1. Yova ká ddingʉe ko iso ka ndi pɨ ná ngbá somo Abrahamu dho?

 RI NGɄE nzá nga ro Abrahamu ka ndi vie ná lo. Ddikpa malaika chulu, Mungu pongʉeri Abrahamu dho ndi si Sodoma ma, Gomora ma na sasa. Chi ngʉ tøni ná fø kpetsike djonga fø lo ngbʉngʉe bbo. Ke dhungʉeri ɨ: “Ni ká ka ni sa chølo nji ná ndrŭ ma, chelo nji ná ndrŭ ma na krʉ? . . . Dz’ lu djó lod’i ná ke ká ka ndi njí chølo nzá?” Ngatsovedha na Yova ddingʉe bbo na mana kʉ ná somo ndidzá ji dhi kau dho nari nǎ ro ko ka ko ba faida ndirigoti ri ka ndi pɨ ko krʉ iso: Mungu nzɨ sa chø kʉ ná ndrŭ ro ri.​—Mwa. 18:23-33

2. Rie lo Yova d’i ndrŭ djo ró ke adi chølo ma, zølo ma na dhé dho ná føri ka ko chu ngbaribbai?

² Rie lo Yova d’i ndrŭ djo ró ke adi chølo ma, zølo ma na dhé dho ná føri ká ko chu ngbaribbai? Følo ko chu dho nari kʉ “Yova adi ndrŭ thí nanga njanja.” (1 Sa. 16:7) Bbʉbbʉ dhé, ke chu “ndrŭ krʉ thí nǎ” kʉ ná lo chu. (1 Fa. 8:39; 1 Ny. 28:9) Føri kʉ ke ka ndi ké ko nanga ná bbʉbbʉlo. Yova dhó lod’idha ro nzá ko ka ko famu ri. Mutume Paulo pongʉe i lo Yova Mungu djo: “Kedhó lod’idha nanga ro nzá le ka le ne ri!”​—Ro. 11:33.

3-4. Nja saa na ká ko ka ko dhu ngbá lo ko tso, ndirigoti i lo nǎ ká ko si loti ngbá lo djo? (Yohana 5:28, 29)

³ Njaro ko ka ko di ngadhu ko tso Abrahamu dhungʉe nga nari bbai. Njaro ko ka ko dhuri: ‘Ri ká ka ndi ka ka Yova chengʉe ná ndrŭ ki ngʉ shi vi? Loroji na, Sodoma ma, Gomora ma na nǎ ke chengʉe ná ndrŭ. “Nga kʉ chø ná ndrŭ. . . si ga ná saa na” ká Yova chengʉe ná fø ndrŭ kana nja kpa ro ma si ga ddi?’​—Mdo. 24:15.

⁴ Akongʉ gadha djo ko churie ná lo djolu di. Ø le tue lo nanga ko dho “shinga dhi gadha” ma, “lod’idha  dhi gadha” ma na djo. a (Azø Yohana 5:28, 29.) Ø ko chue ná fø lo liri ko ø kodhó nja kʉ ná lo thika, fø lo djo i ko si loti i lo nǎ ndirigoti gosi ná lo nǎ. Yova dhó chø kʉ ná lod’idha djo ko si nzá ko chu ná lo ma, chu ko chu ná lo ma na nja.

NZÁ KO CHU NÁ LO

5. Anziro ká kodhó vichapo ngʉ adi ngbá lo po Sodoma ma, Gomora ma na nǎ Yova chengʉe ná ndrŭ djo?

⁵ Anziro, kodhó vichapo tingʉe lo nga kʉ chølo dhi ri ná ndrŭ ró Yova njingʉe ná lo djo. Anziro ko pongʉeri Sodoma ma, Gomora ma na nǎ Yova chengʉe ná ndrŭ ro nzɨ si ga ri. B’lo ko zø Biblia li ko li ko thí ro ndirigoti b’lo ko nji sala fø lo djo nari goti ko ra ri famu ko nzá ka ko pori fø ri. Ká addudho?

6. Yova ká d’ingʉe lo nga kʉ chølo dhi ri ná ndrŭ djo ngbá saa djo, ndirigoti nzá ko chu fø ndrŭ djo nari ká kʉ ngbá lo?

⁶ Addinga i lo djo. Biblia nǎ Yova d’ingʉe lo nga kʉ chølo dhi ri ná ndrŭ djo ná loroji kʉ bí. Loroji na, Garika dhi saa djo Yova sangʉe ndrŭ krʉ, ro ke gøngʉe Noa ma, ndibbá dza nǎ ndrŭ na dhé. Waisraeli chulu Yova sangʉe Koddo koni ná Ngø nǎ ngʉ di ná saba kʉ ná ndrŭ tsɨ ndirigoti ddikpa malaika chulu ddikpa cha kuna Yova chengʉe Ashuru nǎ bbasødda 185 000. (Mwa. 7:23; Kum. 7:1-3; Isa. 37:36, 37) Biblia ká pori nari kʉ Yova vʉngʉeri fø kpa ddi ddiro cheni theinga dho ndirigoti kpa ki ro nzɨ si ga ri? Ri nga kʉ føri. Ká addudho ko ripo fø?

