LONGANEDHA DHI RI 31
DYI 12 Yova bbò Mungu
Yova njingʉe ná lo ndiro ndi gø ndrŭ chenga ma, dhe ma na nǎ ro d’e
“Mungu jingʉe dz’ bbo nari dho, ke bbʉngʉe ndidzá ddikpa dhé kʉ ná ngba.”—YOH. 3:16.
RI NǍ LO
I lo nǎ ko si loti ngbaribbai ma Yova liri ri kaka ko dho ko si chenga djolu ndirigoti ko njí ndi nyǒ tho ná lo nari djo. Godhé, ko si ngbaribbai ma ke liri ri kaka ko dho ko si di cho ró nŭnŭ, nzá ko nji chenga ki ro nari nja.
1-2. (a) Chenga ká kʉ addu ndirigoti ko ká ka ko si ri djolu ngbaribbai? (Anja “Nja lo nanga le tu nari” maddi.) (b) I Dzamu dhi Munara nǎ i lo nǎ ndirigoti nja kʉ ná lo nǎ ká ko si loti ngbá lo djo? (Godhé anja i Dzamu dhi Munara nǎ ɨ djǒ ripo ná lo “Lo zø ná ndrŭ dho.”)
YOVA Mungu ká jirie ni ngbá ngatsi? Ni ka ni ba fø logoti, lo ni chú ke njingʉe ni dho ndiro ndi gø ni chenga ma, dhe ma na nǎ ro ná lo djo nari chulu. Chenga a kʉ nzá tso ró ni ka ni hwini ni nganga dhó kpakpanga na ná bbo pli kʉ ná mbuba. Ko adi chenga nji krʉ ddo ró ndirigoti ko kʉ chenga dhi ndrŭ nari dho ko krʉ adi cheni che. (Ro. 5:12) Ro, hwè dhi lo-i ro i kʉ nì. Yova dhó nga tsotsokodha chulu, ko si sisi chenga ma, dhe ma na djolu!
2 Yova korie ndrŭ tsotso chøchø cho 6 000 b’lo ndiro ndrŭ njínji ndi dho nì mai ndima e chenga dhi ndrŭ ro. Ká addudho? Dhonalo ke jirie ko ji. Ke jirie ndrŭ, ndrŭ ndi nongʉe ná nga djo ró dhé. Føri dho, ke nji bí kʉ ná lo ko dho ndiri kó ko tsotso chenga ko nji ná saa na d’e. Mungu churi nari kʉ chenga adi rili ko cheni che ndirigoti ke nzá jirieri ko cheni che ri. Ke jiri ko di cho ró nŭnŭ. (Ro. 6:23) Føri i kʉ ni dho ke jirie ná lo. I lo nǎ, ko si gbo kʉ ná logoti ngʉ: (1) Yova ká lingʉeri chenga dhi ndrŭ é ngab’odha na ngbaribbai? (2) Biblia tilo djo ná nzá kaka ná ndrŭ ká njingʉeri ngbǎ ndiro ndima tso uni Yova na d’e? (3) Yesu ká njingʉe ngbá lo ndiro ndi gø ndrŭ chenga ma, dhe ma na nǎ ro d’e?
YOVA KÁ LINGɄERI CHENGA DHI NDRŬ É NGAB’ODHA NA NGBARIBBAI?
3. Adamu ma, Eva ma na ká njingʉe ngbá chenga?
3 Yova nongʉe ya kwanza kpetsi ke ma, isɨle ma na ná saa na, ke jingʉeri kpa é hwè na. Yova bbʉngʉe bblo kʉ ná didha dhi nga ma, ndoa dhi kado ma, bblo pli kʉ ná njí ma na kpa dho. Kpa ka ndima lieri ndima nǎ gø lili dz’ djo ndirigoti dz’ lu djonga ngʉ paradiso Edeni nǎ í nanga bbai. Yova bbʉngʉe ddikpa sʉsʉ kʉ ná yadha dhé kpa dho. Ndirigoti ke pongʉeri kpa dho njati kpa d’ri ndidzá yadha nanga ndirigoti kpa tsatsa ndi ro ró, kpa si kʉ cheni che. Ro, ko chu føro njingʉeni ná lo ngbà. Nzá jingʉe Mungu ma, ndrŭ ma na ná ddikpa che kʉ ná Malaika shangʉe Adamu ma, Eva ma na ndiro nzɨ kpa rrnga Mungu dho ró. Adamu ma, Eva ma na njingʉe che kʉ ná fø Malaika jingʉe ná lo. Kpa nzá lingʉe ndima thí ro bbo dhongʉe jidha ndima dho ná Baba djo ri. Kpa rr é nga ke dho nari rɨngana, kpa njingʉe chenga. Yova po ná lo adi njini nji dhé. Kpa rrngʉe nga nzá nari djotsina, kpa ngʉngʉe ngó ndirigoti kpa chengʉeni che.—Mwa. 1:28, 29; 2:8, 9, 16-18; 3:1-6, 17-19, 24; 5:5.
