1. 1 Watesalonike 5:11 ripo nari bbai, ko krʉ dho ká ringani ko njí ngbá njí?

 NI BBÁ ká le chi njudha dhi dzá b’lo inga ni bbá Pidhinga dzá dza ronga ká le thɨthɨ? Njati rie fø ró, ni ya kwanza ni njingʉe njudha fø dza nǎ nari ngano nì. Ni pongʉe mbai Yova dho bbo. Njaro ni nanga jingʉeni ji nari dho, ni dzzngʉe dzz nganga ndirigoti ni ngongʉe njudha tso ngadha dhi dyi bbobbo ni chu na. Kodhó bblo le chi ná Pidhinga dzá dza adi madha bbʉ Yova dho. Ro ko adi madha bbʉ ke dho bbo njati rie nja chu nǎ ko ngachidha dhi njínji ri ró, ná føri tsu ndi nǎ ná lo dada ngachidha dhi njí nganga djolu. Føri kʉ kpakpa le fø madha dhi ngana si ná ndrŭ li nari. Kodhó lo dyʉ ndi ró ná andiko 1 Watesalonike 5:11 nǎ kʉ ná lo Mutume Paulo ngʉ ndí ná saa na, ke ngʉ ngaddi fø ngachidha dzá aina djo.​—Azø.

2. I lo nǎ ká ko si loti ngbá lo djo?

² Le lai ndrŭ ká le ka le li kpakpa ngbaribbai nari chungʉe ná ndrŭ kana Paulo ngʉe bblo pli kʉ ná loroji. Ke ngʉ adi ndi li ndrŭ rɨngana. I lo nǎ ko si ngbaribbai ma ke kongʉe, ndi djoi ma, ndi vei ma na tsotso (1) ndima ve kpakpalo tso d’e (2) nja ndima é ngoi na ndima kana d’e, ndirigoti (3) nja ndi li kpadhó udha kpakpa Yova djo d’e nari nja. Akonja ngbaribbai ma ko ka ko dyø ke, kpakpa ko ko djoi ma, ko vei ma na li nari chulu nari di.​—1 Ko. 11:1.

3. Paulo ká ngʉe ngbá bblo kʉ ná nganjadha na?

³ Paulo jingʉe ndi djoi bbo. Ke mbungʉe kpakpalo ndi nganga ró, føri dzá lo dho ke ka ndi dhoe zølo ndirigoti ndi lie ndi ndi lai Wakristo rɨngana kpakpalo lu kpa da ná saa na. Ddikpa saa djo, Paulo dhó nga ngʉe mbø ro ri ndirigoti  kedhó nga ngʉe njí ro ndi kó na ndi tsotso ndirigoti ndi lai kpa tsotso d’e ri. (Mdo. 20:34) Ke ngʉ adi bbadza (hema) dya ndi dzí nanga d’e. Korinto nǎ ke singʉe ná saa djo, ya kwanza ke ngangʉe njínjidha tso ndi lai bbadza ngʉ dya ná Akila ma, Prisila ma na. Ro “krʉ sabato dyi” ke ngʉ adi ra lod’ra Wayahudi ma, Wagiriki ma na dho. Føri goti Sila ma Timoteo ma na singʉe ná saa djo “Paulo ngangʉe lod’radha dhi njí tso bbo.” (Mdo. 18:2-5) Paulo nzá vingʉe bbo na mana ngʉe ndidhó maisha nǎ ná ritsi nga ri, ná føri ngʉe Yova dho ke njínji nari. Paulo ngʉ adi njínji bidii na nari dho ri ka ndi kae ka ke li ndi djoi ma, ndi vei ma na kpakpa. Ke ngʉ adi ringano kpa dho nzɨ kpa bbá ndima dhó maisha nǎ kpakpalo inga ndima dhó familia dhó loji ná ritsi ndima ne nari liri ndima bé “bbo na mana kʉ ná ritsi” pá, ná føri kʉ Yova dho le madha bbʉ ná chu krʉ.​—Flp. 1:10.

