LONGANEDHA DHI RI 31
“Anitøni kprɨ ndirigoti nzɨ ni ronga jaja”
“Ji dhi le-djoi, anitøni kprɨ ndirigoti nzɨ ni ronga jaja.”—1 KO. 15:58.
DYI 122 Tukuwe na Nguvu na Tusitikisike!
RI NǍ LE SI CHU NÁ LO a
1-2. Mukristo ká ka ndi é dza bbai ngbá chu nǎ? (1 Wakorinto 15:58)
CHO 1970 na ndrŭ chingʉe 60 nǎ etaje kʉ ná dza Japon nǎ Tokyo na. Ndrŭ adi fø dza ká le chingʉe ngbaribbai ma nari dhu ndima tso dhonalo fø bbagʉ lu rɨ (matetemeko ya inchi) adi da bí ina. Addui ká ngʉ adi rili fø dza tøni føga? Fø dza chingʉe ná ke lingʉeri dza é kpakpa, nì ndi nanga ro d’oni d’o rɨ da ná saa na ro, ndiro nzi rɨ ri ko ró. Wakristo maddi kʉ fø dza bbai. Ká ngbá chu nǎ?
2 Mukristo dho maddi ringani ndi é usawaziko na kprɨ le tøni nari ma, kiasi ma na djo. Kedho ringani ndi tøni kprɨ nzɨ ndi ronga jaja ro ndirigoti ndi vʉri ndi rrnga Yova dhó yadha ma, kedhó kanuni ma na dho d’e. (Azø 1 Wakorinto 15:58.) Kedho ringani ndi é “tayari ngarrdha dho” ndirigoti nzɨ ndi d’i ji. Nja chu nǎ kedho ringani ndi é “kiasi” na, ri uri ndi é kiasi na ná saa na. (Yak. 3:17) Fø di ná ngaddidha na kʉ ná Mukristo nzɨ adi tøni ndi chu ná lo djo dhé inga ndi u krʉ lo tso ri. I lo nǎ ko si ngbaribbai ma ko ka ko é nzɨ ko ronga jaja ro nari nja, føri kina ko si Shetani adi nji ndiro nzɨ ko tøni kprɨ ró ná mbʉ kʉ ná lo nja ndirigoti ngaribbai ma ko ka ko hwini fø lo tso ró nari nja.
KO KÁ KA KO TØNI KPRƗ NGBARIBBAI?
3. Matendo 15:28, 29 nǎ ká kʉ sheria adi bbʉ ná Bboke dhó ngbá sheria?
3 Yova kʉ sheria adi bbʉ ná Bboke nari dho, krʉ ddo ró ke adi wazi kʉ ná sheria bbʉ ndidzá ndrŭ dho. (Isa. 33:22) Loroji na, karne ya kwanza na lo dho chutso ddá ná baraza d’rangʉe Mukristo ka ndi tøni kprɨ lu ná gbo kʉ ná chu: (1) nzɨ kpa sanamu ma, ro Yova dhé kpa má nari chulu (2) ju kpa nja takatifu nari chulu ndirigoti (3) Yova dhó sheria ndima dyø uasherati ró ndima ndima ronga b’o nari chulu. (Azø Matendo 15:28, 29.) Nde, gbo kʉ ná fø chu nǎ ká Wakristo ka ndima b’o ndima ronga ngbaribbai?
4. Ko ká adi Yova dhé má ngbaribbai? (Ufunuo 4:11)
4 Akob’o ko ronga sanamu ró, ro akoma Yova dhé. Yova pongʉeri Waizraeli dho kpa má ndi ddiro dhé. (Kum. 5:6-10) Ibilisi mbungʉe Yesu ná saa na, Yesu pongʉeri wazi nari kʉ ringani ko má Yova ddiro dhé. (Mt. 4:8-10) Føri dzá lo dho ko nzɨ adi sanamu ro má ri. Føri kina ko nzɨ adi ndrŭ ro má inga ko nja kpa mungu bbai ri, njati rie dini nǎ bbobbonga ma, politiki nǎ bbobbonga ma, inga b’o chuni kpà dhi lo ma, miziki dhi lo ma na kana ná kpa ma ró. Ko adi tøni Yova laidjo ndirigoti ko adi madha bbʉ “ritsi krʉ nongʉe ná ke dho dhé.”—Azø Ufunuo 4:11.
