1-2. Loti bbai, njʉ ká Wakristo adi bani ngbá kpakpalo na?

 I DZ’ DJÓ ndrŭ dhó nyi ko nja ná saa na, ko adi ko mbu Loti bbai. Ke “thí bʉngʉeni bbo nzɨ ngʉ adi sheria dyø ná, nzɨ djo do ngʉ adi pá ná ndrŭ dhó che kʉ ná nyi djotsina,” dhonalo ke chungʉeri chu nari kʉ kodhi ra nǎ Baba ndrorie che kʉ ná nyi ndro. (2 Pe. 2:7, 8) Loti jingʉe Mungu bbo ndirigoti ke ngʉ adi heshima bbʉ bbo ke dho nari dho ke ndrongʉe ndi kuso lu ngʉe ná ndrŭ ngʉ adi nji ná che nyi bbo. Ko kuso lu maddi kʉ sese inga nzɨ nganga dhé heshima ro bbʉ Mungu dhó yadha dho ná ndrŭ. Nì mai ri kʉ føro, ko ka ko é tse kodhó nyi tse ro, njati ko b’o Mungu laidjo ko e na ná jidha ronga ndirigoti ko di heshima bbʉ ke dho bbo ró.​—Mez. 14:2.

² Yova ko tsotso kó ko njiri fø Mezali nǎ kʉ ná kpakpa ka ndi li ko ná lo chulu. Føga kʉ ná shauri nǎ ro Wakristo krʉ ka ndima ba faida ngbà dhé, njati kpa é kpetsi ma, isɨ ma, jadda ma inga ngó ma ro.

3. Mezali 17:3 ripo nari bbai, ko thí ronga ringani ko b’o dho ná bbo na mana kʉ nari ká kʉ ngbá lo? (Anja ji maddi.)

³ Ko thí ronga ri adi ngani ko b’o dho ná bbo na mana kʉ ná lo kʉ, Yova adi ko thí nǎ kʉ ná lo njanja. Føri na mana kʉ ke nzɨ adi ndrŭ adi nja ná lo dhé nja ri, ro ke adi ko thí nǎ ká ko kʉ ngbaribbai ma nari nja. (Azø Mezali 17:3.) Ke ka ndi ji ko njati ko di ngaddi choro nŭnŭ di ná shinga ka ndi bbʉ ko dho ná shauri djo ró dhé. (Yoh. 4:14) Føro nzá che kʉ ná nyi ma, Shetani dhó kali ma, i dz’ djó che kʉ ná  ndrŭ ma na ka ndima vó ko ronga ro ri. (1 Yo. 5:18, 19) Njati ko ndrini chøchø Yova ro ró, kodhó jidha ma, heshima ma na si dhidhi ke laidjo. Ko nzá jirieri ko bbʉ njedha kodhi Baba dho ri nari dho, ko nzɨ adi riji ko é che kʉ ná ngaddidha ro na karrnø maddi ri. Njati rie chelo ji ndi njini kodhó ro ró, ko ka ko dhuri ko tso, ‘Ma ká ka ma vó bbò jidha dho ma dho ná ke thí ronga ndá ngbaribbai?’​—1 Yo. 4:9, 10.

4. Yova do ndi nji nari ká b’ongʉe ddikpa le-ve ronga ngbaribbai nzɨ ndi nji chelo ró?

⁴ Croatie nǎ Marta ró dho kʉ ná le-ve ndiri: “Ma dho ringʉe kpakpa ma ddinga bblo lo djo ndirigoti ma hwini che kʉ ná lo ma njie nari dhi tamaa tso ró. Ro, Yova do ma nji nari b’ongʉe ma ronga b’o.” b Nde, føri ká b’ongʉe le ronga ngbaribbai? Marta pori ndi ddingʉenga che ndi vʉ lonanga nari nǎ ro ka ndi si ná matokeo djo. Ko maddi ka ko njiri fø. Che bbo kʉ ná matokeo kʉ ko si njedha bbʉ Yova thí dho ndirigoti ko nga sie choro nŭnŭ si madha bbʉ ke dho ná ndrŭ kana ri.​—Mwa. 6:5, 6.

