1-2. Mungu dzá njí dhi ndrŭ ká adi hwè ba ngbá lo dho? (Yakobo 1:22-25)

 YOVA ma ndidzá ji dhi Ngba ma na adi riji ko é hwè na. Zaburi 119:2 ndingʉe ná ke pongʉeri ɨ: “Hwè na kʉ nari kʉ kedhó le djǒ nganodha dho ngarr ná ndrŭ ndirigoti ndima thí nǎ ro krʉ ke ne ná ndrŭ.” Yesu pongʉeri ɨ: “Hwè na kʉ nari kʉ Mungu dzá lo rr ndirigoti nì njínji ri na ná ndrŭ!”​—Lu. 11:28.

² Yova dzá njí dhi ndrŭ e hwè na. Ká addudho? Ko e hwè na dho ná lo kʉ bí. Ro, ri kana bbo na mana kʉ ná ddikpa ri kʉ, ko adi Mungu dzá lo zø ndirigoti ko adi njínji ri nǎ ro ko ba ná lo na nari.​—Azø Yakobo 1:22-25.

3. Mungu dzá lo nǎ ro ko zø ná lo na ko njínji nari nǎ ro ká ko adi ngbá faida ba?

³ “Lo na ko njínji” nari nǎ ro ko adi faida ba bí kʉ ná chu lu. Loroji na, njati ko di njínji Mungu dzá lo nǎ ro ko zø ná lo na ró, ko adi hwè bbʉ Yova dho ndirigoti ko ma adi hwè ba ddi. (Muh. 12:13) Føri kina, njati ko dyø Mungu dzá lo nǎ kʉ ná shauri ró, ri adi rili ko kana nga é chøchø kodhó familia ma, kutaniko ma na nǎ ndrŭ na. Njaro ni njarie fø lo dzá bbʉbbʉnga ro b’lo nidhó maisha nǎ. Føri djolu pli, ko ka ko pʉ nzɨ adi Yova dhó yadha dyø ná ndrŭ adi bani na ná kpakpalo ko ró ro. Fø lo tso nju Pi Daudi pongʉe ná lo na. B’lo ndi tilo ndidhó dyi nǎ, Yova dhó yadha ma, lojadha ma, lod’idha ma na djo nari goti ke dyangʉe ndidhó lo tso ɨ: “Ri dho le ngarr nari adi bbò ledha bbʉ.”​—Zb. 19:7-11.

4. Mungu dzá lo nǎ le zø ná lo na le njínji nari ká e sʉsʉ nga addudho?

 ⁴ Bbʉbbʉ dhé, Mungu dzá lo nǎ ro le zø ná lo na le njínji nari nga e sʉsʉ ri. Dhonalo ko nji ná lo e bí maisha nǎ, ro ringani ko di saa ba Biblia zødha dho ndiro ko famu Yova ji ko njí ná lo d’e. Føri dzá lo dho akonja ko tsotso ka ndi kó ná lo ro ndiro ko di Biblia zø krʉ ddo ró d’e. Føri kina ko si ko tsotso ka ndi kó ná lo nja ndiro ko di ngaddi ko zø ná lo djo ndirigoti ko chu ngbaribbai ma ko ka ko njínii ri na kodhó maisha nǎ nari.

ADI SAA BA MUNGU DZÁ LO ZØDHA DHO

5. Bbo adi kodhó saa dzi nari ká kʉ ngbá lo ro mai?

⁵ Yova dzá ndrŭ nji ndima dhó maisha nǎ ná njí e bí. Bbo na mana kʉ ri Biblia nzi ná lo ko nji nari ma adi kodhó saa dzi bbo ddi. Loroji na, ko kana bí kʉ ná ndrŭ adi njínji bbo ndiro ndima gba ndima dhó lo tso ndirigoti ndima dhó familia dhó ritso maddi d’e. (1 Ti. 5:8) Ndirigoti bí kʉ ná Wakristo adi ndima dhó familia nǎ ngó ngʉ ná ndrŭ ma, dhe nji ná ndrŭ ma na dhó lo tso gba. Ndirigoti ko nganga dho maddi ri adi ngani ko b’o kodhó afya ronga, ná føri maddi adi saa dzi bbo. Føri kina kutaniko nǎ ko adi nji ná bbo na mana kʉ ná njí maddi adi saa dzi. Ro, fø njí kana bbo na mana kʉ ná ddikpa ri kʉ, hwè dhi lo-i ko d’ra nari. Ni nji ná fø njí krʉ kana ká ri ka ndi ka ngbaribbai ni di saa ba ni zø Biblia krʉ ddo ró, ni di ngaddi ri djo ndirigoti ni di njínji ri nǎ ro ni zø ná lo na d’e?

