1. Yesu ká nzingʉeri Yova b’o ndi unakpa ronga addudho?

YESU dhe nari nji kuna, ke ngʉ ngaddi ndi unakpa ka ndima bani na ná kpakpalo djo. Ke jingʉe ndi unakpa nari dho Yesu pongʉe ri ndidzá Baba dho “ab’o kpa ronga che kʉ ná ke ró.” (Yoh. 17:14, 15) Yesu chungʉe ndi si ngʉ ra nǎ nari ngba ndirigoti ke chungʉe føri goti Stani ka ndi nji lɨ Yova dho ji ndima nji njí ná kpa tso ro. Føridho Yova dzá nrŭ dhó lo jiri le b’o ndima ronga b’o.

2. Yova ka ndi ngʉ kodhó sala goti nari ká ko ka ko u ngbaribbai?

² Yova ngʉngʉe Yesu dhó sala goti ke ji ndidzá ngba ji naridho. Njati ko nji kpakpanga ko nji Yova nyo tho nalo ró, ke ka ndi ji ko ji ndirigoti njati ko nziri ke b’o ko ronga ró, Yova ka ndi rr kodhó sala rr. Familia nǎ bbo jidha dhi Baba bbai, ke si ndidzá nzø ronga b’o jidha na. Njati ke njiri fø nzá ró, ri ka ndi sa kedhó sifa sa!

3. Kodhó lo ká jiri Yova b’o ronga njʉ addudho?

³ Kodhó lo ji Yova b’o ko ronga anji nga djolú. Stani le di ra nǎ ro naridho “ke kʉ thø na bbo.” (Ufu. 12:12) Ke rili nja nrŭ di riddi nari kʉ, kpa ko nza ná saa na, kpa “takatifu kʉ ná njí nji Mungu dho.” (Yoh. 16:2) Nzá u Mungu ná nja kʉ ná kpa adi ko nzanza dhonalo ko nzɨ adi ko tso tsu dz’ dzá ri kʉ nalo nǎ ri. Nimai ri kʉ fø ro ko nzɨ adi do ro nji ri. Ká addudho? Dhonalo Mungu dzá lo ripo: “Bboke kʉ chí kʉ ná ke, ke si kpakpanga bbʉ ni dho ndirigoti ke si ni ronga b’o che kʉ ná ke dhó ro.” (2 Te. 3:3) Yova ká adi ko ronga b’o ngbaribbai? Kosi loti aro (2) kʉ nalo djo.

4. Waefeso 6:13-17 ripo naribbai, Yova ká bbʉ addu ko dho nja ri b’o ko ronga d’e?

⁴ Yova bbʉ là njidha dhi ritsi ko dho nja ri b’o ko ronga Stani dzá lɨ ró d’e. (Azø Waefeso 6:13-17.) Mungu dhó ro si ná fø là njidha dhi ritsi kʉ kpakpa ndirigoti ri njí nji bblo! Ro njati ko ji ri b’o ko ronga ró, kodho ringani ko nji njí fø là njidha dhi ritsi na krʉ. Là njidha dhi fø ritsi krʉ na mana ká kʉ addu? Akotilo ri djo ddiddi ro.

5. Bbʉbbʉlo dhi Mukabba ká kʉ addu, ndirigoti kodho ká ringani ko njøri addudho?

⁵ Bbʉbbʉlo dhi Mukabba na mana kʉ Mungu dzá lo, Biblia nǎ kʉ ná bbʉbbʉlo. Kodho ká ringani ko njø fø mukabba addudho? Dhonalo Stani kʉ “kali ba.” (Yoh. 8:44) Ke sha kali cho bí b’lo ndirigoti ke “nrŭ di djó ná dz’ lu” sha! (Ufu. 12:9) Ro Biblia nǎ kʉ ná bbʉbbʉlo adi ko ronga b’o fø kali ró. Nde Bbʉbbʉlo dhi mukabba ká ko adi njø ngbaribbai? Ko adi ri njø bbʉbbʉlo ko chu Yova djo, ko ke má “roho na ndirigoti bbʉbbʉlo na nari chulú,” ndirigoti krʉ kʉ nalo kana ko chø kʉ nalo nji ná saa na.​—Yoh. 4:24; Efe. 4:25; Ebr. 13:18.