4. Yova ká ndrorie chenga addudho ndirigoti ke ká adi ko tsotso kó ngbaribbai ndiro ko si ri djolu d’e? (Waroma 8:20, 21)
4 Yova liri fø lo ndini Biblia na ndiro ko famu ddikpa bbo na ma na kʉ ná lo d’e. Fø lo adi ko tsotso kó ko famu addudho ma ke ndrorie chenga bbo nari. Chenga adi ko kana nga ndondo kodhi Baba na ndirigoti ri adi ko mba dhe djo. (Isa. 59:2) Ri kʉ føri dho i Shetani ndrorie Yova ma, ndrŭ ma na ndro ri. Ke lingʉeri Adamu ma, Eva ma na njí chenga ndirigoti ke adi ra anzi ndrŭ ndi sha nari na. Adamu ma, Eva ma na njingʉe chenga ná saa na, njaro Shetani ngʉ riddi ndi sa Yova ngʉe na ndrŭ dho ná kusudi sa. Ro, ke nzá chungʉe Yova ká e jidha na ngbá ngatsi ma nari ro ri. Yova nzá d’erie ndidhó kusudi thika ro ø Adamu ma, Eva ma na nǎ gø djo ri. Ke jirie ndrŭ ji nari dho, føri goti thei ke bbʉngʉe ngab’odha ndrŭ krʉ dho. (Azø Waroma 8:20, 21.) Yova chungʉeri nari kʉ, fø gø kana ro nja ndrŭ si rivʉ ndima dhǒ jidha ndi dho ndirigoti ndima ne ndidhó nga tsotsokodha ndiro ndima si si chenga djolu d’e. Ke kʉ ndrŭ dhi Baba ndirigoti ngano ná ke nari bbai, ke liri ri kaka ndrŭ dho ndrŭ ndri ndima chøchø ndi ro ndirigoti ndrŭ gøgø chenga ma, dhe ma na nǎ ro. Yova ká liri fø lo krʉ kaka ngbaribbai?
5. Ya Kwanza ká Yova bbʉngʉe ngab’odha chenga dhi ndrŭ dho ngbá saa na? Atu rinanga. (Mwanzo 3:15)
5 Azø Mwanzo 3:15. Ya kwanza Yova bbʉngʉe ngab’odha chenga dhi ndrŭ dho ke d’rangʉe Shetani ró si njini ná lo ná saa na. Mungu pongʉeri ndrŭ si gødha ba chulu ná ddikpa “gø” ro sie thé. Fø gø ka ndi sie Shetani djǒ nanga d’rɨd’rɨ ndirigoti ndi thɨ Edeni nǎ í nǎ ke ngangʉe tso ná chelo thika krʉ. (1 Yo. 3:8) Nì mai ri kʉ føro, fø gø ro ka ndi nzaeni vi. Shetani ka ndi njieri ke ró che inga ndi hwi ke hwi. Fø lo ka ndi voe Yova thí ronga bbo pli. Ro, Yova ngʉe tayari ndi nzani nza ndirigoti ndi uri fø gø ma nzani nza ddi ndiro ndi gø ndrŭ chenga ma, dhe ma na nǎ ro d’e.
BIBLIA TILO DJO NÁ NZÁ KAKA NÁ NDRŬ TSO KÁ UNGɄENI YOVA NA NGBARIBBAI?