6. Ni ká ka ni njiri ngbá ndiro ni li Biblia ni zø nari anziro d’e? (Anja ji maddi.)

⁶ Wakristo ko kʉ ro Biblia zødha e ddikpa “bbo nǎ mana kʉ ná ritsi” ko dho, føri dho ringani ko li ri anziro. (Flp. 1:10) Hwè na kʉ ná ke djo Zaburi ya kwanza pori: “Ke adi hwè ba Yova dzá yadha nǎ ro ndirigoti ke adi ri zø rere ndi chu na kuna ma, dyina ma.” (Zb. 1:1, 2) Bbʉbbʉ dhé, fø lo ridho nari kʉ ringani  ko kpe saa Biblia zødha dho. Nde, bblo kʉ Biblia zødha dho nari ká kʉ ngbá saa? Ri ka ndi é bblo ko kana nja le ddiro vʉ ndi dho ka ná saa. Ri kʉ bbo na mana kʉ ná lo ko vʉ ngbà ko ka ko zø Biblia krʉ ddo ró ná saa. Victor ró dho kʉ ná le-djo pori: “Ma adi riji ma zø Biblia bbʉtso. Nzá mai ma jirie bbʉtso ma dani tse nari ro, fø saa na ma djǒ nanga ngbʉ ná ritsi nga e bí ri. Fø saa djo mae krr ndirigoti rie sʉsʉ ma li ma thí ma zø ná lo djo.” Njaro ni ma ka ni njiri fø ddi. Føri dzá lo dho adhuri ni tso, ‘Bblo pli e ma dho Biblia zødha dho nari ká kʉ ngbá saa?’

ADI NGADDI NI ZØ NÁ LO DJO

7-8. Addui ká ka ndi liri nzɨ ko zø ná lo ko ko tsotso? Abbʉ loroji.

⁷ Bbʉbbʉlo kʉ, njaro nzá ko ka ko famu ko zø ná bí kʉ ná lo ro ri. Ni ká zørie ddikpa lo ro b’lo ndirigoti ni nzá no ni zøe ná lo nga ro ddikpa maddi ri? Ko krʉ ró fø di ná lo ro njirieni b’lo. Njedha dhi lo kʉ, njaro fø di ná lo ka ndi njini Biblia ko zø ná saa na maddi. Loroji na, njaro ko vʉrieri ko di Biblia nǎ sura ro zø bí ddikpa cha. Føri kʉ bblo. Ro, ringani ko li muradi ko nji ndirigoti ko ra anzi fø ko rinji nari na d’e. (1 Ko. 9:26) Njati ko ji ko ba faida Biblia zødha nǎ ro ró, kodho ringani ko njí nja lo ki maddi Biblia ko zø nari kina.

⁸ Addinga i lo djo: Tsó dhó lo adi dji u nja ndi di shi d’e. Ro, dji kó bbo nga djolu sese saa kana ró, ri adi dz’ sasa ná føri dho bbo kó ná dji nga e bblo tsó dho ri. Dz’ dhó lo adi saa u ndiro dji-dda tsu ndi nǎ, ndi kó tsó tsotso ri dhidhi d’e. Føri dzá lo dho ringani nzɨ ko zø Biblia lele bbo, dhonalo ri ka ndi liri nzɨ ko ddinga ri nǎ ro ko zø ná lo djo, nzɨ ko no ri nga ndirigoti nzɨ ko njinjí ri.​—Yak. 1:24.

9. Njati ko ra ri utso d’i ko Biblia zø lele pli nga djolu ró, ká ringani ko njiri ngbǎ?

⁹ Ni ká d’irie ri utso ni zø Biblia ro lele nga djolu b’lo? Njati rie fø ró, ni ká ka ni njiri ngbǎ? Adi ngazø dzødzø ndiro ni ddinga ni zø ná lo djo d’e. Fø le  rinji nari nga ka ndi é kpakpa ri. Ni ka ni vʉri ni zønga kpla ndiro ni ddinga ri djo d’e inga ni ka ni vʉri ni zø nga sese ndirigoti ma gʉ ma ná saa kana ni ddinga ri djo. Anziro djo ko tielo ná Victor pori, “Ma adi ngazø nja saa na sese njaro sura ddikpa dhé. Bbʉtso ma ngazø nari adi rili ma ddinga bli ma zøe ná lo djo.” Ni ka ni vʉ ngbaribbai ma ni ngazø nari, ro bbo nǎ mana kʉ ná lo kʉ ni zønga dzødzø ndirigoti ni ddinga ni zø ná lo djo.​—Zb. 119:97; Anja kisanduku “ Ringani le ddinga djo ná ngadhudha.”

