1. Yova dzá nrŭ ká adi bani ngba kpakpalo na?

NI KÁ kʉ kpakpalo kana? Njaro kutaniko nǎ ddikpa le nji che kʉ nalo ni ró. (Yak. 3:2) Inga ni lai darasa nǎ kpa ma, ni lai njí dhi kpa ma na ka ndima be ni pa ni njí nji Yova dho nari dho. (1 Pe. 4:3, 4) Inga familia nǎ nrŭ ka ndima cho ni tso ndiro nzɨ ni ra mukusanyiko na inga nzɨ ni ra lod’ra ró. (Mt. 10:35, 36) Njati ni di nzani bbo ró, ni ka ni ddiri ni bbá Mungu dho ni njí nji nari tso bba. Ro ni ka ni uri nari kʉ, ni bani ngbadi ná kpakpalo na ma ró, Yova ka ndi bbʉ nyodyu ni dho nja ni vʉ lonanga bblo ndirigoti ni ve kpakpalo tso d’e.

2. Waroma 15:4 ripo naribbai, Biblia le zø nari ká ka ndi kó ko tsotso ngbaribbai?

² Biblia nǎ, Yova d’ra ngbaribbai ma nzá kaka ná nrŭ vengʉe ndima bani na ná kpakpalo tso nari. Ká addudho? Ndiro ko ba somo kpadhó loroji nǎ ro d’e. Yova lingʉeri mutume Paulo ndi lo fø lo djo. (Azø Waroma 15:4.) Fø lo ko zø nari ka ndi li ko kpakpa ndirigoti koe ngab’odha na. Føri dho, ko dho ringani ko nji nja lo ki maddi Biblia ko zø nari goti. Ko dho ringani ko bbá Biblia ø kodhó ngaddidha thika ndirigoti ri lø ko thí ronga. Lorojina, ko ká ka ko njiri ngba njati kodhó loji shauri ko bani na ná kpakpalo djo ro? Ko ka ko njí 4 kʉ ná i lo: (1) Anji sala, (2) Addinga, (3) Addinga bbo lo djo, ndirigoti (4) Anjinjí ri na. Ko si ngbaribbai ma le ka le nji njí fø lo na nari nja. * Ko si njí nji fø lo na Pi Daudi ma, mutume Paulo ma na dhó loroji ko chu nari chulú.

3. Biblia zødha tso ni nga nari njí, ká ringani ni njí ngba lo, ndirigoti addudho?

 ³ (1) Anji sala. Biblia zødha tso ni nga nari njí, anziri Yova kó ni tsotso nja ni ba faida ni zø nalo nǎ ro d’e. Lorojina, njati rie ni tsotso kodha ni ne ri ró, anziri Yova kó ni tsotso Biblia nǎ kʉ ná yadha chulú nja ni chu ni ka ni njí nalo d’e.​—Flp. 4:6, 7; Yak. 1:5.

4. Ni tsotso ká ngba lo ka ndi kó Biblia nǎ djo lo le ti ná nrŭ dhó loroji nǎ ro?

⁴ (2) Addinga. Yova nji ke dho le nanga ka ndi keni ná ritsi. Biblia nǎ ro ni zø nalo ka ndi kó ni tsotso ni ddinga iddoro njini nalo djo ndirigoti Biblia nǎ djo lo le ti ná nrŭ dhó loroji djo maddi. Adi lo nja kpa ngʉ adi lo nja naribbai ndirigoti arr ni kpa ngʉ adi ndima rr naribbai.

