LONGANEDHA DHI RI 7
DYI 15 Madha Yova dzá sidjo ngba dho!
Yova dhó le zønjidha nǎ ro ká ni ka ni ba faida ngbaribbai?
“Bbʉbbʉ le zønjidha kʉ ni dhi ngana.”—ZB. 130:4.
RI NǍ LO
Ko si loti Biblia nǎ kʉ ná loroji djo, Yova adi ko zø nji ná bblo pli kʉ ná chu ndi dhǒ ro. Føri kina, i lo si ko tsotso ko ko di mbai po bbo Yova adi ko zø nji nari dho.
1. Njati ddikpa le pori ndi nji ni zø nji, nari na mana ni famu nari ká e kpakpa addudho?
NJATI ddikpa le pori “Ma nji ni zø nji” ró ni iso adi pɨni bbo, bbo pli njati ri é ni poe ná lo inga ni njie ná lo voe le thí ronga vo ri ró! Ro, ddikpa le pori “Ma nji ni zø nji” ná føri na mana nganga ká kʉ addu? Njaro bʉ thí ni bʉe ná le ká riji ndi pori ni kana kau ngʉ anziro rie nari bbai? Inga njaro ká le riji ndi pori ndi nzá ji ndi tilo ki fø lo djo ri? Bbʉbbʉ dhé, ndrŭ pori ndima nji ni zø nji ná føri na mana le famu nari e kpakpa.
2. Biblia ká po ngbá lo Yova dhó le zønjidha djo? (Anja agʉro le tu nanga ná lo maddi.)
2 Yova adi nzá kaka ná ndrŭ zø nji ná chu kʉ njonjo bbo ko adi ndrŭ zø nji ná chu ró ro. Yova adi ndrŭ zø nji nari bbai nzá ie ma ka ndi njí ndrŭ zø ro ddi ri. Zaburi ndi ná ke pongʉeri Yova djo ɨ: “Bbʉbbʉ le zønjidha kʉ ni dhi ngana ndiro le njí ni do d’e.” a (Zb. 130:4) Bbʉbbʉ dhé, Yova dhó le zønjidha kʉ “bbʉbbʉ le zønjidha.” Ke ddiro dhé adi le zønjidha na mana nganga ká kʉ addu nari dhǒ ko dho. Biblia ndi ná kpa njinjí Kiebrania nǎ ddikpa lo na ndima dhǒ na le zønjidha, ná fø lo na nzá le ka le njínjí ro le dhǒ na ndrŭ dhó le zønjidha ri.
3. Yova dhó le zønjidha ká kʉ njonjo kodhó ri ró ro ngbaribbai? (Isaya 55:6, 7)
3 Njati Yova njí ddikpa le dhó chenga zø ró, ke adi fø le dhó chenga tu da ndi nyǒ djó ro. Ri é sa ma kpa kana kau saeni ri ró, ri ki adi ngʉ chøchø vi. Yova adi ko zø nji bí ina nari dho ko adi mbai po bbo.—Azø Isaya 55:6, 7.
4. Yova ká adi ko tsotso kó ngbaribbai nja ko famu le zønjidha na mana nganga d’e?
4 Yova dhó le zønjidha e njonjo kodhó ri ró ro. Nde nzá kaka ná ndrŭ ká ka ndima famu kedhó le zønjidha na mana nganga ngbaribbai? Yova adi ko tsotso kó bblo pli kʉ ná loroji na ndiro ko famu ndidhó le zønjidha d’e. I lo nǎ ko si loti fø loroji kana nja kʉ ná ri djo. Ri si ridho nari kʉ njati ko leni le kodhó chenga nǎ ro ró, Yova adi kodhó fø chenga sasa ndirigoti ke adi riji ko ki ngʉ ndidhó bbakau vi. Fø loroji djo ko loti nari si ko tsotso ko ko dhǒ ko nanga jini nari kodhi zølo dhi Baba dho, ke adi ko zø nji bí kʉ ná chu nǎ nari dho.
