1. U ko u nari ká kʉ ngbá lo?

 YOVA dzá ndrŭ ko kʉ ro, ko churi chu nari kʉ, ke jirie ko ji ndirigoti ke jirieri ko é bblo kʉ ná maisha na. (Ro. 8:35-39) Føri kina ko uri nari kʉ, Biblia nǎ kanuni nǎ ro ko adi faida ba krʉ ddo ró njati ko di njínji ri na ró. (Isa. 48:17, 18) Nde, ko ká ka ko njiri ngbǎ njati ko bani nzá djo ko ddienga ná kpakpalo na ró?

2. Ko ká ka ko bani ngbá kpakpalo na ndirigoti føri ká ka ndi liri ko di ngbá lo dhu ko tso?

² Yova dzá njí dhi ndrŭ krʉ adi bani kpakpalo na. Loroji na, kodhó familia nǎ le ka ndi bʉ ko thí nja kʉ ná chu nǎ. Njaro ko ró kʉ ná dhe ka ndi liri nzɨ ko njinjí bbo Yova dho. Njaro ko ka ko bani chʉ adi ngaba ná lo na. Inga njaro ko nzani kodhó udha djotsina. Fø di ná kpakpalo na ko bani ná saa na ko ka ko di ridhu ko tso: ‘Fø lo ká njini ma ró addudho? Ma ká nji chelo ro maddi? Føri na mana ká kʉ Yova ma ronga lé nzɨ?’ Ni ká mburie ni ro føri bbai b’lo? Njati rie fø ró nzɨ bbari ni thí bʉni. Chi ngʉ tøni Yova dho ná njí dhi bí kʉ ná kpa ma mbungʉe ndima ro føri bbai ddi.​—Zb. 22:1, 2; Hab. 1:2, 3.

3. Zaburi 34:19 nǎ ro ká ko ka ko ba ngbá somo?

³ Azø Zaburi 34:19. Anja i Zaburi nǎ bbo na mana kʉ ná aro kʉ ná lo: (1) Chølo dhi ndrŭ adi bani kpakpalo na. (2) Yova adi ko gøgø kodhó kpakpalo nǎ ro. Nde, Yova ká adi ko gø ngbaribbai? Ddikpa chu kʉ, ke ko tsotso kó ndiro ko é bblo kʉ ná nganjadha na maisha djo ngasini ná i saa na d’e nari. Yova tsoni nari kʉ, ko sie hwè na ndi dho ko njínji nari kana, ro ke nzá d’rari kodhó maisha ka ndi é nga nǎ kpakpalo ro njʉ ri. (Isa. 66:14) Ke ko li kpakpa ko  li ko thí kodhó gosi ná ddo djo, fø saa na kodhó maisha sie ke jirieri ri é nari bbai, ko si di theinga dho. (2 Ko. 4:16-18) Fø ddo ko b’o ná saa na, ke ko tsotso kó ndiro ko njinjí ndi dho krʉ ddo ró d’e.​—Omb. 3:22-24.

4. I lo nǎ ká ko si loti ngbá lo djo?

⁴ Akonja drrdrr ndirigoti i ddo ró njínji nì ndima tøni chi Yova dho ro ná ndrŭ dhó loroji nǎ ro ko ka ko ba ná somo di. Ko si rinja nari bbai, ko ka ko bani nzá djo ko ddinga ná kpakpalo na. Ro, ngbà ko li ko thí Yova djo ró, ke si ko tsotso koko. (Zb. 55:22) I loroji djo ko loti ná saa na, adhuri ni tso: ‘Fø di ná hali nǎ ká ma ka ma njieri ngbǎ? I loroji ká li Yova djo ma ma thí li nari kpakpa ngbaribbai? Madhó maisha nǎ ká ma ka ma njinjí ngbá somo na?’

