1-2. Batiso ndrŭ ba ná saa djo ká ngbá lo adi ngaba ndirigoti ri ká ngani ni ddinga addu djo?

 NI KÁ njarie batiso ra ba ná ndrŭ ro b’lo? Batiso kpa ra ba nari njí, aro kʉ ná ngadhudha goti kpa ngʉ ná saa djo, kpadhó udha adi njani pʉlʉpʉlʉ. Kpadhó familia ma, kpadhó bbakau ma na nanga adi jini bbo kpa ndima nja ná saa djo. Dda nǎ ro kpa vʉ ná saa djo ni adi ndima thó ndrŭ b’ɨ kpa dho ndirigoti kpa kʉ na ná hwè njanja. Krʉ yenga ddo ró chøchø maelfu kʉ ná ndrŭ adi ndima bbʉ Yova dho, ndirigoti kpa adi batiso ba nja ndima ngʉ Yova dzá Dimu d’e.

² Nde, nidhó lo ká kʉ ngbǎ? Njati rie ni riddi ni ba batiso ri ró, ni na mana kʉ bbo che kʉ ná i dz’ djó dhonalo ni “Yova ne.” (Zb. 14:1, 2) I lo le ndi ni dho njati ni é jadda ma inga ngó ma ró. Njati rie b’lo ma ko ba batiso ri ró ko tsotso ma i lo ka ndi kó ddi, ndiro ko rá anzi kpakpanga na ko Yova má nari na theinga dho d’e. Akonja ko adi cho nja ko njinjí Yova dho d’e ná sababu kana gbo kʉ ná ri ro di.

3. Yova dzá njí dhi ndrŭ ká jirie bbʉbbʉlo ma, chølo ma na addudho? (Zaburi 119:128, 163)

³ Yova rija ndidzá ndrŭ dho kpa “ji bbʉbbʉlo.” (Zek. 8:19) Yesu jangʉeri ndi unakpa dho kpa ne chølo. (Mt. 5:6) Føri na mana kʉ, kpa dho ringani ndima njí chølo, bblo lo ndirigoti tsetse Mungu nyǒ djó ná lo. Nde, ni ká jirie bbʉbbʉlo ndirigoti chølo ngbà? Ko uri u nari kʉ, ni jirie chølo ma, bbʉbbʉlo ma na ngbà. Ni ndrorie kali ma, krʉ kʉ ná chelo ma na ndro. (Azø Zaburi 119:128, 163.) Kali sha ná ke adi Shetani dyø i dz’ djó pi ndi kʉ ro. (Yoh. 8:44; 12:31) Shetani dhó muradi kana ddikpa ri e ndi sa Mungu ró takatifu kʉ ná  dho nanga sa. Shetani adi kali nanga pli kodhi Mungu djo Edeni na ndi tsangʉe nanga djó ro. Ke adi rili ndrŭ ddiri nari kʉ Yova kʉ dya, kali dhi ke ndirigoti ke adi bblo ritsi ruru ndrŭ ró. (Mwa. 3:1, 4, 5) Shetani adi rili ndrŭ é che kʉ ná ngaddidha na Yova djo. Njati ndrŭ vʉri nzɨ ndima “ji bbʉbbʉlo” ró, Shetani ka ndi cho kpa kpa njí nga kʉ chø ná lo ma, che kʉ ná lo ma na.​—Ro. 1:25-31.

4. Yova ká dho ndi kʉ “bbʉbbʉlo dhi Mungu” nari ngbaribbai? (Anja ji maddi.)

⁴ Yova kʉ “bbʉbbʉlo dhi Mungu” ndirigoti ke adi bbʉbbʉlo ngaddi hwè na ngbà ji ndi ná ndrŭ dho. (Zb. 31:5) Fø ndi rinji nari na, ke adi kpa klóklo Shetani dhó kali nǎ ro. Føri kina Yova adi riddi ndidzá njí dhi ndrŭ dho kpa di bbʉbbʉlo po ndirigoti kpa é chø. Føri adi rili ndrŭ bbʉ heshima kpa dho ndirigoti kpa é ngoi na. (Mez. 13:5, 6) Ke ká njingʉeri ni dho fø ddi Biblia ni ngʉ jifunza ná saa djo? Ni jifunza nari kʉ, Yova dhó chu i kʉ bblo kʉ ná ri ndrŭ krʉ dho ndirigoti ni dho maddi. (Zb. 77:13) Føri dzá lo dho ni jirie ni njí chø kʉ Yova nyǒ djó ná lo. (Mt. 6:33) Ni jieri ni d’ra bbʉbbʉlo ndirigoti ni dhori nari kʉ, Shetani adi po kodhi Mungu Yova djo nari e kali. Nde, ni ká ka ni njiri fø ngbaribbai?