5. Lonanga le ddi bbo nari na mana ká kʉ addu, ndirigoti ko ka ko ddinga bbo lo djo ngbaribbai?

⁵ (3) Addinga bbo lo djo. Lonanga le ddi nari na mana kʉ ni ddinga bbo ni zø nalo djo ndirigoti ngbaribbai ma fø lo lø ni ronga nari djo. Føri ka ndi kó ni tsotso ni chu nidhó ngaddidha ndirigoti ni famu ni zø nalo bblo. Njati ni di Biblia zø ndirigoti ni di ngaddi bbo nzá ri nǎ ni zø nalo djo ró, føri kʉ ddiddi ni li kpà dhi ritsi mesa djo, ro ni nzá nju ritso ddi ngana ri naribbai. Ro lonanga le ddi bbo nari kʉ ddiddi fø ritsi tso le nju ddi ngana naribbai. Nja ni ddi lonanga bblo d’e, ni ka ni dhu i lo ndirigoti ni ngʉ ri logoti: ‘Addui ká kongʉe i ke tsotso nja ndi hwini ndidhó kpakpalo na d’e? Yova ká kongʉe ke tsotso ngbaribbai? Ma ká ka ma ba somo ngbaribbai fø lo nǎ ro nja ma ve kpakpalo tso d’e?’

6. Kodho ká ringani ko nji njí ko chu nalo na addudho?

⁶ (4) Anjinjí ri na. Yesu pongʉeri njati ko nji njí nzá ko chu nalo na ró, ko kʉ ddiddi sø djo chi ndidhó dza ná ke bbai. Ke njí nji bbo, ro ri nzɨ ke tsotso ro kó ri. Ká addudho? Dhonalo njati vʉvʉ si ndirigoti dda chu ró, ri ka ndi sa ri sa. (Mt. 7:24-27) Føri bbai, njati ni di sala nji, ni di ngaddi, ndirigoti ni di lonanga ddi bbo, ro ni di njí nji nzá ni jifunza nalo na ró, ni nidhó saa vi pa. Kodhó udha tsu mbudha na inga kpakpalo na ná saa na, ko ro nzá ka ko tøni chí ri. Ro njati ko di Biblia nǎ lo zø ndirigoti ko njí nji ri na ró, ko ka ko vʉ lonanga bblo, ko ka koe ngoi na, ndirigoti kodhó udha ka ndi ngʉ kpakpa. (Isa. 48:17, 18) Tho (4) djo ko tilo na følo na ko njí nji ná saa na, akonja ko ka ko ba Pi Daudi dhó lo nǎ ro ná somo.

7. Ko ká si loti Biblia nǎ ngba lo djo?

⁷ Nidhó kau inga nidhó familia nǎ ddikpa ke ká ndrorie ni ro b’lo? Njati rie fø ró, ni tsotso ka ndi kó nari kʉ Daudi njingʉe nalo kedzá ngba Absalomu ndrongʉe ke ndirigoti ke jingʉe ndi ngʉ pi ná saa na.​—2 Sa. 15:5-14, 31; 18:6-14.

8. Ni ká ka ni njiri ngba nja Yova kó ni tsotso d’e?

⁸ (1) Anji sala. Fø lodjo ni ngaddi ná saa na, ad’ra ngbaribbai ma ni ni rr nari Yova dho, rie chelo ma nrŭ njingʉe ni ro ri ro. (Zb. 6:6-9) Ad’ra nidhó lo nganga Yova dho. Anziri Yova tso ke kó ni tsotso ni ba ni tsotso ka ndi kó nalo nja ri ddá chutso ni dho ni chu ngbaribbai ma ni ka ni hwini fø kpakpalo tso ro nari d’e.

9. Daudi ma kana Absalomu ma na da nalo djo ká ni ka ni po ngba lo?

⁹ (2) Addinga. Addinga iga djo le tilo nalo djo ndirigoti addinga ngbaribbai ma fø lo løngʉe Pi Daudi ronga nari djo. Daudi dzá ngba Absalomu njingʉe kpakpanga bí cha nja nrŭ ji ndi d’e. (2 Sa. 15:7)  Absalomu njangʉeri ndi ka fø lo dho ngba ná saa na, ke chongʉe wapelelezi Izraeli bba nja kpa pori nrŭ u ndi ndie pi d’e. Ke lingʉeri Daudi dzá ddikpa kau ndirigoti shauri ngʉ bbʉ ke dho ná ke Ahitofeli ma tsatsa ddi Daudi ro. Absalomu njingʉe kpakpanga ndie pi ndirigoti ke ngʉ rine ndi hwi Daudi hwi, føri ngʉe che bbo kʉ nalo fø saa na. (Zb. 41:1-9) Daudi rrngʉe Absalomu ji ndi nji ná fø lo ná saa na, ke nyingʉe nga nyi Yeruzalemu nǎ ro. Absalomu dhó bbasødda njingʉe lɨ Daudi dhó bbasødda tso ro. Absalomu dhó basødda djolu lɨ singʉe si ndirigoti Absalomu le hwingʉe hwi.