5. Ko ká adi Yova dhó sheria dyø shinga ma, ju ma na kʉ takatifu nari djo addudho?
5 Ko adi ngarr Yova bbʉ shinga ma, ju ma na kʉ takatifu nari djo ná sheria dho. Ká addudho? Dhonalo Yova pori shinga kʉ ju nǎ ndirigoti ri kʉ ke bbʉ ko dho ná bbo na mana kʉ ná kado. (Law. 17:14) Ya kwanza Yova ungʉe ritso ndrŭ á zǎ ná saa na, ke pongʉeri nzɨ ndrŭ nyo ju. (Mwa. 9:4) Ke ngʉngʉe fø yadha djolu ki Musa dhó Sheria ndi bbʉngʉe Waizraeli dho ná saa na. (Law. 17:10) Føri goti ke ddangʉe chutso karne ya kwanza nǎ baraza dho kpa jari Wakristo krʉ dho nari kʉ, “kpa b’o ndima ronga . . . ju ró.” (Mdo. 15:28, 29) Ko adi tøni kprɨ Yova dhó fø yadha dho ddawa dhi lo djo ko longavʉ ná saa djo. b
6. Ko ká adi rinji ngbà ndiro ko rrnga Yova bbʉ nyi djo ná sheria dho d’e?
6 Ko adi ngarr Yova po uasherati djo ná sheria dho. (Ebr. 13:4) Mutume Paulo pongʉeri ko dho ko “ché” ko ndí ró sehemu ché, føri na mana kʉ ringani ko njí ko dho ka ná lo krʉ ndiro ko pʉ che kʉ ná tamaa ko ró ro d’e. Ko nzɨ adi uasherati ka ndi li ko njí ná ritsi nja inga ri njiri. (Kol. 3:5; Yob. 31:1) Ndirigoti ko di mbuni ko njí chelo ná saa na, ko adi ko kana kau ka ndi sa Mungu na ná ngaddidha ma, ná lo ma na pʉ ko ró ro thei.
7. Ri ká ngani ko vʉri ko njí addu ndirigoti addudho?
7 Yova adi riji ko “rrnga ndi dho ko thí nǎ ro.” (Ro. 6:17) Kedhó chutsoddadha e krʉ ddo ró kodhi bblonga dho ndirigoti ko nzá ka ko ø kedhó sheria thika ro ri. (Isa. 48:17, 18; 1 Ko. 6:9, 10) Ko adi kpakpanga nji ko rrnga Yova dho ndirigoti ko njinjí mutunga Zaburi pongʉe ná i lo na: “Ma vʉri ma rrnga nidhó yadha dho krʉ saa ró kpø mwisho djo.” (Zb. 119:112) Nì mai ri kʉ føro, Shetani adi rili nzɨ ko ngarr Yova dhó sheria dho. Nde, fø ká ke adi rinji ngbá chu lu?
SHETANI KÁ ADI KO TØNI CHI NARI TSU MBUDHA NA NGBARIBBAI?
8. Shetani ká adi ko nzá ngbaribbai ndiro nzɨ ko tøni chi ró?
8 Ndrŭ dhó ro le nzadha ba nari. Ibilisi adi ko nzá ko ndí ro ndirigoti kodhó akili ró ndiro nzɨ ko tøni chi ró. Ke adi riji ndi “chó ko chó” ndirigoti ndi sa ko kana kau Yova na. (1 Pe. 5:8) Karne ya kwanza nǎ Wakristo na ndrŭ ngʉ adi do tá, ndrŭ ngʉ adi kpa njinji ndirigoti kpa cheche kpa vʉngʉeri ndima tøni chi nari dho. (Mdo. 5:27, 28, 40; 7:54-60) Njʉ maddi Shetani adi ra anzi ndrŭ ndi nza nari na. Russia ma, nja ngø ma na nǎ ndrŭ le-djoi ma, le-vei ma na nzá ná føri fø lo dhǒ wazi ndirigoti dz’ djó krʉ kʉ ná ngalu wapinzani kpa nzá njonjo chu nǎ.