7. Garika inga Kanaani na chengʉeni ná ndrŭ djo ko chu nzá nari ká kʉ ngbá lo? (Anja ji.)

⁷ Yova ká d’ingʉe lo fø ndrŭ djo ddi ddiro ngbaribbai ma nari ro nzá ko churi; che chengʉeni ná fø ndrŭ ká bangʉe Yova djo ndima lo chu ná chu ro ddi ma inga ndima leni le ná føri ro ma nzá ddi ko chu ri. Garika dhi saa na njingʉeni ná lo djo Biblia ripo, Noa ngʉe “chølo ngʉ adi d’ra ná ke.” (2 Pe. 2:5) Ro, Biblia nzá pori safina Noa ngʉ chi ná saa djo, ke mbungʉeri ndi d’ralo dz’ lu djó ndrŭ dho ndiro nzɨ ndrŭ si sadha ba ró ri. Føri bbai, Kanaani nǎ chengʉeni ná chelo dhi ndrŭ ká bangʉe Yova djo ndima lo chu ná chu ro ngbà ndirigoti ndima ø ndima dhó nyi thika nari ro nzá ko chu ri.

8. Nzá ko chu Sodoma ma, Gomora ma na nǎ ndrŭ djo nari ká kʉ ngbá lo?

⁸ Ko ká ka ko po ngbá lo Sodoma ma, Gomora ma na nǎ ndrŭ djo? Chølo dhi ke Loti ngʉ di fø ndrŭ kana. Nde, ko ká chu Loti d’rangʉe lo fø ndrŭ krʉ dho nari chu? Nzá. Bbʉbbʉ dhe, ndrŭ ngʉ chelo nji, ro ndrŭ ká chungʉe bblo lo ma kana njonjonga chelo na ddi? Anonga nari kʉ, birobiro kʉ ná kpetsi kpa singʉe ndima ddo Loti bba singʉe ná lʉ na. Biblia pori, fø kpa kana ngʉe “jadda kpa ma, ngó kpa ma na krʉ.” (Mwa. 19:4; 2 Pe. 2:7) Nde, ko ká churi nari kʉ zølo dhi Mungu Yova d’ingʉe lo fø kpa djo kpa cheni ndirigoti nzɨ kpa si ga? Ko nzá ka ko pori fø ri. Yova pongʉeri Abrahamu dho chølo dhi ndrŭ ro nzá si kumi maddi fø bba ri. (Mwa. 18:32) Bbʉbbʉ dhé, kpa ngʉe chelo dhi ndrŭ ná føri dzá lo dho Yova ngʉe haki na ndi sa kpa fø lo djó. Ko ká ka ko pori nari kʉ, fø kpa kana ddikpa ke ro ma nzɨ ddi si ga “nga kʉ chølo dhi ri ná ndrŭ . . . si ga” ná saa na ri? Ko nzá chu fø lo dzá bbʉbbʉnga ro ri!

9. Sulemani djo ko chu nzá nari ká kʉ ngbá lo?

⁹ Nja chu nǎ ko rizø Biblia nǎ nari kʉ,  nì ngʉ tøni chi ná ndrŭ ma ka ndima ngʉ ddi nzɨ tøni chi ná ndrŭ. Fø loroji kana ddikpa ri ro kʉ Pi Sulemani. Ke chungʉe Yova ndirigoti ke chungʉe ngbaribbai ma ndi ka ndi bbʉe madha Yova dho nari chu. Føri dzá lo dho Yova lengʉe ke ronga bbo, nì mai ringʉe fø ro luti ke ngangʉe kali dhi miungu madha tso. Føri dho Yova nanga kangʉeni bbo ndirigoti føri lingʉeri Waisraeli nzani cho bí kana Sulemani njingʉe ná chenga djotsina. Bbʉbbʉ dhé, Biblia pori Sulemani ma le “d’øngʉe ndi bbui na,” føri i kʉ chi ngʉ tøni ná ke Pi Daudi mai. (1 Fa. 11:5-9, 43; 2 Fa. 23:13) Nde, ke ma le d’øngʉe ndi bbui ma na ná føri na mana ká kʉ ke si gaga? Biblia nzá pori føri. Føro mai, nja ndrŭ ka ndima pori, “dhedhe ná le kloni klo ndidhó chenga nǎ ro.” (Ro. 6:7) Nì mai ri kʉ føro, ri nga kʉ dhedhe ná ndrŭ krʉ i si gaga ri, dhonalo ri nga kʉ ddikpa le dhedhe nari dho i le kʉ haki na ndi si gaga ri. Gadha kʉ ji dhi Mungu dhó ro si ná kado. Ndirigoti ke adi fø kado bbʉ ji ndi ji ndima njínji ndi dho theinga dho ná ndrŭ dho. (Yob. 14:13, 14; Yoh. 6:44) Nde, Sulemani ká si fø kado ba ddi? Ko nzá chu fø lo ro ri, Yova dhé chu ri. Chu ko chu nari kʉ, Yova si chø kʉ ná lo nji.

