Lo dho chutso ddá ná Baraza nǎ kpa kana ø si ná aro kʉ ná kpa
GBONJI na, Bi 1 ddo 18, 2023 nǎ, le njingʉe pekee kʉ ná matangazo jw.org djó, fø saa na le-djo Gage Fleegle ma, Jeffrey Winder ma na le lingʉe ndima é Yova dzá Dimu dhó Lo dho chutso ddá ná Baraza nǎ kpa ro. Fø le-djoi njinjí Yova dho chi ndima tøni ro cho bí.
Gage Fleegle ma, ndibbá le Nadia ma na
Le-djo Fleegle dhi États-Unis nǎ Pennsylvanie nǎ agʉnga lai djó ndirigoti ke dho ddi bbʉbbʉlo nari ngʉe kedzá gø dhi ndrŭ. Go ke ngʉe jadda ro, ke ma dhó familia rangʉe ddikpa sese vile na bbò uhitaji ngʉe ná ngana. Føri goti tse, ke bangʉe batiso Bi 11 ddo 20, 1988 na.
Le-djo Fleegle dzá gø dhi ndrŭ ngʉ adi ke li kpakpa ke ngá krʉ saa ró le njínji Yova dho nari tso d’e. Kpa ngʉ adi waangalizi wa muzunguko ma, Beteli nǎ njínji ná kpa ma na kó bí ina ndima bba ndirigoti le-djo Fleegle ngʉ adi ngbaribbai ma fø le-djoi ma, le-vei ma na kʉ hwè na nari nja. Batiso ke ba nari goti tse, ke ngʉngʉe painia Bi 9 ddo 1, 1989 na. Føri goti cho aro goti, ke tso singʉe si cho 12 ke ngʉe ro ke lingʉe ndi nji ná muradi djo, føri ngʉe ndi rá Beteli na. Ke ngangʉe ndidhó njí tso Brooklyn nǎ Beteli na Bi 10 nǎ 1991 na.
Beteli nǎ, le-djo Fleegle njingʉe njingʉe njí papie tso le nju ndi ngʉ buku ná ngana cho munane kana, føri goti le chongʉe ke njí dhi Departema na. Fø saa na, ke njingʉe njí ro sese cho kana Russie nǎ ndrŭ adi ti ná ddikpa luga dhi kutaniko nǎ. Cho 2006 na, ke ma chingʉe ndoa Nadia na ná le ma na kpa ngʉ Beteli nǎ njínji. Kpa njingʉe njí cho bí Portugais ndrŭ ti ndirigoti cho kumi djolu Espagnol ndrŭ ti nǎ ná eneo nǎ. B’lo ndi njinjí cho bí njí dhi Departema nǎ nari goti, Le-djo Fleegle le ngʉngʉe Longaddidha dhi Komite dhó biro na ndirigoti luti njí dhi Komite dhó biro na. Bi 3 na 2022 nǎ le lingʉe ke ndi kó Lo dho chutso ddá ná Baraza nǎ njí dhi Komite tsotso.
Jeffrey Winder ma, ndibbá le Angela ma na
Le-djo Winder dhi États-Unis nǎ Californie nǎ Murrieta dhi bbagʉ. Ke dho ddi bbʉbbʉlo nari ngʉe kedzá gø dhi ndrŭ, ndirigoti ke bangʉe batiso Bi 3 ddo 29, 1986 na. Føri goti nzá bi d’e da bí ro, ke ngʉngʉe painia musaidizi. Ke nanga jingʉeni ji upainia dho nari dho, ke jingʉeri ndi rá fø njí na anzi. B’lo ke nji painia musaidizi bí kʉ ná bi kana nari goti, ke ngʉngʉe painia wa kawaida Bi 10, ddo 1, 1986 na.
Jadda le-djo Winder ngʉe ro, ke rangʉe ndi njí aro kʉ ná kpa ronga be Beteli nǎ ndima ngʉ adi njínji fø saa na ro. Føri chongʉe ke ronga ndi é ù na Beteli nǎ njí dho. Bi 5 nǎ 1990 na, ke le nzingʉe ndi njinjí Wallkill nǎ Beteli nǎ.
Beteli nǎ, Le-djo Winder njingʉe njí njonjo departema nǎ, føri ngʉe usafi dhi Departema nǎ ma, Ferme nǎ ma, Beteli nǎ biro nǎ ma. Ke ma chingʉe ndoa Angela na 1997 na, ndirigoti kpa ngangʉe njí njidha tso Beteli nǎ thei fønga djó ro. Cho 2014 na, kpa le chongʉe Warwick na, ná ngana Le-djo Winder ngʉ nga tsotso kó Lo dhi bbò bbagʉ ngachidha dhi njí na. Cho 2016 nǎ, kpa rangʉe Yova dzá Dimu adi longaddi ndrŭ dho ná ngana Patterson na, fønga na le-djo Winder ngʉ adi njínji Audio/Video dhi ngana. Cho tho goti kpa ki ngʉngʉe Warwick na ndirigoti Le-djo Winder ngʉ njínji Beteli nǎ ndrŭ djonga adi nja ná Komite nǎ biro nǎ. Bi 3 na, 2022 nǎ ke le lingʉe ndi kó Lo dho chutso ddá ná Baraza nǎ Beteli nǎ ndrŭ djonga adi nja ná Komite tsotso.
Ko rinzi Yova lé “kado le bbʉ ná fø kpetsi kpa” ronga Pidhinga dzá bblonga dho kpa njínji kpakpanga na nari kana.—Efe. 4:8.
