1. Jadda le-djo dho ká ringani ndi njiri ngbǎ ndi é dhidhi kiroho nǎ ná Mukristo d’e?

 PI DAUDI pongʉeri Sulemani dho ɨ: “Ao kpakpa ndirigoti adhoni kpetsi ke bbai.” (1 Fa. 2:1-3) Fø lo na mana kʉ bbo ngbà jiri ndima dyø Yesu njʉ ná Wakristo krʉ dho. Nja ndima njiri fø d’e, ringani kpa rrnga Mungu dhó yadha krʉ dho ndirigoti kpa di njínji Biblia nǎ kanuni na ndima dhó maisha nǎ krʉ kʉ ná lo kana. (Lu. 2:52) Jadda le-djoi dho ká ri kʉ bbo na mana kʉ ná lo ndima ngʉ dhidhi kiroho nǎ ná Wakristo addudho?

2-3. Ri ká kʉ bbo na mana kʉ ná lo jadda le-djo ngʉ dhidhi kiroho nǎ ná Mukristo addudho?

² Mukristo kʉ ná kpetsi ke adi bbo na mana kʉ ná njínji familia nǎ ndirigoti kutaniko nǎ. Jadda le djoi, njaro ni ddirie nga ro b’lo gosi ná saa djo ni si ba ná madaraka djo. Njaro ni adi riddi ni si ngʉ mutumishi wa huduma, ndirigoti luti muzee. Inga ni si ndoa chi ndirigoti ni si nzø ba. (Efe. 6:4; 1 Ti. 3:1) Nja ni tso si fø muradi djo ndirigoti ri kaka ni dho d’e, ringani ni é dhidhi kiroho nǎ ná Mukristo. b

³ Ni tsotso ká addu ka ndi kó ndiro ni dhidhi kiroho nǎ d’e? Ringani ni nji ná bbo na mana kʉ ná lo ro kʉ thé. Nde, ni ká ka ni njí addu njʉ ndiro ni tayarisha ni ndirigoti ni si gosi ná saa djo ka ndi si bbʉni ni dhona ná njínji bblo d’e?

4. Ni ka ni dyø ná bblo kʉ ná loroji ká ni ka ni ba ngbaga? (Anja ji maddi.)

⁴ Avʉ bblo kʉ ná loroji ni dyø d’e. Biblia nǎ kʉ dyø dhó loroji ni ka ni dyø ná jadda kpetsi kpa bí. Fø kpa jingʉe Mungu  ji ndirigoti kpa ngʉe bí kʉ ná madaraka na ndiro ndima kó Mungu dzá ndrŭ tsotso d’e. Føri kina, ni ka ni ba bblo dhó loroji kʉ ná dhidhi kiroho nǎ ná kpetsi kpa nidhó familia nǎ inga nidhó kutaniko nǎ. (Ebr. 13:7) Ndirigoti ni ka ni dyø kaka ná ke Yesu dhó loroji maddi. (1 Pe. 2:21) Fø kpa dhó loroji ni zø li ni li ni dyu ro ná saa na, addinga kpadhó bblo pli kʉ ná sifa djo. (Ebr. 12:1, 2) Ndirigoti avʉ ngbaribbai ma ni ka ni dyø fø kpetsi kpa nari.

5. Ni ká ka ni njiri ni é ngaddidha dhi kpakpanga na ngbaribbai ndirigoti føri ká kʉ mana na addudho? (Zaburi 119:9)

⁵ Aneri ni é “ngaddidha dhi kpakpanga na ndirigoti ni b’o . . . ri ronga.” (Mez. 3:21) Ngaddidha dhi kpakpanga na kʉ ná ke adi lonangaddi li ndi li ndi dyu ro, lo ndi nji nari njí. Føri dzá anji kpakpanga ni é fø uwezo na goti ni di njínji ri na. Ká addudho? Dhonalo i dz’ djó bí kʉ ná jadda kpa adi lonangavʉ ndima djǒ na si ná lo ró ro inga ngbaribbai ma ndima ndima mbu nari ró ro. (Mez. 7:7; 29:11) Føri kina, le nyǒ le djé na ná ritsi ka ndi é matokeo na ni djo. Nde, ngaddidha dhi kpakpanga ká ni ka ni ba ngbaribbai? Anga ritso Biblia nǎ kanuni ni chu nari na ndirigoti addinga addudho ma ri na mana kʉ bbo nari djo. Ndirigoti anjinjí fø kanuni na ni vʉ lonanga ngbà ka ndi tho Yova nyǒ nari bbai d’e. (Azø Zaburi 119:9.) Njati ni é bbo na mana kʉ ná fø ufundi na ró, føri sie b’lo ni nji bbo na mana kʉ ná lo ni dhidhi kiroho nǎ d’e ri. (Mez. 2:11, 12; Ebr. 5:14) Anja ngbaribbai ma ngaddidha dhi kpakpanga ka ndi kó ni tsotso aro kʉ ná i lo kana nari di: (1) ngbaribbai ma ni njini ni vei na nari ndirigoti (2) ngbaribbai ma ni lonanga vʉ ni ronga thodha ma, ni ronga thɨdha ma na djo nari.

