1. Ddiddi 1 Petro 5:2 ripo nari bbai, wazee dho ká ringani ndima njí bbo na mana kʉ ná ngbá njí?

 WAZEE dho ringani ndima b’o Mungu dhó bbo na mana kʉ ná chembø ronga. Chi tøni ná fø le-djoi nanga adi jini bbo ndima njínji le-djoi ma, le-vei ma na tsotsokodha dho nari dho ndirigoti kpa adi njínji kpakpanga na ndima é “bblo miya . . . ronga b’o ná kpa” d’e. (Yer. 23:4; azø 1 Petro 5:2.) Ko adi mbai po kutaniko nǎ fø kpetsi kpa dho!

2. Nja wazee ká ka ndima bani ngbá kpakpalo na?

² Ndima dhona bbʉni ná fø njí wazee nji nari kana kpa adi bani bí kʉ ná kpakpalo na. Kpadho ri adi ngani ndima njinjí kpakpanga na nja ndima b’o kutaniko nǎ ndrŭ ronga d’e. États-Unis nǎ Tony ró dho kʉ ná muzee dho ringangʉeni ndi é kiasi na ndi tso ú ndi njí ná njí kana. Ke pori: “Korona tso ngangʉeni ro, ma mbungʉeri ma njinjí bbo ndiro ma kpe njudha ma, lod’radha ma na d’e. Ro, ngbà mai ma njingʉe ma ka ma njie ná lo krʉ ro, njí ma ka ma njí ná lo ngʉe godhé. Ma ró njí ngʉe bbo nari dho, Biblia zødha ma, funzo la pekee ma, sala njidha ma na dho ma saa ba nari ngʉe kpakpa ma dho.” Kosovo nǎ Ilir ró dho kʉ ná muzee ngʉ bani na ná kpakpalo ngʉe njonjo føri ró ro. Ke ngʉe nǎ ná eneo na lɨ tangʉe ná saa na, ringʉe kpakpa ke dho ke rrnga tengenezo bbʉ ná chutsoddadha dho. Ke pori: “Ma ngʉe do na tawi pongʉeri ma rá che kʉ ná eneo nǎ kʉ ná le-djoi ma, le-vei ma na tsotso ko ná saa na. Ma do ngʉ nji ndirigoti ma njangʉe ma ba ná chutsoddadha nga kʉ bblo ri.” Asie nǎ Tim ró dho kʉ ná ddikpa misionere dho ringʉe kpakpa ndi njí krʉ ddo ró ringangʉeni ndi njí ná njí. Ke pori: “Nja saa na ma ngʉ adi ma mbu si ronga djolu lo si nari bbai.” Wazee tsotso ká addu ka ndi kó ndiro ndima hwini fø di ná kpakpalo na d’e?

3. Ko krʉ ká ka ko ba ngbá faida lo ngʉ adi d’i ná ke Gideoni dhó loroji nǎ ro?

³ Wazee ka ndima ba somo lo ngʉ adi d’i ná ke Gideoni dhó  loroji nǎ ro. (Ebr. 6:12; 11:32) Ke ngʉ adi Mungu dzá ndrŭ ronga b’o ndirigoti ke ngʉ adi chutso ddá kpa dho. (Amu. 2:16; 1 Nya. 17:6) Gideoni bbai, wazee le li ndiro ndima b’o Mungu dzá ndrŭ ronga kpakpa lo tso o ná saa na d’e. (Mdo. 20:28; 2 Ti. 3:1) Ko ka ko ba somo Gideoni ngʉe kiasi na, nyenyenga na ndirigoti ke ngʉ adi ngarr nari nǎ ro. Ke dho ringʉe kpakpa ndi ve ngatso ndidhó bbʉni ná njí ndi nji nari kana. Ko é muzee inga nga ma ró, ringani ko di mbai po bbo wazee nji ná lo dho. Ko ka ko kó kpakpanga na adi njínji ko ronga b’odha dho kutaniko nǎ ná fø le-djoi tsotso ko.​—Ebr. 13:17.

