Kodhó lo zø ná kpa adi dhu ná lo
Biblia nǎ 2 Watesalonike 3:14 pori le li alama nja ndrǔ ro. Fø ndrǔ ro ka ndi li alama nari ká kʉ kutaniko nǎ wazee inga wahubiri?
Mutume Paulo ndingʉe Tesalonike nǎ Wakristo dho ná barua nǎ ke pongʉeri ɨ: “Njati ddikpa ke rrnga i barua nǎ ko po ná lo dho nzá ró, ringani le li alama ke ro.” (2 Te. 3:14) Anziro, ko jangʉe fø lo wazee dho. Njati ddikpa ke rr e nga nzá bí ina le bbʉ ndi dho Biblia nǎ ro ná shauri dho ró, wazee dho ringangʉeni ndima bbʉ lojadha dhi hotuba kutaniko nǎ. Føri goti, kutaniko nǎ wahubiri dho nzá ringangʉeni ndima gba ndima tso alama le li ró ná fø ke na ri.
Føro mai, ringani le thɨ ddikpa lo thika ro ngbà dhé. Kpadjo ko famu nari kʉ Paulo dhó fø shauri tilo kutaniko nǎ nja le ddiro dho ringani ndi vʉ nanga ná lo djo nja kʉ ná lo banga ró. Føri dho, ri nga kʉ lazima wazee bbʉ lojadha dhi hotuba ri. Fø lo thika ká øni addudho? Akonja addu djo ma Paulo ngʉ loti fø shauri ndi ngʉ bbʉ ro nari di.
Paulo dhongʉeri nari kʉ kutaniko nǎ nja kʉ ná Wakristo ngʉ “bbí ngadhi utaratibu ro.” Kpa nzɨ ngʉ ngarr roho dda chutso dho shauri dho ri. Anji ke bengʉe kpa ronga ro, ke bbʉngʉe i lojadha kpa dho: “Njati ddikpa ke ji ndi njínji nzá ró, nzɨ ke nyonga.” Nja kpa gʉngʉe ndima tsotso ndima ka ndima kó na ná njí njidha gʉ, ngbà mai ri ka ndi kae ndima njínji ro. Godhé, kpa ngʉ ndima tsu nja ndrǔ dhó lo na. Fø di ná ndrǔ na ká ringʉngani Wakristo njini ngbaribbai?—2 Te. 3:6, 10-12.
Paulo pongʉeri,“le li alama fø di ná ke ro.” Kigiriki nǎ fø ri kʉ i le ripo ri, le di krr ndiro nzɨ le njini fø ke bbai ro. Paulo nzá jangʉe fø lo wazee dho dhé ri, ro kutaniko nǎ ndrǔ krʉ dho. (2 Te. 1:1; 3:6) Njati ddikpa Mukristo d’ie riutso nari kʉ ndi lai Mukristo nzɨ ngarr chutso ddani dho ná shauri dho ri ró, ke ka ndi vʉeri “ndi bbá nzɨ bbí utaratibu na ná fø ke na ndi ndi tso gba nari tso bbá.”
Føri na mana ká ngʉe ndrǔ njini fø ke na pʉ le pʉ kutaniko nǎ ro ná ke bbai? Nga, Paulo pongʉeri ki ɨ: “Anira anzi shauri ni bbʉ ke dho le-djo bbai nari na.” Ro, Wakristo kana nja le ddiro ka ndi vʉeri ndi gba ndi tso fø ke na njudha dhi ngana inga lod’radha dhi njí kana, ro kpa ka ndima vʉeri nzɨ ndima gba ndima tso ke na nja kʉ ná chu nǎ inga le nyǒ djedha dhi lo kana. Ká addudho? Paulo pori, “ndiro do pá ke djo d’e.” Njati ko bbá ko ko tso gba fø ke na nari tso bbá ró, føri ka ndi liri do pá ke djo ndirigoti ke ø ndidhó nyi thika ø.—2 Te. 3:14, 15.
Njʉ ká Wakristo ka ndima njínji fø shauri na ngbaribbai? Paulo ndingʉe ná i lo nǎ ya kwanza ko ka ko neri ko chu fø ke ká bbí “ngadhi utaratibu” ro bbʉbbʉ nari. Ke nzɨ ngʉ loti njonjo na kodhó zamiri kʉ inga njonjo na ko ji ná lo kʉ ná ndrǔ djo ri. Ndirigoti ke nzɨ ngʉ loti che njingʉeri ko ró ná ndrǔ djo ri. Ro, Paulo ngʉ loti nzɨ riji ndima rrnga Mungu bbʉ ná shauri dho ná ndrǔ djo.
Njʉ maddi, njati ko d’i riutso nari kʉ ddikpa Mukristo vʉri ndi rrnga Mungu dzá lo dho nzá ró, a ko ka ko vʉri nzɨ ko gba ko tso ke na le nyǒ djedha dhi ri tsi ma, nja kʉ ná lo ma na chulu. Føri kʉ nja le ddiro dhó lo nangavʉdha, ko nzá ka ko tilo fø lo djo d’i ndrǔ na ri, ro ko abbá familia nǎ ndrǔ na dhé. Ndirigoti ko ka ko gba ko tso fø ke na njudha dhinga na ndirigoti lod’radha dhi njí kana. B’lo ke ø ndidhó nyi thika ró, ko ka ko gba ko tso gba ke na nì rie nari bbai.
a Loroji na, ddikpa Mukristo ka ndi gʉ ndi tsotso ndi ka ndi kó na ná njí ndi nji nari gʉ inga ke ka ndi di rine ndi gba ndi tso nga kʉ Mukristo ná ke inga ná le na ndoa dhi lo kana inga ke ka ndi di ndo ka ndi ndo ndrǔ kana nga inga vo ka ndi vo ndru thí ronga ná lo nanga pli ndrǔ kalu. (1 Ko. 7:39; 2 Ko. 6:14; 2 Te. 3:11, 12; 1 Ti. 5:13) Føri bbai njini nari kʉ “ngadhó utaratibu” kʉ ná ndrǔ.
