1-2. (a) Paulo ká ngʉe ngbá di ná hali nǎ Efeso nǎ ndrŭ dho ndi ndingʉe barua ná saa na? (b) Ko ka si loti ngbá ngadhudha djo?

 PRIZO nǎ Paulo ngʉe ná saa na ke jingʉeri ndi li ndi lai Wakristo kpakpa. Ke nzá ka ndi sie kpa dhi ngana ndi ronga na ri nari dho, ke ndingʉe barua kpa dho. Ke ndingʉe Efeso nǎ ndrŭ dho ná ddikpa barua ke ndingʉe cho 60 ma kana 61 na Y.G.G.​—Efe. 1:1; 4:1.

² Anziro da ná cho 10 kana Paulo dingʉe bicha Efeso nǎ longa ndi ddi ndirigoti hwè dhi lo-i ndi d’ra ro. (Mdo. 19:1, 8-10; 20:20, 21) Ke jingʉe ndi djoi bbo ndirigoti ke jingʉeri ndi kó kpa tsotso nja kpa tøni chi Yova dho d’e. Ro, ke ká ndingʉe lo ché na le d’ri ná Wakristo dho tɨtɨnga ma, kadha ma na djo addudho? Nde, Wakristo krʉ ká ka ndima ba ngbá somo fø lo nǎ ro? Akotilo ro fø ngadhudha dhi jibu djo.

KPA TUNI TƗTƗNGA NǍ RO NDIRIGOTI KPA TSU KADHA NA

3. Efeso nǎ Wakristo dho Paulo ndingʉe ná barua nǎ ká ke tingʉe lo addu djo?

³ Paulo ndingʉeri ɨ Efeso nǎ Wakristo dho: “Ni ngʉe tɨtɨnga nǎ, ro kpa djo ni tsu kadha nǎ.” (Efe. 5:8) Iga Paulo tilo tɨtɨnga ma, kadha ma na djo ndiri na ndi dhǒ Efeso nǎ Wakristo øngʉe ndima dhó nyi thika nari d’e. Akonja addudho ma Paulo pongʉeri Efeso nǎ Wakristo ngʉe “tɨtɨnga” nǎ nari.

4. Efeso nǎ ndrŭ ká ngʉe tɨtɨnga nǎ dini djotsina ngbá chu nǎ?

⁴ Tɨtɨnga nǎ kali dhi dini djotsina. Bbʉbbʉ lo ndima jifunza ndirigoti Wakristo ndima ngʉ nari njí Efeso nǎ ndrŭ ngʉe kali dhi dini nǎ ndirigoti kpa ngʉ adi djai nji. Efeso nǎ bbò chungʉeni nari ngʉe Artemis ró dho ngʉe  ná mungu dhó hekalu, føri kʉ ndrŭ chingʉe ná saba ngʉe ná ritsi kana bbò chungʉeni ná ddikpa ri. Fø hekalu nǎ ndrŭ ngʉ adi madha bbʉ sanamu dho. Fø isɨ mungu ró ji ndima thɨ nja ndima dzi nanga d’e nari nǎ ro ndrŭ ngʉ adi mbø ba bbo. (Mdo. 19:23-27) Føri kina Efeso nǎ bí kʉ ná ndrŭ ngʉ adi djai nji.​—Mdo. 19:19.