4. Paulo ma, Timoteo ma na ká kongʉe ndima lai Wakristo tsotso kpa hwini kpakpalo na ngbaribbai?

⁴ Tesalonike nǎ kutaniko tso ngani nari goti tse fø Wakristo hwingʉeni kpakpa tso o ná upinzani na. Thø na ngʉe ná wapinzani bangʉe Paulo ma, Sila ma na nzá nari djó, kpa mbangʉe “nja le-djoi fø bba ngʉe ná pi bba ɨ ndima hø ro: I kpetsi kpa Kaisari po ná lo dzá njonjonga nji.” (Mdo. 17:6, 7) Addinga ngbá ngatsi ma fø ø Wakristo ka ndima njie do ndima ra riutso d’i fø bbagʉ kpetsi kpa leni le ndima ró ná saa na nari djo. Kpa ka ndima bbá e kpakpanga na ndima njínji Yova dho ná ritso bbá, ro Paulo nzá jingʉeri fø lo njini ri. Føri dho ke ma, Sila ma na ra nari njí, kpa lingʉeri fø ø kutaniko é bblo ndi djonga njani ro. Paulo pongʉeri Tesalonike nǎ Wakristo dho: “Ko cho kodhi djona Timoteo . . . , nja ndi li ni kpakpa ndirigoti ndi pɨ ni iso ni dhi udha dzá lo dho d’e, ndiro nzɨ ni kana ddikpa le ma nji kpakpalo do ro ró.” (1 Te. 3:2, 3) Timoteo ro dangʉe fø di ná kpakpalo lú b’lo Listra nǎ. Ke njangʉe føro ká Paulo lingʉe le-djoi kpakpa ngbǎ ma nari nja. Yova kongʉe kpa tsotso nari ndi njae ná føri ka ndi lieri Timoteo d’rari kpa dho kpa tsotso ma Yova si ko ddi.​—Mdo. 14:8, 19-22; Ebr. 12:2.

5. Bryant ró dho kʉ ná le-djo ká bangʉe faida ddikpa muzee dhó ngatsotsokodha nǎ ro ngbaribbai?

⁵ Paulo ká lingʉe ndi lai Wakristo kpakpa nja ngbá chu na? Listra ma, Ikoniamu ma, Antiokia ma na nǎ lú ndima ngʉ ro, Paulo ma, Barnaba ma na “lingʉe wazee fø kutaniko krʉ lu.” (Mdo. 14:21-23) Bbʉbbʉ dhé, fø wazee ka ndima ée leisopɨdha kutaniko dho, ddiddi rie njʉ nari bbai. Anja Bryant ró dho kʉ ná le-djo po ná lo: Ke pori “Go madhó cho ngʉe 15 ro, madzá baba rangʉe ra abbaro ndirigoti madzá mama ngʉngʉe mutengwa. Ma mbungʉe ma bba le bba nari bbai ndirigoti ma thí bʉngʉeni bʉ.” Nde, Bryant tsotso ká addu kongʉe nja ndi ve fø kpakpalo tso d’e? Ke pori: “Tony ró dho kʉ ná muzee ngʉ adi loti ma na njudha dhi ngana ndirigoti nja saa na maddi. Ke ngʉ adi loti ma dho ndima dhó hwè ronga b’oe nì mai ndima bani fø di ná kpakpalo na ro ná ndrŭ djo. Ke zøngʉe Zaburi 27:10 ma dho ndirigoti bí ina ke ngʉ adi loti ma dho Ezekia djo, chi ndi tongʉeni Yova dho nga mai ndidzá baba ngʉe bblo kʉ ná loroji ro.” Fø lo ká kongʉe Bryant tsotso ngbaribbai? Bryant pori, “Tony dhó ngatsotsodha chulu, Ma ngangʉe krʉ saa ró ma lod’radha dhi njínji nari tso, ná føri ngʉ adi hwè bbʉ ma dho.” Wazee, anidi krr nja ni kó Bryant bbai dhó lo u le li ndima kpakpa “bblo lo” na ná ndrŭ tsotso d’e.​—Mez. 12:25.

6. Paulo ká ngʉ adi njínji ndrŭ dhó maisha djo tilo ná lo na ngbaribbai nja ndi li ndi djoi ma, ndi vei ma na kpakpa d’e?