6. Chø lo dhi kachali ká kʉ addu, ndirigoti kodho ká ringani ko njøri addudho?

⁶ Chø lo dhi Kachali (Bamba la kifuani la uadilifu) na mana kʉ Yova dho chø kʉ ná yadha. Kodho ká ringani ko njø kachali addudho? Kachali adi sødda thí ronga b’o naribbai chø lo dhi kachali ka ndi b’o ko thí mufano dhi ri ronga ndiro nzɨ dz’ djó che kʉ nalo sa ko dho nyi ro. (Mez. 4:23) Yova jiri ko ji ndi ndirigoti ko nji njí ndidho ko thí nǎ ro krʉ. (Mt. 22:36, 37) Stani riji nzɨ ko nji njí Mungu dho ko thí nǎ ro krʉ, føridho ke adi riji ko ji dz’ djó kʉ ná ritsi. (Yak. 4:4; 1 Yo. 2:15, 16) Ndirigoti ke ji nalo ko nji nzá ro, ke adi rine ndi cho ko ndiro ko nji nzá tho Yova nyo nalo d’e.

7. Chø lo dhi kachali ká ko adi njø ngbaribbai?

⁷ Chø lo dhi kachali ko adi njø Yova dho yadha dho ko ngarr ndirigoti njí ko nji fø yadha na ná saa na. (Zb. 97:10) Nja nrŭ adi riddi nari kʉ, Yova dzá yadha le ronga tso cho bblo kʉ nalo ró. Ro njati ko nji njí nzá Yova dzá yadha na kodhó maisha nǎ ró, føri ka ndie ddiddi lɨ dhi saa na tu ndidhó kachali ndi badjo ro ná sødda bbai, ke riddi ri o li nari dho. Føri kʉ nga dhó akili kʉ ná ke ka ndi nji nalo! Ro njati ko ji Yova ró, kedzá yadha “nzá ka ndi o li ri,” ro ri ka ndi b’o kodhó shinga ronga b’o.​—1 Yo. 5:3.

8. Ngoi dhi hwè dhi lo i dhi ss ko thó ko kó ro ná føri na mana ká kʉ addu?

⁸ Paulo pori ko thó ngoi dhi hwè dhi lo i dhi ss ko kó ro. Føri na mana kʉ, krʉ ddoro koe tayari Pidhinga dzá hwè lo i d’radha dho. Ko di Biblia nǎ kʉ ná hwè dhi lo i d’ra nrŭ dho ró, ri adi rili kodhó udha ngʉ kpakpa. Ko nanga adi jini bbo ko di rinja Yova dzá nrŭ kpakpanga nji ndima d’ra lo ngodhé ná saa na. Lorojina kpa adi lod’ra njí dhi ngana ma, darasa na ma, nyumba kwa nyumba ma, d’uka dhi ngana ma, soko na ndima ra ná saa na ma, nga kʉ Yova dzá dimu ná familia ronga ndima ra be ná saa na ma inga ndima lai nja nrŭ dho ma. Njati ko bba lod’radha dhi njí tso do ko nji nari dzá lodho ró, ko ka koe lɨ dhi saa na tu ss ndi kó ro ro ná sødda bbai, ke ko ronga ka ndi vovo. Ndirigoti ri ka ndie kpakpa ke b’o ndi ronga lɨ dhi saa na ndirigoti ri ka  ndie kpakpa ke dyø ndidhó bbonga dhó yadha.

9. Kodho ká ringani ko b’o udha dhi bbo ngali ronga addudho?

⁹ Udha dhi bbo ngali na mana kʉ Mungu djo ko kʉ na ná udha. Ko u nari kʉ ke si ndi tsoni djo nalo krʉ nji nji. Fø udha si ko tsotso ko “ko dhé che kʉ ná ke s ko djo ná mbrr ró kazz.” Kodho ká ringami ko b’o fø ngali ronga addudho. Dhonalo ri adi ko ronga b’o gʉ Yova dzá lo gʉ ná kpa dhó mafundisho ró ndirigoti che lo adi ti ko djo ná nrŭ ró maddi. Ngadhi udha ro ri ka ndie kpakpa ko dho ko rrnga Yova dhó yadha dho, njati nrŭ di riji nzɨ ko rrnga ke dho ró. Kodhó udha ronga ko b’o bblo nari ko adi dho njí dhi ngana ma, darasa na ma, Yova ji nalo ko nji nari chulú. (1 Pe. 3:15) Kodhó udha ka ndi b’o ko ronga njati ko di nzá gbani Mungu ji nalo na ná njí gʉ ná saa na. (Ebr. 13:5, 6) Ndirigoti udha adi ko ronga b’o njati ko di tøni chí Mungu dho mbudha kana ma ró.​—1 Te. 2:2.