10. Pi Daudi ká ka ndi njie addu?

¹⁰ Førigoti addinga ngbaribbai ma Daudi ka ndi mbu ndi ke bangʉe ni na ná fø lo djo nari. Ke jingʉe Absalomu ji ndirigoti ke lingʉe ndi thí Ahitofeli djo. Ke dho kau nganga ndrongʉe ke ndro. Kpa ndrongʉe ke bbo ndirigoti kpa jingʉe ndima hwi ke hwi. Daudi ka ndi ddieri kedhó nja kʉ ná kau maddi gbangʉe ndima tso Absalomu na ndirigoti ke nzá ka ndi lie ndi thí kpa djo ri. Daudi ka ndi ddienga ndidhó lo djo dhé inga ndi nyinga ddiro dhé. Inga ke thí ka ndi bae njedha. Ro Daudi nzá njingʉe fødi nalo ro ri. Fø nga ringana ke singʉe fø kpakpalo djolú si. Addui ká kongʉe ke tsotso ke ve fø kpakpalo tso d’e?

11. Daudi ká njingʉeri ngba kpakpalo na ndingʉe ná saa na?

¹¹ (3) Addinga bbo lo djo (Tafakari). Følo nǎ ro ká ni ka ni ba ngba yadha? Angʉ i lo goti, “Daudi ká njingʉe ngba lo nja ndi tsotso koni d’e?” Daudi ronga nzá tangʉe ta ri ndirigoti ke nzá vʉngʉe lonanga che ri. Ke nzá njingʉe do ro bbo ri ndirigoti ndi nanga rɨni rɨ ndi ka ndi nji nalo djo ri. Føri ringana ke nzingʉeri Yova kó ndi tsotso. Ke nzingʉeri ndidhó kau kó ndi tsotso. Ndirigoti ke vʉngʉe ndi ka ndi njí nalo lele. Ngbamai følo bbʉngʉe njedha ke thí dho ro, ke nzá bbangʉe nja nrŭ djo ndi ndi thí li nari tso ro ri ndirigoti ke nanga nzá kangʉeni bbo ri. Ke ngʉ adi ndi thí li Yova djo ndirigoti ndidhó kau djo maddi.

12. Yova ká njingʉe addu nja ndi kó Daudi tsotso d’e?

¹² Yova ká kongʉe Daudi tsotso ngbaribbai? Njati ni nji utafiti ró, ni ka ni chu nari kʉ Yova bbʉngʉe kpakpanga ke dho nja ke ve na fø kpakpalo tso d’e. (Zb. 3:1-8; utangulizi) Yova lengʉe Daudi vʉngʉe nalo ronga le. Ndirigoti Yova kongʉe Daudi dhó kau tsotso kpa ngʉ rine ndima b’o ndima dhó pi ronga ná saa na.

13. Ni ká ka ni dyø Daudi dhó loroji ngbaribbai njati nrŭ nji chelo ni ró ro? (Matayo 18:15-17)

¹³ (4) Anjinjí ri na. Adhuri ni tso, ‘Ma ká ka ma dyø Daudi ngbaribbai?’ Avʉ lo nanga lele nja ni si fø kpakpalo djolú d’e. Ri ka ndie bblo ni nji njí Yesu bbʉngʉe Matayo Sura 18 nǎ ná shauri na. (Azø Matayo 18:15-17.) Ro nidho nzá ringani ni vʉ lonanga ka ni nanga kani ná saa nari. Nidho ringani ni nziri Yova tso ke kó ni tsotso ndiro nzɨ ni ronga tata ndirigoti ni chu ni ka ni nji nalo d’e. Nzɨ bba ni thí ni li nidzá kau djo nari tso. Fønga ringana au kpa ni tso kó nari u. (Mez. 17:17) Føri djolu pli, adyø Yova bbʉ ni dho Biblia nǎ ná yadha.​—Mez. 3:5, 6.