6. Abeli ma, Noa ma, chi ngʉ tøni ná nja kʉ ná kpa ma na ká njingʉe ngbá lo ndiro ndima kana nga é chøchø Yova na d’e?
6 Dzodzo dhé, Yova løngʉe chu ndiro ndima kana nga ngʉ chøchø chenga dhi ndrŭ na d’e. Adamu ma, Eve ma na dhi ya pili ngba, Abeli lingʉe ndidhó udha Yova djo, b’lo che pli kʉ ná lo njingʉeni Edeni na nari goti. Abeli jingʉe Yova, ke jingʉeri ndi bbʉ hwè ke dho ndirigoti ndima kana nga é chøchø ke na nari dho, ke bbʉngʉe bbʉdha ke dho. Abeli ngʉe miya ronga b’o ná ke, føri dho ke dzingʉe ndidhó chembø kana ro bblo kʉ ná ri ndirigoti ke bbʉngʉe ri bbʉdha Yova dho. Fø lo ká Yova njangʉe ngbaribbai? Ke “ungʉe Abeli ma, kedhó bbʉdha ma na tso u.” (Mwa. 4:4) Yova nanga ngʉ adi jini nja ndrŭ bbʉ ndi dho ná bbʉdha dho maddi, føri ngʉe Noa bbʉngʉe ná bbʉdha ro mai. (Mwa. 8:20, 21) Fø di ná bbʉdha tso ndi u nari chulu, Yova dhongʉeri nari kʉ chenga dhi ndrŭ tso ka ndi uni ndi na ngbà ndirigoti ndima kana nga ka ndi ngʉ chøchø kpa na. b
7. Abrahamu bbʉngʉe ndidhi dduna bbʉdha jidha na, nari nǎ ro ká ko ba ngbá somo?
7 Abrahamu ngʉe kpakpa kʉ ná udha na Yova djo. Yova nzingʉeri Abrahamu njí kpakpa kʉ ná ddikpa lo. Ke pongʉeri ke bbʉ ndidhi dduna Isaka bbʉdha. Bbʉbbʉ dhé, fø lo ka ndi bʉe Abrahamu thí bbo. Ro, ke vʉngʉeri ndi rrnga Yova dho. Abrahamu ngʉ riji ndi hwi ndidzá ngba ná saa na, Mungu chongʉe ke tso cho. Yova chungʉeri bblo pli nari kʉ, Abrahamu ka ndi mbue ndi che bbo njati ndi hwie ndidzá ngba hwi ró. Fø loroji ridho nari kʉ, Yova jingʉeri ko chu gosi ná saa na ndi si nji ná lo. Yova ngʉe tayari ndi bbʉ ndidzá bbo ndi jingʉe ná ngba bbʉdha ndi jirie ndrŭ bbo pli nari dho.—Mwa. 22:1-18.
8. Ko ká ba ngbá somo yadha pongʉeri le bbʉ zǎ bbʉdha nari nǎ ro? (Mambo ya Walawi 4:27-29; 17:11)
8 Yova bbʉngʉe yadha Waisraeli dho ná saa na, ke pongʉeri kpa di zǎ bbʉ bbʉdha ndima dhi chenga djotsina. (Azø Mambo ya Walawi 4:27-29; 17:11.) Fø bbʉdha ngʉ ridho nari kʉ, Yova sie bblo pli kʉ ná bbʉdha bbʉ ndiro ndi si ndrŭ gø theinga dho chenga nǎ ro d’e. Mungu pongʉeri ndidhó bbanabi ndí lo, tso djo ndi tsongʉeni ná fø gø djo. Ndirigoti kpa dhongʉeri nari kʉ, fø gø sie Mungu nganga dhi dduna, ná ke ka ndi nzaeni nza ndirigoti ndi dhedhe. Ke ka ndi ée bbʉdha dho le ngʉ bbʉ ná chembø bbai. (Isa. 53:1-12) Anzingaddi di: Yova kpengʉeri ndi bbʉ ndidzá bbo ndi ji ná ngba ndiro ndi gø ndrŭ chenga ma, dhe ma na nǎ ro d’e,—fø ndrŭ tsu ni maddi ndi nǎ!
YESU KÁ NJINGɄE NGBÁ LO NDIRO NDI GØ NDRŬ CHENGA NǍ RO D’E?
9. Batiso ngʉ bbʉ ná Yohana ká pongʉe ngbá lo Yesu djo? (Waebrania 9:22; 10:1-4, 12)
9 Cho 29 na Y.G.G., batiso ngʉ bbʉ ná Yohana njangʉe Nazareti nǎ Yesu ndirigoti ke pongʉeri ɨ: “Anja, Mungu dzá chembø, dz’ djó chenga ndi tŭ ro!” (Yoh. 1:29) Roho takatifu chulu ndingʉeni ná lo ridho pʉlʉpʉlʉ nari kʉ, Yesu i ngʉe drrdrr djo unabi tingʉe lo ná gø. Yova bbʉngʉe ndidzá ngba ndiro ndi gø ndrŭ krʉ chenga nǎ ro d’e.—Azø Waebrania 9:22; 10:1-4, 12.