5. Labani djotsina ká Yakobo bangʉeni ngbá kpakpalo na? (Anja ri chuti ji.)

⁵ Yova dho ngʉ njínji drrdrr ná njí dhi kpa bangʉeni nzá djo ndima ddingʉe nga ná kpakpalo na. Akonja Yakobo dhó loroji. Kedzá baba jangʉeri ke rá dhɨ ne ndima dhó familia nǎ nì ngʉ Yova má ná ke Labani dzá sinzø kana, ndirigoti kedzá baba d’rangʉeri ke dho nari kʉ Yova si ke ronga le bbo. (Mwa. 28:1-4) Yakobo njingʉeri føri nganga bbai. Ke rangʉe Kanaani nǎ ro Labani bba. Fø ke dzá sinzø nzø ngʉe aro, føri ngʉe Lea ma, Raheli na. Yakobo jingʉe re singba Raheli ndirigoti ke ungʉeri tso u ndi njinjí cho saba ledzá baba dho, le ndi kø nari njí. (Mwa. 29:18) Ro, lo nzá njingʉeni Yakobo ngʉ riddi nari bbai ri. Labani bʉngʉe ke thí bʉ ndidzá bbo singba Lea ndi bbʉngʉe ke dho nari na. Labani pongʉeri Raheli si ngʉ Yakobo bbá le yenga ddi goti, njati ke njinjí ki cho saba ro dhé. (Mwa. 29:25-27) Labani nga ngʉe chø Yakobo na ndi ngʉ nji ná lo kana ri. Labani njingʉe nga kʉ chø ná lo Yakobo ró cho 20 kana!​—Mwa. 31:41, 42.

6. Yakobo ká vengʉe nja ngbá kpakpalo tso ki?

⁶ Yakobo vengʉe nja kpakpalo tso maddi. Kedhó familia nǎ ndrŭ ngʉe bí, ro ke ddui nzɨ ngʉ adi rrni ndima kana ri. Kpa dzingʉe ndima dhi djona Yosefu nanga nja ndi é nokpa d’e. Yakobo ddui kana aro kʉ ná kpa, Simeoni ma, Lawi ma na pangʉe do ndima bbá familia djo ndirigoti Yova ró dho djo. Føri kina, Yakobo bbá bbo ke jingʉe ná isɨle Raheli dhengʉe ndima dhi ya pili ngba ndi gø ro. Ndirigoti kpa bba ù chingʉe bbo nari dho ringangʉeni Yakobo tsɨ Misri na nì mai ndi ngʉe ngó ro.​—Mwa. 34:30; 35:16-19; 37:28; 45:9-11, 28.

7. Yova ká dhongʉe ndi u Yakobo tso ngbà nari ke dho ngbaribbai?

⁷ Fø kpakpalo krʉ kana Yakobo ngʉe nì dhé udha na Yova djo ndirigoti kedhó tsodha djo. Føri dho Yova dhongʉeri nari kʉ ndi u ke tso ngbà. Loroji na, nzá mai Labani njingʉeni bblo Yakobo na ro, Yova bbʉngʉe mali bbo ke dho. Føri kina addinga ngbá ngatsi ma Yakobo pongʉe mbai Yova dho ndima ki njungʉe ndidzá dhe ndi ngʉ ddi dhe ná ngba Yosefu na ro nari djo di! Yakobo ma kana kau ngʉe kpakpa Yova na nari lingʉeri ke ve kpakpalo tso ve. (Mwa. 30:43; 32:9, 10; 46:28-30) Njati ko li ko kana kau kpakpa Yova na ró, ko maddi si sisi nzá djo ko ddienga ná kpakpalo djolu.

8. Pi Daudi ká jingʉeri ndi njí ngbá njí?

⁸ Pi Daudi nzá ka ndi njie ndi jingʉe ndi njí Yova dzá njí kana ná njí krʉ ri. Loroji na, Daudi jingʉeri bbo ndi chi hekalu  ndidzá Mungu dho. Ke d’rangʉe ndi ngʉ riji ndi njiri fø nari nabi Natani dho. Natani pongʉeri ɨ ke dho: “Anji ni thí nǎ kʉ ná lo krʉ, dhonalo bbʉbbʉ Mungu kʉ ni na nì.” (1 Ny. 17:1, 2) Ko ka ko ddinga ngbaribbai ma fø lo lingʉe Daudi kpakpa nari djo. Njaro ke ngangʉe ngbaribbai ma ndi ka ndi njí fø bbo njí nari kpedha tso thei.