5. Leo da lu ná lo nǎ ro ká ni ka ni ba ngbá somo?

⁵ Njati ko di Yova do nji ró, ko nzɨ adi kau nji chelo nji ná ndrŭ na ri. Congo nǎ Leo ró dho kʉ ná le-djo bangʉe fø somo. Batiso ndi ba nari goti cho da 4 ro, ke ngangʉe kau njidha tso chelo ngʉ nji ná kpa na. Ke ngʉ riddi rie nzá ndi nganga d’e chelo ro nji ri ró, ndi nzá d’e chenga ro nji Yova nyǒ njí ri. Nì mai ri kʉ føro, føri goti tsé kpa lingʉeri ke nga wa rɨdha tso ndirigoti nzá tsetse ná nyi njidha tso. Føro ke ngangʉe ngaddidha tso ndidhó Wakristo ngʉe ná gø dhi ndrŭ ddingʉe ndi dho ná lo ma, ndi ngʉe na Yova dho ndi ngʉ njínji ro ná hwè ma na djo. Føro ká ke njingʉeri  ngbǎ? Ke ngangʉe bblo lo njidha tso ki vi. Wazee dhó ngatsotsokodha chulu, ke ngangʉe njí njidha tso ki vi Yova dho. Njʉ fø ke njínji hwè na muzee ndirigoti painia wa pekee ndi kʉ ro.

6. Kpadjo ká ko loti loroji dhi aro kʉ ná ngbá isɨ ndrŭ djo?

⁶ Akotilo Mezali sura 9 djo, føga le tilo nyodyu ma djo rrdha na, nari le ddi aro kʉ ná loroji dhi isɨ ndrŭ na. (Anja Waroma 5:14; Wagalatia 4:24.) Anonga nari kʉ, Shetani dhó i dz’ djó ndrŭ ji uasherati ma, pornografia ma na bbo. (Efe. 4:19) Føri dzá lo dho, ri kʉ bbo na mana kʉ ná lo ko di Mungu do nji ndirigoti nzɨ ko di chelo nji. (Mez. 16:6) Føri dho, i sura nǎ kʉ ná lo nǎ ro ko krʉ ka ko ba faida njati ko é kpetsi inga isɨ ma ró. Andiko pori, aro fø isɨ ndrŭ krʉ “nga kʉ bblo akili na ná ndrŭ” nzǐ ndima bba. Ndrŭ krʉ ripo ‘anisi mabba ndirigoti ko nyonga.’ (Mez. 9:1, 5, 6, 13, 16, 17) Ro, fø ndrŭ nzi ndima ná ngana si ná ndrŭ ró njini ná lo kʉ njonjo bbo.

7. Mezali 9:13-18 ripo nari bbai, rrchu ná isɨle nzi ndima ná ngana si ná ndrŭ ró ká ngbá lo njini? (Anja ji maddi.)

⁷ Anja “rrchu ná isɨle” ndrŭ nzǐ na ná lo. (Azø Mezali 9:13-18.) Nga ró do ro le nga kʉ bblo akili na ná ndrŭ nzǐ, “Anitsu i dzá” ndirigoti akonji fete. Føri nǎ ro ká ngbá matokeo si? “Føga kʉ checheni ná ndrŭ.” Njaro ni no fø di lo djo ko tilo Mezali nǎ anziro nari nga ngbà. Ko dho le d’rari ko b’o ko ronga “tsatsa” ndirigoti “che dhó nyi kʉ ná isɨle ró.” Ko dho le d’raeri: “Le bbá dza ndrŭ tsú kabuli na.” (Mez. 2:11-19) Mezali 5:3-10 tilo tsatsa ná nja “isɨle djo” maddi ná fø le “kó tsu dhe dhi ngana.”

