Mutume Paulo ndingʉeri ndi lai muzee Timoteo dho: “Ma rinzi ni tso Mungu ma, Kristo Yesu ma, vʉ vʉni ná malaiká ma na nyǒ njí ni dyø i lojadha nzá ni d’i lo inga nzá ni krø ndrŭ nanga krø ro.”​—1 Ti. 5:21.

Ndiro ko chu fø malaiká ká kʉ ie ma nari d’e, ko ka ko tilo nzá le ka le zø fø malaiká kana nari ká kʉ ie ma nari djo. Bbʉbbʉ dhé, fø malaiká nga ka ndima é 144 000 kana ri. Timoteo dho Paulo ndingʉe nga ná saa na, nzá ché na le d’ri ná kpa ro d’engʉe ga ndiro ndima rá ra na d’e ri. Mitume ma, ché na le d’ri ná nja ndrŭ ma na nzá d’engʉe ngʉ malaiká ri, føri dzá kpa nga ka ndima é “vʉ vʉni ná malaiká ri.”​—1 Ko. 15:50-54; 1 Te. 4:13-17; 1 Yo. 3:2.

Føri kina, “vʉ vʉni ná malaiká” nga ka ndima é Noa cho na kongʉe ná dji dhi saa djo tsangʉe ná malaiká ri. Fø malaiká gbangʉe ndima tso Shetani na, kpa ngʉngʉe gó ndirigoti kpa ngʉngʉe Yesu dhó mbubai. (Mwa. 6:2; Lu. 8:30, 31; 2 Pe. 2:4) Gosi ná saa djo, le si kpa bu abiso na cho 1 000 dho ndirigoti le si kʉ kpa sa Shetani ma na.​—Yud. 6; Ufu. 20:1-3, 10.

Føri dzá lo dho, fø verse nǎ “vʉ vʉni ná malaiká” Paulo nzi nari kʉ chi tøni “Mungu ma, Kristo Yesu ma na dho ná malaiká.”

Chi tøni ná malaiká kʉ maelfu. (Ebr. 12:22, 23) Ri njani nari kʉ, Yova nzɨ adi ddikpa njí dhé bbʉ malaiká krʉ dhona ri. (Ufu. 14:17, 18) Anonga nari kʉ Ashuru nǎ bbasødda chedha dho ke chongʉe ddikpa malaika dhé, ná ke chengʉe kpa 185 000. (2 Fa. 19:35) Ro, njaro bí kʉ ná malaiká le lirie “ndiro ndima gbá ndirigoti ndima tu kedhó [Yesu] Pidhinga nǎ ro adi ndrŭ bʉ ná ritsi tso krʉ ndirigoti nzɨ ngarr yadha dho ná ndrŭ ma na.” (Mt. 13:39-41) Nja malaiká ka ndima é ché na le d’ri ná kpa tso ndima adi gbá ra na ro. (Mt. 24:31) Ndirigoti nja kpa le li ndima ‘b’o ko ronga ko nji ná lo krʉ kana.’​—Zb. 91:11; Mt. 18:10; anja Matayo 4:11; Lu. 22:43.

Biblia nǎ 1 Timoteo 5:21 tilo djo ná “vʉ vʉni ná malaiká” ka ndima é kutaniko tsotsokodha dhi njí bbʉni dhó ná kpa. Fø lo na Paulo ngʉ shauri bbʉ ngbaribbai ma wazee ka ndima njí ndima dhó njí ndirigoti ngbaribbai ma kutaniko nǎ ndrŭ ka ndima bbʉ heshima wazee dho nari djo. Wazee dho ringani ndima njí ndima dhó njí “nzá ndima d’i lo inga nzá ndima krø ndrŭ nanga ro” ndirigoti ndima ne lo nanga bbo ndima lo nanga vʉ nari njí. Ndirigoti Paulo dho addudho ma ringani wazee njiri fø dho ná lo. Ke pori kpa ndima djoi tsotso kó “Mungu ma, Kristo Yesu ma, vʉ vʉni ná malaiká ma na njí.” Føri na mana kʉ fø njí kpa nji ngbaribbai ma nari Mungu ma, Yesu ma, vʉ vʉni ná malaiká ma na adi njanja. Føri ridho nari kʉ nja malaiká dhó bbʉni ná njí kʉ ndima kó kutaniko tsotso. Kpadhó njí kana ka ndi é ndima b’o Mungu dzá ndrŭ ronga, ndima kó kpa tsotso lod’radha dhi njí kana ndirigoti ndima d’ra ndima nja ná lo Yova dho.​—Mt. 18:10; Ufu. 14:6.