1. Zaburi 18:46 nǎ ká Daudi ddi Yova addu na?

 KO DI djó ná i dz’ djó ko ka ko bani nzá djo ko ddinga ná kpakpalo na nari ka ndi ngʉ kodhó maisha kpakpa inga ri ka ndi ø kodhó maisha thika krʉ ma ngbà dhé. Ko ka ko ne ko tsotsokodha Yova Mungu dhó ro ná føri dho ko adi mbai po! Anziro da ná lo nǎ, le noenga ko dho nari kʉ Yova kʉ shi di ná Mungu ndirigoti ke e tayari dhé ko tsotsokodha dho. Njati ko ba kedhó nga tsotsokodha ró, føri adi ridho ko dho nari kʉ, “Yova kʉ shi!” (Azø Zaburi 18:46.) Ro, Mungu kʉ shi nari ndi po nari goti Daudi nzingʉe Mungu “madzá bbó Dju.” Nde, Daudi ká ddingʉe Mungu nga kʉ shi ná ritsi na addudho?​—Føri na mana ká kʉ addu?

2. Daudi nzingʉe Yova ‘madzá bbò Dju’ ná føri djo ká ringani ko chu lo addudho?

² I lo nǎ, ko si addudho ma le nzi Yova bbò dju nari ma, føri ká ngbá lo ngaddi ko dho nari ma na nja. Føri goti, ko si ngbá chu nǎ ma ko ka ko nja ke kodhó bbò Dju bbai nari nja. Lotso dyadha dho, ko si loti ngbaribbai ma ko ka ko dyø Yova dhó fø sifa nari djo.

YOVA KÁ LE NZI BBÒ DJU ADDUDHO?

3. Biblia ká njínji le ripo “bbò dju” ná fø lo na thɨ ina? (Anja ji.)

³ Biblia adi Yova ddi “bbò dju” na ndiri na ndi kó ko tsotso ko famu kedhó nja sifa d’e. Bí ina, rie Mungu dhó bblo pli kʉ ná sifa djotsina kedzá njí dhí ndrŭ madha bbʉ kedhó ri ró, kpa adi ke ddi bbò dju na Biblia nǎ. Ya kwanza le nzi Yova “bbò Dju” Kumbukumbu la Torati 32:4 nǎ. Ndidhó sala nǎ Hana pongʉeri “kodhi Mungu bbai kʉ ná bbò Dju ro nga kʉ ri.” (1 Sa. 2:2) Habakuki nzingʉe Yova “madzá bbò Dju.” (Hab. 1:12) Zaburi 73 ndi ná ke nzingʉe Mungu “ma thí dzá bbò dju.” (Zb. 73:26) Ndirigoti Yova nganga ma adi ndi nzi bbò dju ddi. (Isa. 44:8) Akotilo bbò dju bbai Yova adi ndi dhǒ lu ná 3 kʉ ná sifa djo ndirigoti ngbaribbai ma ko ka ko ngʉ ke “kodhó bbò Dju” nari djo.​—Kut. 32:31.

4. Yova ká kʉ nga le nyi ná nga ngbá chu nǎ? (Zaburi 94:22)

 ⁴ Yova kʉ nga le nyi ná nga. Bbò dju adi le ronga b’o vʉvʉ ma, dji ma na ró nari bbai, Yova adi ko ronga b’o kpakpalo na ko di bani kodhó maisha nǎ ná saa na. (Azø Zaburi 94:22.) Ke adi ko tsotso kó ko b’o ko kana kau ronga ndi na ndirigoti ke ripo ko dho njʉ ko bani na ná kpakpalo si sini si. Føri kina ke tsoni ko dho nari kʉ ndi si ko nanga d’o ná lo ma, nza ko nzani dho ná lo ma na krʉ sisi gosi ná saa djo.​—Eze. 34:25, 26.