9. Abbʉ bbo pli ndrŭ le cho nari dhǒ ná loroji.
9 Bbo pli ndrŭ le cho nari. Ko ndi nzá nari kina Shetani adi njínji “shasha dhi lo” na. (Efe. 6:11) Loroji na, le-djo Bob tso le chongʉe ddawa djo ndiro le njí ndi operasio d’e. Ke pongʉeri ndidhó doktere dho ndi ro nzɨ le tsu ju ro ri. Doktere ungʉe ritso ndi rrnga rr kedhó fø lonangavʉdha dho. Nì mai ri kʉ føro ke le tha nari njí kuna, d’i doktere singʉe b’lo ke abba ndrŭ ngʉ abba ro. Ke pongʉeri Bob ro nzɨ le tsu ju ro ri, ro ke ro le si ju tsu njati ri si riu ná saa na dhé. Njaro doktere ngʉ riddi Bob ka ndi lee ndidhó nganjadha thika le nga ke abba ndrŭ kʉ ná saa na. Bob tøngʉeni kprɨ ndirigoti ke nzá ungʉeri ro le tsu ju ndi ro njati ri di ngbǎ ma ró ri.
10. Ndrŭ dhó ngaddidha ká ka ndi tsu ko mutego na addudho? (1 Wakorinto 3:19, 20)
10 Ndrŭ dhó ngaddidha. Njati kodhó ngaddidha é ndrŭ dhó ngaddidha bbai ró, ko ka ko nga Yova ma, kedhó sheria ma na ko be pá nari tso. (Azø 1 Wakorinto 3:19, 20.) Bí ina “i dz’ dzá nyodyu” adi rili nzɨ ndrŭ rrnga Mungu dho. Pergamu ma, Tiatira ma na nǎ nja ndrŭ bbangʉeri ndima dhó nganjadha é sanamu djo ndirigoti nzá tsetse ná nyi djo fø bbagʉ ndrŭ dhó nganjadha ngʉe nari bbai. Yesu bbʉngʉe kpakpa kʉ ná shauri fø kutaniko nǎ ngʉe ná ndrŭ dho kpa ungʉe nzá tsetse ná nyi tso nari dho. (Ufu. 2:14, 20) Njʉ maddi ko ronga tso d’e ná ndrŭ ka ndima liri ko u che kʉ ná ngaddidha tso. Kodhó familia nǎ ndrŭ ma, ko ronga tso d’e ná ndrŭ ma na ka ndima liri ko uri kodhó lo ronga dyu kpakpa ndirigoti nzɨ ko rrnga Yova dhó yadha dho. Loroji na, nja ndrŭ ka ndima pori tsetse ná nyi na le kʉ ná føri na mana ro nga kʉ ri ndirigoti Biblia nǎ yadha kʉ b’lo ndi cho da ro.
11. Njati ko di tøni kprɨ ró ká ko ka ko pʉ ngbá lo ko ró ro?
11 Nja saa na ko ka ko ddiri nari kʉ, Yova bbʉ ko dho ná chutsoddadha nga kʉ wazi ri. Njaro ko ka ko shani ko “dádá ndi ndini ná lo djolu.” (1 Ko. 4:6) Yesu dhó saa na ngʉe ná dini nǎ bbobbonga ngʉ adi fø di ná chenga nji. Ndrŭ dhó yadha ndima ndri Mungu dhó yadha djo nari na kpa ngʉ adi li o ná no li ndrŭ djo. (Mt. 23:4) Yova adi wazi kʉ ná chutsoddadha bbʉ ko dho ndidzá lo ndirigoti ndidzá tengenezo chulu. Ke bbʉ ko dho ná chutsoddadha djo ko lo ki ndri dho ná lo ro nga kʉ ri. (Mez. 3:5-7) Føri dho ko nzɨ adi da Biblia nǎ ndi ndini ná lo djolu inga ko li sheria ko lai Wakristo ka ndima vʉnanga ndimaro ná lo djo ri.
