NI RO ká hwirieni ddiro b’lo kpakpalo tso ró? Ko di nǎ nari kʉ “kpakpa tso o ná saa” ná føri dho ko ka ko mbu ko bʉ thí bʉni ndirigoti ddiro kʉ nari bbai. (2 Ti. 3:1) Nì mai ri kʉ fø ro, ko nzá ka ko hwini maisha nǎ ko bani ná na kpakpalo tso ró ddiro ri. Biblia ripo bbʉbbʉ kʉ ná bbakau ka ndima kó ko tsotso bbo “njedha dhi saa na.”—Mez. 17:17.

Mutume Paulo dhó misionere dhi njí kana, ke ngʉ adi bbí ndidhó nja bbakau na ndirigoti kpa ngʉ adi ke tsotso kó bí kʉ ná chu nǎ. (Kol. 4:7-11) Roma nǎ Paulo ngʉe prizo nǎ ná saa na, kedhó bbakau kongʉe ke tsotso nzá ka ndi njieni ke dho ná njí na. Loroji na, Epafrodito singʉe Filipi nǎ le-djoi ma, le-vei ma na chongʉe Paulo dho ná ritsi na. (Flp. 4:18) Tikiko chongʉe Paulo ndingʉe ná barua njonjo kʉ ná kutaniko lu. (Kol. 4:7) Paulo dhó bbakau dhó le tsotsokodha chulu, ke lingʉe kutaniko kpakpa nzá ndi ka ndi vʉe prizo nǎ ro ndirigoti ddiro ndi ngʉe prizo nǎ ná saa na. Nde, ni ká ka ni é bbʉbbʉ kau njʉ ngbaribbai?

Njʉ bí kʉ ná le-djoi ma, le-vei ma na adi nji ná lo adi ngbaribbai ma bbʉbbʉ bbakau ka ndima kó ndima tsotso ndima kana nari dhǒ. Espagne nǎ painia wa kawaida kʉ ná le-ve Elisabet d’ra ngbaribbai ma ddikpa le-ve kongʉe ndi tsotso kpakpalo dhi saa na nari. Elisabet dzá mama ro le bangʉe hwi ka ndi hwi le ná kaser ná saa na, le-ve chongʉe Biblia ró dyʉ ndi ná kpakpa ka ndi li le ná mesaje bí le dho. Elisabet pori: “Ledhó mesaje ma ngʉ adi ba ná saa na, ma ngʉe hwè na bbo dhonalo ma chungʉeri ma djo ngaddi ná le ro kʉ nì ndirigoti føri ngʉ adi ma li kpakpa ndiro ma ra anzi ma ji ma nji ná lo na d’e.”—Mez. 18:24.

Ko kana kau ka ndi ngʉ kpakpa ko lai Wakristo na njati ko di kpa tsotso kó lod’radha dhi njí kana inga njudha nǎ ró. Loroji na, ni ka ni d’u ngó ngʉ ná le-djo inga le-ve nidhó motokari nǎ lod’radha dhi njí inga njudha dhi ngana. Njati ni njiri fø ró, ni krʉ si hwè ba kpakpa le le li le kana nari nǎ ro. (Ro. 1:12) Ro, nja kʉ ná Wakristo dho rie kpakpa ndima vʉ abba ro. Ko ká ka ko é bbʉbbʉ bbakau kpa dho ngbaribbai?

Ko kana nja kʉ ná Wakristo nzá ka ndima si njudha dhi ngana dhe inga nja kʉ ná kpakpalo djotsina ri. Loroji na, David ró dho kʉ ná le-djo dhó lo dingʉe fø nganga ke ró ngʉe kaser dhi dhe. Bi 6 djolu, ke bangʉe dawa fø dhe dho. Fø ddo krʉ kana David ma, ndibbá le Lidia ma na ngʉ adi njudha dyø videokoferase chulu.

Kutaniko nǎ le-djoi ma, le-vei ma na ká kongʉe kpa tsotso ngbaribbai? Njudha krʉ goti, Pidhinga  dzá dza nǎ ngʉe ná le-djoi ma, le-vei ma na ngʉ adi kpakpanga nji ndima tilo David ma, Lidia ma na na videokoferase chulu. Ndirigoti David ma, Lidia ma na bbʉ komatere ró, kpa lai Wakristo ngʉ adi kpakpa ka ndi li kpa ná mesaje cho kpa dho. Føri ká lingʉeri David ma, Lidia ma na mbu ndima ngbaribbai? Kpa mbungʉe ndima ji ndima djoi ma, ndima vei ma na ji ri.