5. Efeso nǎ ndrŭ ká ngʉe tɨtɨnga nǎ ndima dhó nyi djotsina ngbá chu nǎ?

⁵ Tɨtɨnga nǎ che nyi djotsina. Efeso nǎ ndrŭ chungʉeni bbo che kʉ ná nyi djotsina ndirigoti kpa djo nzɨ do ngʉ adi pa che kʉ ná lo ndima nji nari dho ri. Kpa ngʉ adi nji ná teatre ma, fete ma na krʉ ngʉ adi loti ngono djo. (Efe. 5:3) Efeso nǎ bí kʉ ná ndrŭ djo “nzɨ do ro ngʉ adi pa ri,” føri na ma na kʉ, “kpa nzɨ ngʉ adi njedha ro ba ndima nji ná che lo djotsina ri.” (Efe. 4:17-19) Yova dhó yadha po bblo lo ma, che lo ma na djo ná lo Efeso nǎ Wakristo chu nari njí, kpadhó zamiri nzɨ ngʉ adi lo ro d’i kpa djo ndima nji ná che lo dho ri. Kpa nzɨ ngʉ adi nga ro ddi ngbaribbai ma Yova ndi mbu ndima dhó nyi djotsina nari djo ri. Føri dho i Paulo pongʉeri kpa kʉ,“tɨtɨnga nǎ ndima dhó akili ró ndirigoti kpa kʉ da Mungu dhó ro si ná shinga ró ro.”

6. Ká addudho Paulo pongʉeri Efeso nǎ ndrŭ kʉ “kpadjo kadha nǎ”?

⁶ Efeso nǎ nja ndrŭ nzá mangʉe tɨtɨnga na ri. Ro, Paulo ndingʉeri “kpadjo ni kʉ kadha nǎ ni gba ni tso Bboke na nari chulu.” (Efe. 5:8) Kpa ngʉ Yova ji ná lo nji ndima dhó maisha nǎ. (Zb. 119:105) Efeso nǎ fø Wakristo tungʉeni tu kali dhi dini nǎ ro ndirigoti kpa bbangʉe che kʉ ná nyi tso bba. Kpa ngʉngʉe “Mungu dyø ná ndrŭ” ndirigoti kpa ngʉ adi ndima dho ka ná lo nji krʉ ndiro ndima bbʉ madha Yova dho ndirigoti ndima njí ke nyǒ tho ná lo d’e.​—Efe. 5:1.

7. Nde, kodhó hali ká kʉ ddiddi Efeso nǎ ngʉe ná Wakristo na ngbaribbai?

⁷ Føri bbai, bbʉbbʉlo ko chu nari njí ko ngʉe tɨtɨnga nǎ dini ma, che kʉ ná nyi ma  na djotsina. Ko kana nja ndrŭ ngʉ adi kali dhi dini nǎ takatifu kʉ ná ddo má ndirigoti nja ndrŭ ngʉ adi che kʉ ná nyi nji ndima dhó maisha nǎ. Ro, Yova dhó yadha ko chu bblo lo ma, che lo ma djo nari goti ko lengʉeni le. Ko ngangʉeYova ji ná lo jidha tso kodhó maisha nǎ ndirigoti ko bangʉe bí kʉ ná ledha. (Isa. 48:17) Føro mai ko adi hwini kpakpalo lo tso ró nì dhé. Ringani ko tuni da ko goti ko bba ná tɨtɨnga ró ro ndirigoti “ko ra anzi kadha dzá nzø bbai ko bbi nari na.” Nde, fø ká ko ka ko njiri ngbaribbai?

ANIVɄ TƗTƗNGA NǍ RO

8. Waefeso 5:3-5 ripo nari bbai, Efeso nǎ ndrŭ dho ká ringangʉeni ndima njí addu?

⁸ Azø Waefeso 5:3-5. Nja ndima di da tɨtɨnga na tsungʉe ndima ná nyi ro ró d’e, Efeso nǎ Wakristo dho ringangʉe ndima pʉ che kʉ ná nyi ndima ró ro ndirigoti ndima njí Yova nyǒ tho ná lo. Føri ngangʉe uashareti dhé ri, ri ngʉe che kʉ ná lo si le tso nǎ ro nari maddi. Paulo nongʉe ri nga Efeso nǎ ndrŭ dho nari kʉ, njati kpa pʉ fø di ná nyi nzá ndima ró ro ró, “kpa nzɨ si tsu Mungu ma, Kristo ma na dhó Pidhinga na ri.”