8. Ko dho ká ringani ko vʉ ngbá lo nanga?

⁸ “Rrchu ná isɨle” nzi ndima na ngana ra ná ndrŭ dho ringani ndima vʉ nanga nari kʉ: Ndima ká ke rara ndima le nzi ná ngana inga nzɨ ma nari. Ko maddi kʉ fø di ná longavʉdha njí. Ko ká ka ko njí addu njati ddikpa le mburi ndi cho ko ko njí uasherati inga ko si pornografia ro nzá ko ji ro eternete djó ró?

9-10. Uasherati ringani ko pʉ ko ró ro dho nari ká kʉ ngbá lo ro mai?

⁹ Uasherati ringani ko pʉ ko ró ro dho ná ddikpa bblo sababu kʉ, “Rrchu ná isɨle” ripo ɨ: “D’u le d’ù ná dda adi o djuu.” Nde, “d’u le d’ù ná dda” ká kʉ addu? Biblia adi ndoa chi ná ndrŭ nji ná ngono nzǐ  bblo kʉ ná dda. (Mez. 5:15-18) Sheria nǎ chi ndoa ná kpatsi ke ma, isɨle ma na tso uni u ndima njí ngono. Nde, føri ká kʉ njonjo “d’u le d’ù ná dda na” ngbaribbai? Føri le ka le ddi gʉgʉni ná ngono na. Bí ina føri adi njini gbʉ, ddiddi bandi adi ngad’u nzá nga ndrŭ chu ro nari bbai. “D’u le d’u ná dda” ka ndi njani djuu o nari bbai njati ri d’ù ná ndrŭ di riddi nzá le nja ndima ro ri ró. Føri e sha kpa shani ri! Dhonalo Yova adi krʉ lo njanja. Yova na kʉ ko kana ná kau ko vi nari bbai o dyadya ná ritsi ro ngaeri, ná føri ro nzɨ adi o “djuu” ri. (1 Ko. 6:9, 10) Ro, fø le rinji nari nǎ ro adi si ná lo dada fønga djolu.

¹⁰ Uasherati adi do pa, ri adi rili le mbu le ngana mana kʉ ri, ri adi rili le ba nzá le ji ná lɨnga ndirigoti ri adi familia sasa. Bbʉbbʉ dhé, ri kʉ nyodyu dhi lo nzɨ ko si rrchu ná isɨle ko nzǐ ná ngana, nzɨ ko tsu le bbá “dza” na ndirigoti nzɨ ko nyo le dhó nyo. Føri kina uasherati adi ko kana kau sasa Yova na, uasherati nji ná bí kʉ ná ndrŭ adi ba ná dhe adi kpa hwi tse. (Mez. 7:23, 26) Sura 9 nǎ verse 18 dya lo tso ɨ: “Le ro lʉ krʉ kʉ kabuli nǎ.” Nde, bí kʉ ná ndrŭ ká adi ra fø le nzi ndima ná ngana addudho?​—Mez. 9:13-18.

11. Pornografia le nja nari ká kʉ che bbo addudho?

¹¹ Føri bbai di ná hatari kʉ pornografia. Nja ndrŭ adi riddi pornografia le nja nari ro nga kʉ che ri. Ro, pornografia e che bbo ndirigoti ri adi rili le vi ledhó heshima ma, nja ndrŭ dhó ri ma na vi ndirigoti ritso bbadha e kpakpa bbo. Nga kʉ bblo ná ji tuni le djǒ nǎ ro nari e kpakpa bbo. Føri kina, pornografia nzɨ adi ngono dyu sisi ri; ro ri adi ri ki ndrindri. (Kol. 3:5; Yak. 1:14, 15) Bbʉbbʉ dhé, pornografia nja ná bí kʉ ná ndrŭ adi ra uasherati nji.

