1-2. Zaburi 25:14 ridho nari bbai, ri ká ngani ko njí ngbá lo njati ko jiri ko kana kau é chøchø Yova na ró?

 NI KÁ riddi ndiro ni kana kau é kpakpa ddikpa le na d’e ri uri ni é ngbá sifa na? Njaro ni ka ni pori, bblo kʉ ná bbakau adi jidha dhǒ ndima kana ndirigoti kpa adi ndima tsotso kó ko. Do le nji ná føri kʉ bbo na mana kʉ ná sifa nja le kana kau é kpakpa d’e ná føri djo nzá ni d’erie nga ro ddi njaro ri. Nì mai ri kʉ føro, kodhó i lo dyʉ ndi ró ná andiko ridho nari bbai, ngbà jiri ndima kana kau é chøchø Yova na ná ndrŭ dho ringani ndima “njí ke do.”​—Azø Zaburi 25:14.

² Rie sese inga bicha ma ko njinjí Yova dho ri ró, ringani ko ra anzi bblo kʉ ná chu nǎ ko Yova do nji nari na. Nde, Mungu do le nji nari na mana ká kʉ addu? Ko ká ka ko chu Yova do le nji nari ngbaribbai? Ndirigoti ko ká ka ko ba ngbá somo Obadia ma, Bbò Kuhani Yehoyada ma, Pi Yoashi ma na dhó lo nǎ ro Mungu do le nji nari djo?

3. Ad’ra ngbaribbai ma do ko nji nari ka ndi b’o ko ronga nari

³ Ko adi do nji njati ko njari ko ka ko bani che ka ndi njí ko ná lo na ró. Føri kʉ bblo kʉ ná do dhonalo ri ka ndi liri ko vʉ lonanga bblo. Bʉ ko bʉni nari do ko nji nari adi rili nzɨ ko bbi bʉ nǎ ro ko ka ko bʉni ná ngalu. Ko ronga ka ndi vo nari do ko nji nari adi rili ko nyi hatari kʉ ná lo tso nyi. Ko kana kau ko sa ji ko ji ná le na nari do ko nji nari dho ko nzá ka ko po inga ko njí nga kʉ bblo ná lo ri.

4. Shetani ká adi riji ko njí Yova do ngbaribbai?

⁴ Shetani adi riji ndrŭ di Yova do nji nga kʉ bblo ná chu nǎ. Shetani dhó ngaddidha e Elifazi pongʉe ná i lo bbai: Mungu e thø na krʉ ddo ró, ke adi riji ndi bbʉ malipizi ko dho ndirigoti ko nzá ka ko bbʉ hwè ro ke thí dho ri. (Yob. 4:18, 19)  Shetani adi riji ko njí Yova do bbo ndiro ko bba ke dho ko njínji nari tso bba d’e. Nja ko si fø lo djolu d’e ringani ko chu ngbaribbai ma ko ka ko njí Yova do bblo kʉ ná chu lu nari.

5. Mungu do le nji nari na mana ká kʉ addu?

⁵ Bblo kʉ ná chu lu Mungu do nji ná le jirie ke ji, le nzɨ adi riji ndi njí sa ka ndi sa ndima kana kau ke na ná lo ri. Yesu ngʉ adi “Mungu do nji” føri bbai. (Ebr. 5:7) Ke ronga ro nzɨ ngʉ adi tata Yova do dho ri. (Isa. 11:2, 3) Føri rɨngana, ke jingʉe Yova bbo ndirigoti ke jingʉeri ndi rrnga ke dho. (Yoh. 14:21, 31) Yesu bbai, ko adi heshima bbʉ bbo ke dho dhonalo ke e jidha na, nyodyu na, chølo na, ndirigoti kpakpanga na. Føri goti ko churieri Yova ji ko bbo ndirigoti ke adi ko ká ngarr ndi ddi ko dho ná lo dho nì ma nari njanja. Njati ko rrnga Yova dho ngbà ró ke thí adi hwè ba, ro ko rrnga ke dho nzá ró ke adi njedha ba.​—Zb. 78:41; Mez. 27:11.