9. Ri ká ngani ko pʉ nga kʉ bblo ná nyi djo ko loti nari ko ró ro addudho?

⁹ Ringani ko ra anzi krr ko kʉ nari na ndiro “nzɨ ko nji tɨtɨnga na ka ndi tsu ko ná lo ró.” (Efe. 5:11) Dhonalo njati ddikpa ke di che kʉ ná lo nja, ri rr, ndirigoti ke di loti ri djo bí ina ró, fø ke dho rie sʉsʉ ndi njí che kʉ ná lo. (Mwa. 3:6; Yak. 1:14, 15) Ddikpa ngø nǎ bí kʉ ná le-djoi ngʉngʉe “bbakua” eternete djó ndima loti na ná ndrŭ na. Ya kwanza, kpa kana bí kʉ ná kpa ngʉ adi loti Yova djo ndirigoti bbʉbbʉlo djo. Luti, kpa ngangʉe lotidha tso nzɨ hwè bbʉ Yova dho ná lo djo. Føri goti kpa ngangʉe lotidha tso bí ina ngono dhi lo djo. Bí kʉ ná le-djoi pori nzá tsetse ná nyi djo ndima loti bí ina nari lingʉeri ndima njí uasherati.

10. Shetani ká adi riji ko di ngaddi ngbá lo djo? (Waefeso 5:6)

¹⁰ Shetani dhó dz’ adi rine ndi sha ko shá ndirigoti ko uri nari kʉ che kʉ ná lo ma, nzá tsetse ná nyi ma na ro nga kʉ che ri. (2 Pe. 2:19) Ro, ko nanga nzá fø lo ka ndi ké ri! Drrdrrnga djó Ibilisi adi rili nzɨ ndrŭ famu bblo lo ma kana njonjonga che lo na. (Isa. 5:20; 2 Ko. 4:4) Føri dho i bí kʉ ná filme ma, video ma, eternete djó kʉ ná bí kʉ ná lo ma na e nzá gbani Yova dhó chi kʉ ná yadha dhi kanuni na ná lo! Shetani adi liri ko ddiri nari kʉ, bbo kʉ i dz’ djó njʉ ná che nyi ma, nzá tsetse ná nyi ma na kʉ utso uni ná lo ndirigoti ri ro nga kʉ che ri.​—Azø Waefeso 5:6.

11. Waefeso 5:7 nǎ kʉ ná shauri na le njínji nari kʉ nyodyu dhi lo nari ká Angela da lu ná lo dhǒ ngbaribbai? (Anja ji maddi.)

¹¹ Shetani adi riji ko gba ko tso nzɨ ngarr Yova dhó yadha dho ná ndrŭ na. Paulo jangʉeri Efeso nǎ ndrŭ dho ɨ: “Nzɨ ni gba ni tso kpa na,” føri kʉ che kʉ ná lo nji Mungu nyǒ njí ná ndrŭ na. (Efe. 5:7) Ringani ko é krr Efeso nǎ ngʉe drrdrr ná ndrŭ djolu dhonalo njʉ nzɨ ko adi kau nji ko ronga na ko nju na ná ndrŭ na dhé ri, ro eternete djó maddi. Asie nǎ di ná le-ve Angela a njangʉe ngbá ngatsi ma eternete kʉ hatari nari. Le pori: “Eternete ka ndi é ddikpa mutego bbai, ndirigoti dzodzo ri ka ndi ø nidhó ngaddidha thika ø. Ma ngʉ adi riddi nari kʉ nzɨ ngarr  Yova dho ná ndrŭ na ma kau nji ná føri ro nga kʉ che ri. Ma ngʉ adi riddi nari kʉ nzɨ hwè bbʉ Yova dho ná lo le nji ledhó maisha nǎ ná føri nga kʉ che ri.” Jidha na wazee kongʉe Angela tsotso ndiro le njí ndidhó lo ungʉe ná mabadiliko d’e. Le pori: “Ma adi ma thí li Yova ma, kedhó ngaddidha ma na djo eternete djo ma lie ma thí nari rɨngana.”

