1. Ni ká adi ni mbu bbʉbbʉlo dho ngbaribbai?

 YOVA dzá ndrŭ jirie Biblia nǎ e ná bbʉbbʉlo ji. Kodhó udha dyʉrie ndi ri ró. (Ro. 10:17) Ko uri u nari kʉ Yova lirie Wakristo dhó kutaniko ndi tøni “tødha bbai ndirigoti ndi ddi bbʉbbʉlo.” (1 Ti. 3:15) Ndirigoti ko adi ko djø ji ko nanga jini ro ko kana “chutso ddá ná kpa dho,” dhonalo kpa adi Biblia nǎ bbʉbbʉlo nanga tu ndirigoti kpa adi chutsoddadha bbʉ ko dho ndiro ko njí Mungu nyǒ tho ná lo d’e.​—Ebr. 13:17.

2. Yakobo 5:19 ripo nari bbai, b’lo ko chu bbʉbbʉlo nari goti ká ngbá lo ka ndi ba ko?

² Ngbà mai ko u bbʉbbʉlo ndirigoti ko u kodho ringani ko dyø Mungu dhó tengenezo dhó chutsoddadha nari ro, ko ka ko di shani godhé. (Azø Yakobo 5:19.) Shetani adi ndi dho ka ná lo nji krʉ ndiro nzɨ ko li ko thí Biblia djo inga Mungu dhó tengenezo bbʉ ná chutsoddadha djo ró.​—Efe. 4:14.

3. Ri ká ngani ko tøni kprɨ bbʉbbʉlo kana addudho? (Waefeso 6:13, 14)

³ Azø Waefeso 6:13, 14. Karrnga goti Shetani si ndrŭ krʉ sha ndiro ndima tøni Yova tso ro d’e. (Ufu. 16:13, 14) Godhé ko churi nari kʉ, Shetani si ndi dho ka ná lo nji krʉ ndi sha Yova dzá ndrŭ maddi d’e. (Ufu. 12:9) Føri dzá lo dho, ri kʉ bbo na mana kʉ ná lo ko chu bbʉbbʉlo ma kana njonjonga kali dhi lo na ndirigoti ko di ngarr bbʉbbʉlo dho. (Ro. 6:17; 1 Pe. 1:22) Føri kʉ bbo na mana kʉ ná lo ndiro ko si gøgø bbò mbudha dhi saa djo d’e!

4. I lo nǎ ká ko si loti ngbá lo djo?

 ⁴ I lo nǎ ko si loti aro kʉ ná sifa djo, ná fø sifa si ko tsotso ko ko d’i Biblia nǎ bbʉbbʉlo utso ndirigoti ko u Mungu dhó tengenezo bbʉ ná chutsoddadha. Føri goti ko si ko tsotso ka ndi kó ná gbo kʉ ná lo nja ndiro ko tøni kprɨ bbʉbbʉlo kana d’e.

KODHÓ LO U NÁ SIFA NDIRO KO D’I BBɄBBɄLO UTSO D’E

5. Yova do ko nji nari ká ka ndi kó ko tsotso ko d’i bbʉbbʉlo utso ngbaribbai?

⁵ Yova do le nji nari. Rie nì ko Yova do nji ri ró ko adi ke ji bbo, ná føri adi rili nzɨ ko nji nzá ka ndi tho ke nyǒ ná ddikpa lo ro maddi. Ko adi riji bbo ko chu bblolo ma kana njonjonga chelo na ndirigoti ko chu bbʉbbʉlo ma kana njonjonga kali dhi lo na ndiro ko tso uni Yova na d’e. (Mez. 2:3-6; Ebr. 5:14) Ri nzá ngani ko bbari ndrŭ do ko nji nari dada Yova dho ko kʉ na ná jidha djolu ri, dhonalo bí ina ndrŭ ji ná lo nzɨ adi Yova nyǒ tho ri.