 ⁶ Paulo nongʉe nga ndi lai Wakristo dho nari kʉ, Yova dhó le tsotsokodha chulu “ndundu bbai kʉ ná bbadimu” vengʉe kpakpalo tso ve. (Ebr. 12:1) Paulo chungʉeri chu nari kʉ, kpakpalo krʉ tso vengʉe ná ndrŭ dhó loroji ka ndi bbʉe kpakpanga ndi djoi ma, ndi vei ma na dho ndiro kpa li ndima thí “shi di ná Mungu bbá bbo bba djo” d’e. (Ebr. 12:22) Njʉ maddi ri kʉ føri bbai. Ko krʉ adi kpakpanga ba Yova kongʉe Gideoni ma, Baraka ma, Daudi ma, Samweli ma, ndirigoti nja bí kʉ ná ndrŭ ma na tsotso nari ko zø ná saa djo. (Ebr. 11:32-35) Ndirigoti njʉ kʉ udha na ná ndrŭ dhó loroji ma adi ko li kpakpa ddi. Yova dzá Dimu dhó bbo bbagʉ, ko adi le-djoi ma, le-ve ma na dhó barua ba bí ina, njʉ tøni chi ná ndrŭ dhó maisha djó lo le ndi nari ndima zø nari lie ndima dhó udha kpakpa ro.

7. Waroma 14:19-21 nǎ Paulo ndi ná shauri nǎ ro ká ni ba ngbá somo?

⁷ Ko adi ko djoi ma, ko vei ma na li kpakpa njati ko ti ná lo inga ko nji ná lo di rili ngoi é kutaniko nǎ ró. Ko nzɨ adi ribba kodhó ngaddidha kʉ njonjo nari ndó ko nanga ri. Ndirigoti ko nzɨ adi ndrŭ cho ndrŭ u kodhó ngaddidha ri, rie nzá Biblia nǎ kanuni po lo fø lo djo ri ró. Anja ddikpa loroji. Roma nǎ kutaniko nǎ ngʉe Wayahudi ma, nga kʉ wayahudi ná ndrŭ ma na. Musa dhó sheria bbangʉe njí tso ná saa djo, ri nga ngʉe lazima nzɨ Yova dzá ndrŭ nyo gʉ Musa dhó sheria gʉngʉe ná nyo ri. (Mk. 7:19) Fø saa djó ro, Wayahudi kʉ ná nja Wakristo mbungʉe ndima huru ndima nyó krʉ kʉ ná nyo d’e. Ro, Wayahudi ngʉe ná nja Wakristo ngʉ rinja ri nga kʉ bblo le nyó fø nyo ri. Fø lo djó kutaniko nanga ndongʉeni ndó. Paulo tingʉe lo kpa dho ngoi ronga le b’o ná føri kʉ bbo na mana kʉ ná lo nari djo ndirigoti ke pongʉeri: “Ri nga kʉ bblo ni á zǎ, ni jø wa inga ni njí bʉ ka ndi bʉ adjoni thí ná ritsi krʉ ri.” (Azø Waroma 14:19-21.) Paulo kongʉe ndi lai Wakristo tsotso kpa nja ngbaribbai ma, fø di ná lo ka ndi é che kʉ ná matokeo na kpa kana kila mutu djo ndirigoti kutaniko krʉ djo nari. Ke ngʉ adi riji ndi ø ndidhó nyí thika ø ndiro nzɨ ndi bʉ nja ndrŭ thí ró. (1 Ko. 9:19-22) Ko maddi ko ka ko li nja ndrŭ kpakpa ndirigoti ko liri kutaniko é ngoi na njati rie nzɨ ko gʉni kila mutu dho ringani ndi vʉ nanga ná lo djo ri ró.