5. Ni ká ka ni dhǒ ni ji bbʉbbʉlo ma, chølo ma na nari ngbaribbai?

⁵ Ni nji ná lo chulu ni ka ni dhori nari kʉ ni nzá gba ni tso Shetani dhó kali na ri, ro ni gba ni tso bbʉbbʉlo na. Ni ka ni dhori nari kʉ ni ji Yova é nidhó Pi ndirigoti ni ji ni njí chø kʉ ná lo ke nyǒ djó. Ni ká ka ni njí føri ngbaribbai? Sala chulu ni tsoni Yova dho ni njinjí ke dho theinga dho ndirigoti batiso ni ba nari chulu. Bbʉbbʉlo ma, chølo ma na le ji ná føri i kʉ le ronga adi cho ná lo ndiro le vʉri le ba batiso d’e.

6. Zaburi 45:4 ká Yesu Kristo ni ka ni ji dho ná ngbá sababu d’ra ni dho?

⁶ Yesu Kristo ká ni jirie addudho? Anja Zaburi 45:4 (Azø) nǎ kʉ ná bbo na mana kʉ na sababu. Yesu jingʉe bbʉbbʉlo ma, nyenyenga ma, chølo ma na. Njati rie ji ni jirie bbʉbbʉlo ma, chølo ma na ri ró ni ka ni ji Yesu maddi. Addinga ngbaribbai ma Yesu ngʉ bbʉbbʉlo ma, chølo ma na ddi nga nǎ ddo ro nari djo di. (Yoh. 18:37) Yesu ká dhongʉe nyenyenga ngbaribbai?

7. Yesu dhó nyenyenga nǎ bbo lø ni thí ronga nari ká kʉ ngbá lo?

 ⁷ Yesu dhó loroji ridho ke ngʉe nyenyenga na. Loroji na, ke ngʉ nji ná ritsi krʉ dho ke ngʉ adi madha bbʉ ndidzá Baba dho nga ndi dho ri. (Mk. 10:17, 18; Yoh. 5:19) Nde, Yesu dhó nyenyenga ká adi rili ni mbu ni ngbaribbai? Bbʉbbʉ dhé, føri adi ni cho ni ji Mungu dhi Ddùna ndirigoti ni dyø ke. Yesu ká ngʉe nyenyenga na addudho? Ke ngʉe nyenyenga na dhonalo kʉ, ke jingʉe ndidzá Baba ndirigoti ke ngʉ ke dyø. (Zb. 18:35; Ebr. 1:3) Yesu dhó loroji ká adi ni ronga cho nzɨ, ni ji ke kaka nari bbai ndi dyøngʉe Yova dhó sifa ro?

8. Kodhi Pi Yesu ká ko jirie addudho?

⁸ Ko jirie kodhi Pi Yesu ji dhonalo ke kʉ bblo pli kʉ ná Pi. Yova bbʉngʉe mazoezi ndidhi Ddùna dho ndiro ke nyó pi d’e. (Isa. 50:4, 5) Anzi ngaddi, bbʉdha Yesu bbʉngʉe ndi nari chulu ke dhongʉe ko dho ná jidha djo. (Yoh. 13:1) Yesu kʉ nidhó Pi nari dho ri kaka ni ji ke. Ke pongʉeri ndi adi bbʉbbʉ ji ndi ná ndrŭ nzǐ ndidzá bbakau ndirigoti kpa adi fø jidha dhǒ kedhó yadha dho ndima ngarr nari chulu. (Yoh. 14:15; 15:14, 15) Yova dhi Ddùna dzá kau le kʉ nari kʉ bblo pli kʉ ná lo!