9. Daudi ká bangʉe bʉ ka ndi bʉ le thí ná ngbá imba?

⁹ Nì mai ri kʉ føro, karrnga goti Yova dhó nabi ki ngʉngʉe Daudi dhi ngana bʉ ka ndi bʉ le thí ná imba na. “Fø kuna,” Yova d’rangʉeri Natani dho Daudi nga kʉ hekalu ka ndi chi ná ke ri, ro ri ke ddui kana ddike si chi. (1 Ny. 17:3, 4, 11, 12) Daudi ká njingʉeri ngbǎ fø imba ndi rr ná saa na? Ke øngʉe ndi pɨngʉe ná lo thika ø. Ke ngangʉe mbø ma, hekalu chidha dhi nja ritsi ma na tso njudha ndiro ndidhi dduna Sulemani si na fø njínji d’e.​—1 Ny. 29:1-5.

10. Daudi ronga ká Yova lengʉe ngbaribbai?

¹⁰ Yova d’rangʉeri ke nzá ka ndi chi hekalu ri ná saa na thei, ke njingʉe ddikpa koddo Daudi na. Yova tsongʉeni nari kʉ Daudi nǎ gø kana ddikpa ke si pinyo theinga dho. (2 Sa. 7:16) Ø dz’ djó, cho elfu ddi kana Daudi sie hwè na bbo ke si richu Pi Yesu singʉe ndi nǎ gø nǎ ro nari dho! Fø lo ngaddi kodho nari kʉ, njati rie nzá ma ko nji ko e ji ko njí Yova dho ná lo krʉ ri ró, kodhi Mungu ka ndi bbʉ nzá djo ko ddienga ná bblo pli kʉ ná nja ritsi ngbà dhé ko dho.

11. Karne ya kwanza nǎ Wakristo ronga ká lengʉeni ngbaribbai nzá mai Pidhinga singʉe kpa ngʉ riddi ná saa na ro? (Matendo 6:7)

¹¹ Karne ya kwanza nǎ Wakristo bangʉeni nzá djo ndima ddingʉe nga ná kpakpalo na. Loroji na, kpa ngʉ Mungu dhó Pidhinga si si nari b’o bbo ù na, ro kpa nzá chungʉe ngbá saa na ma ri ka ndi si nari ri. (Mdo. 1:6, 7) Nde, kpa ká njingʉeri ngbǎ? Kpa ngʉ lod’radha dhi njínji kpakpanga na. Hwè lo-i d’rani bbo ndirigoti bí kʉ ná ngalu nari kpa njangʉe ná saa na kpa ungʉeri u nari kʉ Yova ndima nji ná kpakpanga ronga lé nì.​—Azø Matendo 6:7.

12. Karne ya kwanza nǎ Wakristo ká njingʉeri ngbǎ ù chingʉe ná saa na?

¹² Ddikpa saa na ù chingʉe bbo “dz’ djolu gble.” (Mdo. 11:28) Karne ya kwanza nǎ Wakristo ro ma fø ù chingʉe ddi. Addinga ngbá ngatsi ma fø bbo ù nzangʉe kpa nari djo di. Gø dhi ndrŭ nanga ngbaribbai ma ndima ka ndi bae nyo ndima dhó familia dho nari ka ndi d’oe bbo. Nde, bbo jingʉeri ndima d’ralo ná jadda kpa ronga ká fø lo ka ndi løe ngbaribbai? Njaro kpa ka ndima ddieri ndima b’o nga ro vi kpø fø ù sini nanga djo. Wakristo vungʉe ndima vu fø hali na. Kpa rangʉe anzi ngbà ka ndima dho ná ngatsi ndima lod’ra nari na ndirigoti kpa bbʉngʉe ndima dhó ritsi ro Yudea nǎ Wakristo dho.​—Mdo. 11:29, 30.