8. Bbo na mana kʉ ná lo jingʉe ndi sa kutaniko nǎ ngoi ná saa djo, ká Paulo njingʉeri ngbǎ?

⁸ Paulo bbangʉe bblo kʉ ná loroji ko dho ngbaribbai ma, ko ka ko b’o ngoi ronga nzɨ na le rrni bbo na mana kʉ ná lo djó ná ndrŭ na nari djo. Loroji na, karne ya kwanza nǎ kutaniko nǎ nja kpa ngʉ adi ripo, nga ngʉe Wayahudi ná Wakristo dho ringani ndima njí tohara, njaro føro nzá nja Wayaudi ka ndima die kpa nja che ri. (Gal. 6:12) Paulo nzá ungʉe kpadhó fø nganjadha tso ro ri, fø nga rɨngana ke pongʉeri le ne fø lo nanga vi, nyenyenga na ke kongʉe shauri mitume tsó ndirigoti Yerusalemu nǎ ngʉe ná wazee tsó. (Mdo. 15:1, 2) Fø lo bbʉngʉe ná matokeo ngʉe, ri kongʉe nja kʉ ná Wakristo tsotso ndima b’o kutaniko nǎ hwè ma, ngoi ma na ronga.​—Mdo. 15:30, 31.

9. Ko ká ka ko dyø Paulo dhó loroji ngbaribbai?

⁹ Njati ddikpa nzɨ dho le rrni ná lo banga ró, ko ka ko b’o kutaniko nǎ ngoi ronga Yova li kutaniko ronga b’odha dho ná kpa dhó ro ko chutsoddadha ne nari chulu. Bí ina Biblia ró dyʉ ndi ná chutsoddadha ka  ndi bani kodhó vichapo na inga tengenezo bbʉ ná chutsoddadha na. Njati ko di fø lojadha dyø ko nganga dhó nganjadha ko dyøé nari rɨngana ró, ko si rili ngoi é kutaniko nǎ.

10. Paulo ká njingʉe nja ngbá lo nja ndi b’o kutaniko nǎ ngoi ronga d’e?

¹⁰ Paulo ngʉ adi kutaniko nǎ ngoi ronga b’o, ndi djoi ma, ndi vei ma na dhó bblo sifa djo ndi loti nari na, nga kpadhó chelo ri. Loroji na, Roma nǎ Wakristo dho ndi ndi ná ya mwisho barua nǎ Paulo nzingʉe bí kʉ ná ndrŭ ndima ró dho na, ndirigoti bí ndrŭ djo ke tingʉe bblo lo inga nini kʉ ná nja lo. Ko ka ko dyø Paulo ko djoi ma, ko vei ma na dhó bblo sifa djo ko loti nari chulu. Njati ko njiri fø ró, ko ka ko bbʉ ko djoi ma, ko vei ma na dho nja sababu nja ndima kana nga é chøchø d’e, ná føri ka ndi liri kutaniko dhidhi jidha kana.

11. Lo ta ko kana ná saa djo, ká ko ka ko ngʉ ngoi ko kana ngbaribbai?

¹¹ Nja saa djo, dhidhi kiroho nǎ ná Wakristo ma ka ndima rrni nzá ddi ndima kana. Føri kʉ Paulo ma, ndidzá kau Barnaba ma na kana tangʉe ná lo ro. Fø kpetsi kpa gʉngʉeni bbo ndima dhó luti safari dho ká Marko si rara ndima ulu inga nzɨ ma nari djó. Kpa “ddangʉeni bbo pli ndima kana” ndirigoti kpa bbangʉe ddinga ndima bbi nari tso bba. (Mdo. 15:37-39) Ro luti Paulo ma, Barnaba ma, Marko ma na njingʉe ngoi ndima kana ná føri na kpa dhongʉeri ngoi ndirigoti ddi kutaniko tso gbani nari kʉ bbo na mana kʉ ná lo. Luti Paulo tingʉe lo bblo Barnaba ma, Marko ma na djo. (1 Ko. 9:6; Kol. 4:10) Ringani ko maddi ko si ko kana kʉ kutaniko nǎ nja ndrŭ na ná lo ndirigoti ko rá anzi kpadhó bblo sifa djo ko ko thí li nari na. Fø ko rinji nari na ko ka ko b’o ngoi ronga ndirigoti ddi le tso gbani nari ronga.​—Efe. 4:3.