5. Yova ká ka ndi ngʉ nga ko nyi ná nga ngbaribbai?

⁵ Yova ko ka ko ngʉ nga ko nyi ná nga lu ná ddikpa chu kʉ, nga ko nzi ke tsó nari. Nga ko nzi ndi tsó ná saa na, Yova adi “Mungu dzá ngoi” bbʉ ko dho, ná føri adi ko thí ma, kodhó ngaddidha ma na ronga b’ob’o. (Flp. 4:6, 7) Anja Artem dalu ná lo, ke le sʉngʉe prizo na ndidhó udha djó. Prizo nǎ kpa ngʉ adi ngadhu ke tso bí ina, kpa ngʉ adi ke nzanza ndirigoti kpa ngʉ adi rimbu ndima tá do ke na. Artem pori “Nga kpa si dhu ma tso ná saa na ma ngʉ adi njedha ba bbo. . . . Ma ngʉ adi sala nji krʉ ddo ró. Ma ngʉ adi rinzi Mungu kó ma tsotso ma é ngoi ma, nyodyu ma na na. Nì mai kpa ngʉ ma nzanza ro ma dingʉe ko ma jotso ko ro. . . . Yova dhó nga tsotsokodha chulu, ma ngʉ ma mbu ddikpa bbò dju goti runi nari bbai.”

6. Krʉ ddo ró ká ko ka ko li ko thí Yova djo dhé addudho? (Isaya 26:3, 4)

⁶ Yova kʉ ngbà djo le ka le li le thí ná ke. Nzá ro ka ndi tuni ndi kʉ ná nga nǎ ro ná bbò dju bbai, Yova e krʉ ddo ró tayari ko tsotsokodha dho. Ko ka ko li ko thí li ke djo dhonalo ke kʉ “cho ró nŭnŭ di ná bbò Dju.” (Azø Isaya 26:3, 4.) Ke kʉ nzɨ dhe ná ke nari dho ke si ndi tsoni djo ná lo njinji, ke adi kodhó sala rr ndirigoti ke adi ko tsotso kó kodhó lo u ná ritsi na. Føri kina, ko ka ko li ko thí Yova djo dhonalo kʉ, ke adi tøni chi dhé ndi dho njínji ná ndrŭ dho. (2 Sa. 22:26) Ke nzɨ vi ko nji ndi dho ná longa ro ri, ndirigoti ke si ko kobe bbʉbbʉ dhé.​—Ebr. 6:10; 11:6.

7. Ko di ko thí li Yova djo ró ká ko adi ngbá faida ba? (Anja ji maddi.)

⁷ Ko adi rili Yova é kodhó bbò Dju ko thí nǎ ro krʉ ko ko thí li ke djo nari chulu. Ko uri u nari kʉ, njati ko di ngarr ke dho kpakpa lo tso o ná saa na ma krʉ ró, ko si faida ba. (Isa. 48:17, 18) Krʉ saa ró ke ko tsotso kó nari ko di nja ró, ko adi ko thí li bbo ke djo. Føri kina, ri adi rili ko uri u nari kʉ, ri kʉ Yova dhé ka ndi kó ko tsotso ko ve ngatso ri, rié ngbá ngatsi ma kpakpalo tso o li ri ró. Bí ina, rié nga ko tsotso ko ná ndrŭ ro kʉ ri ró, ko adi ri famu nari kʉ Yova dhé kʉ li djo le ka le li le thí ná ke. Vladimir pori “Prizo nǎ ma ngʉe ná saa na ma ngʉ adi ma mbu chøchø bbo Yova ró, ma chungʉe bbo má ma thí li Yova djo nari dhonalo ma tsotso ka ndi koe nari ngʉe ke dhé.”

8. (a) Ko ká ka ko pori Yova ro nzɨ adi øni ri addudho? (b) Mungu kʉ kodhó bbò Dju ná føri nǎ ro ká ko adi faida ba ngbaribbai? (Zaburi 62:6, 7)

⁸ Yova ro nzɨ adi øni ri. Yova kʉ ddikpa  ngana di ná bbò dju bbai. Kedhó sifa ma, kedhó kusudi ma na thika ro nzɨ adi øni ri. (Mal. 3:6) Adamu ma, Eva ma na tsangʉe ndi ro ná saa na, Yova nzá øngʉe ndi pɨngʉe ndrŭ tsɨ dho ná lo thika ro ri. Mutume Paulo ndingʉeri nari bbai, Yova “nzá ka ndi gʉ ndi ro ndi ndiro ri.” (2 Ti. 2:13) Føri na mana kʉ njati addu ma njini inga ngbá lo ma nja ndrŭ njí ró, Yova nzɨ ø ndidhó sifa ma, ndi pɨngʉe ná lo ma, ndidhó yadha ma na thika ro ri. Yova ro nzɨ adi øni ri nari dho, ko uri u nari kʉ ke si ko tsotso koko kpakpalo dhi saa na ndirigoti ke si gosi ná saa djo ndi tsoni djo ko dho ná lo njinji.​—Azø Zaburi 62:6, 7.