10. Adho ngbaribbai ma ni ka ni njinjí ni chu ná lo na nari. (1 Watesalonike 5:17, 18)

¹⁰ Njati ni zø ddikpa verse ró, aba saa ni ddinga ngbaribbai ma ni ka ni njinjí ri nǎ lo na nari djo. B’lo ni zø ddikpa lo Mungu dzá lo nǎ ro ró, adhuri ni tso ɨ, ‘I lo na ká ma ka ma njinjí kpadjo ndirigoti gosi ná saa djo ngbaribbai?’ Loroji na njati rie 1 Watesalonike 5:17, 18 ni zø ró. (Azø ri.) Aro kʉ ná fø verse ni zø nari goti ringani ni tøni ndirigoti ni ddinga thɨ ina ma ni adi sala nji nari ma, ngbaribbai ma ni adi ri nji nari ma na djo. Føri kina, ni ka ni ddinga mbai ni adi po dho ná lo djo. Njaro ni ka ni vʉri ni po mbai Yova dho gbo kʉ ná bbo na mana kʉ ná lo dho. Rie sese saa dho ma ni adi ngaddi Biblia nǎ ro ni zø ná lo djo ró, føri si ni tsotso ko ndiro ni famu Mungu dzá lo ndirigoti ni njinjí ri nǎ ro ni zø ná lo na d’e. Addinga ngbá ngatsi ma ni ka ni ba faida krʉ ddo ró, ni fø di ná lo nji Biblia nǎ njonjo sehemu na nari djo! Bbʉbbʉ dhé, ni si ngʉ Yova dho njínji ná bblo pli kʉ ná ke. Njati ni ra ri ba nidho ringani ni thɨ thika ná lo kʉ bí ró, ká ringani ni njiri ngbǎ?

ALI NGBÀ DJO NI KA NI SI NÁ MURADI NI NJI

11. Nja saa djo ká ni ka ni mbu ni si djolu lo si nari bbai addudho? Abbu loroji.

¹¹ Nja saa djo ni thí ka ndi bʉni bʉ Biblia ni zø nari dho dhonalo ni ka ni rá ri utso d’i nari kʉ, thɨ thika ringani ni thɨ ná lo kʉ bí. Addinga i lo djo, ddikpa cha ni zø Biblia nǎ ro ná lo tilo ndrŭ nanga le krø nari djo. (Yak. 2:1-8) Føro ni njari ringani ni thɨ ndrŭ na ni adi njini ná nja chu thiká thɨ ndirigoti ni vʉri ni ø nidhó nja lo thika ø. Føri kʉ bblo pli! Bbʉdyi ni zø Biblia nǎ ro ná verse ripo ri kʉ bbo na mana kʉ ná lo ni di ngaddi ni po ná lo djo. (Yak. 3:1-12) Ni ra ri ba nja saa djo ni adi po nari kʉ nga kʉ bblo ná lo inga bʉ ka ndi bʉ ndrŭ thí ná lo. Føri dho ni vʉri ni di nja ndrŭ li kpakpa ni ti ná lo chulu. Luti dyi ni zø Biblia nǎ ro ná lo  tilo dz’ dzá kau le kʉ nari djo. (Yak. 4:4-12) Føro ni njari nari kʉ ringani ni di ni nyǒ ni djé na ná ritsi nanga vʉ bblo. Tho cha ddo djó ni ka ni mbuni si djolu lo si nari bbai, nidho ringani ni thɨ thiká ná fø lo krʉ djotsina.

12. Biblia ni zø nari kana ni rá riba nidho ringani ni thɨ thiká ná lo kʉ bí ró, ká ringani nzɨ ni thí bʉni addudho? (Anja agʉro nanga le tu ná lo.)

