BI KɄ ná nrŭ churie ri nari kʉ Mizri nǎ nrŭ ngʉ adi ngandi kolo djo. Ugiriki nǎ nrŭ ma, Roma nǎ nrŭ ma na ngʉ adi ngandi kolo djo. * Ro bí kʉ ná nrŭ nzá churie bbú le ngʉ adi thɨ kolo na nari ro ri.

Cho da 2 500 b’lo nabi Isaya ndingʉeri, “Etiopia nǎ dda dhi ngø nǎ di ná kpa” chongʉe “chochokpa dda djolu, kolo dhi bbú na.” Føri goti nabi Yeremia ngʉ loti Babiloni dhi bba Wamedi ndirigoti Waajemi si sa nari djo ná saa na, ke pongʉeri kpa si Babiloni nǎ “kolo dhi bbú” sasa ndiro nzɨ kpa nyinga ró.​—Isa. 18:1, 2; Yer. 51:32.

Drdr ritsi djo adi rine ndima chulo ná kpa ba nari kʉ, kolo na le ngʉ bbú thɨ Biblia le ngʉ ndi ná saa na. Fø lo nzá ka ndi ke Biblia jifunzi ná kpa nanga ro ri dhonalo Biblia dho Mungu dda chutso. (2 Ti. 3:16) Kpa ká bangʉe ngba lo ki? Drdr ritsi djo adi rine ndima chu lo ná kpa ba ngbaribbai ma le ngʉ kolo dhi fø bbú thɨ Mizri nǎ nari.

Mizri nǎ kabbuli djó ndirigoti dza ikpa ró le ndi nalo ngbaribbai ma nrŭ ngʉ adi kolo ba ndirigoti ngbaribbai ma kpa ngʉ adi bbú thɨ ri na nari dho. Kpetsikpa ngʉ adi kolo krr ndirigoti kpa ngʉ adi ritso nju ddikpa nga na. Kolo ngae kpere ri. Føri dzá lodho njati le chi ritso ddikpa ngana ró, ri adi ngʉ kpakpa. Buku A Companion to Ancient Egypt ridho naribbai kolo dhi bbú dhó danga ka ndi sie kpø 17 m ndirigoti fø bbú tsotso adi kó nja ndi bbi bblo dda djolu d’e ná tsu ka ndi tsu ri na 10 inga 12.

Mizri nǎ ringʉe dhʉdhʉ le ba kolo dhonalo ri ngʉ adi dhi Nile dhi dda nǎ. Ndirigoti kolo dhi bbú le thɨ nari ma ngʉe dhʉdhʉ ddi. Ngba mai le ngangʉe bbú thɨdha tso mbawa na ro, bbè pɨ ná kpa ma, zǎ pɨ ná kpa ma na ngʉ adi njínji kolo na le thɨ ná bbú na ddi.

Cho bí kana nrŭ ngʉ adi njínji kolo na le thɨ ná bbú na. Plutarch Ugiriki nǎ ngandi ná ddikpa ke dingʉe mitume dhó saa na. Ke pongʉeri fø saa na ma nja kʉ ná nrŭ ngʉ njínji ddi kolo na le thɨ na bbú na.