4. Gideoni ká dhongʉe ndi kʉ kiasi na ndirigoti nyenyenga na nari ngbaribbai?

⁴ Gideoni ngʉe kiasi na ndirigoti nyenyenga na. b Yova dhó malaika d’rangʉeri ke le vʉ ndi gø Waizraeli Midiani nǎ kpakpa ngʉe ná kpa dhó ro ná saa na, nyenyenga dhi fø ke ngʉngʉe logoti ɨ: “Mabbá dza nǎ ndrŭ kʉ Manase dhó dza kana sese pli kʉ ná ri ndirigoti ma kʉ madzá baba dzá dza nǎ nga na mana kʉ ná ke.” (Amu. 6:15) Ke mbungʉe ndi nzá dho ndidhó bbʉni ná njí ka ndi njini nari bbai, ro Yova chungʉeri chu ke nji fø njí nì. Yova dhó ngatsotsokodha chulu, Gideoni njingʉe ndidhó bbʉni ná njí bblo pli.

5. Muzee dho ká ri ka ndi é kpakpa ngbá saa na ndi é kiasi ndirigoti nyenyenga na?

⁵ Wazee adi kpakpanga nji ndima é kiasi na ndirigoti nyenyenga na krʉ kʉ ná lo kana. (Mik. 6:8; Mdo. 20:18, 19) Kpa nzɨ adi ndima nja pli ndima ka ndima njí inga b’lo ndima nji na njí djotsina ri; ndirigoti kpa nzɨ adi ndima nja pa ndima njie ná kosa djotsina ri. Ro, nja saa na ri ka ndi é kpakpa muzee é nyenyenga na ndirigoti kiasi na. Loroji na, ke ka ndi ú bí kʉ ná njí ndirigoti ri ka ndi ra si kpakpa ke njí fø njí krʉ. Njaro ndrŭ ka ndima ti chelo ke djo inga ndima má ke ma ke nji ná njí dho. Wazee ká ka ndima ba ngbá somo Gideoni dhó loroji nǎ ro ndiri kó ndima tsotso fø di ná lo kana d’e?

6. Wazee ká ka ndima ba ngbá somo Gideoni dhó nyenyenga nǎ ro? (Anja ji maddi.)

⁶ Ane ni tsotsokodha. Kiasi na kʉ ná ke churieri chu nja kʉ ná ritsi nzá ka ndi njini ndi dho ri. Gideoni dhongʉeri ndi kʉ kiasi na ke nzingʉeri nja ndrŭ kó ndi tsotso nari chulu. (Amu. 6:27, 35; 7:24) Nyodyu na kʉ  ná wazee maddi adi rinji fø. B’lo djo ko tielo ná le-djo Tony pori: “Sesenga nǎ ro ma bangʉe ná formasio lingʉeri ma di njí tso u ngbà ma ka ma njí ná nga djolu. Føri dho ma ngʉ adi kiasi djo tilo ná lo vʉ ko ti djo lo ibada ya familia nǎ ndirigoti ma ngʉ adi mabbá le dhó ngaddidha ma dhu ddi. Godhé ma njangʉe ɨ djǒ ripo ná video jw.org djó Kama Yesu, Uwazoeze, Uwategemeze, na Uwatie Wengine Nguvu.” Tony ngʉ adi nja ndrŭ nzǐ ndiro kpa kó ndi tsotso ndi nji ná njí kana d’e. Føri ká bbʉngʉe ngbá matokeo? Tony pori: “Kutaniko nǎ njí adi ra anzi ndirigoti ma adi saa ba bbo ndiro ma li madhó kiroho kpakpa d’e.”