12. Ko djoi ma, ko vei ma na adi hwini tso ró, nari ká kʉ ngbá kpakpalo ro mai?

¹² Ko adi ko djoi ma, ko vei ma na li kpakpa njati ko di kpadhó udha li kpakpa Yova djo ró. Nja kpa, ndima dhó familia nǎ ndrŭ ma, ndima lai njí dhi ndrŭ ma, ndima lai darasa nǎ nzø ma na adi be pá. Nja kpa hwini afya dhi kpakpalo tso ró, inga che ndima ndima mbu nari tso ró. Nja kpa ba batiso nari goti cho si bí ndirigoti kpa adi i dz’ dzá mwisho si nari b’o drrdrr nga djó ro. Fø lo krʉ ka ndi tsu Wakristo dhó udha mbudha kana njʉ. Karne ya kwanza nǎ Wakristo maddi ngʉ adi hwini fø di ná kpakpalo na. Nde, Paulo ká njingʉe addu nja ndi li ndi djoi ma, ndi vei ma na kpakpa d’e?

13. Pá ndrŭ ngʉ adi bé ndima u ná lo djó ná ndrŭ tsotso ká Paulo kongʉe ngbaribbai?

¹³ Paulo ngʉ adi njínji maandiko na nja ndi li ndi djoi ma, ndi vei ma na kpakpa d’e. Loroji na, kpadhó nga kʉ Wakristo ná familia ngʉ adi ripo Wayahudi dhó dini kʉ bblo pli Wakristo dhó dini djolu ná saa na, Wakristo kʉ ná Wayahudi nzá ka ndima bae ngbaribbai ma ndima ngʉ fø kpadhó logoti nari ro ri. Bbʉbbʉ dhé, Paulo ndingʉe Waebrania dho ná barua lingʉe fø Wakristo kpakpa. (Ebr. 1:5, 6; 2:2, 3; 9:24, 25) Kpa ka ndima njie njí kedhó kpakpa ngʉe ná fø ngaddidha na, nja ndima ngʉ na fø wapinzani dhó logoti d’e. Njʉ, nja kʉ ná Wakristo ndima lai ndrŭ adi bé pá, ná fø kpa tsotso ko ka ko kó Biblia ró dyʉ ndi ná vichapo na ndiro kpa tú ndima dhó udha nanga nja ndrŭ dho d’e. Ndirigoti njati rie kodhó jadda kpa ndrŭ bé pá ndima uri ritsi norieni nó nari djó ró, ko ka ko kó kpa tsotso broshua Uhai​—Ulitokana na Muumba? ndirigoti Vitu Vyenye Uzima Vilianza Namna Gani?​—Maulizo 5 ya Kujiuliza na, ndiro kpa  dhǒ addudho ma, ndima ueri ritsi noni nó nari d’e.

14. Nì mai Paulo ngʉ adi lod’radha ma, longaddidha dhi njí ma na nji bbo ro, ke ká ngʉ adi addu ma nji ddi?

¹⁴ Paulo ngʉ adi ndi djoi ma, ndi vei ma na li kpakpa nja ndima dhǒ jidha “bblo kʉ ná njí” Chulu d’e. (Ebr. 10:24) Ke ngʉ adi ndi djoi ma, ndi vei ma na tsotso kó nga ndi ti ná lo chulu dhé ri, ro ndi nji ná lo chulu maddi. Loroji na, Yudea na ù (njala) chingʉe ná saa na, Paulo bbʉngʉe fø Wakristo dhó lo ungʉe ná ritsi ro kpa dho. (Mdo. 11:27-30) Bbʉbbʉ dhé, nì mai Paulo ngʉ adi lod’radha ma, longaddidha ma na dhi njínji bbo ro, ke ngʉ adi kimwili nǎ ritsi dhi mahitaji na kʉ ná ndrŭ tsotso ndi ko ná chu ne krʉ saa ró. (Gal. 2:10) Fø ndi rinji nari na ke ngʉ adi ndi lai Wakristo tsotso kó, kpa uri nari kʉ Yova si ndima ronga b’ob’o. Njʉ maddi, njati ko di njínji kodhó saa na ma, kodhó kpakpanga na ma, kodhó ufundi na ma, nja ko kó na chʉ ngaba ná lo na bani ná le-djoi ma, le-vei ma na tsotso ró, føri na ko ka ko li kpadhó udha kpakpa. Ko ka ko njiri ki fø, dz’ djolu gble njini ná njí tsotso ko kó kodhó muchango na nari chulu. Fø chulu ndirigoti nja chu nǎ maddi ko adi ko djoi ma, ko vei ma na tsotso kó kpa uri nari kʉ, Yova nzɨ bba ndima ro ri.