14. Addui ká ka ndi liri ni ddinga bbo 2 Timotheo 1:12-16; 4:6-11, 17-22 nǎ kʉ nalo djo?

¹⁴ Nidhó familia nanga ká adi jini nzɨ ni njí nji Mungu dho nari dho? Inga ni ká adi gʉ Yova dzá lo gʉni ná ngø na? Njati rie fø ro 2 Timotheo 1:12-16 ndirigoti  4:6-11, 17-22 * nǎ kʉ nalo ni zø nari ka ndi bbʉ kpakpanga nidho. Paulo ndingʉe fø lo kana nja kʉ nalo prizo nǎ ndi ngʉe ná saa na.

15. Yova tsó ká ni ka ni nzinga ngba lo djo?

¹⁵ (1) Anji sala. Følo ni zø nari nji, ad’ra ni bani na ná kpakpalo Yova dho, ndirigoti ad’ra ngbaribai ma ni nirr nari ke dho. Ad’ra ni thí nza nalo nganga. Anzinga Yova tsó ni ba somo Daudi ndi nalo nǎ ro ndirigoti ni chu ngbaribbai ma ni ka ni hwini fø kpakpalo na nari.

16. Paulo bangʉeni na nalo nanga ká ni ka ni tu ngbaribbai?

¹⁶ (2) Addinga. Ali ni Paulo ringa na. Ke le sʉngʉe Roma nǎ prizo na sheni na. Ro luti le sʉngʉe ke prizo na ná saa na, ke ngʉ riddi ndi le si hwihwi. Kelai nja kpa bbangʉe ke bba, ndirigoti kedhó klø singʉeni si.​—2 Ti. 1:15.

17. Paulo ká ka ndi njieri ngba?

¹⁷ Njaro Paulo ka ndi ddieri, ndie mukristo nga ró nzá le ka le sʉe ndi ri. Ke nanga ka ndi kaeni ndi lai kpa djo ndirigoti ndidzá nja kʉ ná kau djo maddi. Ro Paulo nzá njingʉe fø di nalo ro ri. Ke ká tøngʉeni chí ndirigoti ke ká ngʉe ngab’odha na addudho?

18. Paulo ká njingʉeri ngba kpakpalo na ndi ngʉ hwini ná saa na?

¹⁸ (3) Addinga bbo lo djo (Tafakari). Angʉ i logoti, “Paulo tsotso ká kongʉeni ngbaribbai?” Ngbamai Paulo chungʉe ndi le si hwihwi nari ro, ke nzá vingʉe bbo na mana kʉ nalo nga ro ri, føri kʉ le bbʉ madha Yova dho. Ndirigoti ke ngʉ ngaddi nja nrŭ ndi ka ndi li kpakpa nari djo maddi. Ke lingʉe ndi thí Yova djo krʉ ddo ro ndi nganzi nari chulú. (2 Ti. 1:3) Bbabba ngʉe ke ná kpa djo ke lie ndi thí nanga ringana, ke lingʉe ndi thí ndi tsotso kongʉe ná nrŭ djo njonjo kʉ ná chulú. Føri djolu pli, Paulo ngʉ Mungu dzá lo zø krʉ ddo ro. (2 Ti. 3:16, 17; 4:13) Godhé, ke chungʉeri nari kʉ Yova ma, Yesu ma na ji ndi ji. Kpa nzá ka ndima bbae ke ro ri, ndirigoti kpa ka ndima lee ke ronga ke njingʉe njí chí ndi tøni ro nari dho.

19. Yova ká kongʉe Paulo tsotso ngbaribbai?

¹⁹ Yova jangʉeri Paulo dho nari kʉ, ke kʉ mukristo naridho ke ka ndi vee kpakpalo lotso ngba. (Mdo. 21:11-13) Yova ká kongʉe Paulo tsotso ngbaribbai? Yova ngʉngʉe Paulo dhó sala goti, ndirigoti ke bbʉngʉe kpakpanga ke dho. (2 Ti. 4:17) Paulo chungʉeri nari kʉ ndi ka ndi ba ledha dhonalo ke njingʉe ndi dho Mungu bbʉ ná njí kpakpanga na. Yova chongʉe Paulo dzá kau ronga ndiro kpa kó ke tsotso bblo d’e.

