NJA SAA na Biblia ndi ná kpa ngʉ adi ngʉngʉ nja lo djolu. Akonja fø kpa ngʉ adi rinji dho ná lo ro gbo:

Ri le ndingʉe ná saa. Waisraeli dhó saa na, bí kʉ ná ndrŭ dhó nga ngʉe ndindini ná Yadha dhi kopi ro ri. Bí kʉ ná ndrŭ ngʉ adi Yadha le zø nari rr ndrŭ tsɨ ngʉ adi njuni tabenakulo na ná saa na. (Kum. 31:10-12) Bbʉbbʉ dhé, lo ndrŭ rr nari ró ka ndi shae ndrŭ nyǒ ná ritsi ngʉe bí ndirigoti ndrŭ ngʉ adi tøni bí kʉ ná saa kana, bí kʉ ná ndrŭ kana. (Neh. 8:2, 3, 7) Fø di ná saa bbʉ ndi ro ró, bbo na mana kʉ ná lo djolu le ngʉ nari ngʉ adi rili rie sʉsʉ ndrŭ no maandiko nǎ bbo na mana kʉ ná lo nga ndirigoti ndrŭ njinjí ri na. Nja lo djolu le ngʉ nari ngʉ adi ndrŭ tsotso kó ndima no Yova bbʉngʉe ná Yadha nǎ rere kʉ ná lo nga ma krʉ ddi.​—Law. 18:4-22; Kum. 5:1.

Nga ndrŭ ngʉ adi ndi ná chu. Biblia nǎ kʉ ná nja buku nǎ kʉ dyi, føri kʉ Zaburi dzá buku ma, Wimbo wa Sulemani ma, Maomblezo ma na. Nja saa na dyi nǎ e ngʉ djolu le ngʉ ná lo (koras) maddi ná føri adi dyi djǒ dhǒ ndirigoti føri adi dyi rr ná ndrŭ tsotso kó ndima lø ri nǎ lo ndima djǒ na. Loroji na, anja Zaburi 115:9-11 nǎ bani ná i lo: “Ee Israeli, anili ni thí Yova djo. Ke kʉ kpa tsotso kó ná ke ndirigoti kpadhó ngali. Ee Haruni dzá dza, anili ni thí Yova djo. Ke kʉ kpa tsotso kó ná ke ndirigoti kpadhó ngali. Nì Yova do nji ná ndrŭ, anili ni thí Yova djo. Ke kʉ kpa tsotso kó ná ke ndirigoti kpadhó ngali.” Fø lo djolu le ngʉ nari ka ndi kó dyi ngo ná ndrŭ tsotso ndima lø lo nǎ bbo na mana kʉ ná lo ndima djǒ na ndirigoti ndima thí na.

Bbo na mana kʉ ná lo djolu le ngʉ nari. Biblia ndi ná kpa ngʉ adi ngʉ nja saa na bbo na mana kʉ ná lo djolu. Loroji na, Yova jangʉeri Waisraeli dho nzɨ kpa nyo ju ná saa na, ke pongʉeri Musa ngʉ fø lo djolu bí ina. Mungu jingʉeri ndi dhori nari kʉ le ndí dzá shinga kʉ ju nǎ, føri na mana kʉ ju kʉ shinga. (Law. 17:11, 14) Luti mitume ma, Yerusalemu nǎ wazee ma na ngʉ nzá tho Mungu nyǒ ná pʉ ndrŭ ka ndima pʉ ndima ró ro ná ritsi kpe ná saa na, kpa ki ngʉngʉe addudho ma ringani le cho le ronga tso ju ró ná føri djolu vi.​—Mdo. 15:20, 29.

Ngbà mai Biblia ngʉ lo djolu bí ina ro, føri na mana nga kʉ Yova riji ko di ngʉ Biblia nǎ lo djolu dyi bbai ri. Loroji na, Yesu pongʉeri: “Sala ni nji ná saa na, nzɨ di ddikpa lo dhé po ndirigoti ni di ngʉ ri djolu bí ina.” (Mt. 6:7) Ke dhongʉe ko ka ko nzinga djo ná ngbà tso gbani Yova ji ná lo na ná lo. (Mt. 6:9-13) Nzɨ ko di ngʉ ddikpa lo djolu dhé kodhó sala nǎ, ro ddikpa lo djo ko ka ko nzinga bí ina ngbà.​—Mt. 7:7-11.

Biblia adi ngʉ nja lo djolu bblo kʉ ná sababu djotsina. Føri kʉ ngbaribbai ma kodhó Bbò Mwalimu longaddi ko dho nja ko ba faida d’e lu ná ddikpa chu ro.​—Isa. 48:17, 18.