Ni ká zøe i cho dhi Dzamu dhi Munara li ni li ni dyu ro i ngbà? Anja ni ká ka ni ngʉ i logoti ngbà ma nari:

Yova ká bba ngbá loroji ngbaribbai ma le ka le njini isɨ ndrŭ na nari kana?

Ke nzɨ adi kpa nanga krø ri inga ndi nja kpetsi kpa mana dhi ri isɨ ndrŭ djolu ri. Mungu adi isɨ ndrŭ rrrr, ke adi ndi dyu lili ngbaribbai ma kpa ndima mbu nari ro ndirigoti kpa nanga d’o ná lo ro. Ndirigoti ke adi ndi thí lili kpa djo kpa ndidzá njínji nari dho.​—w24.01, paje 15-16.

Waefeso 5:7 ripo: “Nzɨ ni gba ni tso kpa na” ná fø lo na ká ko ka ko njínjí ngbaribbai?

Mutume Paulo rija nzɨ ko gba ko tso nzá ka ndima liri ko rrnga Yova dhó yadha dho ná ndrŭ na. Føri kʉ ko ronga na ko nju na ná ndrŭ ma, eternete djó ko loti na ná ndrŭ ma na.​—w24.03, paje 22-23.

Ri ká ngani ko b’o ko ronga ngbǎ di ná kali dhi lo ró?

Ringani ko b’o ko ronga kodhó bbakau ma, nzá nyi ko chu ná ndrŭ ma, waasi imani ma na dhó ro si ná nzá dzá d’ʉnga chuni ná lo ró.​—w24.04, paje 12.

Pi Sulemani ma, Sodoma ma, Gomora ma na nǎ chengʉeni ná ndrŭ ma, Garika dhi saa djo chengʉeni ná ndrŭ ma na djo chu ko chu nari ká kʉ ngbá lo ndirigoti nzá ko chu nari ká kʉ ngbá lo?

Ko nzá chu Yova ká sa kpa theinga dho ma nari ri. Ro, chu ko chu nari kʉ ke chu krʉ kʉ ná lo ngbà ndirigoti ke kʉ bbò zølo dhi Mungu.​—w24.05, paje 3-4.

Mungu le nzi “Bbò dju” ná føri ká adi rili ko u ngbá lo? (Kum. 32:4)

Ko ka ko nyinga Yova dhi ngana. Ke djo le ka le li le thí li dhonalo ke adi ndi tsoni djo ná lo njinji dhé. Ndirigoti ke ro nzɨ adi wøni ri, føri na mana kʉ kedhó sifa ma, kedhó kusudi ma na thika ro nzɨ adi wøni ri.​—w24.06, paje 26-28.

Addui ká ka ndi kó ni tsotso ni chuni nidhó wø kutaniko na d’e?

Ali ni thí Yova djo ndiro ke kó ni tsotso anziro ke kongʉe ndidzá njí dhi ndrŭ tsotso nari bbai. Nzɨ di anziro ni e nǎ ná kutaniko ddi nidhó wø kutaniko na. Adi njínji nidhó kutaniko na ndirigoti ane wø bbakau ro ni dho.​—w24.07, paje 26-28.

Matayo sura 25 nǎ le tilo gbo kʉ ná loroji djo nari nǎ ro ká ko ka ko ba ngbá somo?

Chembø ma, ndrr ma na dhó loroji ridho, ringani ko di tøni chi. Rr chu ná bikirá ma, nyodyu dhi bikirá ma na dhó loroji ridho ringani ko é tayari ndirigoti krr. Ndirigoti talata dhi loroji ridho nari kʉ ringani ko di njínji ngana tss ro.​—w24.09, paje 20-24.

Sulemani chingʉe ná hekalu na le ngʉ tsu ná nga dzá danga ká ngʉe ngbá ngatsi?

Drrdrr nja buku nǎ ri ndini 2 Mambo ya Nyakati 3:4 nǎ, ri dzá danga ngʉe “le kù 120,” ná føri ridho arø ri dzá danga ngʉe metre 53. Ro, bbʉbbʉ kʉ ri le ka le nja ná buku ridho nari kʉ ri dzá danga ngʉe “le kù 20,” inga metre 9. Ya pili kʉ ná fø buku po ná lo njani ngbà tso ka ndi gbaeni hekalu ró dzaikpa dzá danga na nari bbai.​—w24.10, paje 31.

Mutumishi wa huduma ringani é ‘ddikpa bbá isɨ le kʉ ná ke’ ná føri na mana ká kʉ addu? (1 Ti. 3:12)

Føri na mana kʉ kebbá le ringani é ddikpa dhé ndirigoti nzɨ ke nji uzinifu. Føri kina, ri nzá ngani ke ti ji dhi lo nja isɨ ndrŭ na ri.​—w24.11, paje 19.

Ko ká ka ko pori Yohana 6:53 nzá tilo Bboke dzá Ngasdjo nga dhi Nyo djo ri addudho?

Yohana 6:53 pori ringani le nyó Yesu ndí ndirigoti le jø ke ró ju. Yesu pongʉe fø lo cho 32 na Y.G.G. Galilaya nǎ nzá d’engʉe ndi u ná Wayahudi dho. Ro, Bboke dzá Ngasdjo nga dhi Nyo tso ke ve ra nga cho ddi djó føri goti Yerusalemu nǎ ndima ngʉe ro. Yesu ngʉ loti ra nǎ na ndima si pi nyo ná kpa na.​—w24.12, paje 10-11.