20. Waroma 8:38, 39 ridho naribbai, ko ká ka ko dyø Paulo dhó loroji ngbaribbai?

²⁰ (4) Anjinjí ri na. Adhu i lo ni tso, ‘Ma ká ka ma dyø Paulo dhó loroji ngbaribbai?’ Paulo bbai, kodho ringani ko churi nari kʉ, nrŭ ka ndima nza ko nza Yova dho ko njí nji nari dho. (Mk. 10:29, 30) Nja ko tøni chí mbudha kana d’e, kodho ringani ko li ko thí Yova djo sala chulú ndirigoti ko di Biblia zø krʉ ddoro. Ndirigoti kodho ringani ko chú nari kʉ bbo na mana kʉ ko dho nalo kʉ ko bbʉ madha Yova dho. Ndirigoti Yova nzá ka ndi bba ko ro ri ndirigoti nrŭ nji addu ma ro, føri nzá ka ndi cho Yova dhó jidha ronga tso ro ko ró ri.​—Azø Waroma 8:38, 39; Ebr. 13:5, 6.

21. Aya ma, Hector ma na tsotso ká ngba lo kongʉe nja kpa si ndima kʉ na ná kpakpalo djolu d’e?

²¹ Rie ngbadi nalo kana ma ko kʉ ri ró, Biblia nǎ kʉ ná loroji ka ndi bbʉ kpakpanga  ko dho ko ve na ko bani na ná kpakpalo tso. Lorojina, Japon nǎ kʉ ná le ve Aya pori i, Yona dhó loroji adi ma tsotso kó ndiro nzɨ ma nji do bí nrŭ kʉ ná ngana ma lod’ra ná saa djo. Indonesia nǎ kʉ ná le-djo Hector, kedzá gødhi nrŭ nga kʉ Yova dzá Dimu ri, ke pori i, Ruta dhó loroji adi ma ronga cho ma chulo Yova djo ndirigoti ma nji njí ke dho.

22. Njonjo kʉ ná drama ma inga “Tuige Imani Yao” nǎ kʉ nalo ká ka ndi kó ni tsotso ngbaribbai?

²² Biblia nǎ kpakpa ka ndi li ni ná loroji ká ni ka ni ba ngbaga? Kodhó video ma, drama ma na adi ko tsotso kó nja Biblia nǎ kʉ nalo le nja njinjini naribbai njʉ d’e. * Adi fø lo njanja ma, adi ri rr rr ma, inga adi ri ro zøzø maddi, ro fø lo krʉ ni nji nari nji, adi rinzi Yova kó ni tsotso nja ni ba somo ri nǎ ro d’e. Anji ni fø kpa nganga bbai. Addinga chí tøngʉeni Yova dho ná kpa njingʉe nalo djo ndirigoti ngbaribbai ma Yova kongʉe kpa tsotso kpakpalo dhi saa na nari djo. Ndirigoti anji njí ni chu ná fø lo na nidhó maisha na. Apo mbai ni tsotso Yova ko nari dho. Ndirigoti føri ni nja mana na nari adho nja nrŭ ni li kpakpa ndirigoti nrŭ tsotso ni kó ná chulu maddi.

23. Isaya 41:10, 13 ripo naribbai, Yova ká tsoni ndi si rinji ngba ko dho?

²³ Stani dzá i dz’ djó nja lo ka ndi njani kpakpa ndirigoti ko nzá ka ko chu ko ka ko nji nalo ro ri. (2 Ti. 3:1) Ro kodho nzá ringani ko ronga di tata inga koe do na ri. Yova chu ko bani na nalo bblo, ke pori ndi si ko lø ndi thó tha djo ri na. (Azø Isaya 41:10, 13.) Ko di ngatsotso kodha ne ná saa na, ako uri nari kʉ ke ka ndi kó ko tsotso ko, ndirigoti føri ka ndi liri koe kpakpanga na maandiko chulú nja ko si kpakpalo djolu d’e.