7. Wazee ká ka ndima dyø Gideoni dhó loroji ngbaribbai chelo ndrŭ ti ndima djo ná saa na? (Yakobo 3:13)

⁷ Nzɨ bbari ni nanga kani ndrŭ di chelo ti ni djo ró. Wazee adi ba ná nja kpakpalo kʉ chelo ndrŭ ti kpa djo nari. Godhé, Gideoni dhó loroji ka ndi kó kpa tsotso ko. Bbʉbbʉ dhé ke chungʉeri ndi nzá kaka ri, føri dho ke ngʉngʉe Efraimu nǎ kpa dhó logoti ko ndi jotso ko ro chelo kpa ngʉ ti ke djo ná saa na. (Amu. 8:1-3) Gideoni nzá ngʉngʉe kpadhó logoti ro ka ndi nanga kani ro ri. Ke dhongʉe ndi jotso koko nari kpadhó logoti ndi ngʉngʉe bblo nari chulu ndirigoti føri lingʉeri kpa jotso maddi koko. Nyodyu na kʉ ná wazee adi Gideoni dhó loroji dyø bblo ndima nja ndrŭ rr ndirigoti ko ndima jotso ko ro ndima kpadhó logoti ngʉ chelo kpa ti ndima djo ná saa na nari chulu. (Azø Yakobo 3:13.) Fø kpa rinji nari ka ndi liri kutaniko é ngoi na.

8. Daraka na kʉ ná kpa dho ká ringani ndima njiri ngbǎ kpa ndrŭ di má ma ró? Abbʉ loroji.

⁸ Abbʉ madha Yova dho krʉ kʉ ná lo kana. Gideoni dho ndrŭ ngʉ madha bbʉ ke singʉe Wamidiani djolu nari dho ná saa na, ke lingʉeri fø madha rá Yova dho. (Amu. 8:22, 23) Daraka na kʉ ná kpa ká ka ndima dyø Gideoni dhó loroji ngbaribbai? Ringani kpa bbʉ madha Yova dho ndima nji ná lo dho. (1 Ko. 4:6, 7) Loroji na, njati ddikpa muzee ndrŭ di má ke longaddi bblo nari djotsina ró, ke ka ndi drr ndrŭ dhó nganjadha Mungu dzá lo djo inga tengenezo chulu ko ba ná formasio djo. Nja saa na wazee ka ndima ddinga ndima nji ná lo ká ndrŭ dhó nganjadha drr ndima djo nari djo. Akonja Timothy ró dho kʉ ná muzee bangʉeni na ná lo. Timothy jingʉeri bbo ndi di ndrŭ krʉ dho le adi bbʉ ná hotuba bbʉ. Ke pori: “Madhó utangulizi ma, ma bbʉ ná loroji ma na ngʉe da kʉ ná ri ndirigoti ri ngʉe kpakpa. Føri ngʉ adi nja ndrŭ dhó nganjadha drr bbo ma djo. Njedha dhi lo kʉ, føri lingʉeri ndrŭ li ndima thí ma djo, nga Biblia djo inga Yova djo ri.” Timothy rangʉe ri utso d’i nari kʉ, ringani ndi ø ngbaribbai ma ndi longaddi nari thika ø ndiro nzɨ ndi drr ndrŭ dhó nganjadha ndi djo ró. (Mez. 27:21) Føri ká bbʉngʉe ngbá matokeo? Ke pori: “Kpadjo nja le-djoi ma, le-vei ma na adi ripo madhó hotuba adi rili ndima sisi ndima bani na ná kpakpalo djolu, ndima ve mbudha tso inga ndima kana nga ngʉ chøchø Yova na. Ndirigoti ma adi hwè ba bbo kpa adi po ná fø lo dho anziro ndrŭ ngʉ adi madha bbʉ ma dho ro ma ngʉ adi ba ná hwè djolu.”

9. Addui ká lingʉeri rie kpakpa Gideoni dho ndi rrnga Yova pongʉe ná lo dho ndirigoti ndi é nga nǎ do ro? (Anja ri chuti kʉ ná ji.)