6. Mungu do njidha ko ka ko chu lu ná ddikpa ri ká kʉ ngbá chu? (Zaburi 34:11)

⁶ Ko nzɨ adi gøni gø Yova do njidha na ri, ringani ko chu ngbaribbai ma ko ka ko nji ke do nari. (Azø Zaburi 34:11.) Fø ko ka ko njiri ná ddikpa chu kʉ nononi ná ritsi ko nja nari chu lu. Mungu dhó nyodyu ma, kpakpanga ma, ke dhǒ ko dho ná jidha ma na ko di nja ke “no ná ritsi” chu lu nari si rili ko bbʉ heshima ke dho ndirigoti ko ji ke bbo. (Ro. 1:20) Adrienne ró dho kʉ ná le-ve pongʉeri, “Yova dhó nyodyu ma di nja ke no ná ritsi chulu ró, ma nanga adi keni bbo ndirigoti føri adi ma tsotso kó ma churi nari kʉ ke chu bblo kʉ ma dho ná lo chu.” Le ngʉ adi ngaddi bbo fø lo djo nari lingʉeri le po i lo, “Ma nzá ka ma ji ma njí ko kana kau ka ndi sa Yova na ná lo ro ri.” Aba saa ro i yenga ddo kana ndiro ni ddinga Yova no ná ritsi ro djo d’e. Fø ni rinji nari ka ndi liri ni dhǒ heshima ma, jidha ma na bbo Yova dho.​—Zb. 111:2, 3.

7. Sala ká adi ko tsotso kó ngbaribbai ndiro ko di Yova do nji bblo kʉ ná chu nǎ d’e?

⁷ Mungu do njidha ko ka ko chu lu ná nja chu kʉ sala ko nji krʉ ddo ró nari. Ko di sala nji bí ina ró, ko adi Yova chu bblo pli. Ko di rinzi Yova bbʉ kpakpanga nja ko ve mbudha tso d’e ná saa na, ko adi ngbá ngatsi ma ke kʉ kpakpanga na nari ngano. Ko di mbai po ke bbʉ ndidhi Dduna ko dho kado nari dho ná saa na, ko adi ngbá ngatsi ma ke jirie ko nari ngano. Ko di rinzi Yova kó ko tsotso kpakpalo na ko kʉ ná saa na ró, ko adi ke kʉ nyodyu na bbo nari ngano. Fø di ná sala adi rili ko bbʉ heshima bbo Yova dho ndirigoti nzɨ ko nji sa ka ndi sa ko kana kau ke na ná lo.

8. Ko ká ka ko njiri ngbǎ ndiro nzɨ ko bba Mungu do ko nji nari tso ró?

⁸ Ko ka ko di Mungu do nji, njati ko di Biblia zø na ná kusudi é ko ba somo ri nǎ kʉ ná bblo lo ma, che lo ma na nǎ ro ró. Akotilo chi tøngʉeni Yova dho ná aro kʉ ná kpa djo. Føri ngʉe Pi Ahabu bbá dza nǎ ritsi djó nga ngʉ adi nja ná ke Obadia ma, Bbò Kuhani Yehoyada ma na. Føri goti ko si Yuda nǎ Pi Yehoashi dhó lo nǎ ro ko ka ko ba ná somo nja, bba ndi bbangʉe Yova dho ndi njínji nari tso luti ro.

9. Obadia ngʉ adi Mungu do nji nari ká kongʉe ke tsotso ngbaribbai? (1 Wafalme 18:3, 12)

⁹ Obadia b djo Biblia tilo ya kwanza ná ngana ri pori, “Obadia ngʉ adi Yova do nji  bbo pli.” (Azø 1 Wafalme 18:3, 12.) Obadia ngʉ adi Mungu do nji nari ká kongʉe ke tsotso ngbaribbai? Ya kwanza, føri lingʉeri ke é chi kʉ ná ke ndirigoti ngbà djo le ka le li le thí ná ke, føri dho pi lingʉe ke ndibbá dza nǎ ritsi djó nganjadha dho. (Anja Nehemia 7:2.) Obadia ngʉ adi Mungu do nji nari lingʉeri ke é nga nǎ do kʉ ná ke, føri i kʉ kedhó lo ungʉe ná sifa. Ke ngʉe che ngʉe ná Pi Ahabu dhó pidhinga tsena, “che pli ngʉe ná lo ndi njingʉe Yova nyo djó anziro ngʉe ná [pikpa] djolu ro.” (1 Fa. 16:30) Føri kina, Ahabu bbá Baali ngʉ adi má ná le Yezebeli ndrongʉe Yova bbo nari dho le mbungʉeri ndi si bbʉbbʉ madha si ndidhó pidhinga nǎ arønga laidjó ro. Le chengʉe Yova dhó bí ngʉe ná bbanabi che. (1 Fa. 18:4) Bbʉbbʉ dhé, Obadia ngʉ madha bbʉ Yova dho kpakpa lo tso o ná saa na.