12. Addui ká ka ndi kó ko tsotso ndiro ko dyø Yova dhó yadha bblo lo ma, che lo ma na djo d’e?

¹² Ringani ko hwini dz’ riddi che kʉ ná nyi kʉ bblo ná føri tso ró. Dhonalo ko churi nari kʉ, føri kʉ kali. (Efe. 4:19, 20) Ri kʉ bblo ko dhu i ngadhudha ko tso: ‘Ma ká adi ngana mana kʉ ná kau ma nji ma lai njí dhi ndrŭ ma, darasa nǎ nzø ma, inga nzɨ heshima bbʉ Yova dhó chi kʉ ná yadha dho ná ndrŭ na nari pʉpʉ i nì ma ró ro? Ma ká adi Yova po bblo ma, che lo ma na djo ná yadha i dyø nì njati rie che ma ndrŭ ma nja fø ma rinji nari djó ri ró?’ 2 Timoteo 2:20-22 ripo nari bbai, kutaniko nǎ ko kau vʉ ná saa na maddi ringani ko é krr. Ringani ko di ngano nari kʉ nja ndrŭ ka ndima liri nzɨ ko tøni chi Yova dho.

ANIBBI “KADHA DZÁ NZØ BBAI”

13. “Anzi le ra kadha dzá nzø bbai le bbi” ro nari na mana ká kʉ addu? (Waefeso 5:7-9)

¹³ Paulo lingʉe Efeso nǎ Wakristo kpakpa tɨtɨnga nǎ ro kpa tuni nari kina “kpa rá anzi kadha dzá nzø bbai ndima bbi nari na.” (Azø Waefeso 5:7-9.) Fø lo na mana ká kʉ addu? Ri nǎ mana kʉ ko di njini bbʉbbʉ Wakristo bbai krʉ saa ró. Nja ko njiri fø d’e ringani ko di Biblia ma, ri ró dyʉ ndi ná vichapo ma na zø. Ri kʉ bbo na mana kʉ ná lo ko di ko dyu li Yesu Kristo dhó loroji ma, ke ddingʉe ná lo ma na ro, dhonalo ke kʉ, “dz’ djó kadha.”​—Yoh. 8:12; Mez. 6:23.

14. Roho takatifu ká ka ndi kó ko tsotso ngbaribbai?

¹⁴ Føri kina kodhó lo u Mungu dhó roho takatifu ndiri kó ko tsotso ko rá anzi “kadha dzá nzø bbai” ko njini nari na d’e. Ká addudho? Dhonalo che kʉ ná i dz’ djó le di tsetse ná nyi na nari ro nga e sʉsʉ ri. (1 Te. 4:3-5, 7, 8) Roho takatifu  ká ndi kó ko tsotso ndiro nzɨ ko ddinga i dz’ djó ndrŭ bbai dhonalo kpadhó ngaddidha tso nzá gbani Yova dho ri na ri. Roho takatifu ka ndi kó ko tsotso ndiro ko njí “krʉ kʉ ná bblo lo ma, chølo ma na d’e.”​—Efe. 5:9.

15. Ko ká ka ko ba roho takatifu ngbá chulu? (Waefeso 5:19, 20)

¹⁵ Ndiro ko ba roho takatifu d’e ringani ko di sala nji. Yesu pongʉeri Yova si “roho takatifu bbʉ ndi tso ri nzǐ ná ndrŭ dho.” (Lu. 11:13) Ndirigoti ddinga ko madha bbʉ Yova dho njudha dhi ngana na ná saa na ma ko adi roho takatifu ba ddi. (Azø Waefeso 5:19, 20.) Mungu dhó roho ka ndi cho ko ndiro ko bbi ngbà ka ndi tho ke nyǒ ná chulu d’e.