YOVA ADI KODHÓ CHENGA SASA
5. B’lo Yova njí kodhó chenga zø ró ká ngbá lo adi njini?
5 Biblia nǎ bí ina le adi chenga ddi li o ná no na. Pi Daudi pongʉeri ndidhó chenga djo ɨ: “Madhó kosa si bí ma djǒ djó ddiddi li o ná no bbai, ri ro nzá ka ndi d’uni ma dho ri.” (Zb. 38:4) Ro, Yova adi chenga nji ná le leni ná ke zø njinji. (Zb. 25:18; 32:5) Kiebrania nǎ lo nanga le tu “le zønjidha” ná føri na mana kʉ, “le tu ri tu le djó ro” inga “le d’u ri d’u le djó ro” nari. Føri dzá lo dho, njati Yova njí kodhó chenga zø ró, ke adi li o ná no tu ko djó ro. Ri kʉ ddiddi bbo o li ná no ke tu ko kù djó ro nari bbai.
“Njingʉe zø” (Zb. 32:5)
6. Yova ká adi kodhó chenga tu ko ró ro da ngbá ngatsi?
6 Biblia njinjí nja loroji na ndiri dhǒ ngbá ngatsi ma Yova adi kodhó chenga tu da ko ró ro nari d’e. Zaburi 103:12 ripo ko dho: “Dyi si ná nga e da dyi tsu ná nga ró ro nari bbai, ke adi kodhó chenga tu ko ró ro da.” Dyi si ná nga e da dyi tsu ná nga ró ro, aro kʉ ná fø nga tso ro nzá ka ndi nju ngbá dyi maddi ri. Nja lo nǎ le ka le pori, Yova adi kodhó chenga tu da ko ró ro nzá djo ko ka ko ddinga ki vi ná ngatsi. Fø lo adi rili ko uri u nari kʉ, Yova nji ko zø nji!
“Dyi si ná nga e da dyi tsu ná nga ró ro nari bbai” (Zb. 103:12)
7. Biblia ká pori Yova adi kodhó chenga nji ngbǎ? (Mika 7:18, 19)
7 Nì mai Yova adi kodhó chenga tu ko ró ro da loroji chulu ro, ke ká adi ra anzi ri djo ndi ngaddi nari na? Nzɨ. Pi Hezekia ndingʉeri Yova djo ɨ: “Ni bungʉe madzá chenga kpari krʉ ni goti.” Inga agʉro nanga le tu ná lo ripo nari bbai, “ni tungʉe madzá chenga kpari krʉ ni nyǒ djó ro.” (Isa. 38:9, 17; maelezo ya chini) Fø loroji ridho nari kʉ le leni ná ndrŭ dhó chenga Yova adi bu da ndi nyǒ djó ro. Fø lo ki le ka le po ɨ: “Ni njangʉe ma nzá nji [chenga] ro nari bbai.” Nja loroji chulu Biblia tu fø lo nanga ki Mika 7:18, 19. (Azø) nǎ. Fø verse ripo ke adi kodhó chenga bu da nanga kʉ ná jʉdda na. Drrdrr saa na, ri ngʉe kpakpa ddikpa ke ba da jʉdda nanga kʉ ná ngana le bu ná ritsi.
“Ni bungʉe madzá chenga kpari krʉ ni goti” (Isa. 38:17)
“Ni si kpadhi chenga kpari bu bbò jʉdda na” (Mik. 7:19)
8. Fø lo ká addu ngaddi ko dho?
8 Fø loroji krʉ ngaddi ko dho nari kʉ, Yova njí ko zø b’lo ró ke adi kodhó chenga dhi no tutu ko djó ro. Bbʉbbʉ dhé, Daudi pongʉeri nari bbai “hwè na kʉ nari kʉ nji dhó chelo zø njini ndirigoti tsi dhó chenga djó nga tso tsini ná ndrŭ; hwè na kʉ nari kʉ nzɨ dhó chenga ki ro Yova zø sese maddi ná ke.” (Ro. 4:7, 8) Føri i kʉ bbʉbbʉ le zønjidha!