Njaro ko ka ko kperi ko d’ralo nzá ka ndi vʉ abba ro ná le-djo inga le-ve na. Ko ka ko wø kodhó lo thika karnø ndiro ko d’ralo kpa ma na d’e. Føri na ko ka ko dhori ko nzá vi kpa nga ri. (Mez. 3:27) Njaro ni ka ni d’ralo kpa ma na barua inga telefone chulu. Wazee ka ndima kperi lod’radha dhi njí dhi njudha le di nji videokoferase chulu maddi. David ma, Lidia ma na nanga jingʉeni bbo kpadhó kutaniko kpengʉe fø lo nari dho. David pori, “Sese saa dho ko ngʉ adi loti kodhó lod’radha dhi kikundi nǎ nari ma, sala ma na ngʉ adi ko li kpakpa bbo.” Nja saa na, ni ka ni dhuri nzá ka ndi vʉ abba ro ná le-djo inga le-ve tso, ni ká ka ni di si ngbà ma ni adi Biblia jifunza na ná mwanafunzi na le bba nari ndiro ni njí funzo ddinga d’e.

Njati ko di saa ba ndiro ko di nzá ka ndi vʉ abba ro ná le-djoi ma, le-vei ma na na ró, føri ka ndi liri ko chu kpa, kpadhó bblo kʉ ná sifa ndirigoti ko kana nga é chøchø kpa ma na. Loroji na, ni di ngbaribbai ma kpa Mungu dzá lo ngaddi ndrŭ dho nari ma, kpa ndrŭ tsotso kó ndrŭ njí kau Yova na nari ma na nja ná saa na, føri ka ndi liri ni di heshima bbʉ bbo kpa dho. Ni lai Wakristo tsotso ni kó lod’radha dhi njí kana nari ma, njudha dhi saa na nari ma na chulu ni ka ni ba wø bbakau.—2 Ko. 6:13.

Paulo ngʉe kpakpalo kana ná saa na, ke bangʉe ndi tsotsokodha ndidzá kau Tito dhó ro nari lingʉeri ke mbu ndi bblo. (2 Ko. 7:5-7) Ri kʉ bblo ko di kpakpa ka ndi li ko djoi ma, ko vei ma na ná loti kpa dho. Ro, Tito dhó loroji ngaddi ko dho nari kʉ ko ka ko li kpa kpakpa ko saa ba ko di kpa ma na nari ma, ko kpa tsotso ka ndi kó ná ritsi nji nari ma na chulu.—1 Yo. 3:18.

Russie nǎ ko djoi ma, ko vei ma na kʉ bblo loroji nja ndrŭ tsotso ndima kó nari kana. Akotilo le-djo Sergey ma, ndibbá le Tatyana ma na dhó loroji djo di. Polis nengʉe kpabbá dza nanga nari goti kpa rangʉe ke ma, ndibbá le ma na na polis dhó biro na. Ya kwanza kpa bbangʉe Tatyana ndirigoti le ngʉngʉe bba kana. Sergey pori: “[Tatyana] singʉe abba nari goti tse, nga nǎ do ro kʉ ná ddikpa le-ve singʉe le ronga be. Føri goti bí kʉ ná le-djoi ma, le-vei ma na singʉe ko tsotso ko adza lu polis plingʉe nanga na ritsi thí kpedha na.”

Sergey pori ki: “Krʉ saa ró ma jirie Mezali 17:17 ɨ ndi pori ro: ‘Bbʉbbʉ kau adi jidha dhǒ krʉ saa ró ndirigoti ri kʉ nzadha ddo nyi na nga dho gøni ná le-djo.’ Fø nzadha dhi saa na madhó lo ungʉe madzá bbakau dhó le tsotsokodha bbo. Føri dho, ma rangʉe richu nari kʉ Mezali 17:17 nǎ kʉ ná lo kʉ bbʉbbʉ. Yova chongʉe nga nǎ do ro kʉ ná bbakau ma tsotsokodha dho.” a

Kpakpalo lu ko da ná saa na, kodhó lo adi ko tsotso ka ndi kó ná bbakau u. Kodhó lo si kpa u bbo pli bbò mbudha dhi saa na. Føri dho, akonji kpakpanga bbo ndiro ko é bbʉbbʉ kʉ ná kau njʉnga djó ro d’e!—1 Pe. 4:7, 8.