9. Wakristo dhó batiso ká kʉ ddiddi Kristo bangʉe nari na ngbaribbbai?

⁹ Yesu jangʉeri ndi unakpa dho kpa ba batiso. (Mt. 28:19, 20) Ke dhongʉe loroji kpa dho. Nja chu nǎ Yesu dhó batiso kʉ njonjo ke unakpa adi ba nari ró ro. (Anja kisanduku “ Yesu dhó batiso ma, ke unakpa dhó batiso ma na ká ngʉe njonjo ngbaribbai?”) Nja chu nǎ ri kʉ ddiddi. Batiso ndi ba ná saa djo Yesu bbʉngʉe ndi nja ndi njí ndidzá Baba ji ná lo d’e. (Ebr. 10:7) Føri bbai batiso Yesu unakpa ba ná saa djo, kpa adi ridho wazi ndrŭ krʉ nyǒ njí nari kʉ, ndima bbʉ ndima dhó maisha ndiro ndima njinjí Yova Mungu dho d’e. Fø nga djó ro kpa dho bbo na mana kʉ ná lo e ndima njí Mungu ji ná lo, ro nga ndima ji ná lo ri. Fø chu nǎ kpa adi ndima dhó Bboke dhó loroji dyø.

10. Yesu ni ji nari ká ka ndi cho ni ronga ni ba batiso addudho?

¹⁰ Ni uri u nari kʉ Yesu kʉ Yova dzá ya kwanza Ngba ndirigoti ke lirie Yesu ndi nyó Pi ko djo. Ni churie richu Yesu kʉ nyenyenga na ndirigoti ke adi ndidzá Baba dyø kaka nari bbai. Ni jifunzangʉe nari kʉ, ke bbʉngʉe nyo u hwi ná ndrŭ dho, ke pingʉe bbʉ thí bbʉni ná ndrŭ iso ndirigoti ke gøngʉe dhe nji ná ndrŭ. (Mt. 14:14-21) Ni nja ngbaribbai ma ke chutso ddá kutaniko dho njʉ nari nja. (Mt. 23:10) Ndirigoti ni churi nari kʉ, ke si ri ki nji bblo pli Mungu dhó Pidhinga nǎ ndi sie Pi ná saa djo. Ni ká ka ni dhǒ ni ji ke ngbà nari ngbaribbai? Kedhó loroji ni dyø nari chulu. (Yoh. 14:21) Ni ka ni njiri fø ná ddikpa chu kʉ, Yova dho ni ni bbʉ ndirigoti batiso ni ba nari chulu.

11. Batiso ko adi ba dho ná bbori ká kʉ ngbá sababu ndirigoti fø ká ri kʉ addudho?

¹¹ Batiso ni ka ni ba dho ná ddikpa bbo na mana kʉ nari ká kʉ ngbá sababu? Yesu dhongʉe Mungu dhó yadha kana bbo ri ká kʉ ngbá ri nari, ɨ ndi pongʉeri nari na: “Nidho ringani ni ji Yova nidzá Mungu ni thí nǎ ro krʉ, nidhó nafsi nǎ ro krʉ, nidhó ngaddidha nǎ ro krʉ ndirigoti nidhó kpakpanga na krʉ.” (Mk. 12:30) Ni ká jirie Mungu føi ngbà?

12. Yova ká ni jirie addudho? (Anja ji maddi.)

¹² Yova ko jirie dhonalo kʉ bí. Loroji na, ni famuri nari kʉ, ke i kʉ “shinga tso ngani ná nga” ndirigoti “krʉ bblo kado ma, krʉ kaka ná ritsi ma na adi si dhó ro ná ke.”  (Zb. 36:9; Yak. 1:17) Krʉ ni adi hwè ba dho ná bblo kʉ ná ritsi adi si kodhi ji dhi Mungu dhó ro.

