DAUDI dhó bbasødda kana ngʉe nga kʉ Waisraeli ná kpa maddi loroji na, Amoni nǎ ke Zeleki ma, Uria Mhiti ma, Moabu nǎ ke Ithma ma na. a (1 Ny. 11:39, 41, 46) Føri kina Daudi dhó bbasødda kana ngʉe, “Kereti nǎ kpa ma, Peleti nǎ kpa ma, Wagati ma na.” (2 Sa. 15:18) Kereti nǎ kpa ma, Peleti nǎ kpa ma na kana nga ngʉe chøchø Wafilisti na. (Eze. 25:16) Wagati ngʉe Gati nǎ Wafilisti.​—Yos. 13:2, 3; 1 Sa. 6:17, 18.

Daudi ká tsungʉe nga kʉ Waisraeli ná kpa ndidhó bbasødda kana addudho? Ke chungʉeri chu nari kʉ, kpa tøni chi ndi dho ndirigoti bbo pli Yova dho. Loroji na, Kereti nǎ kpa ma, Peleti nǎ kpa ma na djo, The New Interpreter’s Dictionary of the Bible pori: “Kpa tøngʉeni Daudi dho chi kpakpa bbo tso ngʉ o kedhó maisha nǎ ná saa na.” Ká ngbaribbai? “Israeli nǎ kpetsi kpa krʉ bbangʉe Daudi bba nja ndima ra tsatsangʉe ná ke Sheba ulu ná saa,” Kereti nǎ kpa ma, Peleti nǎ kpa ma na tøngʉeni chi Daudi dho ndirigoti kpa kongʉe ke tsotso nja ndima d’ø tsatsangʉe ná fø kpa tso d’e. (2 Sa. 20:1, 2, 7) Ddikpa saa na, Pi Daudi dhi dduna Adonia mbungʉeri ndi dhʉ pidhinga ro, Kereti nǎ kpa ma, Peleti nǎ kpa ma na tøngʉeni chi dhé Daudi dho ndirigoti kpa kongʉe Daudi tsotso ke li Sulemani pi d’e, dhonalo ke i Yova vʉngʉe ndi ngʉ pi.​—1 Fa. 1:24-27, 38, 39.

Chi ngʉ tøni Daudi dho ná ddikpa ke ngʉe Itai Mugati. Itai ma ndi una 600 kʉ ná kpa ma na kongʉe Pi Daudi tsotso Daudi dhi dduna Absalomu tsangʉe ke ro ndirigoti ke lingʉeri Israeli nǎ kpetsi kpa tsá pi ro ná saa na. Itai ngʉe d’i ngø nǎ ke nari dho ya kwanza Daudi pongʉeri ke dho, nzɨ ke ra lɨ tso ro. Ro, Itai pongʉeri: “Rie nì Yova kʉ shi ndirigoti rie nì madzá bboke pi kʉ shi ri ró, rié ngbaga ma madzá bboke pi sie ri ró, njati ke dhedhe inga ke é shi ma ró, nidzá njí dhi ke sie ndi nga nǎ!”​—2 Sa. 15:6, 18-21.

Nì mai Kereti nǎ kpa ma, Peleti nǎ kpa ma, Wagiti ma na ngʉe d’i ngø nǎ kpa ro, kpa chungʉeri chu nari kʉ, Yova kʉ bbʉbbʉ Mungu ndirigoti Daudi kʉ Yova dri ché na ná ke. Bbʉbbʉ dhé, Daudi ngʉe hwè na bbo chi tøni ná fø kpetsi kpa na ndima kʉ nari dho.