⁹ Gideoni le lingʉe ndi é lod’i ná ke Waizraeli djo ná saa na, ringʉe kpakpa ke dho ke rrnga ndirigoti ke é nga nǎ do ro. Ke dhona le bbʉngʉe hatari kʉ ná njí, føri ngʉe ke sa ndidzá Baba chingʉe Baali dho ná mazabahu. (Amu. 6:25, 26) Luti b’lo Gideoni gba bbasødda tso nari goti, Yova pongʉeri aro ina ke dho ke ngʉ ndidhó bbasødda dhó hesabu nanga ngʉ. (Amu. 7:2-7) Føri goti ke  pongʉeri, kpa rá là ta ndima dhó mbubai tso ro kuna.​—Amu. 7:9-11.

10. Muzee dho ká ri ka ndi si kpakpa ndi rrnga ngbá saa na?

¹⁰ Wazee dho ringani ndima é “tayari ngarrdha dho.” (Yak. 3:17) Nì ngarr ná muzee e tayari ndi rrnga Maandiko po ná lo dho ndirigoti Mungu dhó tengenezo ja ná lo dho. Fø ndi rinji nari na ke adi bblo kʉ ná loroji bba nja ndrŭ dho. Ro, nja saa na ri ka ndi si kpakpa ke dho ke rrnga. Loroji na, njaro ri ka ndi si kpakpa ke rrnga ndi ba ná lojadha dho. Nja saa na ke ka ndi dhu nja kʉ ná lojadha ká kʉ nyodyu dhi ri i bbʉbbʉ nari ndi tso. Inga le ka le pori ke njí hatari na ka ndi li kedhó uhuru ná njí. Wazee ká ka ndima dyø Gideoni dhó ngarrdha fø lo kana ngbaribbai?

11. Wazee tsotso ká ngbá lo ka ndi kó nja ndima rrnga d’e?

¹¹ Adi chutsoddadha rr bblo ndirigoti anjinjí ri na. Mungu d’rangʉe ngbaribbai ma Gideoni si ndidzá baba dhó mazabahu sa nari ma, ø mazabahu ká ke si chi ngbaga nari ma, ri djó ká le ka le bɨ ngbǎ di ná zǎ nari ma na. Gideoni nzá njangʉe fø chutsoddadha ro che ri, ke njingʉeri Yova pongʉeri ndi dho nari bbai nganga. Njʉ, wazee adi Yova dhó tengenezo dhó chutsoddadha ba barua ma, matangazo ma, nja lo ma na chulu nari adi ko tsotso kó ndiro ko ronga b’oni b’o ndirigoti ko kana nga é chøchø Yova na d’e. Ko jirie wazee bbo dhonalo kpa adi tengenezo bbʉ ná chutsoddadha dyø chi ndima tøni ro. Føri nǎ ro kutaniko krʉ adi faida ba.​—Zb. 119:112.

12. Wazee ká ka ndima njinjí ngbaribbai Waebrania 13:17 nǎ kʉ ná lo na njati Yova dhó tengenezo jari kpa lé ngbaribbai ma ndima e njínji ná chu thika ró?