15-16. Djø dhó udha djø ná ndrŭ na ká ko ka ko njini ngbaribbai?

¹⁵ Djø dhó udha djø ná ndrŭ ro nzɨ Paulo ngʉ adi bbabba ri. Ke ngʉ adi zølo dhǒ kpa dho ndirigoti ke ngʉ adi loti kpa na ji ndi nanga jini ro. (Ebr. 6:9; 10:39) Loroji na, Waebrania dho ke ndingʉe ná barua nǎ, ke ngʉ adi njínji “ko” na inga “ko dho” na, fø chulu ke ngʉ adi ridho nari kʉ, fø shauri na ndi ma ka ndi njinjí ddi. (Ebr. 2:1, 3) Paulo bbai, ko nzɨ adi djø dhó udha djø ná ndrŭ ro bba ri. Føri rɨngana ko adi kpa li kpakpa,  li ko ko dyu li kpa ro nari na. Fø chu nǎ ko adi kodhó jidha dhǒ kpa dho. Hwè na ndirigoti bblo sauti na ko loti kpa dho nari ka ndi li kpa kpakpa nja lo krʉ djolu.

¹⁶ Paulo ngʉ adi rid’ra ndi djoi ma, ndi vei ma na dho nari kʉ, Yova kpadhó bblo njí nja nì. (Ebr. 10:32-34) Ko maddi ka ko njiri fø djø dhó udha djø ná ke ronga ko ra be ná saa djo. Ko ka ko dhuri ke tso ke ka chungʉe bbʉbbʉlo ngbaribbai inga ko li ke kpakpa ke ddinga Yova kongʉe ndi tsotso ná saa djo. Ko ka ko pori Yova nzá vi kedhó drrdrr ke dhongʉe ná jidha nga ro ri ndirigoti ke nzɨ si ke ro bba gosi ná saa djo maddi ri. (Ebr. 6:10; 13:5, 6) Njaro fø di ná lo ka ndi li le-djoi ma, le-vei ma na kpakpa ndiro ndima rá anzi Yova dho ndima njínji nari na d’e.

17. Ko ká ka ko ngʉ kpakpa ngbǎ ko rinji nari chulu?

¹⁷ Dza chi ná ke dhó ufundi adi dhidhi ke ra anzi njí na nari bbai, ko maddi ko ka ko ngʉ ufundi na njati ko di ko li kpakpa ko kana ró. Ko maddi ko ka ko kó nja ndrŭ tsotso ndima ngʉ kpakpa nja ndima ve kpakpalo tso d’e, b’lo vengʉe kpakpalo tso ná ndrŭ dhó loroji ko dhǒ kpa dho nari chulu. Ko ka ko b’o ngoi ronga nja ndrŭ dhó bblo lo djo ko loti nari na, ndirigoti akodi ngoi ronga b’o sa ri ji ndi sani ná saa na, ndirigoti lo tá ko kana ró akonji ngoi. Ndirigoti ko ka ko li ko djoi ma, ko vei ma na dhó udha kpakpa Biblia nǎ bbo na ma na kʉ ná bbʉbbʉlo ko d’ra kpa dho nari na, kimwili nǎ ko kpa tsotso kó nari na, ndirigoti djø dhó udha djø ná ndrŭ tsotso ko kó nari na.

18. Ni ká vʉri ni rá anzi addu ni nji nari na?

¹⁸ Pidhinga dzá dza chi ná kpa adi hwè ba bbo. Ko si hwè ba bbo njati ko di ko djoi ma, ko vei ma na dhó udha li kpakpa ró. Dza ka ndi sani sa, ro kpakpa ko ndrŭ li nari dhi matokeo ka ndi di choro nŭnŭ! “Akora anzi ko iso ko pɨ ko kana nari na ndirigoti akoli ko kpakpa ko kana.”​—1 Te. 5:11.