6. Ndrŭ do ndima nji nari ká lingʉeri Israeli nǎ 10 ngʉe ná bbobbokpa ø bbʉbbʉlo thika ngbaribbai?

⁶ Njati ko di ndrŭ do nji Mungu do ko adi nji ná nga djolu ró, ko ka ko nga njonjo kʉ Yova adi ddi ná bbʉbbʉlo ró ro ná lo udha tso. Anja Waisraeli dho Yova tsongʉeni djo ná ngø tso rangʉe lo ná 12 ngʉe ná bbobbonga dhó loroji di. Kpa kana 10 ngʉe ná kpa njingʉe Kanaani nǎ ndrŭ do Yova ndima ji nari djolu. Kpa pongʉeri ndima lai Waisraeli dho: “Ko dho nzɨ ri ro ka ko rá lɨ nji fø kpa na ri dhonalo kpa kʉ kpakpa bbo ko djolu.” (Hes. 13:27-31) Bbʉbbʉ dhé, ndrŭ dhó nganjadha ró ro, Kanaani nǎ ndrŭ ngʉe kpakpa Waisraeli djolu. Ro, Waisraeli ka ndima sie ndima dhó mbubai djolu nzá, ná føri ngʉ po ná kpa nzɨ ngʉ nga ro ddi Yova djo ri. Nga tso rangʉe lo ná fø kpa dho ringangʉeni ndima li ndima thí Yova jingʉe  Waisraeli njí ná lo djo. Føri kina, ringangʉeni kpa ddinga b’lo Yova nji ndima dho anziro ná lo djo. Føri ka ndi lieri kpa famu nari kʉ, Kanaani nǎ ndrŭ dhó kpakpanga ro nzá le ka le ddi ritsi krʉ na ka ná ke Yova dhó kpakpanga na ri. Nga ngʉe udha na ná fø kpa ró ro njonjo Yoshua ma, Kalebu ma na jingʉeri ndima tso uni Yova na. Kpa pongʉeri ndrŭ dho: “Njati Yova nanga jini kodhi lo dho ngbà ró, bbʉbbʉ dhé ke si ko tsutsu fø ngø na ndirigoti ke si fø ngø bbʉ ko dho.”​—Hes. 14:6-9.

7. Ko ká ka ko njí Yova do bbo ngbaribbai? (Anja ji maddi.)

⁷ Ndiro ko njí Yova do bbo d’e, ringani ko di ngaddi ngbaribbai ma ko ka ko bbʉ hwè ke dho nari djo, lonanga ko vʉ ná saa krʉ ró. (Zb. 16:8) Biblia nǎ ddikpa lo ni zø ró, adhuri ni tsó, ‘Njati ma baeni fø lo na ró ká ma ka ma vʉe lonanga ngbaribbai?’ Loroji na, addi ni Waisraeli bbá 10 ngʉe ná bbobbonga ngʉ bbʉ ná che kʉ ná rapor rr nari bbai. Ni ká ka ni ue kpa po ná fø lo u ndirigoti ni ngá ndrŭ do njidha tso inga Yova ni ji ndirigoti ni riji ni bbʉ hwè ke dho ná føri ká ka ndi dae da ndrŭ do ni nji nari djolu? Waisraeli krʉ nzá ungʉe Yoshua ma, Kalebu ma na pongʉe ná bbʉbbʉlo ro ri. Føri lingʉeri nzɨ Yova u fø Waisraeli tsu Koddo koni ná Ngø na.​—Hes. 14:10, 22, 23.

8. Ri ká ngani ko njí kpakpanga ko é ngbá sifa na ndirigoti addudho?

⁸ Nyenyenga. Yova adi bbʉbbʉlo dhǒ nyenyenga na kʉ ná ndrŭ dho. (Mt. 11:25) Nyenyenga na ko ungʉe bbʉbbʉlo u. (Mdo. 8:30, 31) Føro mai ringani ko di krr ndiro nzɨ ko nga nodha njidha tso ró. Njati ko é nodha ró, ko ka ko di riddi nari kʉ kodhó ngaddidha kʉ nyodyu dhi ri ddiddi Biblia nǎ kanuni ma, tengenezo dhó ro ko adi ba ná chutsoddadha ma na bbai dhé.

