NJɄ dz’ djó bí kʉ ná ndrŭ adi riji ndima ba bbobbo pendeleo, le njini ndima na pekee kʉ ná chu nǎ ndirigoti le njini ndima na bblo nja ndrŭ djolu nari ro ká ni njarie b’lo? Njati kpa ba fø ritsi krʉ ma ró, kpa adi riji ndima ba ri ki føri djolu dhé. Fø adi ngaddi nari kʉ, bbo adi ngaddi ndima djo ná ndrŭ ndirigoti nzɨ mbai po ndima dhó kʉ ná ritsi dho ná ndrŭ. Biblia pongʉeri nari kʉ, nga sini ná saa na ndrŭ ka ndima ée fø di ná nyi na.—2 Ti. 3:2.

Bbʉbbʉ dhé, bbo le ngaddi le djo nari ro nga kʉ wø lo ri. Loroji na, Adamu ma, Eva ma na vʉngʉe bblolo ma, chelo ma na nanga ndima dho ndima ro, ro njʉ ko krʉ adi nzani kpa vʉngʉe nanga ná lo djotsina. Cho bí goti, Yuda bbá Pi Uzia ddingʉeri ndi kaka ndiro ndi bbʉ bbʉdha tabenakulo nǎ d’e, ro ke dho nzá ringangʉeni ndi njí føri ro ri. (2 Ny. 26:18, 19) Føri bbai, Wafarisayo ma, Wasadukayo ma na ngʉ riddi ringani Mungu njini ndima na pekee kʉ ná chu na nja ndrŭ djolu ndima kʉ Abrahamu nǎ gø nari dho.—Mt. 3:9.

Ko ronga tso d’e nari kʉ, bbo ngaddi ndima djo ná ndrŭ ma, dya na kʉ ná ndrŭ ma na, føri dho ko maddi ko ka ko di kpadhó fø di ná nyi dyø dzodzo dhé. (Gal. 5:26) Njaro ko ka ko di riddi ri kaka ko ba ddikpa pendeleo ro inga le njíni ko na pekee kʉ ná chu nǎ. Nde, fø di ná ngaddidha ká ko ka ko pʉ ko ró ro ngbaribbai? Ya kwanza, ko dho ringani ko chu Yova dhó nganjadha fø lo djo. Biblia nǎ aro kʉ ná kanuni ka ndi kó ko tsotso ndiro ko chu fø lo bblo d’e.

 Yova chu ko dho ka ná lo ngbà. Anzingaddi i loroji djo di.

• Familia nǎ, dzaba adi riji ndibbá le bbʉ heshima ndi dho ndirigoti isɨle adi riji ndibbá ke ji ndi bbo. (Efe. 5:33) Ndoa dhi ndrŭ dho ringani ndima dhǒ bbo pli kʉ ná jidha ndima kana dhé. (1 Ko. 7:3) Gø dhi ndrŭ adi riji ndima dhi nzø rrnga ndima dho ndirigoti nzø adi riji ndima dhi gø dhi ndrŭ dhǒ jidha ndima dho ndirigoti kpa kó ndima tsotso.—2 Ko. 12:14; Efe. 6:2.

• Yova ripo, ko dho ringani ko bbʉ heshima kutaniko nǎ wazee dho kpakpa njí kpa nji nari dho. (1 Te. 5:12) Nì mai ri kʉ fø ro, kpa dho nzá ringani ndima nyopi ndima djoi ma, ndima vei ma na djo ri.—1 Pe. 5:2, 3.

• Mungu bbari ndrŭ dhó pidhinga nyopi ndrŭ djo, føri dho ri kaka kpa kó kitas ndirigoti kpa pinyo djo ná ndrŭ bbʉ heshima kpa dho.—Ro. 13:1, 6, 7.

Jidha na Yova bí kʉ ná ritsi bbʉ ko dho ri ko ka ko ba ná nga djolu. Ko krʉ e chenga dhi ndrŭ nari dho, ko karie dhe dho. (Ro. 6:23) Bbʉbbʉ dhé, Yova dhó chi kʉ ná jidha ke dhǒ ko dho nari djolu, ke adi bí kʉ ná ledha bbʉ ko dho. (Zb. 103:10, 11) Ke dhó ro ko adi ba ná ledha inga pendeleo krʉ ko adi ba nzá tso ka ndi kóe le djo ná zølo djotsina.—Ro. 12:6-8; Efe. 2:8.

Adi krr ndiro nzɨ ni di ngaddi dz’ dzá ndrŭ bbai ró. Nzá nga ko chu ro, ko ka ko di riddi nari kʉ ko kaka ddikpa lo dho nja ndrŭ djolu. Yesu dhongʉeri ri ka ndi é sʉsʉ le é fø di ná ngaddidha na, dinari bangʉe ná njí dhi ndrŭ dhó loroji djo ndi tingʉe lo nari chulu. Nja njí dhi ndrŭ ngangʉe njí tso bbʉtso ndirigoti kpa njingʉe njí bli bbo ká ná dyi na; nja ndrŭ njingʉe njí saa ddikpa dhé. Ya kwanza fø kpa ka ndima ddieri ndima kaka ndima ba mbø bbo ndima njie ná njí djotsina. (Mt. 20:1-16) Fø loroji djo Yesu tingʉe lo nari chulu, ke ngʉ rija ndi unakpa dho ringani kpa nanga di jini ji Mungu bbʉ ndima dho ná ritsi dho.

Adi mbai po ndirigoti nzɨ di riddi ndrŭ si ritsi bbʉ ni dho. (1 Te. 5:18) Adyø mutume Paulo dhó loroji, nzá ndi kongʉe ritsi ndi tsotsokodha dho Korinto nǎ le-djoi dhó ro ro, ngbà mai ri kangʉe ke njí ri fø ro. (1 Ko. 9:11-14) Ko dho ringani  ko nanga di jini krʉ ko ba ná ritsi dho ndirigoti nzɨ ko di riddi ndrŭ si ritsi bbʉ ko dho.

Adi nyenyenga na. Njati ddikpa ke di ngaddi nga djolu ndi djo ró, føri adi rili ke ddiri ndi ba é ritsi bbo nì kʉ ndidhó ná ri djolu. Nyenyenga kʉ che kʉ ná ngaddidha dhi dawa.

Nabi Danieli bbangʉe bblo kʉ ná loroji nyenyenga na le kʉ nari ndi dhongʉe nari chulu. Ke dhingʉe nǎ ná familia ma, ke d’angʉeni bbo nari ma, ke ngʉe akili na nari ma, ke ngʉe na ná kpakpanga ma na dho ri ka ndi ee sʉsʉ ke mbu ndi ngbà le ka le njini na pekee kʉ ná chu nǎ ndirigoti ngbà ka ndi bae ndi bangʉe ná pendeleo krʉ nari bbai. (Da. 1:3, 4, 19, 20) Nì mai ri kʉ fø ro, Danieli ngʉe nyenyenga na ndirigoti fø sifa lingʉeri ke é mana na bbo Yova nyǒ njí.—Da. 2:30; 10:11, 12.

Ako pʉ i dz’ dzá ndrŭ dhó nyi, bbo le ngaddi le djo nari ma, le le nja mana na bbo nja ndrŭ djolu nari ma na ko ró ro. Føri rɨngana, akora anzi hwè ko ba kedhó nzá tso ka ndi kóe le djo ná zølo chulu krʉ ko adi ba ná ledha nǎ ro.