13. Le ødha dhi be ká kʉ bblo pli kʉ ná kado addudho?

¹³ Le ødha dhi be kʉ Yova bbʉngʉe ko dho ná bblo pli kʉ ná kado. Fø ká ko ripo addudho? Anzi ngaddi Yova ma kana ngʉe ndidzá ngba na ná bblo pli kʉ ná kau djo di. Yesu pongʉeri ɨ: “Baba jirie ma ji “ndirigoti “ma jirie Baba ji.” (Yoh. 10:17; 14:31) Kpa kana kau ngʉngʉe kpakpa bbo ddinga kpa dingʉe cho bí nari kana. (Mez. 8:22, 23, 30) Addinga ngbaribbai ma, Mungu mbungʉe ndi ndi ungʉe ritso ndidhi Ddùna nzani ndirigoti ke dhedhe ro nari djo di. Yova jingʉe ndrŭ tsɨ bbo ná føri tsu ni maddi ndi nǎ, føri dzá lo dho i ke bbʉngʉe ndidhi Ddùna bbo ndi ji nari ndiro ri kaka ni ma, nja ndrŭ ma na ba choro nŭnŭ di ná shinga d’e. (Yoh. 3:16; Ga. 2:20) Føri kʉ Mungu ko ka ko ji dho ná ddikpa bbo kʉ ná sababu.

14. Nidhó maisha nǎ ni ka ni li ni nji ná bblo pli kʉ nari ká kʉ ngbá muradi?

¹⁴ Yova djo ni lochu ná ngatsi i nidhó jidha ma adi dhi ke djo. Bbʉbbʉ dhé, ni jiri ni kana nga é chøchø ke na kpadjo ndirigoti choro nŭnŭ. Ndirigoti ni ka ni njí føri njí. Yova rinzi ni tsó ni bbʉ hwè ndi thí dho. (Mez. 23:15, 16) Ni nzá ka ni njiri fø ni tso nǎ lo chulu dhé ri, ro ni nji ná lo chulu  maddi. Nidhó maisha nǎ ni nji ná lo si ridho nari kʉ, ni ji Yova bbʉbbʉ. (1 Yo. 5:3) Føri kʉ nidhó maisha nǎ ni ka ni li ni nji ná bblo pli kʉ ná muradi.

15. Ni ká ka ni dhǒ nidhó jidha Yova dho ngbaribbai?

¹⁵ Ni ká ka ni dhǒ ni ji Yova nari ngbaribbai? Ya kwanza ni ka ni bbʉ ni ddikpa dhé kʉ ná bbʉbbʉ Mungu dho pekee kʉ ná sala chulu. (Zb. 40:8) Ndirigoti ni ka ni dhǒ ni bbʉe ni Mungu dho nari krʉ kʉ ná ndrŭ nyǒ njí batiso ni ba ná saa djo. Arøro ko njaeri nari bbai, føri e hwè dhi ndirigoti bblo pli kʉ ná maisha tso le nga ri. Batiso ni ba ná saa na ni adi ø maisha tso nga ndiro ni njí Yova ji ná lo, nga ni ji ná lo ri. (Ro. 14:8; 1 Pe. 4:1, 2) Føri adi njani kpakpa kʉ ná longavʉdha bbai ndirigoti bbʉbbʉ dhé rie kpakpa. Ro føri adi rili ni é bblo pli kʉ ná maisha na. Ká ngbaribbai?

16. Zaburi 41:12 ripo nari bbai, Yova ká si ndi dho bbʉ ndima ná ndrŭ ronga le ngbaribbai?

¹⁶ Yova kʉ bbo pli adi ritsi bbʉ ndrŭ dho ná ke. Njati rie addu ma ni bbʉ ke dho ri ró, ke si ri bbʉ ni dho fø nga djolu dhé. (Mk. 10:29, 30) Ke si bblo pli ndirigoti bí nǎ ledha kʉ ná maisha bbʉ ni dho che kʉ ná i dz’ djó. Ndirigoti føri kʉ nga dhé ritso ngani go ri. Batiso ni ba nari na ni nga tso ná maisha dzá mwisho ro nga sie ri. Ni ka ni rá anzi nidzá ji dhi Baba dho ni njínji nari na choro nŭnŭ. Ni kana kʉ nidzá Baba na ná jidha ka ndi ra anzi dhi ndi dhi nari na ndirigoti ni si di shi theinga dho ke bbai.​—Azø Zaburi 41:12.