9. Ko ká ka ko ra anzi nyenyenga ko dhǒ nari na ngbaribbai?

⁹ Nja ko ra anzi nyenyenga ko dhǒ nari na d’e ringani ko di ko kʉ sese pli le ddi ko Yova na ró nari ngano. (Zb. 8:3, 4) Føri kina, akonziri Yova kó ko tsotso ko é nyenyenga na bbo ndirigoti ko di ribba ke ddi longa ko dho. Yova si ko tsotso ko ndiro ko di ndidhó ngaddidha nja mana na bbo kodhó ri djolu, Biblia ma, ndidzá tengenezo ma na chulu ko adi ndi ba ro. Biblia ni zø ná saa na aba somo ngbá ngatsi ma Yova jirie nyenyenga ndirigoti ngbá ngatsi ma ke ndrorie nodha ma, ngbe le le ngbé nari ma na nari nǎ ro. Ndirigoti bbo pli anji kpakpanga ni rá anzi nyenyenga na ni kʉ nari na njati ni ba ddikpa pendeleo Yova dzá njí kana nari di bí kʉ ná ndrŭ dhó nganjadha drr ni djo ró.

NGBARIBBAI MA KO KA KO TØNI KPRƗ BBɄBBɄLO KANA NARI

10. Yova ká ngʉ adi lojadha ma, chutsoddadha ma na bbʉ ie ma chulu ndidzá ndrŭ dho?

¹⁰ Ara anzi Yova dhó tengenezo bbʉ ná chutsoddadha djo ni ni thí li nari na. Drrdrr Israeli nǎ Yova ngʉ adi loja ndidzá ndrŭ dho Musa chulu ndirigoti luti Yoshua chulu. (Yos. 1:16, 17) Yova Mungu cho ná kpa bbai Israeli ngʉ fø kpetsi kpa nja ná saa na, kpa ronga ngʉ adi leni bbo. Luti Wakristo dhó kutaniko tso ngangʉeni ro, 12 ngʉe ná mitume ngʉ adi chutso ddá. (Mdo. 8:14, 15) Luti fø kpa kana ngʉe Yerusalemu nǎ nja wazee maddi. Chi ngʉ tøni ná fø kpetsi kpa dhó chutsoddadha ndima dyø nari dho, “kutaniko ngʉ adi ra anzi kpakpa ndima tøni udha kana nari na ndirigoti ndrŭ dhó hesabu ngʉ adi  ndrini krʉ ddo ró.” (Mdo. 16:4, 5) Njʉ maddi Yova dhó tengenezo bbʉ ná chutsoddadha ko dyø nari adi rili ko ronga leni le. Nde, njati ko di Yova li chutsoddadha dho ná kpa dhó lo gʉgʉ ró, ká ke ka ndi mbu ndi ngbaribbai? Ndiro ko ngʉ fø logoti d’e, akotilo Koddo koni ná Ngø na Waisraeli ngʉ ra ná saa na njingʉeni ná lo djo.