YOVA ADI CHENGA SISI
9. Yova adi kodhó chenga zø nji krʉ nari ká Biblia dho ngbaribbai?
9 Le ødha dhi be chulu ri ka ndi kaka Yova si le leni ná ndrŭ dhó chenga si. Akonja ngbaribbai ma Yova adi fø lo nji nari. Biblia nǎ ko rizø nari kʉ, Yova adi kodhó chenga ʉʉ ndirigoti ri sisi. Føri adi rili chenga nji ná ke tsetse. (Zb. 51:7; Isa. 4:4; Yer. 33:8) Yova nganga po fø ndi rinji nari nǎ ro adi si ná matokeo. Ke pori: “Njati nidhi chenga e ddiddi bbo pli dzá kakanga kʉ ná ritsi bbai ma ró, ri si ngʉ sawø rere thokpa bbai; njati ri é kaka kitambala bbai ma ró, ri si ngʉ sawø chembø-ká bbai.” (Isa. 1:18) Kaka bbo kʉ ná rangi le tu rù nǎ ro nari e kpakpa bbo. Føro mai Yova njinjí fø loroji na, ndiri na ndi dhǒ ko dho nari kʉ ndi adi kodhó chenga ʉ nzɨ ri ki njani nari bbai.
“Njati nidhi chenga e ddiddi bbo pli dzá kakanga kʉ ná ritsi bbai ma ró” (Isa. 1:18)
10. Yova adi kodhó chenga zø nji ji ndi nanga jini ro, nari ká Biblia dho ngbaribbai?
10 Anziro e ná lo nǎ ko njaeri nari bbai, chenga le ddi “ddeni” na. (Mt. 6:12; Lu. 11:4) Føri dzá lo dho, chenga ko njí ná saa krʉ ró, ko nǎ ddeni adi ndrini ndri. Yova dho ringani ko bbʉ ná ddeni kʉ bbo pli ndi kʉ ro. Føri dzá lo dho ke njí ko zø ró, rie ddiddi pá ke bba ko dho ringaeni ko bbʉ ná fø ddeni nari bbai. Ndirigoti ke nzɨ adi b’lo zø ndi nji ná chenga kobe kó ko tso ri! Ro, ddikpa le nǎ ddeni le bbá pá ró, fø le e hwè na. Ná føri bbai Yova njí ko zø ró, ko maddi e hwè na bbo!
“Anji ko nǎ ddeni zø” (Mt. 6:12)
11. Njati Biblia pori kodhó “chenga sani sa” ró, føri na mana ká e addu? (Matendo 3:19)
11 Yova nzɨ adi ko nǎ ddeni inga kodhó chenga bba pá dhé ri, ke adi ri sasa maddi. (Azø Matendo 3:19.) Loroji na addinga i lo djo, njati ddikpa ke tha ni nǎ e ná ddeni nanga tha ma ró, nja ndrŭ ka ndima nja ri ká e thɨ ma nari ngbà dhé. Ro, ddikpa ritsi le sasa nari kʉ njonjo føri ró ro. Nja ni famu fø loroji d’e anonga nari kʉ, drrdrr ndrŭ ngʉ adi ngandi na ná wino na le ndi ná ritsi le njʉ dda na nari ngʉe sʉsʉ. Føri na le ndi ná ritsi dho ddikpa ke dzi dda kʉ nǎ ná eponje nari na ke ka ndi njʉ ri nzɨ ri ki njani nari bbai. Føri dho njati le “sa” ddikpa ddeni sa ró, ri ngʉ adi sini krʉ. Ndrŭ nzá ka ndima njae anziro ká le ndie addu ma føga nari ki ro ri. Ri ngʉ adi njini nga ddeni ro e nari bbai. Føri bbai njati Yova njí kodhó chenga zø ró, rie ddiddi nzá ko d’erie chenga ro nji nari na, ná føri dho ko nanga adi jini bbo!—Zb. 51:9.
“Ndiro nidhi chenga sani d’e” (Mdo. 3:19)
12. Bbò ndundu dhi loroji nǎ ro ká ko ba ngbá somo?
12 Ngbaribbai ma Yova adi kodhó chenga zø nji nari ke dhǒ nja chu nǎ maddi. Ke pori: “Ma si nidhó kosa sa ndundu na le sa nari bbai ndirigoti nidhó chenga sa bbò ndundu na le sa nari bbai.” (Isa. 44:22) Njati Yova njí kodhó chenga zø ró, rie ddiddi ddikpa bbò ndundu goti ke ru kodhó chenga nari na, ndiro nzɨ ndi nja kodhó chenga inga nzɨ ko ma nja ri ki ddi ró.