10. Gødha dhi kofia ká kʉ addu, ndirigoti kodho ká ringani ko di ri thó addudho?

¹⁰ Gødha dhi kofia kʉ Yova bbʉ ko dho ná ngab’odha, fø ngab’odha kʉ ke si ko  gø dhe nǎ ro ndirigoti ke si ledha bbʉ ni ngarr ndi dho ná nrŭ dho nari. (1 Te. 5:8; 1 Ti. 4:10; Tit. 1:1, 2) Kofia adi sødda djǒ ronga b’o naribbai, gødha dhi ngab’odha ka ndi b’o kodhó ngaddidha ronga. Ká ngba chulú? Ngab’odha adi ko tsotso kó ko li ko thí Mungu tsoni djo nalo djo ndirigoti ri adi ko tsotso kó ndiro ko sisi ko bani na nalo djolu d’e. Fø kofia ká ko adi thó ngbaribbai? Fø ri ko adi nji Mungu ji naribbai ko ngaddi nari na. Lorojina, ko nzɨ adi ko thí li nga na mana kʉ ná mali djo ri, ro ko adi ko thí li Mungu djo.​—Zb. 26:2; 104:34; 1 Ti. 6:17.

11. Kiroho nǎ sa ká kʉ addu, ndirigoti kodho ká ringani ko njí nji ri na addudho?

¹¹ Kiroho nǎ sa kʉ Mungu dzá lo Biblia. Fø sa kʉ kpakpanga na ndi dho kali dhiri kʉ nalo, føri ka ndi kó nrŭ tsotso ndima tuni kali dhi mafundisho nǎ ro ndirigoti che kʉ ná nyi nǎ ro. (2 Ko. 10:4, 5; 2 Ti. 3:16, 17; Ebr. 4:12) Ko adi njínji bblo fø sa na Biblia ko zø ná saa na ndirigoti Yova dzá tengenezo mazoezi bbʉ ko dho nari chulú. (2 Ti. 2:15) Ri nga kʉ Yova dhoro si là njidha dhi ritsi chulú dhé ri, ro Yova adi ko ronga b’o nja chulú maddi. Føri ká kʉ ngba chu?

12. Kodhó lo ká ji ngba lo ki, ndirigoti addudho?

¹² Bblo kʉ ná sødda churi nari kʉ, ndi nzá ka ndi nji lɨ ddiro bí kʉ ná sødda tso ró ri; ro ke tsotso nja sødda ka ndi kó. Føri bbai, Stani ma, ke una gó ma na dhó lɨ djó nzá ko ka ko si koko ro ri; ro ringani ko djoi ma, ko vei ma na kó ko tsotso. Yova bbʉ dz’ djolu gble kʉ ná “ko djoi ma, ko vei ma na” nja ndima kó ko tsotso d’e.​—1 Pe. 2:17.

13. Waebrania 10:24, 25 ripo naribbai, njudha ká adi ko tsotso kó ngbaribbai?

¹³ Ko tsotso adi kó ná ddi chu kʉ, njudha dhi ngana ko si nari. (Azø Waebrania 10:24, 25.) Njati ko thí e njedha na ró, njudha dhi ngana ko si nari ka ndi liri ko ba kpakpanga. Ko djoi ma, ko vei ma na bbʉ ná komatere adi ko li kpakpa. Biblia nǎ hotuba ma, nja kʉ ná onyesho ma na adi kpakpanga bbʉ ko dho nja ko njínji Yova dho d’e. Njudha njí ma, ri goti ma ko loti ko kana nari adi ko li kpakpa. (1 Te. 5:14) Ndirigoti njudha adi rili ko ba nja nrŭ dho le ritsi bbʉ nari nǎ ro adi si ná hwè. (Mdo. 20:35; Ro. 1:11, 12) Kodhó njudha adi ko tsotso kó nja kʉ ná chulú maddi. Kodhó njudha adi ko tsotso kó nja ko d’ralo bblo ndirigoti ko ddi longa bblo d’e. Lorojina, ko adi njí nji bblo kodhó lod’radha dhi ritsi na. Føridho adi ni tayarisha bblo njudha dho. Mukusanyiko dhi saa na adi ngarr bblo. Ndirigoti adi njí nji ri nǎ ni chu nalo na. Fø ni di rinji ró, ni ka nie “Yesu Kristo dhó bblo kʉ ná sødda.”​—2 Ti. 2:3.

