Yova jiri ndoa chi ná nrŭ e hwè na ndirigoti kpa nji ndima dhi ndoa hwè bicha ddi ndima tso gbani ro. (Mt. 19:4-6) Njati ni jiri ni chi ndoa ró, ni ká ka ni ba nilai ndoa dhi le ngbaribbai? Yova kʉ ko no ná ke naridho, ke ddiro dhé chu ko ka ko njí nalo ndiro koe hwè na ndoa nǎ d’e. Fø lodho, ni njínji ke bbʉ ko dho ná yadha na ró, ni ka nie hwè na. Akonja fø yadha kana nja ri ro.

Ya kwanza, ringani ko chu ko djo nalo kʉ ena: “Le thí kʉ shashani na ritsi nja ritsi krʉ djolu ndirigoti ri ka ndi tsú le chelo na.” (Yer. 17:9) Le di lelai ne ndoa dho ndirigoti le di rine le chu fø le bblo ná saa na, ledzá ù gʉ adi tsu bbo le na. Føri ka ndi liri le vʉ lonanga nzá le ddinga bbo ro. Le di riji le chi ndoa ddikpa le na fø le dza ù tsu bbo le na nari djotsina dhé ro, bí ina fø di nalo adi ra sani sa. (Mez. 28:26) Føri dzá lodho ri nga ka ndie nyodyu dhi lo ri, aro kʉ ná nrŭ si kau tso nga théi ndirigoti ndima gba ndima tso lele ndoa dho nzá ndima d’e ndima chu bblo ro.

Mezali 22:3 ripo: “Nyodyu dhi ke nja chelo ró, ke adi runi ru, ro rr chu ná ke adi ra anzi dhé ndirigoti ke adi bani kpakpalo na.” Eternete chulu le ndoa le si chi na ná le ne na føri nǎ ro ká le ka le ba ngba kpakpalo? Njedha dhi lo kʉ, nja nrŭ ve ra kau nji ndoa dho nzá nyi chuni ná kpa na Eternete chulu, ro luti fø nrŭ ra nji nalo bʉ kpa thí bbo. Nrŭ sha ná nja kpa ro kʉ théi, ná kpa thɨ gbʉ dhi kote (compte) Eternete djó ndiri chulu ndima di che dhé lo ro u ná nrŭ dhó mbø d’u d’e. Nja saa djo, fø chelo nji ná kpa adi ripo ndima kʉ Yova dzá Dimu.

Akonja ri bbʉ ná nja kpakpalo ki. Lelai ndoa le si chi na ná le lé ne Eternete chulu nari dhi nja site djó le hesabu nji nja le chu ngba ka ndima di ddinga ná nrŭ d’e. Ni mai ri kʉ fø ro, fø chu ká kʉ bblo ni ma nari ro nzá chuni ri. Ri ká ka ndie nyodyu dhi lo bbʉbbʉ, ko li ko thí nrŭ thɨ ná ritsi djo nja ri kó ko tsotso ko vʉ ndoa ko si chi na ná le d’e? Biblia nǎ kʉ na yadha nzá le ka le ddi ordinatere nǎ hesabu dhi lo na ri.​—Mez. 1:7; 3:5-7.

Ddikpa nzɨ thika leni ná yadha bani Mezali 14:15 nǎ, nari ripo: “Chedhé nga ro u ná ke adi krʉ lo úu, ro nyodyu dhi ke adi ngbaribbai  ma ndi bbi nari krʉ nanga nene.” Ndoa le si chi na ná le levʉ nari nji, ringani le chu fø le bblo vi. Ro Eternete djó le nju nari chulu, ri ka ndie kpakpa le chuni bblo le kana. Njati rie foto ma ni adi cho ni kalu inga ni saa ba bbo ni di mesaje ma cho ni kalu ddikpa le na ró, føri ká dhori ni chu fø le bblo? Nja kpa ngʉ riddi ndima ba ji ndima ji ná nrŭ b’lo, ro kpa thí bangʉe njedha nju ndima ve nju fø nrŭ na ná saa na.