11. Tsatsangʉe Yova vʉngʉe chutsoddadha dho ná ke Musa ro ná kpa ká ngbá lo bangʉe? (Anja ji maddi.)

¹¹ Koddo koni ná Ngø na Waisraeli ngʉ ra ro, Israeli nǎ nja bbobbonga tsangʉe tsa Musa ro ndirigoti kpa nzá ungʉe Yova bbʉngʉe Musa dho ná njí ro ri. Kpa pongʉeri: “Kutaniko krʉ [nga Musa dhé ri] kʉ takatifu, kpa krʉ ndirigoti Yova kʉ kpa kana.” (Hes. 16:1-3) Bbʉbbʉ dhé, nì mai Mungu nyǒ njí “kutaniko krʉ” ngʉe takatifu ro, Yova vʉngʉe Musa ndi ddá chutso ndidzá ndrŭ dho d’e. (Hes. 16:28) Musa djo ndima chelo ti ná føri na, kpa ngʉ chelo ti Yova djo. Kpa nzá lingʉe ndima thí Yova ji ná lo djo ri; kpa lingʉe ndima thí ndima ji ná lo djo dhé, føri i ngʉe ndima é kpakpanga na bbo ndirigoti ndima é bbonga na nari. Mungu chengʉe bbobbonga na ngʉe ná fø kpa ma, kpa na gbangʉe ndima tso ná maelfu kʉ ná ndrŭ ma na krʉ. (Hes. 16:30-35, 41, 49) Njʉ ko ka ko uri u nari kʉ, nzɨ adi heshima bbʉ Yova dhó tengenezo bbʉ ná chutsoddadha dho ná ndrŭ dhó lo nzɨ adi Yova nyǒ tho ri.

12. Yova dhó tengenezo djo ko ko thí li nari na ká ko ka ko rá anzi addudho?

¹² Ri ka ndi kaka ko rá anzi Yova dhó tengenezo djo ko ko thí li nari na. Njati ringani le ø Biblia nǎ ddikpa bbʉbbʉlo ko famue ná chu inga Pidhinga dzá njí kpeeni ná chu thika ró, chutso ddá ná kpa nanga nzɨ adi rɨni fø ndima rinji nari dho ri. (Mez. 4:18) Kpa adi rinji fø ndima riji ndima bbʉ hwè Yova dho nari dho. Ndirigoti  kpa adi ndima dho ka ná lo nji krʉ ndiro ndima nanga vʉ ná lo si Mungu dzá lo nǎ ro d’e, dhonalo ri nǎ ro si ná kanuni Yova dzá ndrŭ krʉ adi uu.

13. “Bblo kʉ ná lo kowu” ká kʉ addu ndirigoti ri ká ngani ko njí addu ri na?

¹³ “Ara anzi bblo kʉ ná lo kowu ni dyø nari na.” (2 Ti. 1:13) “Bblo kʉ ná lo kowu” kʉ Biblia nǎ ro Wakristo adi ba ná mafundisho. (Yoh. 17:17) Føri i kʉ ko urie ná lo krʉ dherr. Yova dhó tengenezo adi rili ko u ná lo dyʉ ndi fø yadha ro. Njati ko rá anzi fø ko rinji nari na ró, ko ronga si leni le.

14. Nja Wakristo ká bbangʉe “bblo kʉ ná lo kowu” ndima dyø nari tso ngbaribbai?

¹⁴ Ko ká ka ko bani ngbá lo na “bblo kʉ ná lo kowu” ko dyø nari tso ko bbabba ró? Addinga i lo djo. Karne ya kwanza nǎ nja Wakristo ngangʉe kali dhi lo nanga ndima pli ndrŭ kalu nari tso, kpa ngʉ adi ripo Yova dzá ddo si b’lo. Ri njani ndrŭ bangʉe ná ddikpa barua djó i ngʉe fø lo nari bbai ndirigoti ndrŭ ngʉ riddi Paulo ndingʉe ri ri. Nzá ndima ne ri nanga bblo ro, Tesalonike nǎ nja Wakristo ungʉe fø lo u ndirigoti kpa ngangʉe ri nanga plidha tso. Njati kpa noe ddinga ndima ngʉe mutume Paulo na ro ke ddingʉe ndima dho ná lo nga ró, nzá kpa ka ndima shaeni ri. (2 Te. 2:1-5) Paulo bbʉngʉe shauri ndi djoi dho nzɨ kpa u ndima rr ná lo krʉ. Lutinga dho nja ndi kó kpa tsotso d’e, Tesalonike nǎ ndrŭ dho ndi ndingʉe ná barua ya pili tso ke dyangʉe i lo na: “Iri kʉ madhó zʉdha, ma Paulo, ma nganga thó na ma ndi ná ri, barua krʉ nǎ ndi kʉ ro; ri kʉ føri bbai i ma adi ngandi ri.”​—2 Te. 3:17.