12. Ko ká ka ko dhǒ ko ko ronga b’o uasherati dhi ngaddidha ró nari ngbaribbai?

¹² Nde, Wakristo ko kʉ ro, pornografia dhi ji si kodhó eletronike dhi ritsi na nzá ko ji ro ró ká ringani ko njiri ngbǎ? Ringani ko da fø ji djolu tse. Ko ka ko njiri fø njati ko di ngano nari kʉ, ko jirie ko kana kʉ Yova na ná kau bbo ró. Bbʉbbʉ dhé, nzɨ njani pornografia bbai ná ji ma ka ndi liri uasherati dhi ngaddidha si ko djǒ na ddi. Ri ká ngani nzɨ ko di rinja addudho? Dhonalo ko nzá jiri ko njí uzinifu ro ko thí nǎ karrnø maddi ri. (Mt. 5:28, 29) Thailand nǎ David ró dho kʉ ná ddikpa muzee pori: “Ma adi ridhu ma tso: ‘Rie nga ma ji kʉ pornografia dhi ri ró, Yova ká ka ndi ba hwè ngbà ri ma nja nari dho?’ Fø di ngaddidha adi ma tsotso kó ma vʉ lonanga nyodyu na.”

13. Addui ká adi ko tsotso kó ko njí lo nyodyu na?

¹³ Ko tsotso adi kó ko njí lo nyodyu na d’e nari kʉ Yova ko ji nari. Mungu do le nji ná føri kʉ nyodyu tso “ngani” ná nga. (Mez. 9:10) Fø lo nanga le tu wazi Mezali sura 9 tso ngani ná ngana, føga ko lo zø djo ná isɨle le nzi “bbʉbbʉ nyodyu.”

14. Mezali 9:1-6 nǎ le ko nzi nari ká kʉ njonjo ngbaribbai anziro ko njae nari ró ro?

¹⁴ Azø Mezali 9:1-6. Iga ko lo zø djo nari kʉ, bbʉbbʉ nyodyu si ná nga, føri i kʉ ko No ná ke dhó ro. (Mez. 2:6; Ro. 16:27) Føga le tilo saba tødha kʉ nǎ ná bbo dza djo. Føri ridho nari kʉ, Yova e ritsi adi bbʉ ná ke ndirigoti ke adi ngbà jiri ndima njínji ndidhó shauri na ná ndrŭ kó hwè na.

15. Mungu ká rinzi ko njí addu?

¹⁵ Yova kʉ ritsi adi bbʉ ná ke. Fø sifa le ddi “bbʉbbʉ nyodyu” le nzi Mezali sura 9 nǎ ná isɨle na. Føga ko zø ná lo ripo fø  isɨle tayarisha ndidhó zǎ ma, ndidhó wa ma, ndidhó meza djó nga ma na bblo. (Mez. 9:2, maelezo ya chini) Føri goti, verse 4 ma, 5 ma na nǎ: “Le [bbʉbbʉ nyodyu] ripo ngadhó nyodyu kʉ ná ndrŭ dho: ‘Anisi ndirigoti anika madhó mukati.’” Ri ká ngani ko si bbʉbbʉ nyodyu dhó dza na ndirigoti ko nyó ledhó nyo addudho? Dhonalo Yova adi riji ndidzá nzø e nyodyu na ndirigoti kpa ronga b’oni b’o. Ke nzɨ adi riji ko nji ko ronga ka ndi vó ná lo ri. Føri djotsina i ke jirie “chølo dhi ndrŭ dhó nyodyu dhi lo ji.” (Mez. 2:7) Njati ko di Yova do nji ngbà ró føri na ko hwè bbʉ ke dho. Ko adi kedhó nyodyu dhi shauri rr ndirigoti ko adi hwè ba ri na ko njínji nari dho.​—Yak. 1:25.

16. Mungu do ndi nji nari ká kongʉe Alain tsotso ndi vʉ lonanga nyodyu na ngbaribbai, ndirigoti ri nǎ ro ká ngbá matokeo singʉe?