Zaburi ndi ná ke pongʉeri: “Ma nzɨ adi ma tso gba shasha bai na ri ndirigoti ndima ka kʉ ngba di kpa ma na ri ruru ná kpa tso ma adi nyinyi.” (Zb. 26:4) Bi kʉ ná nrŭ adi rinja le sha nrŭ sha Eternete djo le li ná foto na ndiro le njani bbo d’ani naribbai d’e ná føri nga kʉ che ri. Kpa ka ndima ru ndima káe ngba di nrŭ ma nari ru inga kpa nzá ka ndima dho ngba ma ndima adi njini nari Eternete djo ndima ndima dho ná saa na ri. Ngba mai nja kʉ ná kpa ka ndima pori ndima kʉ Yova dzá Dimu ro, kpa ká kʉ ngba ba batiso ná Wakristo bbʉbbʉ? Kpa ká kʉ dhidhi kiroho nǎ ná nrŭ bbʉbbʉ? Kpa nganga kana nga kae bblo ni Yova na? Kpadhó kutaniko nǎ, nrŭ ká adi heshima bbʉ ni kpa dho? Kpa kae che kʉ na mufano inga “che kʉ na bba kau”? (1 Ko. 5:33; 2 Ti. 2:20, 21) Kpa ká kʉ huru ni ndima chi ndoa Biblia pori naribbai? Nidho ringani ni ba fø logoti. Ro ri ka ndie kpakpa ni ba fø logoti njati bblo chu fø le ná Yova dzá Dimu d’rari nzá ni dho ró. (Mez. 15:22) Ndirigoti ri nzá ngani chí tøni Yova dho ná le chi ndoa nga kʉ Mukristo ná le na ri ndirigoti nzɨ le chi “d’onga d’oni ná kobbo” (nira isiyo sawa) tso fø le na.​—2 Ko. 6:14; 1 Ko. 7:39.

Eternete chulu lé lelai ne ndoa dho nari bbʉ na chelo kʉ bi. Ro bblo lú le ka le ne lelai le ndoa dho ndirigoti le nji bblo kʉ ná kau le na ndiro ledhó ndoa sie madha na ná chu ro kʉ ni. Ndoa dho ká ni ka ni ba bblo kʉ ná le ngbaga? Rie ni ko njuni ddinga na ri ró, ko ka ko chu nja nrŭ bblo njudha dhi ngana ma, asamble na ma ndirigoti nja njudha dhi ngana ma.

Nzɨ mai ko njuni ddinga na Coronavirus dzá lodho ro, ko adi kodhó kutaniko nǎ njudha dhi lo nji elektronike dhi ritsi chulu, fø ritsi chulu ri ka ndi kaka ko chuni nzá d’e ndoa chi ná Yova dza Dimu na. Fø saa na, ni ka ni nja ngbaribbai ma kpa hotuba nji nari ma, kpa komatere bbʉ nari ma ndirigoti kpa loti ndima dhó udha djo nari ma. (1 Ti. 6:11, 12) Ni ka ni tilo ro njudha goti elektronike dhi ritsi nǎ nzɨ bí kʉ ná nrŭ loti ná ngana maddi. Nzɨ mai ko njuni ko ronga na ro, kodhó njudha chulu ni ka ni nja tho dzá lo tho ni nyo na le ká njini ngbaribbai ma nja nrŭ na nari, føri ka ndi liri ni chu fø le bblo. (1 Pe. 3:4) Nilai ni chu bblo nari goti, ni ka ni churi nari kʉ nidhó muradi ma, ji ni ji nalo ma na tso nju ngba. Føri ka ndi kó ni tsotso ni chu ngba ma ni ka ndoa dho nari.

Nzá d’e ndoa chi ná nrŭ di ndima lai ndoa ndima si chi na ná bblo nrŭ ne Biblia nǎ yadha pori nari bbai ró, Mezali dzá buku nǎ le po ná i lo sie bbʉbbʉ kpa dho: “Ddikpake ba bblo kʉ ná isɨle [inga bblo kʉ na kpetsike] ró, fø le ba bblo kʉ ná ritsi ndirigoti fø ke [inga le] ba Yova dzá bblonga.”​—Mez. 18:22