12. Shetani ká adi “pa kʉ ná shasha dhi lo” nga pli ko kalu ngbaribbai?
12 Shasha dhi lo. Shetani adi njínji “pa kʉ ná shasha dhi lo na” ndirigoti “i dz’ djó nga nǎ mana kʉ ná lo na” ndiro ndi sha ndrŭ ndirigoti ndi ndó ndrŭ nanga d’e. (Kol. 2:8) Karne ya kwanza na fø lo tsungʉe ndi nǎ ndrŭ dhó ngadddidha ró dyʉ ndi ná Filosofia ma, Wayaudi ngʉ ddi ná nzá gbani Biblia nǎ lo na ná lo ma, Wakristo dho ringani ndima njinjí Musa dhó sheria nǎ kʉ ná lo na nari ma na. Føri ngʉe shasha dhi ngaddidha dhonalo ri ngʉ ndrŭ dhó ngaddidha tu bbʉbbʉ nyodyu tso nga ná ke Yova djó ro. Njʉ, Shetani adi njínji Eternete na ma, rezo sosio na ma, ndiro ndi pli nzá dzá bbʉbbʉnga chuni ná lo ma, Politiki nǎ bbobbokpa d’ra ná kali dhi lo ma na nanga d’e. Fø di ná lo ro ko njae coronavirus dhi saa na maddi. c Nì ngarr Yova dzá tengenezo bbʉ ná chutsoddadha dho ná Yova Dimu adi nga nǎ mana kʉ ná d’od’o dhi lo pʉpʉ ndima ró ro, ro fø di lo na kali dhi eformasio u ná ndrŭ adi bani.—Mt. 24:45.
13. Ri ká ngani ko hwini saa vi ná lo tso ró addudho?
13 Saa vi ná lo. Ringani ko li ko thí “bbo na mana kʉ ná ritsi djo.” (Flp. 1:9, 10) Saa vi ná lo adi kodhó wakati vi bbo ndirigoti ri adi kodhó ngaddidha tutu bbo na mana kʉ ná lo djó ro. Nyo ma, jødha dhi ritsi ma, le nyǒ le dje nari ma, nja kʉ ná ritsi ma na ka ndi vi kodhó saa vi, njati ko di ko thí li bbo ri djo kodhó maisha nǎ ró. (Lu. 21:34, 35) Føri kina krʉ ddo ró ko adi njonjo kʉ ná eformasio ba ndrŭ kana adi gʉ bbʉ ná lo ma, politiki nǎ kpa loti djo ná lo ma na djo. Ringani nzɨ ko bbari fø lo vi kodhó saa. Njaro ko ka ko gba ko tso fø lo na kodhó ngaddidha ró inga ko thí ró. Shetani adi njínji fø lo na ndiro nzɨ ko nji chø kʉ ná lo ró. Akonja ngbaribbai ma ko ka ko tøni fø lo tso ró ndirigoti ko ka ko tøni kprɨ nari.
KO KÁ KA KO TØNI KPRƗ NGBARIBBAI?
Ndiro ni tøni kprɨ d’e, adi ngaddi Yova dho ni bbʉngʉe ni ndirigoti batiso ni bangʉe nari djo, adi Mungu dzá lo zø ndirigoti adi ngaddi bbo ri djo aliri ni thí é kpakpa ndirigoti ali ni thí Yova djo (Anja paragrafu 14-18)
14. Ko tsotso ka ndi kó ná ddikpa ri ká kʉ ngbá lo ndiro ko tøni kprɨ Yova laidjo d’e?
14 Addinga ni bbʉngʉe nidhó maisha Yova dho ndirigoti ni bangʉe batiso nari djo. Ni njingʉe fø lo ni jingʉeri ni é Yova laidjó nari dho. Addinga ni ba bbʉbbʉlo nari ni u d’e kongʉe ni tsotso ná lo djo. Ni chungʉe lo Yova djo ndirigoti ni jingʉe ke ndirigoti ni ngangʉe heshima ma, jidha ma na ni dhǒ nidzá ra nǎ Baba dho nari tso. Nidhó udha dhingʉe dhi nari chongʉe ni ronga ni leni nidhó chenga nǎ ro. Ni thí chongʉe ni ronga ni bbá che kʉ ná nyi tso ndirigoti ni di Yova ji ná lo nji nidhó maisha nǎ. Ni mbungʉe ni ko thí jotso ko ri Mungu njingʉe ni zø nji nari dho. (Zb. 32:1, 2) Ni ngangʉe njudha tso ndirigoti ni ngangʉe lod’radha tso ni chu ná bblo lo djo nja ndrŭ dho. Ni bbʉngʉe ni Yova dho ndirigoti ni bangʉe batiso nari dho, kpadjo ni bbi shinga dhi chulu. Ndirigoti ni adi kpakpanga nji ndiro ni bbi fø chulu d’e.—Mt. 7:13, 14.