¹² Njati Biblia ni zø ro ni ba thɨ thiká ni ka ni thɨ ná lo bí ró, nzɨ bbari ni thí bʉni. Føri ridho ni kʉ nyenyenga na nì ndirigoti ni ronga bblo kʉ ná lo cho. Njati ko é nyenyenga na nì ró, ko adi maandiko zø ndirigoti ko adi thɨ thiká ringani ko thɨ ná lo ne. a Føri kina anonga nari kʉ, “ø ledha le thó” ná føri nzɨ adi njini ddikpa cha ri. Addui ká ka ndi kó ni tsotso ndiro ni rá anzi Mungu dzá lo na ni njínji nari na d’e?

13. Ni ká ka ni njínji b’lo ni chu ná lo na ngbaribbai? (Anja ji maddi.)

¹³ B’lo ni zø ná lo na ni njié njí krʉ nari rɨngana amburi ni njínji ri kana ddikpa inga aro kʉ ná ri na. (Mez. 11:2) Ambu i lo: Akpe thɨ thiká ringani ni thɨ ná lo dhi liste, avʉri ro ddikpa inga aro ni thɨ thika d’e ndirigoti njari gʉ abba luti nga dho. Ni ká ka ni nga ritso ngbá ri djó ro?

14. Ni ká ka ni nga ritso ngbá muradi djó ro?

¹⁴ Ni ka ni vʉri ni nga ritso lele djo ni ka ni si ná muradi djó ro. Inga ni vʉri ni nga ritso bbo nidhó lo u ni ø thiká ná ri djó ro. Njati ni vʉ ni ka ni thɨ thika ná lo b’lo ró, anji utafiti kodhó vichapo nǎ ro, njaro ni ka ni njinjí Index de Publication Watch tower na inga Msaada Wa kutafuta Habari kwa Ajili ya Mashahidi wa Yehova  na. Anziri Yova tso ke bbʉ ri njidha dhi “ù ma, ri dhi kpakpanga ma na ni dho.” (Flp. 2:13) Amburi ni njinjí ni chu ná lo na. Njati ni thɨ ddikpa lo thiká ro b’lo ró, føri ka ndi cho ni ni thɨ nja ri thiká maddi. Njati ni thɨ ddikpa lo thika ro b’lo, ro rie Wakristo dhó sifa kana ddikpa ri ro ma ró, føri ka ndi li ni kpakpa ni ra anzi ni thɨ njalo thiká maddi d’e. Ndirigoti ri sie sʉsʉ ni thɨ nja lo thika maddi.

ABBARI MUNGU DZÁ LO “NJINJÍ NI NǍ”

15. Yova dzá ndrŭ ká e njonjo ngbaribbai Biblia zø ná bí kʉ ná ndrŭ ró ro? (1 Watesalonike 2:13)

¹⁵ Nja ndrŭ adi ripo ndima zørie Mungu dzá lo bicha b’lo. Ro, kpa ká urie Biblia po ná lo bbʉbbʉ? Kpa ká adi njínji nì Biblia po ná lo na ndima dhó maisha nǎ ndirigoti ndima ø ndima dhó lo thika ø i nì? Bí ina kpa nzɨ adi rinji fø ri. Yova dzá ndrŭ e njonjo fø ndrŭ ró ro! Karne ya kwanza nǎ Wakristo bbai, ko urie ri Biblia kʉ “Mungu dzá lo ndirigoti ri kʉ bbʉbbʉlo.” Føri kina, ko adi ko dho ka ná lo nji krʉ ndiro ko njinjí Biblia nǎ kʉ ná shauri na kodhó maisha nǎ d’e.​—Azø 1 Watesalonike 2:13.

16. Addui ká ka ndi kó ko tsotso ko ngʉ Lo na njínji ná ndrŭ d’e?

¹⁶ Biblia le zø nari ma, ri nǎ lo na le njínji nari ma na ro nga e sʉsʉ ri. Njaro saa ko ba ri zødha dho nari adi o kpakpa. Inga ko ka ko di ri zø lele nzá ko ka ko ddinga ko zø ná lo djo ná ngatsi. Njaro ko adi ko mbu si djolu lo si nari bbai dhonalo ø thika ringani ko ø ná lo kʉ bí. Rie ngbá kpakpalo na ma ni bani ró, føri nga kʉ nzá djolu ni ka ko si ná lo ri. Yova dhó le tsotsokodha na ni ka ni sisi ri djolu. Akovʉri ko u kedhó le tsotsokodha ndirigoti ko di nzɨ ró longa adi vivi ná ndrŭ, ro ko di njínji lo na. Bbʉbbʉ dhé, njati ko di Biblia zø ndirigoti ko di njínji ri nǎ lo na ró, føri si rili ko é hwè na.​—Yak. 1:25.