14. Ko tsotso ka ndi kó ná njari ká kʉ ngba lo?

¹⁴ Ko tsotso mamilioni kʉ ná malaiká ma adi kó ddi. Addinga malaika ddikpa ka ndi nji nalo djo! (Isa. 37:36) Ndirigoti addinga mamilioni kʉ ná malaika ka ndima nji nalo djo. Ddikpa le ma, Stani ro ma ngaddi kʉ kpakpanga na Yova dhó sødda djolu ri. Yova kʉ kpakpanga na bbo ndirigoti ke kʉ klø na bbo. (Amu. 6:16) Føri kʉ bbʉbbʉlo! Njati ni lai njí dhi ke ma, darasa nǎ ngba ma, inga familia nǎ nga kʉ Yova dzá Dimu ná ke di do ka ndi ta nalo nji ró, addinga fø lo djo. Anonga nari kʉ, ni nga kʉ ddiro fø lɨ tsoro ri. Fø ri na ni ngarr Yova ja nalo dho.

15. Isaya 54:15, 17 ripo naribbai, Mungu dzá nrŭ lod’ra nari tso cho ná ritsi ro kʉ nga. Ká addudho?

¹⁵ Stani dzá dz’ djó nrŭ ka ndima ndro ko dho nalo kʉ bí. Ko nzɨ adi ko tso tsu politiki nǎ lo na ndirigoti sø dhi lo nǎ ri. Ko adi Mungu rodho d’ra ndirigoti ko adi rid’ra nari kʉ, ri kʉ ke dhó Pidhinga i si nrŭ bani na ná kpakpalo tso d’ø ri ndirigoti ko adi ngarr ke dzá yadha dho. Ko adi rid’ra nari kʉ i dz’ djó pi kʉ che kʉ ná ke, kali ba ndirigoti nrŭ che ná ke. (Yoh. 8:44) Ndirigoti ko adi rid’ra nari kʉ Stani dzá dz’ le si sa ná ddo kʉ chøchø. Stani ma ndi unakpa ma na nzá ka ndima cho lod’radha dhi njí tso ro ri. Fønga ringana, ko adi madha bbʉ Yova dho krʉ ko nji nalo kana! Nimai Stani kʉ kpakpanga na ro, ke nzá d’erie Mungu dzá Pidhinga dhi hwè lo i le d’ra nari tso ro cho ri. Føri ka ndi njini nji dhonalo Yova adi ko ronga b’o ni.​—Azø Isaya 54:15, 17.

16. Yova kasi ndidzá nrŭ gø ngbaribbai ziki kubwa dhi saa na?

¹⁶ Ko ká ngba lo b’o? Ziki kubwa dhi saa na, Yova si ko gø ke dho le nanga ka ndi keni ná aro kʉ ná chulú. Ya kwanza, ke si ribba dz’ djó pikpa sa kali dhi dini ná saa na, ke si ko gø gø. (Ufu. 17:16-18; 18:2, 4) Ndirigoti ke si kʉ ko gø Stani dzá i dz’ ndi si sa Armagedoni na ná saa na.​—Ufu. 7:9, 10; 16:14, 16.

17. Ko tøni chí Yova dho nari ká si ko tsotso kó ngbaribbai?

¹⁷ Ko kana ngae chøchø Yova na ró, Stani ka ndi nji ko ró nalo ro nga kʉ ri. Fønga ringana ke le si sa theinga dho. (Ro. 16:20) Føri dho anjø là njidha dhi krʉ kʉ ná ritsi, ndirigoti anjinjí ri na! Nzɨ nji fø lɨ ddiro. Abba ni djoi ma, ni vei ma na kó ni tsotso. Adyø Yova ja nalo. Njati ni njiri fø ró, ni ka ni uri nari kʉ, nidzá ra nǎ jidha dhi Baba si ni li kpakpa ndirigoti ke si ni ronga b’ob’o.​—Isa. 41:10.