10. Obadia ká dhongʉe ndi kʉ nga nǎ do ro nari bbo pli ngʉe ná ngbá chu na?

¹⁰ Obadia ká dhongʉe ndi kʉ nga nǎ do ro nari ké dho le nanga keni ná chu nǎ ngbaribbai? Yezebeli ngʉ rine ndi che Mungu dhó bbanabi ná saa na, Obadia dzingʉe 100 kʉ ná kpa ndirigoti ke rungʉe kpa dju na aro kʉ ná kikundi lu, “ddikpa kikundi nǎ kpa ngʉe 50 ndirigoti ke ngʉ adi mukati ma, dda ma na bbʉ kpa dho.” (1 Fa. 18:13, 14) Nga nǎ do ngʉe ná ke Obadia utso le d’ie d’i ró, le ka le hwie ke hwi. Bbʉbbʉ dhé, Obadia do ngʉ nji ndirigoti ke nzá jingʉeri ndi dhe ri. Ro, Obadia jingʉe Yova ma, ke dho njínji ná ndrŭ ma na pli ndi nganga dhó shinga djolu.

11. Njʉ ká Yova dho njínji ná ndrŭ adi ndima kʉ Obadia bbai nari dhǒ ngbaribbai? (Anja ji maddi.)

¹¹ Njʉ Yova dzá bí kʉ ná njí dhi kpa di gʉ kodhó njí gʉni ná ngø nǎ. Kpa adi heshima bbʉ bbobbonga na kʉ ná kpa dho, ro Obadia bbai, ji dhi fø le-djoi ma, le-vei ma na adi Yova dho ndima madha bbʉ nzɨ nari gʉgʉ. (Mt. 22:21) Kpa adi ndima Mungu do nji nari dhǒ ke dho ndima ngarr nari chulu ndrŭ dho ndima rr e nga nari rɨngana. (Mdo. 5:29) Fø lo kpa adi dhǒ anzi ndima ra lo ndima d’ra ndirigoti njudha ndima nji gbʉ nari chulu. (Mt. 10:16, 28) Kpa adi klø nji ndiro ndima bbʉ le-djoi ma, le-vei ma na dhó lo u ná kiroho nǎ nyo kpa dho d’e. Akonja Afrika nǎ gʉ kodhó lo gʉngʉeni  ddikpa saa na ná ngana kʉ ná le-djo Henri dhó loroji. Fø saa na, Henri bbʉngʉe ndi ndi rá kiroho nǎ nyo bbʉ ndi lai Wakristo dho. Ke ndingʉeri: “Ma do adi nji bbo. Føri dho ma uri u ri kʉ Yova dho ma ngʉ heshima bbʉ bbo nari i lingʉeri ma é nga nǎ do ro madhó lo ungʉeri nari bbai ri.” Ni ká dhorie ni ro nga nǎ do kʉ ná ke Henri bbai b’lo? Ri ka ndi kaka njati ni di Mungu do nji bblo kʉ ná chulu ró.

12. Bbò Kuhani Yehoyada ma, ndibbá le ma na ká dhongʉe ndima tøni chi Yova dho bbo pli kʉ ná chu nǎ nari ngbaribbai?

¹² Bbò Kuhani Yehoyada ngʉ adi Yova do nji ndirigoti fø do chongʉe ke ndi tøni chi ndirigoti ndi cho nja ndrŭ ronga ndima gba ndima tso bbʉbbʉ madha na. Fø lo njangʉeni pʉlʉpʉlʉ Yezebeli dzá singba ngba Atalia dhʉngʉe Yuda nǎ pidhinga ná saa djo. Føri dho ndrŭ ka ndima njíe Atalia do ngbà. Le tsɨ sangʉeni bbo ndirigoti le jingʉeri ndi nyó pi nari dho le chengʉe pi dza nǎ ndi nganga dzá nzø che. (2 Ny. 22:10, 11) Ro, fø nzø kana Yehoashi gøngʉe Yehoyada bbá le Yehoshabeati b’ongʉe ndi ronga nari dho. Le ma, ndibbá ke ma na rungʉe ngba ndirigoti kpa b’ongʉe ngba ronga b’o. Fø chu lu Yehoyada ma, Yehoshabeati ma na b’ongʉe Daudi nǎ pi ngʉ si nyo ná gø ronga. Yehoyada ngʉ adi tøni chi Yova dho ndirigoti ke nzá bbangʉeri ndi ronga tá Atalia do dho ri.​—Mez. 29:25.