13. Yova ká lengʉe Wakristo ronga ngbaribbai ù chingʉe ná saa na?

¹³ Wakristo ronga ká lengʉeni ngbaribbai ù chingʉe ná saa na? Ndima dhó lo u ná ritsi bangʉe ná ndrŭ njangʉe Yova dhó le tsotsokodha nja. (Mt. 6:31-33) Kpa kana nga ka ndi ée chøchø ndi ngʉngʉe ndima tsotso kongʉe ná fø Wakristo na ro. Ndirigoti ndima dhó risti bbʉngʉe ná ndrŭ ma, nja chu nǎ kongʉe ngatsotso ná ndrŭ ma na bangʉe bbʉ le ritsi bbʉ nari nǎ ro adi si ná hwè. (Mdo. 20:35) Yova lengʉe kpa ronga le kpa vungʉe ndima fø ø hali na nari dho.

14. Barnaba ma, mutume Paulo ma na ró ká ngbá lo njingʉeni, ndirigoti ri ká bbʉngʉe ngbá matokeo? (Matendo 14:21, 22)

 ¹⁴ Bí ina ndrŭ ngʉ adi karne ya kwanza nǎ Wakristo nzanza, ro nja saa na føri ngʉ adi si nzá djo kpa ddienga ná saa na. Addinga Barnaba ma, mutume Paulo ma na ró njingʉeni Listra nǎ kpa ngʉ lod’ra ná saa na ná lo djo. Ya kwanza ndrŭ kongʉe kpa bblo ndirigoti ndrŭ rrngʉe kpadhó lo bblo. Ro, luti wapinzani “chòngʉe birobiro kʉ ná ndrŭ” ndirigoti fø ndrŭ kana nja ndrŭ bungʉe Paulo dju na chøchø ke dhedhe ná ngatsi. (Mdo. 14:19) Ro, Barnaba ma, Paulo ma na rangʉe anzi lo ndima d’ra nja kʉ ná ngalu nari na. Føri ká bbʉngʉe ngbá matokeo? Kpa njingʉe “bi kʉ ná ndrŭ ndima ngʉ wanafunzi” ndirigoti kpa po ná lo ma, kpadhó loroji ma na lingʉe kpa lai Wakristo kpakpa. (Azø Matendo 14:21, 22.) Ngbà mai ndrŭ nzangʉe Barnaba ma, Paulo ma na ro kpa nzá d’ingʉe ji ro ri, ná føri nǎ ro bí kʉ ná ndrŭ bangʉe faida. Njati ko ma d’i ji nzá ddi Yova bbʉ ko njí ná njí ró ro ró, ko si kʉ ledha ba.

15. Le-djo A. H. Macmillan dhó loroji nǎ ro ká ni ba ngbá somo?

¹⁵ Cho 1914 djó ro Yova dzá ndrŭ adi nja kʉ ná lo si njini nari b’o. Anja Le-djo A. H. Macmillan dhó loroji. Fø saa na nja kpa ma ngʉ riddi ddi nari bbai, Le-djo Macmillan ngʉ riddi karrnga goti ndi si ra rà na. Bi 9 nǎ 1914 na ke bbʉngʉe ná hotuba nǎ ke pongʉeri: “Ri njani i ri kʉ madhó hotuba dzá ya mwisho ri ma bbʉ nari bbai.” Bbʉbbʉ dhé, føri nga ngʉe kedhó ya mwisho hotuba ri. Luti Le-djo Macmillan ndingʉeri: “Njaro ko kana nja ndrŭ dangʉe lo nji ndima ddingʉeri ko ka ko rae thei ra na nari na.” Ke ndringʉeri ki: “Ringani ko é Bboke dzá njí kana ko nji ná ritsi na bí.” Le-djo Macmillan ngʉ Bboke dzá njínji klø na. Ke ngʉ lod’ra bidii na. Ke bangʉe pendeleo nja ndi li prizo na le sʉngʉe nga ndima kʉ ngbá nga laidjo maddi nari djó ná le-djoi kpakpa d’e. Ndirigoti nì mai ndi ngʉe ngó ro ke ngʉ adi si njudha dhi ngana krʉ ddo ró. Le-djo Macmillan ká bangʉe faida ngbaribbai Yova dzá njí ndi ngʉ nji bidii na nari nǎ ro, nì mai ke ngʉ ra na ndi si ra nari b’o ro? Chøchø ndidzá dhe njí 1966 na ke ndingʉeri: “Madhó udha kʉ kpakpa anziro nga djolu.” Føri kʉ bblo kʉ ná loroji ko dho njati rie bícha ma ko ve ngatso nzá ko ddie ná ngatsi ri ró!​—Ebr. 13:7.