10. Yesu pongʉeri ndi “sì chenga dhi ndrŭ nzi” nari nǎ mana ká kʉ addu?
10 Yesu ngʉ loti nzɨ ngʉ ndima mbu bblo ndima nji ná chenga djotsina ná ndrŭ tsotso ndi ka ndi kó nari djo ndirigoti ke ngʉ kpa nzi ndiro kpa ngʉ ndi unakpa d’e. Ke chungʉeri nari kʉ ndrŭ ngʉ nzani nza chenga djotsina. Føri dho, ke ngʉ adi chenga ndima nji nari djotsina nzani ná kpetsi kpa ma, isɨ ndrŭ ma na tsotso kó ko. Ddikpa loroji chulu, ke dhongʉeri: “Nzɨ dhe nji ná ndrŭ dhó lo nzɨ adi munganga u ri, ro ri kʉ dhe dhi ndrŭ.” Ke pongʉeri ki ɨ: “Ma nzá si chølo dhi ndrŭ nzidha dho ri, ro chenga dhi ndrŭ dho.” (Mt. 9:12, 13) Ndirigoti Yesu ngʉ adi fø lo nganga ró njínji. Ddikpa isɨle ʉngʉe ke kó ronga ndi nyǒ-dda na ná saa na, ke tingʉe lo le na nyenyenga na ndirigoti ke njingʉe ledhó chenga zø nji. (Lu. 7:37-50) Samaria nǎ ddikpa isɨle dho, Yesu d’rangʉe bbo na mana kʉ ná bbʉbbʉlo, ngbà mai ke d’ingʉe fø le ma dí nga kʉ ndibbá ke ná ke na nari ri utso ro. (Yoh. 4:7, 17-19, 25, 26) Mungu bbʉngʉe kpakpanga Yesu dho ndiro ke d’ø chenga nǎ ro adi si ná lo tso krʉ d’e, føri kʉ dhe lé dhe nari ro mai. Ká ngbaribbai? Yesu ngʉ kpetsi kpa ma, isɨ ndrŭ ma, jadda nzø ma na gága.—Mt. 11:5.
11. Chenga dhi ndrŭ ká jingʉe Yesu addudho?
11 Ko ka ko famu addudho ma, chenga ngʉ adi njí ná ndrŭ jingʉe Yesu nari bblo. Ke ndrŭ dhi ri zø ngʉ adi nji ndirigoti ke ngʉ adi ndi li nja ndrŭ rɨngana. Ndrŭ nzɨ ngʉ adi do ro nji ke na ndima loti nari dho ri. (Lu. 15:1, 2) Ndirigoti udha na ngʉe Yesu djo ná ndrŭ, ke ngʉ adi li kpakpa ndirigoti ke bbʉngʉe kpa kóbe bbʉ. (Lu. 19:1-10) Yesu ngʉ adi zølo dhǒ ndrŭ dho ndidzá Baba bbai. (Yoh. 14:9) Yesu tso nǎ lo ma, ke ngʉ nji ná lo ma na chulu, ko churi nari kʉ Yova kʉ zølo dhi Mungu ndirigoti ke jirie chenga dhi ndrŭ ji ndirigoti ndi kó kpa tsotso ko. Yesu kongʉe ngbà jiri ndima ø ndima dhó lo thika ndirigoti ndima dyø ndi ná ndrŭ tsotso ko.—Lu. 5:27, 28.
12. Yesu ká ddingʉe ngbá lo ndidzá dhe djo?
12 Yesu chungʉeri ndi si ndidzá shinga bbʉ bbʉdha. Ddikpa cha ke pongʉeri ndi unakpa dho, ndi nanga ndrŭ si dzɨdzɨ ndirigoti ndi ndrŭ si ti tsuba djo. (Mt. 17:22; 20:18, 19) Ke chungʉeri nari kʉ, fø bbʉdha si dz’ djó chenga sasa Yohana d’rangʉeri ndirigoti unabi pongʉeri nari bbai. Yesu pongʉe fø lo ndi dhó shinga ndi bbʉngʉe ndrŭ djotsina nari goti maddi, ke pongʉeri ndi si kʉ “krʉ kʉ ná ndrŭ drr” ndi dhi ngana. (Yoh. 12:32) Nì kʉ udha na Yesu djo ndirigoti nì ngarr kedhó yadha dho ná ndrŭ adi kpakpanga nji ndima dyø ke Yova ji ná lo ndima nji nari na. Njati kpa njí ri fø ngbà ró, “kpa ka ndima kloni klo” chenga nǎ ro. (Ro. 6:14, 18, 22; Yoh. 8:32) Jidha na ndirigoti nga nǎ do ro Yesu ungʉeri ndi ve bbo dro ǒ ná dhe tso ndiro ndi gø ko d’e.—Yoh. 10:17, 18.