¹² Adi tayari nidhó lo thika ødha dho. Anonga nari kʉ, Yova pongʉeri Gideoni ngʉ ndidhó bbasødda kana bí kʉ ná kpa ngʉ abba. (Amu. 7:8) Ke ka ndi ddieri ɨ: ‘Ri ká ngani le lé fø lo thika ngodhé? Nde, føri ká ka ndi é bblo bbʉbbʉ?’ Nì mai ri ngʉe føro Gideoni rrngʉe nga rr. Njʉ wazee adi Gideoni dyø nga ndima rr tengenezo d’ra ná lo dho nari chulu rie njonjo ma ri kʉ anziro e ná ri ró ro ró. (Azø Waebrania 13:17.) Loroji na, 2014 na Lo dho chutso ddá ná Baraza øngʉe ngbaribbai ma Pidhinga dzá dza ma, Asamble dhi nga chidha ma na dho le ka le di mbø bbʉ ná chu thika ø. (2 Ko. 8:12-14) Anziro tengenezo ngʉ adi mbø bbʉ makutaniko dho ndiro kpa chi Pidhinga dzá dza d’e ndirigoti ringʉ adi ngani kutaniko ngʉ fø mbø ngʉ. Ro, i ddo ró tengenezo adi Pidhinga dzá dza ma, asamble dhi nga ma na chi ngbà le ka le chi ri ná ngalu dz’ djolu gble le-djoi ma, le-vei ma na bbʉ ná muchango na, rie sese ma dza le ji le chi ná ngana ndrŭ bbʉ muchango ri ró. José rrngʉe fø lo ná saa na, ke nanga rɨngʉeni ngbaribbai ma fø njí si njini nari djo, ke ddingʉeri: ‘Ddikpa Pidhinga dzá dza ro ma nzá ddi ka ndi chini ri. Fø lo nzá ka ndi njini kodhó ɨ eneo nǎ ri.’ José tsotso ká addu kongʉe ndi rrnga fø chutsoddadha dho d’e? Ke pori: “Mezali 3:5, 6 nǎ kʉ ná lo nga ma nongʉe nari lingʉeri ma  li ma thí Yova djo. Ndirigoti fø mupango bbʉngʉe bblo pli kʉ ná matokeo! Ko chingʉe Pidhinga dzá dza bí ndirigoti ko jifunzangʉe ngbaribbai ma le ka le bbʉ muchango njonjo kʉ ná chu na ndiro fø njí njini krʉ ngalu d’e nari.”

13. (a) Gideoni ká ungʉe ngbá lo? (b) Wazee ká ka ndima dyø Gideoni dhó loroji ngbaribbai? (Anja ji maddi.)

¹³ Anji Yova ji ná lo nga nǎ do ro. Gideoni rrngʉe nga rr Yova dho nì mai ke do ngʉ nji ndirigoti kedhó bbʉni ná njí ka ndi lieri ke tsu hatari na ro. (Amu. 9:17) B’lo ndi rr Yova pongʉe ná lo nari goti, Gideoni ungʉeri u nari kʉ Yova ka ndi kó ndi tsotso ko ndiro ndi b’o Mungu dzá ndrŭ ronga d’e. Gʉ kodhó njí gʉni ná ngø nǎ di ná wazee ka ndima dyø Gideoni dhó loroji. Kpa adi chutso ddá njudha dho, lod’radha dhi njí dho nga nǎ do ro ngbà mai le ka le tsu kpa prizo na inga sheria dhi kpa ka ndima dhunga kpa tso, kpa ka ndima vi ndima dhó njí inga ndrŭ ka ndima njí kpa njí ro. c Bbò mbudha dhi saa na, wazee dho ri si ngani ndima é nga nǎ do ro ndiro ndima rrnga chutsoddadha dho d’e njati ri si rili kpa tsu hatari na ma ró. Loroji na, njaro le ka le jari ko dho ko d’ra lod’idha dhi li tso o ná imba inga le ka le ja ko ka ko njí ná lo ndiro ko si gø Gogu dhi Magogu si ta ná li nǎ d’e.​—Eze. 38:18; Ufu. 16:21.

14. Gideoni dho ká ri singʉe kpakpa ndi é ngatsovedha na addudho?

¹⁴ Gideoni dho ringangʉeni ndi njinjí kpakpanga na ndiro ndi njí lod’idha dhi njí d’e. Midiani nǎ kpa ngʉ nganyi kuna ná saa na, Gideoni dingʉe kpa utso Yezreeli nǎ ngødja nǎ ro kpø Yordani dhi dda tso ro, njaro fønga ronga tso bí kʉ ná tsu kpari d’engʉe. (Amu. 7:22) Nde, Gideoni ká tøngʉeni tø Yordani tso ro? Nzá! Ngbà mai kpa njengʉeni nje ro, ke ma, ndidhó 300 ngʉe ná kpa ma na dingʉe kpa utso di dhé. Mwisho kpa singʉe Midiani nǎ kpa ro si ndirigoti kpa singʉe si kpa djolu.​—Amu. 8:4-12.