9. Tatyana dalu ná lo nǎ ro ká ni ba ngbá somo?

⁹ Njati ko di ngaddi Yova dhó sifa ma, dz’ ma, ndrŭ tsɨ ma na dho ke kpe ná lo ma na djo ró, føri ka ndi kó ko tsotso ko li ko thí ke djo ndirigoti ko liri ke é kodhó bbò Dju. Føri kina, ri ka ndi liri ko jotso koko ndirigoti ko tøni chi ke dho kpakpalo na ko bani ná saa na. (Zb. 16:8) Fø lo dzá bbʉbbʉnga le-ve Tatyana njangʉe nja prizo na le sʉngʉe ndi ndidhó udha djó ná saa na. Le pori “Ma ngʉe ddiro, ya kwanza ringʉe kpakpa bbo ma dho. Bí ina ma ngʉe njedha na bbo.” Ro, luti le ngangʉe ngaddidha tso Yova ma, ndrŭ dho ke kpe ná lo ma na djo, ndirigoti le ddingʉe nga addudho ma ri kʉ bbo na mana kʉ ná lo ndi ve fø kpakpalo tso nari djo. Fø lo lingʉeri le jotso koko ndirigoti ri bbʉngʉe kpakpanga le dho nja le tøni chi d’e. Le pori: “Fø lo na ká ma bani addudho ma nari ma famu nari kongʉe ma tsotso ma nonga nari kʉ, ri kʉ Yova djotsina i ma fø kpakpalo ba ri. Føri kongʉe ma tsotso nzɨ ma di ngaddi bbo ma djo.”

10. Yova ká ka ndi é kodhó bbò Dju njʉ ngbaribbai?

¹⁰ Karrnga goti, ko si bani kpakpa bbo kʉ ná lo na, ná fø saa djo ri si ngani ko li ko thí bbo Yova djo anziro nga djolu. Føri dzá lo dho ri kʉ bbo na mana kʉ ná lo ko li kodhó udha kpakpa njʉnga djó ro dhé Yova djo ndirigoti ko uri u nari kʉ, ke si ko tsotso koko ndiro ko tøni chi d’e, rie ngbadi ná kpakpalo na ma ko bani ri ró. Nde, føri ká ko ka ko njí ngbaribbai? Azø Biblia nǎ kʉ ná lo ndirigoti njʉ Yova dzá Dimu dalu ná lo. Aneri ni nja ngbaribbai ma Yova dho ndi kpadhó bbò dju ndirigoti ke ko ndidzá njí dhi ndrŭ tsotso nari. Addinga bbo fø lo djo. Fø ni rinji nari ka ndi liri ni ngʉ Yova nidhó bbò Dju.

ADYØ YOVA DHÓ SIFA

11. Ko ká adi riji ko dyø Yova dhó sifa addudho? (Anja kisanduku “ Jadda le-djoi ka ndima li ndima nji ná muradi.”)

¹¹ Ko nja bbò dju bbai Yova adi ndi dhǒ ko dho chulu ná sifa ro b’lo. Kpadjo akonja ngbaribbai ma ko ka ko dyø kedhó fø sifa nari. Njati ko njí ko dho ka ná lo krʉ ko dyø Yova dhó sifa d’e ró, ko si ko djoi ma, ko vei ma na li kpakpa. Loroji na, Simoni ró dho Yesu nzingʉe Kefa (“Petro” le adi ndi nzi ro), fø dho na mana kʉ “Dju.” (Yoh. 1:42)  Føri na mana ngʉe ke sie kutaniko nǎ nja ndrŭ iso pɨ ná ke ndirigoti kpakpa nja ndrŭ dhó udha li ná ke. Kutaniko nǎ wazee le nzi “ddikpa bbò dju dhi sʉsʉ.” Føri ngbaribbai ma kpa adi kutaniko nǎ ndrŭ ronga b’o nari dhǒ bblo pli. (Isa. 32:2) Ro, ko krʉ ka ko li ko kpakpa ko kana njati ko di Yova dhó sifa dyø ró.​—Efe. 5:1.