16. Herbert Jennings ma, ndibbá le ma na ká bangʉeni nzá djo ndima ddingʉe nga ná ngbá kpakpalo na? (Yakobo 4:14)

¹⁶ Yova dzá bí kʉ ná ndrŭ bani nzá djo ndima ddinga ná afya dhi kpakpalo na. Loroji na, Le-djo Herbert Jennings b dhó maisha djo tilo ná lo nǎ ke d’ra ngbaribbai ma ndi ma, ndibbá le ma na bangʉe hwè misionere dhi njí ndima ngʉ nji Ghana nǎ ná saa na nari. Ro, fø saa na ke ro le d’ingʉe ddikpa dhe utso. Yakobo 4:14 djo ndi tilo ro le djo Jennings nzingʉe ndima bani na ná fø kpakpalo nzá djo ndima ddingʉe nga ná “‘bbʉ dyinga.’” (Azø.) Ke ndingʉeri: “Ringangʉeni ko é bblo nganjadha na, føri dzá lo dho ko vʉngʉeri ko rára Ghana nǎ ro ndirigoti ko bbá kodhó bbakau ndiro ko ngʉ [matunzo dho] Canada na d’e.” Yova kongʉe Le-djo Jennings ma, ndibbá le ma na tsotso kpa ra anzi chi ndima tøni Yova  dho ro, nì mai ndima ngʉ bani kpakpalo na ro.

17. Le-djo Jennings dhó loroji nǎ ro ká ke lai Wakritso bangʉe faida ngbaribbai?

¹⁷ Le-djo Jennings dhó maisha djo tilo ná lo løngʉe nja ndrŭ ronga bbo. Ddikpa le-ve ndingʉeri: “Fø ke dhó maisha djo tilo ná lo má zø nari lø ma thí ronga nari bbai nzá d’i lo d’erie ma thí ronga ro lø ri. . . . Ngbaribbai ma Le-djo Jennings bbangʉe ndi dhona bbʉni ná njí nja ndi ba matunzo d’e nari kongʉe ma tsotso ma é bblo kʉ ná nganjadha na madhó hali djo.” Føri bbai, ddikpa le-djo ndingʉeri: “B’lo ma nji muzee dzá njí cho 10 nari goti, ma bbangʉe fø njí bba ma djŏ nǎ ngʉe ná dhe dzá lo dho. Ma ngʉ adi ma mbu si djolu lo si ri ndirigoti bʉ thí bʉni nari bbai ma di ndrŭ dhó maisha djo tilo ná lo zø ná saa na. . . . Ro, Le-djo Jennings vengʉe ngatso nari lingʉe ma kpakpa.” Føri ngano ko dho nari kʉ njati ko bani nzá djo ko ddinga ná kpakpalo na ndirigoti ko ve ri tso ve ró, ko ka ko li nja ndrŭ kpakpa. Njati kodhó maisha ø ndi thí njonjo ko e riddi nari ró ro ró, ri ka ndi kaka ko é bblo kʉ ná loroji udha kana ndirigoti ngatsovedha kana.​—1 Pe. 5:9.