16. Addui ká ka ndi kó ko tsotso ndiro ko vʉ lonanga nyodyu na d’e? (Waefeso 5:10, 17)

¹⁶ Njati rie bbo na mana kʉ ná lo nanga ko vʉri ri ró, ringani ko chu “Yova ji ná lo ká kʉ addu ma nari” ndirigoti ko nja ngbaribbai ma ko nji ná lo tso gbani ke ji ná lo na nari. (Azø Waefeso 5:10, 17.) Njati kodhó hali kana ko ba ko ka ko njínji na ná kanuni ró, føri na mana kʉ ko Mungu dhó ngaddidha ne nì. Ndirigoti ko njínji ngbà fø kanuni na ró, ri sie sʉsʉ ko dho ko vʉ lonanga bblo.

17. Ko ká ka ko njínji nyodyu na kodhó saa na ngbaribbai? (Waefeso 5:15, 16) (Anja ji maddi.)

¹⁷ Paulo bbʉngʉe Efeso nǎ Wakristo dho ná shauri nǎ ke pongʉeri kpa di njínji ndima dhó saa na nyodyu na. (Azø Waefeso 5:15, 16.) “Che kʉ ná ke,” ndirigoti kodhó mbuba Shetani adi rine ko vi saa bbo dz’ djó ritsi njidha dho ndiro nzɨ ko ba saa Mungu dzá njí njidha dho ró. (1 Yo. 5:19) Mukristo ka ndi di ndi thí li mbø ma, darasa ma, kimwili nǎ njí ma na djo, Yova dho ndi njie njí nari djo ndi lie ndi thí nari rɨngana. Njati fø di ná lo banga ró, ri ka ndi dhori nari kʉ ke nga ngaddidha tso dz’ dzá ndrŭ bbai. Bbʉbbʉ dhé, fø le rinji nari ro nga kʉ che  ri, ro ri nzá ngani ko li ri anziro kodhó maisha nǎ ri. Ndiro ko bbi “ddiddi kadha dzá nzø bbai” d’e, ringani ko “njínji bblo [kodhó] saa na” ndirigoti ringani ko li ko thí bbo na mana kʉ ná lo djo.

18. Donald ká njingʉe njí bblo ndidhó saa na ngbaribbai?

¹⁸ Adi Yova dho ni ka ni njínji krʉ saa ró ná chu ne. Føri kʉ Afrique du sud nǎ di ná Donald njingʉe ná lo. Ke pori: “Ma ddingʉe nga madhó lo djo ndirigoti ma nzingʉeri Yova kó ma tsotso ndiro ma njínji bbo ke dho lod’radha dhi njí kana d’e. Ma nzingʉeri ke kó ma tsotso ma ba ngbà ka ndi bbá saa ma dho ná njí, ndiro ma d’ra lo bbo d’e. Yova kongʉe ma tsotso ma ba fø di ná njí. Mabbá le ma na ko ngangʉe krʉ saa ró ko njínji Yova dho nari tso.”

19. “Kadha dzá nzø bbai” ká ko ka ko bbi ngbaribbai?

¹⁹ Paulo ndingʉe Efeso nǎ Wakristo dhó ná barua kongʉe kpa tsotso bbo ndiro kpa tøni chi Yova dho d’e. Fø shauri ka ndi kó ko tsotso maddi. Anziro ko njae nari bbai, fø lo ka ndi kó ko tsotso ko vʉ longana nyodyu na ko nyǒ ko djé na ná ritsi ma, ko tso ko gba na ná ndrŭ ma na djo. Ri ka ndi cho ko ronga ko di Biblia zø krʉ ddo ró ndiro ko rá anzi bbʉbbʉlo dhi kadha chutso ddá ko dho ko nji ná lo krʉ kana nari na d’e. Ri tilo roho takatifu ka ndi kó ko tsotso bbo ndiro ko é bblo kʉ ná sifa na d’e nari djo. Paulo ndingʉe ná fø lo na ko njínji ró, ri ka ndi kó ko tsotso ko di lonanga vʉ nyodyu na ndiro ko njí ngbà tso gbani Yova dhó ngaddidha na ná lo d’e. Njati ko njiri føro, ri si kaka ko vʉ dz’ djó tɨtɨnga nǎ ro ndirigoti ko di kadha nǎ!