6. Ngaddidha dhi kpakpanga ká ka ndi kó jadda le-djo tsotso ndi dhǒ heshima le-vei dho ngbaribbai?

⁶ Ngaddidha dhi kpakpanga si ni tsotso ko ni di heshima bbʉ isɨ ndrŭ dho. Ddikpa jadda le-djo di ndi dyu li ddikpa le-ve ro ndima njí na kau ná fø ri ro nga kʉ che ri. Føro mai, nì kʉ ngaddidha dhi kpakpanga na ná jadda ke nzá ka ndi po inga ndi di nji ná lo di rili le-ve ddiri ke ndi thɨ dza dho ri, rie nzɨ ke ripɨ ndi si ndoa chi le na ri ró. (1 Ti. 5:1, 2) Ro, njati rie dza dho ke le-ve  thɨ ri ró, ringani ke b’o ledhó bblo sifa ronga, nzɨ ndima ra di aroro nga d’i ndrŭ kʉ ná ngana nari chulu.​—1 Ko. 6:18.

7. Ngaddidha dhi kpakpanga ká ka ndi kó jadda le-djo tsotso ru ma, ndi djoka thɨdha ma na djo ndi lonangavʉ nari kana ngbaribbai?

⁷ Jadda le-djo ka ndi dhǒ ndi kʉ ngaddidha dhi kpakpanga na nì nari lu ná nja chu ki kʉ, bblo ndi lonangavʉ ru ma, ndi djoka ma na djo nari. Ru thɨ ná ndrŭ ma, ngbaribbai ma le ka le njø ru nari dhi seri adi pʉ bí ina nari e nzɨ heshima bbʉ Mungu dho ná ndrŭ. Føri dho kpa thɨ ná ru ka ndi b’ʉ (kukaza) le bbo inga ri ka ndi di rili kpetsi ke di njani isɨle bbai. Ru djo ndi lonanga vʉ ná saa na, dhidhi kiroho nǎ ná kpetsi ke ka ndi bbari Biblia nǎ kanuni ddá chutso ndi dho ndirigoti ndi dyø kutaniko nǎ bblo dhó loroji kʉ ná kpa. Ke ka ndi dhuri ndi tsó: ‘Ma vʉ nanga ná lo ká ridho ma kʉ kiasi na ndirigoti ma heshima bbʉ nja ndrŭ dho nì? Ma njø na ru ká ka ndi liri nja ndrŭ u ma adi njínji Mungu dho nari ngbà?’ (1 Ko. 10:31-33; Tit. 2:6) Nì kʉ ngaddidha dhi kpakpanga na ná le-djo nzá ka ndi ba heshima le-djoi ma, le-vei ma na dhó ro dhé ri, ro ke ka ndi liri ndidzá ra nǎ Baba ba hwè.

8. Jadda le-djo ká ka ndi liri ndrŭ di ndima thí lili ndi djo ngbaribbai?

⁸ Adi ribba ndrŭ li ndima thí li ni djo. Ngbà djo le ka le li le thí ná ke adi ndidhó le bbʉ ná njínji kpakpanga na. (Lu. 16:10) Akonja kaka ngʉe ná ke Yesu dhó loroji di. Ke nzɨ ngʉ adi ndi dhona le bbʉ ná njí bé pá ri. Føri rɨngana ke njingʉe ndi dhona Yova bbʉngʉe ná njí nji dhé, kpakpa ma ri njidha ngʉe ná saa na. Ke jingʉe ndrŭ ji, ro bbo pli ke jingʉe ndi unakpa ndirigoti ke bbʉngʉe ndidhó shinga ndrŭ djotsina ji ndi nanga jini ro. (Yoh. 13:1) Yesu ni dyø nari kana, anji ni dhona le bbʉ ná njí krʉ kpakpanga na. Njati ni chu ri njidha nzá ró, adi nyenyenga na ndirigoti apori dhidhi kiroho nǎ ná le-djoi kó ni tsotso. Nzɨ di ritsi nji tss na. (Ro. 12:11) Føri rɨngana adi ni dhona le bbʉ ná njí krʉ nji “Yova dho ni nji nari bbai, nga ndrŭ dho ni nji nari bbai ri.” (Kol. 3:23) Bbʉbbʉ dhé ni nzá kaka ri, føri dzá adi kiasi na ndirigoti adi ni nji ná kosa tso uu.​—Mez. 11:2.