¹⁶ Anja ngbaribbai ma Mungu do le nji nari kongʉe Alain tsotso ndi vʉ lonanga nyodyu na nari. Ke ngʉe Muzee ndirigoti ke ngʉe mwalimu darasa nǎ, ke pori “Ko njínji na ná bí kʉ ná ndrŭ ngʉ adi pornografia dyá nzø dho le longaddi ngono djo ná chu ro.” Ro, Alain chungʉeri føri nga kʉ bbʉbbʉ lo ri. “Ke ngʉ adi Mungu do nji nari dho” ke pongʉeri, “ma ngʉ adi fø di ná filme ma nja nari nyinyi. Ndirigoti ma tungʉe addudho ma ma nyi ri ma nja nari nanga ma lai njí dhi ndrŭ dho.” Ke njingʉe njí “bbʉbbʉ nyodyu” dhó ro si ná shauri na ndiro ndi “rá anzi lo le famu ná chu lu ndi bbi nari na d’e.” (Mez. 9:6) Alain njingʉe ná lo ke ndima nanga nari dho, ke lai nja walimu adi Biblia zø njʉ ndirigoti nja kpa adi si njudha dhi ngana si.

17-18. “Bbʉbbʉ nyodyu” nzi ndima ná ngana si ná ndrŭ ká si ngbá ledha ba ndirigoti kpa ká kʉ ngbá ngab’odha na? (Anja ji maddi.)

¹⁷ Yova njinjí aro kʉ ná fø loroji dhi isɨ ndrŭ na ndiro ndi ddi ngbaribbai ma ko si hwè ba gosi ná saa djo nari ko dho d’e. “Rrchu ná isɨle” ndima nzǐ ná ngana ra ná ndrŭ adi rimbu ndima ba hwè uasherati nǎ ro. Bbʉbbʉ dhé, kpa adi ishi kpadjo nga dho ndirigoti kpa adi gosi ná saa be pa. Kpa nji ná lo si rili “kpa ra kabuli na.”​—Mez. 9:13, 17, 18.

¹⁸ “Bbʉbbʉ nyodyu” na le ddi ná isɨle nzi ndima ná ngana ra ná ndrŭ dhó gosi ná saa sie njonjo fø kpa dhó ri ró ro! Njʉ le ró lʉ bblo le kpe ná fete nyo ndirigoti kpa kʉ hwè na, dhonalo kpa kʉ ndima dhó lo u nja ndima kana nga é chøchø Yova na d’e ná ritsi na krʉ. (Isa. 65:13) Nabi Isaya chulu, Yova pongʉeri: “Anirr ma li ni li ni  dyu ro, aninyo bblo nyo, ndirigoti ni si hwè ba bblo pli kʉ ná ritsi dho.” (Isa. 55:1, 2) Ko dho le riddi ko ndro Yova ndro ná ritsi ndirigoti ko ji ke jirie ná ritsi. (Zb. 97:10) Ndirigoti ko adi faida ba nja ndrŭ ko nzǐ ndima ba faida “bbʉbbʉ nyodyu” nǎ ro nari nǎ ro. Ri adi njini ɨ “ko ri jø bbo bbagʉ bbo ngbeni ná nga nǎ ro nari bbai: ‘Nga kʉ nyodyu na ná ke si iga.’” Ko ma, fø ngana si ná ndrŭ ma na nzɨ adi faida ba njʉ dhé ri. Kpa tso si uni ndima di “shi” choro nŭnŭ ndirigoti “ndima ra anzi lo le famu nǎ ná chu lu ndima bbi nari na.”​—Mez. 9:3, 4, 6.

19. Muhubiri 12:13, 14 ripo nari bbai, ri ká ngani ko njí addu? (Anja kisanduku “ Mungu do ko nji nari adi faida bbʉ ko dho.”)

¹⁹ Azø Muhubiri 12:13, 14. Akobbari Mungu do ko nji nari b’o ko thí ronga, ri liri ko é tse kodhó nyi tse ro ndirigoti ko di heshima bbʉ ke dho che kʉ ná i dz’ djó. Mungu do ko nji nari si rili ko nzi bí kʉ ná ndrŭ ngbà ri ka ná nga tsi ndiro ndima ne “bbʉbbʉ nyodyu” ndirigoti ndima ba faida ri nǎ ro d’e.