15. Mungu dzá lo le zø ndirigoti le ngaddi ri djo nari ká adi faida bbʉ ngbaribbai?
15 Adi Mungu dzá lo zø ndirigoti adi ngaddi bbo ri djo. Ddiddi tsú ka ndi é kpakpa njati ri titi é da dz’ nǎ ndi tsu ro ró nari bbai, ko é kpakpa kʉ ná udha na Yova djo ró ko ka ko tøni kprɨ. Ddikpa tsú di dhidhi ná saa na, ri titi adi tsu da dz’ na ndirigoti ri adi ndi nanga nyá bbo. Ko di Biblia zø ndirigoti ko di ngaddi bbo ri djo ró, kodhó udha ka ndi é kpakpa ndirigoti ko ka ko uri u nari kʉ, Mungu dzá chu kʉ bblo pli. (Kol. 2:6, 7) Addinga ngbaribbai ma, Yova bbʉ ná chutsoddadha ma, shauri ma, le ronga b’odha ma na kongʉe anziro ngʉ njínji ke dho ná ndrŭ tsotso nari djo. Loroji na, Ezekieli ngʉ malaika nja li ndi li ndi dyu ro hekalu nanga ke ngʉ ddi ndi dho le dhongʉe ná maono nǎ ná saa na. Fø maono lingʉe Ezekieli kpakpa, ndirigoti ri adi bbo na mana kʉ ná somo bbʉ ko dho ngbaribbai ma ko ka ko njínji tsetse na madha ko bbʉ ke dho nari kana nari djo. d (Eze. 40:1-4; 43:10-12) Ko maddi ko adi faida ba ko di saa ba ko zønga ndirigoti ko ddinga Munga dzá lo nǎ bbo na mana kʉ ná lo djo ró.
16. Kpakpa le thí kʉ nari ká b’ongʉe Bob ronga ngbaribbai? (Zaburi 112:7)
16 Aliri ni thí é kpakpa. Pi Daudi pongʉeri ndi nzɨ bba jidha ndi dhǒ Yova dho nari tso ro ri ɨ ndi ngongʉeri ná saa na: “Ma thí kʉ kpakpa E Mungu.” (Zb. 57:7) Ko thí maddi ka ndi é kpakpa njati ko li ko thí Yova djo ró. (Azø Zaburi 112:7.) Anja ngbaribbai ma fø lo kongʉe anziro ko tielo djo ná Bob tsotso nari. Ke dho le pongʉeri ke ro le si ju tsu ri uri le tsu ri ná saa na, ro ke pongʉeri ri rá si le tsu ju ndi ro ró ndi rá thei hopitali djó ro. Luti Bob pongʉeri, “Ma nanga ro nzɨ ngʉ rɨni ri ndirigoti ma ro nzɨ do ngʉ nji sese maddi ri.”
Njati ko liri ko é kpakpa kʉ ná udha na ró, ko ka ko tøni kprɨ rie ngbá kpakpalo na ma ko bani ri ró (Anja paragrafu 17)
17. Bob bangʉeni na ná lo nǎ ro ká ko ka ko ba ngbá somo? (Anja ji maddi.)
17 Bob tøngʉeni kprɨ dhonalo kʉ, ke vʉngʉe ndi si nji ná lo nanga hopitali djo ndi ra nari njí. Ya kwanza, ke jingʉeri ndi bbʉ hwè Yova dho. Ya pili ke ngʉ adi Biblia zø ndirigoti Biblia ró dyʉ ndi ná kodhó vichapo zø shinga ma, ju ma na kʉ takatifu nari djo ndi tilo ro. Ya tatu, ke ungʉeri nari kʉ, Yova dhó chutsoddadha le dyø nari si choro nŭnŭ kʉ ná faida bbʉ. Ko dho maddi ri ka ndi kaka ko tøni kprɨ njati rie ngbà di ná kpakpalo tso ró ma ko hwini ri ró.