13. Yesu ká dhengʉe ngbaribbai ndirigoti fø lo ká ngbá longaddi ko dho Yova djo? (Anja ji maddi.)
13 Yesu nanga dzingʉe nari ngʉe kedzá bbakua kana ddikpa ke. Føri goti, kedhó mbubai løngʉe ke, kpa ngʉ ke dhudhu ndirigoti kpa ngʉ ke bbø kali dhi lo na. Kpa pongʉeri ringani ke dhedhe ndirigoti kpa nzangʉe ke bbo. Mwisho, bbasødda tɨngʉe ke tsú ba djo ndirigoti ke dhengʉe dhe. Ke vengʉe fø kpakpalo tso krʉ chi ndi tøni ro, ro ddikpa ke mbungʉe ndi che bbo pli fø lo dho. Føri ngʉe Yova Mungu. Yova ngʉe kpakpanga na ndi cho ndidhi dduna nzani nari tso cho, ro ke nzá njingʉeri fø ri. Nde, addui ká lingʉeri jidha dhi Baba bbari fø lo njini? Dhonalo, Yova ji ko ji. Yesu pongʉeri ɨ: “Mungu jingʉe dz’ bbo nari dho, ke bbʉngʉe ndidhi dduna ddikpa dhé kʉ ná ke, ndiro ngbà ú ke ná le nzɨ ba sadha ró, ro ndi le ba nŭnŭ di ná shinga d’e.”—Yoh. 3:16.
Yova thí bangʉe njedha bbo ke bbangʉeri ndrŭ hwi ndidhi dduna ndiro ndi gø ko chenga ma, dhe ma na nǎ ro ná saa na (Anja paragrafu 13)
14. Yesu bbʉngʉe ndi nari nǎ ro ká ko ba ngbá somo?
14 Yesu bbʉngʉe ndi nari ngbá ngatsi ma Yova jirie Adamu ma, Eva ma na nǎ gø nari dhǒ. Føri ridho nari kʉ Yova ji ni bbo pli. Ke bbʉngʉe ndidzá bbo ndi ji ná ngba ndirigoti ke vengʉe bbo pli kʉ ná vodha tso ndiro ndi gø ni chenga ma, dhe ma na nǎ ro d’e. (1 Yo. 4:9, 10) Bbʉbbʉ dhé, ke jiri ndi kó ko krʉ tsotso ndiro ko hwini chenga tso ró ndirigoti ko sí si ri djolu d’e.
15. Ri ká ngani ko njí addu ndiro ko ba faida Mungu bbʉ Yesu le ødha dhi be ná kado nǎ ro d’e?
15 Mungu bbʉ ndidzá ddikpa dhé kʉ ná ngba le ødha dhi be ná kado djotsina, ri ka ndi kaka kodhi chenga zø njini njí. Ro, ndiro Mungu njí ko zø d’e, ringani ko njí ddikpa lo ro thé. Føri ká kʉ ngbá lo? Batiso ngʉ bbʉ ná Yohana ma, Yesu ma na ngʉngʉe fø logoti ɨ: “Anileni le, dhonalo ra nǎ Pidhinga kʉ chøchø.” (Mt. 3:1, 2; 4:17) Føri dho, kodho ringani ko leni le kodhi chenga nǎ ro njati ko jiri ko kana nga ngʉ chøchø Yova na ndirigoti kodhi chenga zø njini ngbà ró. Nde, le lé leni nari na mana ká kʉ addu ndirigoti fø lo ká adi ko tsotso kó ngbaribbai ndiro ko njí Yova nyǒ tho ná lo d’e, nì mai ko kʉ chenga dhi ndrŭ ro? Fø logoti ko si ba gosi ná lo nǎ.
DYI 18 Mbai le ødha dhi bbʉdha dho
a NJA LO NANGA LE TU NARI: Biblia tu “chenga” nǎ mana aro kʉ ná chu nǎ. Nja saa na, føri ka ndi é che kʉ ná lo Yova adi nzi ná lo le nji nari inga Yova po ná chølo le nji nzɨ nari. Ro, “chenga” na mana ka ndi é nzá le kaka nari maddi Adamu ma, Eva ma na dhó ro ko bangʉe ndi ro. Ko barie ná fø chenga djotsina ko krʉ adi cheni che.
b Yova ngʉ adi chi tøni ndi dho ná ndrŭ dhó bbʉdha u u dhonalo ke chungʉeri nari kʉ gosi ná saa na, Yesu Kristo si kʉ ndidzá shinga bbʉ ndiro ndi gø ndrŭ tsɨ krʉ chenga ma, dhe ma na nǎ ro d’e.—Ro. 3:25.