CHU KO CHU NÁ LO

10. Ndrŭ ndi che nari dho ká Yova adi ndi mbu ngbaribbai? (Ezekieli 33:11) (Anja ji maddi.)

¹⁰ Azø Ezekieli 33:11. Rie lo Yova d’i ndrŭ djo ró, Yova adi ngbaribbai ma ndi ndi mbu nari d’rad’ra ko dho. Roho ddangʉe chutso ndi dho ro mutume Petro tingʉe lo nabi Ezekieli ndingʉe ná lo djo ro ke pongʉeri nari kʉ, “Yova . . . nzɨ adi riji ndi sa ddikpa le ro ma ddi ri.” (2 Pe. 3:9) Fø lo adi ko iso pɨpɨ dho ná lo ko churi nari kʉ, Yova nzá ka ndi sa ddikpa le ro theinga dho ri njati ndi é bblo kʉ ná sababu na nga ndi njiri fø ró ri. Ke e zølo na bbo ndirigoti ke adi zølo dhǒ ngbà ndi ka ndi dhǒ ri dho ná ndrŭ krʉ dho.

11. Nzɨ si ga nari ká kʉ ie ma ndirigoti føri ká ko chu ngbaribbai?

¹¹ Ko ká chu ngbà lo nzɨ si ga ná ndrŭ djo? Biblia tilo fø di ná loroji djo sese. b Yesu pongʉeri nari kʉ, Yuda Iskariote nzɨ si ga ri. (Mk. 14:21; Anja Yohana 17:12.) Yuda tangʉeni ndá Yova ma, Ndidhi Dduna ma na dho. (Anja Marko 3:29) Fori bbai, Yesu pongʉeri ndidhó lo ngʉ gʉ ná dini djó nja bbobbonga ro nzɨ si ga ri. (Mt. 23:33) Føri kina, mutume Paulo pongʉeri nzá leni ná tsatsa udha ró ná ndrŭ ro nzɨ si ga ri.​—Ebr. 6:4-8; 10:29.

12. Ko ká chu ngbá lo Yova dhó zølo djo? Abbʉ loroji.

¹² Ko ká chu ngbá lo Yova dhó zølo djo? Yova “nzá jiri ndi sa ddikpa le ro maddi ri” nari ká ke dhongʉe ngbaribbai? Akonja bbobbo chenga njingʉe ná nja kpa dho ke dhongʉe zølo ná chu ro di. Pi Daudi njingʉe bbobbo chenga bí. Loroji na, ke njingʉe uzinifu ndirigoti ke hwingʉe ndrŭ. Bbʉbbʉ dhé, Daudi lengʉeni nari goti Yova njingʉe ke zø nji. (2 Sa. 12:1-13) Pi Manase njingʉe che kʉ ná lo bí ndidhó maisha nǎ. Ngbà mai ke njingʉe fø bbobbo chenga ro, ke lengʉeni ná saa na Yova dhongʉe ndidhó bbò zølo ke dho ndirigoti ke njingʉe ke zø nji. (2 Ny. 33:9-16) Fø lo ri dhǒ nari kʉ, Yova adi zølo dhǒ njati ndi nja fø ndi rinji dho  ná sababu ro ngbà ró. Ke si kʉ fø di ná ndrŭ gaga kpa famungʉe ndima nji ná bbobbo chenga ndirigoti kpa lengʉeni le nari dho.

13. (a) Yova ká njingʉe Ninawi nǎ ndrŭ zø addudho? (b) Ndirigoti luti ká Yesu pongʉe ngbá lo Ninawi nǎ ndrŭ djo?