12. Ko ká ka ko kó nja ndrŭ tsotso kpakpalo dhi saa na ngbaribbai?

¹² Ab’o ni djoi ma, ni vei ma na ronga kpakpalo dhi saa na. Chʉ adi ngaba ná lo ma, li dhi saa ma na na ko ka ko kó ko djoi tsotso ko ronga na. “Nga sini ná saa” tso gʉ ra che bbo nari bbai, ri si ngani bbo pli ko bbʉ ko djoi ma, ko vei ma na dhó lo u ná ritsi kpa dho. (2 Ti. 3:1) Føri kina ko ka ko pɨ ko djoi ma, ko vei ma na iso ndirigoti ko dhǒ kpadhó lo u ná jidha kpa dho. Fø ko ka ko njiri lu ná ddikpa chu kʉ, njudha dhi ngana kpa si ró ko loti kpa na ndirigoti ko kpa iso pɨpɨ nari. Føri kina, ko adi riji kutaniko é ji ndrŭ jini ndirigoti kpakpa ndrŭ ndima li ná nga. Ko di ná i dz’ djó bí kʉ ná ndrŭ tsɨ sani bbo, ndrŭ ro nzá jini ri, føri adi rili ko djoi ma, ko vei mana di ndima mbu che. Føri dzá lo dho, njudha dhi ngana ko djoi ma, ko vei ma na si ró, akonji ko dho ka ná lo krʉ ndiro ko li kpa kpakpa ndirigoti ko dhori kpa dho nari kʉ ko ji kpa ji.

13. Wazee ká ka ndima ko nja ndrŭ tsotso ngbaribbai kpakpalo dhi saa na? (Anja ji maddi.)

¹³ Wazee ka ndima kó le-djoi ma, le-vei ma na tsotso njonjo kʉ ná kpakpalo kana. Chʉ adi ngaba ná lo ma, dawa dhi kpakpalo ma na dhi saa djo wazee adi rikpe lele ndima kó ndima djoi ma, ndima vei ma na tsotso. Føri kina kpa adi chutsoddadha bbʉ Biblia nǎ ro ndirigoti kpa adi ndrŭ li kpakpa. Njati le-djoi ma, le-vei ma na ra ri utso d’i nari kʉ, ddikpa muzee adi loti bblo ndrŭ na, ke adi ndrŭ rr dhʉdhʉ, ndirigoti  ke adi rimbu ndi famu ngbaribbai ma ndrŭ ndima mbu nari ró, le-djoi si fø muzee dhi ngana ndima tsotsokodha ne nari e sʉsʉ. Fø di ná sifa adi rili nja ndrŭ mbu ndima ngbà le ji nari bbai, ndirigoti ri adi rili rié sʉsʉ kpa njínji wazee bbʉ ndima dho ná Biblia ró dyʉ ndi ná chutsoddadha na.​—1 Te. 2:7, 8, 11.

14. Ko djo ndrŭ ka ndima li ndima thí ngbà nari ká ko ka ko dhǒ ngbaribbai?

¹⁴ Aliri ndrŭ li ndima thí li ni djo. Ko adi riji nja ndrŭ li ndima thí li ko djo, bbo pli kpakpalo dhi saa djo. (Mez. 17:17) Nde, ko ká ka ko njiri ngbǎ ndiro nja ndrŭ di ndima thí lili ko djo d’e? Ringani ko njí kpakpanga ko di Mungu dhó sifa dhǒ krʉ ddo ró, loroji na, ko tsoni djo ná lo ko nji nari ma, saa ronga ko b’o nari ma na chulu. (Mt. 5:37) Inga ddikpa le dhó lo u le tsotsokodha ró, ko ka ko kó le tsotso ko. Føri kina, akodi kpakpanga nji ko njí kutaniko nǎ le bbʉ ko dhona ná njí ko ba ná chutsoddadha dhori nari nganga bbai.