9. Jadda le-djo dho ká ringani ndi chu ndi tsotso ka ndi kó ná ufundi addudho?

⁹ Nja ni ngʉ dhidhi kiroho nǎ ná Mukristo d’e, ri u ni chu ni tsotso ka ndi kó ná njí. Føri ka ndi kó ni tsotso ni u kutaniko nǎ le bbʉ ni dhona ná madaraka u, ri si rili ni ba kimwili nǎ njí ndirigoti ni gba nidhó familia dhó lo tso ndirigoti ni kana kau é bblo nja ndrŭ na. Akonja ni ka ni chu ná ufundi ro sese di.

10-11. Bblo ndi chu ngazødha ma, ngandidha ma na nari nǎ ro ká jadda le-djo ma, kutaniko ma na ka ndima ba faida ngbaribbai? (Zaburi 1:1-3) (Anja ji maddi.)

¹⁰ Achu ngazødha ma, ngandidha ma na  bblo. Biblia pori hwè na kʉ ná ke adi saa ba krʉ ddo ró ndi zø Mungu dzá lo ndirigoti ndi ddinga ri djo. (Azø Zaburi 1:1-3.) Biblia ke zø krʉ ddo ró nari si rili ke chu Yova dhó ngaddidha bblo, ná føri si ke tsotso ko ke di ngaddi bblo ndirigoti ke chu ngbaribbai ma ndi njínji maandiko na nari. (Mez. 1:3, 4) Kutaniko dhó lo ji fø di ná kpetsi kpa. Ká addudho?

¹¹ Ko djoi ma, ko vei ma na adi riji ndima ba Biblia ró dyʉ ndi ná shauri ma, lojadha ma na ngbà chu ri bbʉdha ná kpetsi kpa dhó ro. (Tit. 1:9) Njati ni chu ngazødha ma, ngandidha ma na bblo ró, ni ka ni bbʉ kpakpa ka ndi li ndrŭ dhó udha ná hotuba ma, komatere ma na. Føri kina, ni ka ni ndi ni tsotso ka ndi kó ná lo, nga ni zø ná saa na, hotuba ni rr njudha dhi ngana inga asamble nǎ ná saa na. Ni ndi ná fø lo si rili ni li nidhó udha kpakpa ndirigoti ni li nja ndrŭ kpakpa.

12. Ni tsotso ká addu ka ndi kó ndiro ni é bbo chu lotidha ná ke d’e?

¹² Aneri ni chu lotidha bblo ndrŭ na. Mukristo kʉ ná kpetsi ke dho ringani ndi chu lotidha bblo. Bblo chu lotidha ná ke adi nja ndrŭ rrrr ndirigoti ke adi ndrŭ dhó ngaddidha ma, ngbaribbai ma ndrŭ ndima mbu nari ma na famu. (Mez. 20:5) Ke ka ndi famu ndrŭ dhó lo ndima chu ró, ndrŭ nyo djonga ró inga ndrŭ njini nari ró. Ro, njati ni ro di dí ndrŭ na nzá ró, ni nzá ka ni famu ndrŭ ro bblo ri. Bí ina, ni di loti ndrŭ na telefone inga mesaje chulu dhé ró, føri ka ndi liri rie kpakpa ni tilo ndrŭ na ni nju ná saa na. Føri dzá, anji kpakpanga ni di loti ndrŭ na ni ronga na.​—2 Yo. 12.