17. Yova dho ni ka ni bbʉ ná nga kʉ kedhó nari ká kʉ addu?

¹⁷ Njati ni bbʉ nidhó maisha Mungu dho batiso chulu ró, ni ba pendeleo ni bbʉ bbo na mana kʉ ná ritsi nidzá Baba dho. Ke bbʉ bblo pli kʉ ná ritsi ma, hwè dhi saa ma na ni dho nzá ni d’erie ri ro ba nari bbai. Ná føri dho ni ka ni bbʉ ra ma, dz’ ma na no ná ke dho nga kʉ kedhó ná ritsi, føri i kʉ ni njinjí ke dho chi ni tøni ro nari. (Yob. 1:8; 41:11; Mez. 27:11) Føri i kʉ bblo ni njínji nidhó maisha na ri. Bbʉbbʉ dhé, Yova ni ji ná føri kʉ batiso dho ka ndi cho ni ná bblo pli kʉ ná sababu.

18. Ni ká ka ni dhu ngbá ngadhudha ni tso?

¹⁸ Nde, ni ká ka ni ba batiso ba? Fø logoti ká ni ka ni ngʉ ngbaribbai? Ni dhé ka ni ngʉ fø logoti. Nja ni tsotso koni d’e ringani ni dhu i ngadhudha ni tso, ‘ma ronga tso ká addu cho batiso ma ba nari ró?’ (Mdo. 8:36) Ano ko tielo djo ná gbo kʉ ná sababu nga di. Ya kwanza, bbʉbbʉlo ndirigoti chølo ni ji nari. Adhuri ni tso, ‘Ma ká ji ma nja ndrŭ krʉ si chølo nji ndirigoti bbʉbbʉlo ti ná dyí nga ngbà?’ Ya pili, Yesu Kristo ni ji nari. Adhuri ni tso, ‘Ma ká adi riji Mungu dzá Ngba e madhó Pi nì?’ Ndirigoti ma ká adi riji ma dyø kedhó loroji i nì? Ya tatu, dada krʉ lo djolu nari kʉ Yova ni ji nari. Adhuri ni tso, ‘Ma ká adi riji ma bbʉ hwè Yova thí dho ke dho ma njínji nari chulu i nì?’ Njati ni ngʉ fø logoti krʉ nio ró, nde ni ká batiso ba nzɨ addudho? Ni ronga tso ká addu cho batiso ni ba nari ró?​—Mdo. 16:33.

19. Ká addudho nzá ringani ni nanga rɨni batiso ni ba nari dho ri? Abbʉ loroji. (Yohana 4:34)

¹⁹ Njati rie rɨ ni nanga rɨni batiso ni ba nari djo ró anja Yesu bbʉngʉe ná ddikpa loroji. (Azø Yohana 4:34.) Yesu ddingʉe ndidzá Baba ji ná lo le nji nari nyo na. Ká addudho? Dhonalo nyo e bblo ko krʉ dho. Yesu chungʉeri nari kʉ, Yova adi nzǐ ko tso ná lo krʉ e kodhi bblonga dho. Yova nzɨ adi rinzi ko njí che ka ndi njí ko ná lo ro ri. Yova ká jiri ni ba batiso maddi? Ddio. (Mdo. 2:38) Ni ka ni uri u nari kʉ, batiso badha dhi yadha dho ni ngarr nari nǎ ro ni si faida ba. Njati rie nzɨ ni nanga adi rɨni bblo pli kʉ ná nyo ni nyo nari dho ri ró, batiso ni ba nari dho ká ni nanga adi rɨni addudho?

20. Gosi ná lo nǎ ká ko si loti addu djo?

²⁰ Nja ndrŭ ronga tso ká addu adi cho batiso ndima ba nari ró? Bí kʉ ná ndrŭ ka ndima ngʉ fø logoti, “ma nga kʉ tayari ri.” Bbʉbbʉ dhé, Yova dho ni ni bbʉ ndirigoti batiso ni vʉ ni ba ná føri kʉ ddikpa bbo na mana kʉ ná longavʉdha. Føri dzá lo dho ni dho ringani ni ddinga fø lo djo li ni li ni dyu ro ndirigoti ri ka ndi dzi saa ma, kpakpanga ma na ndiro ni é tayari d’e. Njati rie ngbà ni ji ni ba batiso ri ró, ni ká ka ni njí addu ndiro ni tayarisha ni d’e? Ko si fø ngadhudha goti ngʉ gosi ná lo nǎ.