13. Yehoashi dhó cho singʉe 7 ro ká Yehoyada dhongʉe ndi tøni chi nari ki ngbaribbai?

¹³ Yehoashi dhó cho singʉe 7 ná saa na, Yehoyada dhongʉe ndi tøni chi Yova dho nari ki vi dhé. Ke kpengʉe ddikpa lo. Njati fø lo bbie bblo ró, Daudi bbá bbu nǎ haki na kʉ ná ngba Yehoashi ka ndi ngʉe pi. Ro, ri sie bblo nzá ró, Yehoyada ka ndi vie ndidhó shinga vi. Yova dhó ledha chulu, fø lo bbingʉe bblo. Yehoyada tsotso nja bbobbokpa ma, Walawi ma na kongʉe nari chulu Yehoashi ngʉngʉe pi ndirigoti Atalia le hwingʉe hwi. (2 Ny. 23:1-5, 11, 12, 15; 24:1) Føri goti Yehoyada “njingʉe koddo Yova ma kana pi na ndirigoti ndrŭ na, nari kʉ kpa ka ndima rae anzi Yova dzá ndrŭ ndima kʉ nari na.” (2 Fa. 11:17) Yehoyada “lingʉe dzaitso ronga b’o ná kpa maddi Yova dzá dza tso ro ndiro nzɨ nzá tse krʉ lo kana ná le tsu ró.”​—2 Ny. 23:19.

14. Yehoyada ká bangʉe heshima ngbaribbai ke bbʉngʉe heshima Yova dho nari dho?

¹⁴ Anziro Yova pongʉeri: “Ma dho heshima bbʉ ná le dho ma si heshima bbʉ.” Bbʉbbʉ dhé, ke lengʉe Yehoyada ronga le. (1 Sa. 2:30) Loroji na, ke lingʉeri bbò kuhani njingʉe ná fø lo ndini Biblia na ndiro ri ddi longa ko dho d’e. (Ro. 15:4) Ndirigoti Yehoyada dhengʉe ná saa na, le bbʉngʉe bbo pli kʉ ná heshima ke dho “Daudi dhó bba nǎ pikpa le ngʉ adi d’ø nanga na le d’øngʉe ke nari chulu, dhonalo ke njingʉe bblo lo Izraeli nǎ, bbʉbbʉ Mungu ma, Kedhó dza ma na laidjo.”​—2 Ny. 24:15, 16.

15. Yehoyada djo le ti ná lo nǎ ro ká ko ka ko ba ngbá somo? (Anja ji maddi.)

¹⁵ Yehoyada dhó loroji ka ndi kó ko tsotso ko chu ngbaribbai ma ko ka ko njí Mungu do nari nga. Wazee ka ndima dyø Yehoyada kutaniko ronga ndima b’o ná chu ndima ne nari chulu. (Mdo. 20:28) Ngó ndrŭ ka ndima ba Yehoyada dhó loroji nǎ ro ná somo kʉ, kpa di Yova do nji ndirigoti kpa di tøni chi ke dho ró, ke si ndi pi ná lo nji kpa chulu. Ke nzá bba ngó ndrŭ ro bbari. Jadda kpa ka ndima ba somo Yova njingʉe Yehoyada dho ná lo nǎ ro ndirigoti kpa ka ndima dyø ke heshima ndima  bbʉ chi tøni ná ngó ngʉ ná ndrŭ dho nari chulu, pli siri bicha njinjí Yova dho ná kpa. (Mez. 16:31) Ya mwisho, ko krʉ ka ko ba somo Yehoyada tsotso kongʉe ná bbobbokpa ma, Walawi ma na dhó loroji nǎ ro. Akoko ko dho “chutso ddá ná kpa tsotso” nga ko rr kpa dho nari chulu.​—Ebr. 13:17.