13. Jadda le-djo dho ká ringani ndi neri ndi chu ngbá lo nga ki? (1 Timoteo 5:8) (Anja ji maddi.)

¹³ Aneri ni chu ni tsotso kodha ni niro. Dhidhi kiroho nǎ ná Mukristo dho ringani ndi kó ndi tsotso ndirigoti ndidhó familia tsotso maddi. (Azø 1 Timoteo 5:8.) Nja ngø nǎ, jadda le-djoi adi njí chu ndima dhi baba inga ndima dhó familia nǎ nja ndrŭ ró ro. Ro, nja ngø nǎ, jadda kpa adi turuza inga nja njí chu bbò darasa nǎ. Ri gʉ é ngbà ma ró, ri kʉ bblo ni chu ni tsotso ka ndi kó ni ba njí d’e ná ufundi. (Mdo. 18:2, 3; 20:34; Efe. 4:28) Anji kpakpanga ni chuni nì adi ndi dhona le bbʉ ná njínji kpakpanga na ndirigoti nì adi nga tso ndi nga ná njí tso dyá ná ke. Njati ni njiri fø ró ri sie sʉsʉ ni ba njí ndirigoti ni b’o ri ronga. Ko tilo djo ná fø sifa ma, ufundi ma na kʉ mana na bbo Mukristo kʉ ná kpetsi ke dho ndiro ke si ndi dhona si bbʉni ná njínji bblo d’e. Akonja fø njí ro di.

14. Jadda le-djo ká ka ndi tayarisha ndi ngbaribbai ndiro ndi si ngʉ krʉ saa ró njínji ná ke d’e?

¹⁴ Krʉ saa ró njínji ná ke. Dhidhi kiroho nǎ ná bí kʉ ná kpetsi kpa ngangʉe krʉ saa ró le njínji nari tso go ndima ngʉe jadda ro. Painia dzá njí ka ndi kó jadda ke tsotso ndi chu ngbaribbai ma ndi ka ndi di bblo njonjo kʉ ná ndrŭ na nari. Ndirigoti ri ka ndi kó jadda ke tsotso ndi chu ngbaribbai ma ndi ka ndi b’o ndi ba ná mbø ronga ndiro nzɨ ndi sa mbø ri ndi adi ba nanga djolu ró. (Flp. 4:11-13) Ndiro le tso si krʉ saa ró le adi nji ná njí djo d’e, ri ka ndi é bblo le ngá ritso painia musaidizi djó ro. Bí kʉ ná ndrŭ adi painia musaidizi nji ddikpa saa dho ndirigoti ri adi kpa tsotso kó kpa ngʉ painia wa kawaida. Painia le kʉ nari ka ndi liri le tsu krʉ saa ró le nji ná nja njí kana, loroji na føri kʉ Pidhinga dzá dza chidha dhi njí inga Beteli nǎ njí.

15-16. Jadda le-djo tsotso ká ngbá lo ka ndi kó ndiro ke ngʉ mutumishi wa huduma inga muzee d’e?

¹⁵ Mutumishi wa huduma inga muzee le kʉ nari. Wakristo kʉ ná le-djoi krʉ dho ringani ndima li muradi ndima é wazee ndiro ndima kó kutaniko nǎ le-djoi ma, le-vei ma na tsotso d’e. Biblia ripo fø muradi djo rine ndima tso si ná kpetsi kpa “ji bblo kʉ ná njí.” (1 Ti. 3:1) Muzee ndi ngʉ nari njí, le-djo dho ringani ndi njí kpakpanga ndiro ndi é mutumishi wa huduma vi. Watumishi wa huduma adi wazee tsotso kó njonjo kʉ ná chulu. Wazee ma, watumishi wa huduma ma na adi ndima djoi ma, ndima vei ma na tsotso kó nyenyenga na ndirigoti kpa adi lod’ra bidii na. Bblo dhó sifa kʉ ná jadda le-djoi ka ndima ngʉ watumishi wa huduma nì mai kpa kʉ jadda go ro. Ndirigoti nì dhó sifa kʉ bblo pli ná watumishi wa huduma ka ndima ngʉ wazee rie sese ma kpadhó cho ro da 20 djolu ri ró.