15. Njati wazee é ngbà djo le ka le li le thí ná kpa ró, ká kutaniko adi faida ba ngbaribbai?

¹⁵ Li djo le ka le li le thí ná wazee adi rili kutaniko ba faida. Ká ngbaribbai? Njati le-djoi ma, le-vei ma na churi ndima ka ndima nzi wazee ndima dhó lo u le tsotsokodha ná saa na ró, føri adi rili nzɨ ri d’o kpa nanga bbo. Føri kina, njati wazee é tayari le-djoi tsotsokodha dho ró, kpa adi ndima mbu ji le ji nari bbai. Ndirigoti njati wazee bbʉ ná shauri di ndi dyʉ Biblia ma, chi  njí dhi noke dhó vichapo ma na ro ndima dhó nganjadha ndima bbʉe nari rɨngana ró, kpa lai Wakristo adi ndima thí lili kpa djo. Godhé, le-djoi ma, le-vei ma na adi ndima thí lili nzɨ ra ndima dhó siri dhi lod’ra nja ndrŭ dho ndirigoti nì ndima dhó tsodha ró njínji ná wazee djo.

16. Ko ma, nja ndrŭ ma na ká adi faida ba ngbaribbai Yova nyǒ djó kʉ chø ná lo ko nji nari nǎ ro?

¹⁶ Krʉ ddo ró, adi chø kʉ Yova nyǒ djó ná lo nji. Njati ko di ngarr Yova dho krʉ kʉ ná lo kana ndirigoti ko di lonanga vʉ Biblia nǎ yadha ró ro ró, ko sie bblo kʉ ná loroji nja ndrŭ dho. Ko di Mungu dzá lo zø ndirigoti ko di kodhó udha li kpakpa Yova djo ró, ko si tøni chi ke ma, kedhó yadha ma na dho. Ri sie sʉsʉ ko d’i kali dhi mafundisho ma, nzá tso gbani Yova dhó ngaddidha na ná lo ma na utso ndirigoti ko nzá ka ko njí fø di ná lo ri. (Efe. 4:14; Yak. 1:6-8) Yova ma, kedhó tsodha ma na djo ko kʉ na ná udha adi rili ko jotso ko ko che kʉ ná imba ko ba ná saa djo. (Zb. 112:7, 8) Føri kina, ri ka ndi kaka ko kó kpakpalo na bani ná ndrŭ tsotso.​—1 Te. 3:2, 3.

17. Addui ká ka ndi kó wazee tsotso ndima di bblo lo nji d’e?

¹⁷ Wazee dho ringani ndima é kiasi na ndima nji ná lo kana, bblo ndima ngaddi ro, bblo ndima lo kpe ro. Fø kpetsi kpa adi nja ndrŭ tsotso kó ndima jotso koko ndirigoti ndima é kpakpa kʉ ná udha na Yova djo “kpakpa ndima chini udha dhi lo na” nari chulu. (Tit. 1:9; 1 Ti. 3:1-3) Ndima dhó loroji ma, ndrŭ ronga ndima bé nari ma na chulu, wazee adi wahubiri tsotso kó ndima si krʉ ddo ró njudha ma, lod’radha dhi njí ma na dhi ngana ndirigoti kpa zø Biblia krʉ ddo ró. Njati le-djoi ma, le-vei ma na nanga ri di d’od’o ró, wazee adi ngano kpa dho nari kʉ, kpa li ndima thí Yova ma, ke nji ná tsodha ma na djo.

18. Ko ká adi riji ko má Yova ndirigoti ko ndrini chøchø ke ro addudho? (Anja kisanduku maddi “ Chøchø le ka le ndrini Yova ro ná chu.”)

¹⁸ B’lo ko ddinga Yova dhó bblo pli e ná sifa djo nari goti, ko ka ko pori Pi Daudi bbai: “Abbari Yova, madzá bbò Dju, mani ma.” (Zb. 144:1) Ko ka ko li ko thí krʉ ddo ró Yova djo. Ngó ma ko ngʉ ró, ko uri u ke si ra anzi dhé ko tsotso ndi kó ko kana nga é chøchø ndi na d’e nari na. Ndirigoti ko si ripo: “Ke kʉ madzá bbò Dju.”​—Zb. 92:14, 15.