16. Yehoashi ngʉe pá kʉ ná ke nari ká ngbá lo dhǒ?

¹⁶ Pi Yehoashi tsotso Yehoyada kongʉe ndiro ke é bblo kʉ ná pi d’e. (2 Fa. 12:2) Føri dho, fø saa na jadda pi jingʉeri ndi njí Yova nyǒ tho ná lo. Ro, b’lo Yehoyada dhe nari goti Yehoashi rrngʉe nga tsatsa ná bbobbokpa dho. Fø lo nǎ ro ká ngbá lo singʉe? Ke ma, ndidhó raia ma na “ngangʉe takatifu tsu ma, sanamu ma na madha tso.” (2 Ny. 24:4, 17, 18) Yova thí ronga fø lo vongʉe bbo nari dho, ke “ngʉ adi bbanabi cho kpa dhi ngana ndiro kpa ngʉ ndi ro d’e . . . ro, kpa gʉngʉe nga ndima rr nari gʉ.” Kpa nzá rrngʉe Yehoyada dzá ngba Zekaria maddi ri, fø ke nga ngʉe Yova dhó nabi ndirigoti kuhani dhé ri, ro ke ngʉe Yehoashi dhó sangazi dzá ngba maddi. Føri dho, Pi Yehoashi hwingʉe Zekaria hwi ngbà mai Zekaria abba ndrŭ gøngʉe ndidhó shinga ro.​—2 Ny. 22:11; 24:19-22.

17. Luti ká Yehoashi dhó lo dingʉe ngbǎ?

¹⁷ Yehoashi nzɨ ngʉ adi Yova do nji bblo kʉ ná chu nǎ ri ná føri dho kedhó lo nzá bbingʉe bblo ri. Yova pongʉeri ɨ: “Ddikpa ke be ma pá ró ma si ndi ke be pa.” (1 Sa. 2:30) Sese dhé ngʉe Siria nǎ ná bbasødda  singʉe si Yehoashi dhó “bí ngʉe ná bbasødda djolu” ndirigoti kpa “vongʉe ke ronga bbo pli.” B’lo Siria nǎ kpa ra nari goti Yehoashi dhó njí dhi kpa hwingʉe ke Zekaria ke hwi nari djó. Ndrŭ njangʉeri nari kʉ che ngʉe ná fø pi nzá le ka le d’øe “pikpa le ngʉ adi d’ø ná ngana maddi ri.”​—2 Ny. 24:23-25; anja “Barakia dhi dduna” djó lo nanga le tu Matayo 23:35 nǎ nari.

18. Yeremia 17:7, 8 ridho nari bbai, ndiro nzɨ ko njini Yehoashi bbai ró, ká ringani ko njí ngbá lo?

¹⁸ Ko ká ka ko ba ngbá somo Yehoashi dhó loroji nǎ ro? Ke ngʉe ddiddi nzá tɨtɨ tsu da dz’ nǎ ná tsu bbai ndirigoti nja tsu ró le dyʉ ndi ro. Ke tsotso ngʉ kó ná ke Yehoyada dhengʉe ná saa djo ke ngangʉe tsatsa udha ró ná kpa dhó lo rrdha tso. Ndirigoti ke bbangʉe Yova dho ndi tøni chi nari tso bba. Fø loroji ngaddi ko dho nari kʉ ri nzá ngani ko di Mungu do nji kodhó familia inga kutaniko nǎ nja ndrŭ bblo kʉ ná loroji dhǒ ko dho nari dho dhé ri. Nja ko é kpakpa kiroho nǎ d’e, ringani ko é jidha ma, heshima ma na na bbo Mungu dho krʉ saa ró ko ngazø nari ma, bbo ko longa ne nari ma, sala ko nji nari ma na chulu.​—Azø Yeremia 17:7, 8; Kol. 2:6, 7.

19. Yova ká ngbá lo nzǐ ko tsó?

¹⁹ Yova nzǐ ko tsó ná lo ro nga kʉ bí ri. Ke nzǐ ná lo bani Muhubiri 12:13 nǎ, ɨ ndi pori ro: “Anji bbʉbbʉ Mungu do ndirigoti ab’o kedzá yadha ronga, dhonalo føri i kʉ ndrŭ dho ringani ndima njí ná lo krʉ.” Njati ko di Mungu do nji ngbà ró, ko si sisi gosi ná saa djo ko si bani na ná mbudha djolu ndirigoti ko si tøni kpakpa Obadia ma, Yehoyada ma na bbai. Yova na kʉ ko kana ná kau si sa ná lo ro nga sie ddikpa maddi ri.