Kodhó lo zø ná kpa adi dhu ná lo
Zaburi 12:7 nǎ kʉ ná lo ripo “Ni si kpa ronga b’ob’o.” Fø lo ká loti (verse 5) tilo djo ná “vodha dhi ndrŭ” djo inga (verse 6) tilo djo ná “Yova tso nǎ lo” djo?
Fø verse nǎ kʉ ná lo ridho ri loti ndrŭ djo.
Zaburi 12:1-4 nǎ, ko rizø “chi tøni ná ndrŭ tso dyani dya che kʉ ná ndrŭ kana ro.” Ndirigoti Zaburi 12:5-7 nǎ ke pori ɨ.
“‘Vodha dhi ndrŭ nzani nza nari dho,
Njedha dhi ndrŭ hø nzadha tsena nari dho,
Ma si tøni lo njidha dho, Yova pori.
‘Ma si kpa gø pá kpa be ná ndrŭ thó thi ro.’
Yova tso nǎ lo kʉ tse ndi tse ro;
Fø lo kʉ ddiddi dz’ na le thɨ ná furu nǎ kʉ ná bbò kazz na le bɨ ná feza bbai, 7 ina le bɨ ndi ro.
Ni si kpa ronga b’ob’o, Ee Yova;
Ni si kpa ronga b’o krʉ ddi ddiro i ndrŭ tsɨ ró theinga dho.”
Verse 5 nǎ kʉ Mungu si nji vodha dhi ndrŭ dho ná lo. Ke si kpa gøgø.
Verse 6 pori ki “Yova tso nǎ lo tsetse,” ‘kazz na le bɨ ná feza bbai.’ Fø lo ngbaribbai ma ko adi ko mbu Yova tso nǎ lo djo nari dhǒ.—Zb. 18:30; 119:140.
Kpadjo akonja Zaburi 12:7 po ná lo: “Ni si kpa ronga b’ob’o, Ee Yova; Ni si kpa ronga b’o krʉ ddi ddiro i ndrŭ tsɨ ró theinga dho.” Nde, “kpa” ká ie dhǒ?
Verse 7 njí ro kʉ verse 6 nari tilo “Yova tso nǎ lo” djo, nari dho nja ndrŭ ka ndima pori nari kʉ Biblia ripo “kpa,” nari kʉ Mungu tso ná lo. Ko churi nari bbai Mungu njingʉe ndi dho ka ná lo krʉ ndiro Biblia ronga b’oni b’o d’e ngbà mai wapinzani njingʉe kpakpanga bbo ndiro ndima si ri si d’e ro.—Isa. 40:8; 1 Pe. 1:25.
Ro, føri kina Yova adi verse 5 nǎ le tilo djo ná ndrŭ ronga ma b’o ddi. Yova ngʉ adi “vodha dhi ndrŭ” ma, “nza nzani ná ndrŭ” ma na tsotso koko ndirigoti ke si ra anzi dhé kpa tsotso ndi kó ndirigoti kpa ndi gø nari na.—Yob. 36:15; Zb. 6:4; 31:1, 2; 54:7; 145:20.
Nde, verse 7 pori “kpa” ná fø lo na mana ká kʉ addu?
Fø zaburi ridho nari bbai, “kpa” kʉ ndrŭ.
Zaburi 12:1 loti “chølo nji ná ndrŭ djo,” njaro kali nja ndrŭ sha ndima djo ro. Føri goti si ná verse nǎ ko rinja nari kʉ Yova si tøni che njínji ndima dà na ná ndrŭ tso ro. Zaburi ndi ná ke ko li kpakpa ko uri nari kʉ Mungu si tøni ndidhó njí dhi ndrŭ laidjo dhonalo ke tso nǎ lo kʉ tse ndi tse ro.
Verse 7 ripo Yova si “kpa” ronga b’ob’o, fø kpa kʉ chelo nji ná ndrŭ nji ná lo djotsina njedha ba ná kpa.
Le ripo “kpa” ná følo tso nju Wamasoreti le ngʉ nzǐ ná Waebrania ndingʉe ná lo na. Wagiriki dhó La septante le ngʉ nzǐ ná tafsiri njinji aro ina “ko” na verse 7 nǎ, fø lo dho nari kʉ ri kʉ chi tøni ná vodha ba ná ndrŭ ma, nza nzani ná ndrŭ ma na. Ndirigoti verse 7 pori chi tøni ná ndrŭ “ddi ddiro krʉ” ronga si b’oni “i ndrŭ tsɨ ró ro,” føri kʉ che dhó nyi kʉ ná ndrŭ ró ro. (Zb. 12:7, 8) Targums Araméens le nzǐ ná tafsiri nǎ, verse 7 nǎ le rizø: “Ni, EE BBOKE, si chølo nji ná ndrŭ ronga b’ob’o, ni si kpa ronga b’o che kʉ ná i ndrŭ tsɨ ró ro theinga dho.” Fø lo ridho pʉlʉpʉlʉ nari kʉ Zaburi 12:7 nzɨ lo ti Mungu tso nǎ lo djo ri.
Hwè dhi lo kʉ, fø verse ngab’odha bbʉ “chølo nji ná ndrŭ” dho—Mungu si tøni kpa laidjo nì.