“Ma si nidhó kosa sa ndundu na le sa nari bbai” (Isa. 44:22)
13. Yova njí kodhó chenga zø ró ká ko adi ko mbu ngbaribbai?
13 Fø loroji ká ngbá lo ngaddi ko dho? Yova njí kodhó chenga zø ró, ri nzá ngani ko di ra anzi che ko ko mbu fø chenga djotsina nari na ri. Yesu Kristo ró ju chulu, ko nǎ chenga dhi fø ddeni sangʉeni krʉ. Njati Yova njí kodhó chenga zø ró, rie ddiddi nzá ko d’erie chenga ro nji nari bbai. Føri i kʉ Yova dhó bbʉbbʉ le zønjidha nǎ ro ko adi ba ná faida njati ko leni kodhó chenga nǎ ro ngbà ró.
YOVA ADI RI U KO KI NGɄ NDIDHÓ BBAKAU VI
Kodhi ra nǎ Baba ko zø nji nari adi rili ko kana kau é bblo ke na (Anja paragrafu 14)
14. Yova si ko zø njinji, ná føri ká ko ka ko u addudho? (Anja ji maddi.)
14 Njati Yova njí ko zø b’lo ró, ko ka ko uri u nari kʉ ko ki si ngʉ kedzá bbakau vi. Yova adi kodhó chenga sa krʉ ná føri dho ri nzá ngani ko di ko ki mbu che b’lo zø ke nji ná chenga dzá lo dho ri. Ko dho nzá ringani ko di do nji ndirigoti ko di riddi nari kʉ, Yova nanga kani godhe ko djo ndirigoti ke ko dho ndi ka ndi bbʉ malipizi ná chu ne ri. Yova nzá ka ndi njí fø di ná lo ro ri. Føri dzá lo dho Yova pori ndi nji ko zø nji ró, ko ka ko u føri u. Yova pongʉeri nabi Yeremia dho ɨ: “Ma si kpadhó kosa zø njinji ndirigoti ma nzɨ si kpadhó chenga nga ki ro no ri.” (Yer. 31:34) Mutume Paulo ngʉ loti fø lo djo ɨ ndi pongʉeri ro: “Ma nzɨ si kpadhó chenga nga ki ro no ma djǒ na ri.” (Ebr. 8:12) Nde, fø lo na mana nganga ká kʉ addu?
“Ma nzɨ si kpadhó chenga nga ki ro no ri” (Yer. 31:34)
15. Yova nzɨ adi kodhó chenga nga ki ro no ri, nari na mana ká kʉ addu?
15 Biblia nǎ le ripo le ddikpa “lo ngano” nari na mana nga kʉ le nga dhé ddi ri djo ri. Ro, ri na le ka le dhǒ ritsi ddikpa le nji nari maddi. Loroji na, Yesu kuso ngʉe tsú badjó ná gbʉ dhi ke nzingʉeri ɨ Yesu tso: “Yesu, ni si ma nga nono ni dhó Pidhinga na ni si tsu ná saa na.” (Lu. 23:42, 43) Ke nzɨ ngʉ ripo Yesu si nga dhé ddi ndi djo fø saa na ri. Yesu pongʉeri gbʉ dhi fø ke dho, ndi si ke gaga. Føri dho, njati Yova pori ndi nzɨ si kodhó chenga nga ki ro no ri ró, føri na mana kʉ ke nzɨ si kodhó chenga kobe ki ro ko ko tso vi ri. Ke nzɨ si kʉ malipizi ki ro bbʉ ko dho b’lo zø ndi nji ná chenga djotsina gosi ná saa djo ri.
16. Bbʉbbʉ kʉ ná le zønjidha adi le kloklo nari djo ká Biblia tilo ngbaribbai?
16 Biblia njinjí nja loroji na ndiri na ndi dhǒ ngbaribbai ma bbʉbbʉ le zønjidha adi le klo nari d’e. Biblia pori, ko kʉ nzá kaka ná ndrŭ nari djotsina, ko e “chenga dhó no tsena.” Ro, Yova njí ko zø ró, rie ddiddi klo ko “kloni chenga dhó ro” nari bbai. (Ro. 6:17, 18; Ufu. 1:5) Bbʉbbʉ dhé, njati Yova njí ko zø ró ko e hwè na ddiddi no tsena ro le klo ná ke bbai.