¹⁶ Nde, ni ká ka ni nji addu ndiro ni kaka fø njí dho d’e? Biblia tilo nidho ringani ni é na ná sifa djo. Ro, anonga nari kʉ fø sifa dyʉ ndi Biblia ró ndirigoti Mungu ma, nidhó familia ma, kutaniko ma na ni ji nari ró. (1 Ti. 3:1-13; Tit. 1:6-9; 1 Pe. 5:2, 3) Anji kpakpanga ni famu fø njí na mana bblo. Anziri Yova kó ni tsotso ni nji fø njí d’e. c

17. Jadda le-djo ká ka ndi tayarisha ndi ngbaribbai ndi ngʉ dza ba ndirigoti familia djǒ d’e? (Anja ji maddi.)

¹⁷ Dza ba ndirigoti familia djǒ. Yesu pongʉeri nari bbai, dhidhi ná kpetsi kʉ ná nja Wakristo ka ndima má nzá ndima chi ndoa  ro. (Mt. 19:12) Ro, njati ni vʉri ni chi ndoa ró, nidhó njí ka ndi ndrɨni ndrɨ, føri i kʉ dza ba ndirigoti familia djǒ ni si ngʉ nari. (1 Ko. 11:3) Yova adi riji kpetsi ke ji ndibbá le, ke gba ledhó lo tso kimwili nǎ, kiakili nǎ ndirigoti kiroho nǎ. (Efe. 5:28, 29) I lo nǎ ko tilo djo ná sifa ma, ufundi ma, føri i kʉ le rine le é ngaddidha dhi kpakpanga ma, le heshima bbʉ isɨ ndrŭ dho nari ma, le rili ndrŭ li ndima thí li le djo nari ma na si ni tsotso ko ni é bblo kʉ ná dza ba. Ri si ni tayarisha ni njí nidhó njí bblo dza ba ndirigoti familia djǒ ni kʉ nari kana.

18. Jadda le-djo ká ka ndi tayarisha ndi ngbaribbai ndi ngʉ nzø ba d’e?

¹⁸ Nzø ba. Ndoa ni chi nari goti njaro ni ka ni si ngʉ nzø ba. Ndiro ni é bblo kʉ ná nzø ba d’e ká ni ka ni ba ngbá somo Yova dhó ro? Somo kʉ bí. (Efe. 6:4) Yova pongʉeri pʉlʉpʉlʉ ndidzá Ngba Yesu dho nari kʉ, ndi ji ke ji ndirigoti ndi u ke tso u. (Mt. 3:17) Njati ni ngʉ nzø ba ró, adi ripo nidzá nzø dho ni ji kpa ji. Adi kpa má ma kpa nji ná bblo lo dho. Yova dyø ná nzø bai adi ndima dhi nzø tsotso kó ndima ngʉ dhidhi ná Wakristo. Ni ka ni tayarisha ni njʉ fø njí dho kutaniko nǎ ndrŭ ma, nidhó familia nǎ ndrŭ ma na dho ni jidha dhǒ ndirigoti ni ngaddi kpadhó lo djo nari na. Ndirigoti adi ni ji kpa ji ndirigoti kpa kʉ mana na nì ni dho nari d’rad’ra kpa dho. (Yoh. 15:9) Føri si ni tsotso ko ni é bblo kʉ ná dza ba ndirigoti bblo kʉ ná nzø ba gosi ná saa na. Ndirigoti ni sie mana na bbo Yova dho, nidhó familia dho ndirigoti kutaniko dho.

19-20. Jadda le-djoi tsotso ká ngbá lo ka ndi kó ndiro kpa ngʉ dhidhi kiroho nǎ ná kpetsi Wakristo d’e? (Anja ri chuti ji.)

¹⁹ Jadda le-djoi, ri ka ndi dzi saa bbo ndiro ni ngʉ Yesu dyø ná dhidhi kiroho nǎ ná Wakristo d’e. Ringani ni dyø bblo kʉ ná loroji, ni njiri ni é ngaddidha dhi kpakpanga na, ni liri ndrŭ li ndima thí ni djo, ni é njonjo kʉ ná ufundi na ndirigoti ni tayarisha ni gosi ná saa na ni si nji ná njí dho.

²⁰ Njati ni ddinga nidho ringani ni nji ná fø lo krʉ djo ró, njaro ni ka ni nja ri nzá ka ndi ka ni dho ri. Ro, ri ka ndi njini njí ni dho. Anonga nari kʉ Yova jiri ndi kó ni tsotso ko. (Isa. 41:10, 13) Ndirigoti kutaniko nǎ ni djoi ma, ni vei ma na ka ndima kó ni tsotso ko. Njati ni ngʉ ngbà dhidhi kiroho nǎ ná Mukristo ró, nidhó maisha sie bblo ndirigoti ni sie hwè na. Jadda le-djoi, ko jini ji! Yova lé ni ronga kpakpanga ni nji ni ngʉ dhidhi kiroho nǎ ná kpetsi Wakristo nari kana.​—Mez. 22:4.