¹³ Ko chulo Ninawi nǎ ndrŭ dho Yova dhongʉe ná zølo djo maddi. Mungu pongʉeri Yona dho: “Kpadhó chelo si kpø madhi ngana.” Ro, le kpa lengʉeni ná saa na, Yova njingʉe kpa zø ji ndi nanga jini ro. Yova dhó zølo ngʉe bbo Yona dhó zølo djolu. Yona nanga kangʉeni bbo ndirigoti Mungu nongʉe ringa ke dho nari kʉ, Ninawi nǎ ndrŭ “nzá chu chelo ma kana njonjonga ro bblo lo na ri.” (Yon. 1:1, 2; 3:10; 4:9-11) Luti, Yesu njingʉe njí fø loroji na nja ndi ddi na longa Yova dhó chølo ma, kedhó zølo ma na djo d’e. Yesu pongʉeri Ninawi nǎ le lengʉeni ná ndrŭ ka ndima sie “gaga lod’idha dhi ddo dyi na.”​—Mt. 12:41.

14. “Lod’idha dhi gadha” na mana ká sie addu Ninawi nǎ ndrŭ dho?

¹⁴ Ro, le ripo Ninawi nǎ ndrŭ si “gaga lod’idha dhi ddo dyi na” ná føri na mana ká kʉ addu? Yesu pongʉeri gosi ná saa na “lod’idha dhi gadha” sie nì. (Yoh. 5:29) Kedhó fø lo ngʉ ridho nari kʉ, cho elfu ddi ke si pinyo nari kana “chølo dhi ndrŭ ma, nga kʉ chølo dhi ri ná ndrŭ” ma na si gaga. (Mdo. 24:15) Nga kʉ chølo dhi ri ná ndrŭ si ga “lod’idha dhi gadha dho.” Følo na mana kʉ, fø ndrŭ si ga nari goti Yova ma, Yesu ma na si kpa ká ngarr nì ndirigoti kpa ká njínji nì ndima dho le ddi ná lo na nari nja. Njati Ninawi nǎ gaga ná ndrŭ kana ddikpa ke si Yova ndi má nari gʉgʉ ró, Yova nzɨ si ribba ke má shi ri. (Isa. 65:20) Ro, ngbà si rivʉ ndima bbʉ madha Yova dho chi ndima tøni ro ná fø ndrŭ djo ke si lod’i bblo. Kpa ka ndima si di cho ró nŭnŭ!​—Da. 12:2.

15. (a) Addudho ká ringani nzɨ ko pori Sodoma ma, Gomora ma na nǎ chengʉeni ná ndrŭ nzɨ si ga ri? (b) Yuda 7 nǎ kʉ ná lo ká ko ka ko famu ngbaribbai? (Anja kisanduku “ Yuda ká ngʉ riji ndi pori ngbǎ?”)

¹⁵ Sodoma ma, Gomora ma na nǎ ndrŭ djo Yesu pongʉeri, kpadhó lo sie bblo pli “lod’idha dyi nǎ” gʉ gʉngʉe ndi ma, ndi  ngʉ ddi ná lo ma na ná ndrŭ dhó lo djolu. (Mt. 10:14, 15; 11:23, 24; Lu. 10:12) Ke ká ngʉ riji ndi pori ngbǎ? Njaro ko ka ko pori føri ngʉe kʉ (chumvi) Yesu lingʉe lo na ri (Hyperbole). Ro, ri nga kʉ fø ri dhonalo Yesu pongʉeri Ninawi nǎ ndrŭ si gaga. c Fori nga kʉ loroji dhi lo ri. Føri rɨngana ri njani nari kʉ Sodoma ma, Gomora ma na nǎ ndrŭ djo Yesu ngʉ loti ná saa djo ke pongʉeri kpa si gaga nganga nari bbai. Iga ke tilo djo ná fø “lod’idha dhi ddo” kʉ ddiddi Ninawi nǎ ndrŭ djo ndi tilo ro ke pongʉe ná lod’idha dhi ddo na. Ninawi nǎ ndrŭ ma, Sodoma nǎ ndrŭ ma, Gomora nǎ ndrŭ ma na krʉ njingʉe chelo. Ro, Ninawi nǎ ndrŭ bangʉe le ndima ka ndima leeni ná saa ro ngbà. Føri kina anonga nari kʉ, Yesu pongʉeri “chelo njingʉe ná ndrŭ” ma si ga ddi “gadha dhi lod’idha” dyi nǎ. (Yoh. 5:29) Ri njani nari kʉ Sodoma ma, Gomora ma na nǎ ndrŭ ngʉe fø ngab’odha na nì nari bbai. Ri ka ndi kaka fø ndrŭ kana nja ndrŭ si gaga, ndirigoti ko si longaddi kpa dho Yova ma, Yesu Kristo ma na djo.