“Ni kloni klo chenga nǎ ro” (Ro. 6:18)
17. Le zønjidha nǎ ro ká gødha adi si ngbaribbai? (Isaya 53:5)
17 Azø Isaya 53:5. Ya mwisho djo ko si loti ná loroji ddi ko nzá ka ndi gø ná dhe kʉ ró ná ndrŭ na. Yova bbʉngʉe ndidhi Dduna chulu ná le ødha dhi be djotsina ko gørie gø. (1 Pe. 2:24) Njati ko njí chenga ró føri na ko adi ko kana kau sasa Yova na. Ro, le ødha dhi be chulu ri ka ndi kaka ke njí ko zø ndirigoti ko kana kau ki ngʉ bblo ke na. Njati ddikpa le gø bbò dhe nǎ ro ró, fø le e hwè na bbo nari bbai, ko kana kau ki ngʉ Yova na bblo ndirigoti ko tso ki uni ke na ró, ko e hwè na bbo.
“Ke ró kilonda djotsina ko gøgø” (Isa. 53:5)
YOVA DHÓ LE ZØNJIDHA NǍ RO KO ADI BA NÁ BBLONGA
18. Njonjo kʉ ná fø loroji ká ddi ngbá lo nga ko dho Yova dhó le zønjidha djo? (Anja kisanduku “Ngbaribbai ma Yova adi ko zø nji nari” maddi.)
18 Njonjo kʉ ná fø loroji ká ddi ngbá lo nga ko dho Yova dhó le zønjidha djo? Føri ddinga ko dho nari kʉ Yova njí ko zø ró, ke adi kodhó chenga sa krʉ ndirigoti theinga dho. Ná føri ka ndi liri ko kana kau ngʉ bblo kodhi ra nǎ Baba na. Føri kina, ko adi ngano nari kʉ bbʉbbʉ le zønjidha kʉ kado. Føri Yova adi nji ndi ji ko ji ndirigoti ndidhó nzá tso ka ndi kó le djo ná zølo ndi dhǒ chenga dhi ndrŭ dho nari djotsina. Ri nga kʉ ngangani ke njí ndrŭ dho ná lo ri.—Ro. 3:24.
19. (a) Ri ká ngani ko di mbai po ngbá lo dho? (Waroma 4:8) (b) Gosi ná lo nǎ ká ko si loti ngbá lo djo?
19 Azø Waroma 4:8. Yova kʉ “bbʉbbʉ adi le zø nji” ná Mungu ná føri djotsina ko adi mbai po bbo ke dho! (Zb. 130:4) Føro mai, njati ko jiri Yova njí ko zø ró ringani ko njí ddikpa bbo na mana kʉ ná lo. Yesu tungʉe fø lo nanga ɨ: “Njati ri é nzɨ ni ndrŭ nji ni ró ná chelo zø nji ri ró, nidhi Baba ma nzɨ ddi si nidhi chelo zø nji ri.” (Mt. 6:14, 15) Bbʉbbʉ dhé, ri kʉ bbo na mana kʉ ná lo, ko dyø Yova dhó le zønjidha. Ro, fø ká ko ka ko njiri ngbaribbai? Gosi ná lo nǎ ko si loti djo ná lo si ngbaribbai ma ko ka ko njiri fø nari dhǒ.
DYI 46 Ko po mbai ni dho Yova
a Kiebrania nǎ le ripo, “le zønjidha” nari na mana kʉ bbʉbbʉ le nji ddikpa le zø nari, ngbà mai le ka le njí ndrŭ zø d’i kʉ ná chu lu ro. Bí kʉ ná Biblia nǎ nga fø lo kana njonjonga ro kʉ ri, ro Biblia Tafsiri ya Ulimwengu Mupya nǎ ri kʉ nì, føri rili Zaburi 130:4 nǎ lo é pʉlʉ.