18. Ji djó ko rinja nari bbai, ni ká ba ngbá somo Nigeria nǎ ddikpa mujane dhó loroji nǎ ro?

¹⁸ Nya ndi nanga nyá ná dhe Coronavirus løe Yova dzá bí kʉ ná ndrŭ ronga. Loroji na, Nigeria nǎ ddikpa mujane dhó nyo ma, mbø ma na mangʉe sese. Ddikpa cha bbʉtso ledzá singba ngba dhungʉeri le tso kodhó muchele gʉ ma kopo ddikpa, nde ri sini ró ká ko si addu nyo. Kodhi vena ngʉngʉe logoti nari kʉ, mbø ma inga nyo ma na ki ro nga kʉ kodhó ri, ro ringani ko dyø Sarefati nǎ mujane dhó loroji. Fø isɨle ma, ndidzá singba ngba ma na ringʉe ndima dhó gʉ mangʉe ná nyo krʉ nari goti kpa lingʉe ndima thí Yova djo. (1 Fa. 17:8-16) Dyina ndima si nyo ná  nyo djo ndima ngaddi nari njí, kpa lai Wakristo mbangʉe nyo kpa dho kitunga nǎ. Fø kitunga nǎ ngʉe yenga aro djolu kpa ka ndima nyó ná nyo. Le-ve pori nari kʉ, ma nzá chu ngbá ngatsi ma Yova ngʉ ndi thí li madzá singba ngba dho ma ngʉ d’ra ná fø lo djo nari ro ri. Bbʉbbʉ dhé, njati ko li ko thí Yova djo ngbà ró nzá djo ko ddienga ná kpakpalo ka ndi liri ko kana nga ngʉ chøchø ke na.​—1 Pe. 5:6, 7.

19. Aleksey Yershov ká vengʉe ngbá nzadha tso?

¹⁹ B’lo da ná cho nǎ bí kʉ ná ko djoi ma, ko vei ma na vengʉe nzá djo ndima ddienga ná nzadha tso. Addinga Russie nǎ Le-djo Aleksey Yershov djo. Le-djo Yershov bangʉe batiso 1994 na ná saa na, fø bbagʉ ngʉe ná Yova dzá ndrŭ ngʉe uhuru ro na nì. Ro, luti Russie nǎ lo thí øngʉeni ø. Cho 2020 na Le-djo Yershov dhó dza na ndrŭ tsungʉe kpakpanga na ndirigoti ndrŭ nengʉe ri nanga ndirigoti ndrŭ dhʉngʉe kedhó mali ró bínga dhʉ. B’lo bi da bí nari goti, guvernema d’ingʉe lo ke djo ndirigoti kpa pongʉeri ke kʉ che pli kʉ ná lo nji ná ke. Ndiro ndima d’ilo gʉ che pli ke djo d’e, kpa dyʉngʉe ndima dhó lo Biblia jifunza nari ngʉ ndi nzǐ ná ke njingʉe ná video ro. Fø ke jifunza ngʉe Biblia cho ddi djolu. Føri ngʉe che pli kʉ ná lo.

20. Le-djo Yershov ká lingʉe ndima kana kau kpakpa pli Yova na ngbaribbai?

²⁰ Le-djo Yershov vengʉe nzadha tso nari nǎ ro ká bblo lo ro sie ddi? Ddio. Ke ma kana kau ngʉngʉe kpakpa pli Yova na. Ke pori: “Ma ma, mabbá le ma na ko adi sala nji bí ina ddinga. Ma rae ri utso d’i nari kʉ ri kʉ Yova dhó le tsotsokodha chulu dhé ma vee fø kpakpalo tso ri.” Ke pori ki ɨ: “Ddiro ma Biblia jifunza nari koe ma tsotso nzɨ ma thí bʉni. Ma adi ngaddi chi tøngʉeni drrdrr ná kpa dhó loroji djo. Ko le jotso ko ro le di ndirigoti le thí le li Yova djo nari kʉ bbo na mana kʉ ná lo nari dhǒ ná loroji kʉ bí Biblia nǎ.”

21. I lo nǎ ká ko jifunza ngbá lo?

²¹ I lo nǎ ká ko jifunza ngbá lo? Nja saa na ko adi bani nzá djo ko ddinga ná kpakpalo na. Nì mai ri kʉ føro, krʉ ddo ró Yova adi ndidzá njí dhi kpa tsotso koko ngbà kpa li ndima thí ndi djo ró. Kodhó lo djǒ dyʉ ndi ró ná andiko pori nari bbai, “chølo dhi ke ró kpakpalo e bí, ro Yova adi ke gøgø ri krʉ nǎ ro.” (Zb. 34:19) Akodi ko thí li Yova dhó le tsotsokodha dhi kpakpanga djo, ro nga kodhó kpakpalo djo ri. Mutume Paulo bbai ko ka ko pori: “Krʉ kʉ ná lo dho ma kʉ klø na kpakpanga bbʉ ma dho ná ke chulu.”​—Flp. 4:13.