15. Nja saa na ká ri ka ndi é kpakpa muzee ve ngatso addudho?

 ¹⁵ Nja saa na muzee ka ndi mbu ndi bbo njeni nari bbai kutaniko nǎ ndrŭ ndirigoti ndidhó familia nǎ ndrŭ ronga ndi b’o nari djotsina. Fø di ná hali kana ká wazee ka ndima dyø Gideoni dhó loroji ngbaribbai?

16-17. Gideoni tsotso ká addu kongʉe ndiro ke é ngatsovedha na d’e, ndirigoti wazee ká ka ndima ú ngbá lo? (Isaya 40:28-31) (Anja ji maddi.)

¹⁶ Auri u Yova si kʉ ni li kpakpa. Gideoni ungʉeri u Yova ka ndi bbʉ kpakpanga bbʉ ndi dho ndirigoti Yova njingʉeri nji føri bbai. (Amu. 6:14, 34) Ddikpa saa na, Gideoni ma, ndi unakpa ma na dingʉe Wamidiani bbá aro kʉ ná pikpa utso ndima kó na nì mai fø pikpa ngʉ d’a ngamia djó ro. (Amu. 8:12, 21) Ro, Mungu kongʉe Waisraeli tsotso ro kpa løngʉe Wamidiani ndirigoti kpa singʉe si là djolu. Føri bbai Wazee ka ndima li ndima thí Yova djo, dhonalo ke kʉ “nzɨ ro adi njeni ná ke ndirigoti nzɨ ndi adi ji ro d’i ro.” Ke si kpakpanga bbʉ kpa dho kpadhó lo uri ná saa na.​—Azø Isaya 40:28-31.

¹⁷ Akonja Matthew dhó loroji, Hopitale dhi lo djó nga adi nja ná Komite nǎ ddike ndi kʉ ro. Ke tsotso ká addu kongʉe ndiro ke ve ngatso d’e? Matthew pori: “Ma bangʉe Yova d’ra Wafilipi 4:13 nǎ ná kpakpanga. Bí ina ma di ma mbu nzá ka ndi njí addu maddi nari bbai ró, ma adi kpakpanga nzǐ Yova tso ndiro ma kó ma djoi tsotso d’e. Fø saa na, ma adi ma mbu b’lo ba kpakpanga Yova dhó roho takatifu chulu nari bbai, nari adi ma tsotso kó ma é ngatsovedha na.” Gideoni bbai, wazee adi njínji kpakpanga na ndiro ndima b’o Yova dzá ndrŭ ronga d’e nga mai rie sʉsʉ krʉ ddo ró ro. Bbʉbbʉ dhé, ringani kpa é kiasi na ndirigoti ndima churi nari kʉ ndima nzá ka ndima njí ritsi krʉ ddo ró ndima jiri nari bbai dhé ri. Kpa ka ndima uri nari kʉ, Yova si ndima tsotsokodha ndima nzǐ nari rr nì ndirigoti ke si kpa li kpakpa kpa é ngatsovedha na d’e.​—Zb. 116:1; Flp. 2:13.

18. Dʉ chu nǎ, wazee ká ka ndima dyø Gideoni dhó loroji ngbaribbai?

¹⁸ Wazee ka ndima ba somo bbo Gideoni dhó loroji nǎ ro. Ringani wazee é kiasi na ndirigoti nyenyenga na ddikpa njí tso kpa u ndima njí nari kana ndirigoti ndrŭ di chelo ti kpa djo inga ndrŭ di kpa má ma kpa nji ná njí kana ró. Ringani kpa é nì ndima ngarr ro ndirigoti nga nǎ do ro bbo pli, ɨ dz’ dzá mwisho si chøchø nari dho. Ndirigoti ringani kpa uri u nari kʉ njati rie ngbǎ di ná kpakpalo tso ró ma ndima hwini ri ró, Mungu ka ndi bbʉ kpakpanga ngbà kpa dho. Bbʉbbʉ dhé, ko adi mbai po bbo kpakpanga na adi chembø ronga b’o ná fø kpa dho ndirigoti ko “adi ra anzi fø kpa dho ko heshima bbʉ nari na.”​—Flp. 2:29.