni nzá inga ko thí bʉni nzá ró, ko si choro nŭnŭ di ná shinga ba.​—w21.10, p. 25-26.

Mambo ya Walawi sura 19 ká ko tsotso kó ngbaribbai ko njinjí i shauri na: “Aningʉ watakatifu nidhó nyi krʉ kana”? (1 Pe. 1:15)

Fø verse nǎ le d’ra Mambo ya Walawi 19:2 nǎ kʉ nalo. Sura 19 bbʉ bí kʉ ná loroji ko dho ngbaribbai ma ko ka ko njinjí 1 Petro 1:15 nǎ kʉ nalo na kodhó maisha na nari djo.​—w21.12, p. 3-4.