Biblia nzá ngʉ fø logoti ro ri. Ro, nzá dho kpa ka ndima vʉeri ndima ngʉ Nazareti na dho ná lo nanga ro i ri tu ngbà.

Ddikpa malaika pongʉeri Maria ni le si linga ba ndirigoti le si ngba gø. Malaika singʉe fø lo d’ra Maria ma, Yosefu ma na dho ná saa na, kpa ngʉ ishi Nazareti nǎ, Yosefu ma bbá bbagʉ Galilaya nǎ. (Lu. 1:26-31; 2:4) Luti Mizri nǎ ro kpa ngʉngʉe Nazareti na. Yesu dhingʉe fø bbagʉ ndirigoti ke ngʉngʉe Nazareti nǎ ke. (Mt. 2:19-23) Ri kʉ føri dho i ko ripo Yesu ma, Yosefu ma, Maria ma na krʉ ngʉe Nazareti nǎ ndrŭ ri.

Maria ma dhó familia nǎ le ró dho ngʉe Elizabeti ndirigoti le ngʉ di Yuda nǎ. Elizabeti ngʉe kuhani Zekaria bbá le føri goti le ngʉngʉe Yohana Batizaji dzá mama. (Lu. 1:5, 9, 13, 36) Maria singʉe Elizabeti ró nga be ndirigoti le ma ddingʉe bi gbo kana ddinga Yuda nǎ. Føri goti Maria ngʉngʉe Nazareti na. (Lu. 1:39, 40, 56) Føri dzá lo dho Maria chungʉe Yuda nǎ bba ro ngbà ka ná ngatsi.

Ddikpa saa na, Yosefu rrngʉe nga sheria pongʉeri kpa rá ndima “ndindi” nari dho. Føri dho Yosefu rangʉe Nazareti nǎ ro kpø Betlehemu na, føri ngʉe “Daudi dhó bba” ndirigoti unabi pongʉe Masiya ka ndi gøeni ná nga. (Lu. 2:3, 4; 1 Sa. 17:15; 20:6; Mik. 5:2) B’lo Maria ba Yesu fø bbagʉ nari goti, Yosefu nzá lingʉeri le njí da kʉ ná safari Nazareti na ø gøni ná fø ngba na ri. Kpa dingʉe Betlehemu nǎ vi, ndirigoti fø bba ngʉe kilometre 9 Yerusalemu nǎ ro. Føri dho ri ka ndi ée sʉsʉ kpa mba ndima dhó fø ngba Hekalu na ndirigoti ndima bbʉ sheria nzingʉe ná bbʉdha.​—Law. 12:2, 6-8; Lu. 2:22-24.

Anziro Mungu dhó Malaika d’rangʉeri Maria dho nari kʉ, fø ngba dho le ka le sie “Daudi dhó pi dhi kiti bbʉ” ndirigoti ngba ka ndi ngʉe “Pi.” Njaro Yosefu ma, Maria ma na njangʉeri nari kʉ, Yesu gøni Daudi dhó bbagʉ ná føri kʉ bbo na mana kʉ ná lo. (Lu. 1:32, 33; 2:11, 17) Njaro kpa ddingʉeri nari kʉ, ri kʉ nyodyu dhi lo ndima di vi føga ndirigoti ndima b’o nga kpø føri goti Mungu si po ndima njí ná lo ndima nji ná nga djo.

Ko nzá chu dyødyø djo zøngʉe nga ná kpa singʉe nari ká ngʉe thɨcha ma kpa nji ddo Betlehemu nǎ nari ro ri. Fø lu fø familia ngʉ di ddikpa dza nǎ ndirigoti kpadjo kpadhó fø “ngba singʉe jadda ke” b’lo, ro nga re ngba go ri. (Mt. 2:11) Ri njani nari kʉ Nazareti nǎ ndima ngʉ nari rɨngana kpa ro dingʉe Betlehemu na bicha vi nari bbai.

Herode jangʉeri “Betlehemu nǎ cho aro djó ro dhó cho kʉ agʉ ná kpetsi nzø krʉ” le cheche . . . (Mt. 2:16) Mungu dhó ro si ná lojadha ndima bangʉe Herode bbʉngʉe ná fø lo djo ná saa na Yosefu ma, Maria ma na nyingʉe nga Yesu na Misri na ndirigoti kpa dingʉe følu kpø Herode dhedhe ná nga djo. Luti, Yosefu ma ngʉngʉe ndibbá familia ma na Nazareti na. Nde, kpa ki ká ngʉngʉe Betlehemu na nzá addudho? Dhonalo fø saa na Herode dzá ngba Arkelao ngʉ pinyo Yuda djo ndirigoti ke ngʉe makali bbo pli, føri goti ddikpa malaika d’rangʉe ri ki godhé Yosefu dho følu ke ngʉ nari kʉ hatari. Nazareti ngʉe bblo pli Yosefu ka ndi ngue Yesu ná nga ndiro ke é Yova dho madha bbʉ ná ke d’e.​—Mt. 2:19-22; 13:55; Lu. 2:39, 52.

Ri njani nari kʉ, Yosefu dhengʉe nzá Yesu d’e ra na ndrŭ ra ná chutso klo ro nari bbai. Føri dho, Yosefu si kʉ gadha ba i dz’ djo. Bí kʉ ná ndrŭ ka ndima si kʉ njunju ke na ndirigoti ndima chu lo bbo ke dhó ro addudho ma ke ma, Maria ma na mangʉe vi Betlehemu na Yesu gøni nari goti nari djo.