15. Ko ká ka ko b’o ko ronga ngbaribbai bbʉbbʉlo bbai njani ná kali dhi lo ró? Abbʉ loroji. (Anja ji maddi.)

¹⁵ Paulo ndingʉe Tesalonike nǎ ndrŭ dho ná lo nǎ ro ká ko ka ko ba ngbá somo? Njati ko rr ná lo é njonjo Biblia adi ddi ko dho ná lo ró ro inga rie bbo ka ndi lø le thí ronga ná lo ró, ringani ko njinjí nyodyu na. Drrdrr Union Soviétique dhó saa na, kodhó mbubai chongʉe le-djoi dho ná barua  ngʉ njani Yova dzá Dimu dhó lo dhi bbò bbagʉ ro si nari bbai. Fø barua nǎ le chongʉe nja le-djoi ndima ngá d’i tengenezo tso. Fø barua ngʉ njani bbʉbbʉ kʉ ná ri bbai. Ro, chi ngʉ tøni ná le-djoi nzá bbangʉeri ndima shani ri. Kpa famungʉeri nari kʉ fø barua nǎ kʉ ná lo tso ro nzá gbani ndima dho le adi ddi ná lo na ri. I ddo ró, kodhó mbubai adi njínji nja saa na eternete na ndiro ndima shá ko ndirigoti ndima ndó ko kana nga d’e. Ko bbaeri “[ko] djǒ nanga ngbʉni lele” nari rɨngani, ko ka ko b’o ko ronga b’lo ko churie ná bbʉbbʉlo djo ko ngaddi nari chulu.​—2 Te. 2:2; 1 Yo. 4:1.

16. Waroma 16:17, 18 pori nari bbai, ko ká ka ko njiri ngbǎ njati ddikpa le bbá bbʉbbʉlo bbá ró?

¹⁶ Ara anzi chi tøni Yova dho ná ndrŭ na ni ni tso gba nari na. Mungu jiri ko bbʉ madha ndi dho ddi ko tso gbani ko djoi ma, ko vei ma na na ro. Ko si ra anzi ddi ko tso gbani ro njati ko d’i bbʉbbʉlo utso ngbà ró. Ddikpa le di nga kʉ d’ʉ ná lo nanga pli ró, føri na le adi rili kutaniko nanga ndoni ndo. Ri kʉ føri dho i Mungu rija ko dho “nzɨ ko gba ko tso fø kpa na ri.” Ro, njati ko gba ko tso fø kpa na ró, kpa ka ndima tu ko tu bbʉbbʉlo ró ro.—Azø Waroma 16:17, 18.

17. Ko ká adi ngbá faida ba njati ko d’i bbʉbbʉlo utso ndirigoti ko tøni kprɨ ri kana ró?

¹⁷ Njati ko d’i bbʉbbʉlo utso ndirigoti ko tøni kprɨ ri kana ró, ko kana nga sie chøchø Yova na ndirigoti kodhó udha si ngʉ kpakpa. (Efe. 4:15, 16) Ko ronga si b’oni b’o Shetani dhó kali dhi mafundisho ma, propagande ma na ró ndirigoti Yova si ko ronga b’ob’o bbò mbudha dhi saa djo. Føri dho ara anzi kprɨ ni tøni bbʉbbʉlo kana nari na “ndirigoti ngoi dhi Mungu sie ni na nì.”​—Flp. 4:8, 9.