Baraka ma, ndidhó kpetsi kpa ma na dingʉeni Sisera dhó bbasødda na nga nǎ do ro (Anja paragrafu 18)
18. Baraka dhó loroji ká ka ndi kó ko tsotso ngbaribbai ndiro ko li ko thí Yova djo d’e? (Anja ri chuti ji.)
18 Ali ni thí Yova djo. Akonja ngbaribbai ma Baraka singʉe lɨ djolu Yova dhó chutsoddadha djo ndi ndi thí li nari dho nari. Fø saa na Waizraeli nzá tayarishangʉe ndima ro lɨ dho ndirigoti kpadhó nga ngʉe la njidha dhi ritsi ro ri. Ro, Yova pongʉeri Baraka rá hwini Wakanaani bbá pi Sisera ma, ndidhó bbasødda ma na tso ró nì mai fø kpa dhó la dhi ritsi ngʉe bí ro. (Amu. 5:8) Isɨ nabi Debora pongʉeri Baraka ra hwini Sisera ma, ndidhó 900 kʉ ná share mana tso ró kpere chi ná ngana. Kpere chi ná ngana ri ka ndi é ngʉe kpakpa Waizraeli dho ndima njí lɨ share tso ró, ro ngbà mai Baraka chungʉe fø lo ro ke rrngʉe nga rr dhé. Føro bbasødda ngʉ thʉ Tabori dhi Ngøtsɨ djó ro ná saa na, Yova lingʉeri dji kó bbo pli. Sisera dhó share ngangʉe b’adha tso d’o na, ndirigoti Yova lingʉeri Baraka ba ushindi. (Amu. 4:1-7, 10, 13-16) Føri bbai, Yova si ushindi bbʉ ko dho njati ko li ko thí ndi djo ndirigoti ndi li chutsoddadha dho ná kpa djo ró.—Kum. 31:6.
AVɄRI NI TØNI KPRƗ
19. Ni ká jiri ni tøni kprɨ addudho?
19 Ko kpakpanga nji ko tøni kprɨ, ná føri na ringani ko ra anzi njati rie godhé ko kʉ Shetani dhó i dz’ djó ri ró. (1 Ti. 6:11, 12; 2 Pe. 3:17) Akovʉri nzɨ ko bbari ndrŭ dhó ro le ba ná nzadha ma, bbo pli ndrŭ ko cho nari ma, ndrŭ dhó ngaddidha ma, shasha dhi lo ma, saa vi ná lo ma na djø ko dhó udha. (Efe. 4:14) Føri ringana akotøni kprɨ nzɨ ko ronga jaja ro. Krʉ ddo ró akodi jidha dhǒ Yova dho ndirigoti ko rrnga kedhó yadha dho. Ndirigoti fø lo krʉ kana ringani ko é kiasi na. Gosi ná lo na ko si ngbaribbai ma Yova ma, Yesu ma na kʉ kaka ná loroji kiasi na le kʉ nari kana nari nja.
DYI 129 Tutaendelea Kuvumilia
a Adamu ma, Eva ma na Shetani shangʉe ná nga djó ro ke adi rili ndrŭ uri nari kʉ, ndrŭ ka ndima vʉ bblo lo ma, chelo ma na nanga ndima dho ndima ro. Ke adi rili ko ma é fø di ná ngaddidha na i Yova dhó sheria ma, tengenezo ma na bbʉ ko dho ná chutsoddadha djo. I lo si ko tsotso ko ko b’o ko ronga Shetani dhó i dz’ dzá che kʉ ná ngaddidha ró ndiro ko ra anzi krʉ ddo ró ko ngarr Yova dho nari na d’e.
b Ndiro ni chu lo bbo ngbaribbai ma Mukristo ka ndi heshimu Mungu dhó nganjadha ju djo nari d’e, anja Buku Anji Maisha Hwè Theinga dho! nǎ somo 39.
c Anja ɨ djǒ ripo ná lo jw.org djó “Jilinde Dhidi ya Habari za Uwongo.”
d Nja ni chu lo bbo d’e, anja buku Ibada Safi ya Yehova Inarudishwa Tena! nǎ sura 13 ndirigoti 14.