16. Yova ká si ie ma ga nari djo ká ko chu ngbá lo? (Yeremia 17:10)

¹⁶ Azø Yeremia 17:10. Fø verse nǎ ko b’lo ko chu Yova dhó lod’idha dhi chu djo ná lo zø: Yova kʉ ndrŭ “thí nanga adi ne ndirigoti ndrŭ dhó ruruni ná ngaddidha” adi nja ná ke. Njati ke si rivʉ ndi gá ddikpa ke ga ró, “ke si ndrŭ krʉ kobe bbʉ ndima njingʉe ná lo ró ro.” Føri dzá lo dho Yova si malipizi bbʉ chelo nji ná ndrŭ dho ringani ndi njiri fø ró ndirigoti ke si zølo dho kpa dho rie ngbà ri ka ró. Ko nzá ka ko pori ie si gaga inga ie si ga nzɨ ri njati Biblia pori nzá ró.

“DZ’ LU DJÓ LOD’I NÁ KE” SI “CHØLO NJI”

17. Gosi ná saa djo ká checheni ná ndrŭ si ngbá ledha ba?

¹⁷ Adamu ma, Eva ma na gbangʉe ndima tso Shetani na ndirigoti kpa tsangʉe Yova Mungu ro ná nga djoro ndrŭ cherieni bí b’lo. Dhe kʉ che pli kʉ ná “mbuba!”  (1 Ko. 15:26) Checheni ná fø ndrŭ krʉ dhó lo ká si di ngbǎ? Sese dhó hesabu kʉ ná kpa 144 000 ma si ra ra na Kristo ma na. Ndirigoti kpa si nzɨ ro si sani ná shinga ba. (Ufu. 14:1) Ngbà ji Yova ndirigoti chi tøni ke dho ná isɨ ndrŭ ma, kpetsi kpa ma na “si ga . . . chølo dhi ndrŭ si ga” ná saa na ndirigoti kpa si di i dz’ djó theinga dho njati kpa tøni chi Kristo dhó pidhinga dho cho elfu ddi kana ndirigoti ya mwisho mbudha dhi saa na ngbà ró. (Da. 12:13; Ebr. 12:1) Føri kina, cho elfu ddi kana, “nga kʉ chølo dhi ri ná ndrŭ,” føri i kʉ nzá njingʉe njí Yova dho ná ndrŭ inga “chelo ngʉ nji ná ndrŭ” ma na si ga ndirigoti kpa si saa ba ndima ø ndima dhó nyi thika ndirigoti ndima tøni chi Yova dho. (Lu. 23:42, 43) Nì mai ri kʉ fø ro, chelo njingʉe nda na ná ndrŭ nzɨ si ga ri.​—Lu. 12:4, 5.

18-19. (a) Yova si lod’i checheni ná ndrŭ djo kaka nari bbai nari ká ko ka ko uu addudho? (Isaya 55:8, 9) (b) Gosi ná lo nǎ ká ko si loti ngbá lo djo?

¹⁸ Yova lod’i ndrŭ djo ná saa djo ke adi lonanga vʉ bblo dhé, ná føri ká ko ka ko uu? uo! Abrahamu chungʉeri nari bbai, Yova kʉ kaka ná ke, bbo kʉ nyodyu na ná ke ndirigoti “dz’ lu djó lod’i ná ke.” Ke bbʉ mazoezi Yesu dho ndiro ndi d’ilo ndrŭ djo d’e. (Yoh. 5:22) Yova ma, Yesu ma na churie ndrŭ thí nǎ kʉ ná lo chu. (Mt. 9:4) Føri dzá lo dho, lo kpa si d’i ndrŭ djo ná saa na kpa si kʉ “chølo dhé nji!”

¹⁹ Ako uri u nari kʉ, Yova ma, ndidhó lonangavʉdha ma na e bblo dhé. Ko churi chu nari kʉ, ko ro nzá ka lod’idha dho ri, ke kaka fø njí dho! (Azø Isaya 55:8, 9.) Ko bba lod’idha krʉ dhi lo Yova ma, ndidhi dduna Yesu ma na dhó dhonalo Yesu adi ndidzá Baba dhó chølo ma, zølo ma na dyø. (Isa. 11:3, 4) Nde, bbò mbudha njí ká Yova ma, Yesu ma na si lod’i ndrŭ djo ngbaribbai? Nzá ko chu fø lo djo nari ká ngbá lo? Ndirigoti chu ko chu nari ká kʉ ngbá lo? Gosi ná lo nǎ ko si fø ngadhudha goti ngʉ.