LONGANEDHA DHI RI 2
DYI 132 Kpadjo ko ngʉ ddikpa
Dzabai, anibbʉ heshima nibbá isɨ ndrŭ dho
“Ni dzabai, . . . anibbʉ heshima isɨ ndrŭ dho.”—1 PE. 3:7.
RI NǍ LO
Ngbaribbai ma dzaba ka ndi bbʉ heshima ndibbá le dho ndi ti ná lo ma, ndi nji ná lo ma na chulu nari.
1. Ká addudho Yova bbʉngʉe ndoa dhi kado?
YOVA kʉ “hwè dhi Mungu” ndirigoti ke jiri ko maddi é hwè na. (1 Ti. 1:11) Ke bbʉ bí kʉ ná kado ko dho ndiri kó ko tsotso ko é hwè na d’e. (Yak. 1:17) Fø kado kana ddikpa ri kʉ ndoa. Ddikpa kpetsi ke ma, isɨle ma na chi ndoa ná saa na, kpa adi koddo nji ndima dhǒ jidha ma, heshima ma na ndima kana. Kpa di bbʉbbʉ jidha dhǒ ndima kana nari ka ndi liri kpa é hwè na bbo.—Mez. 5:18.
2. Bí kʉ ná ndoa kana ká ngbá lo adi ngaba njʉ?
2 Njedha dhi lo kʉ, bí kʉ ná dza dhi ndrŭ nzɨ adi ra anzi jidha ma, heshima ma na ndima dhǒ ndima kana ndima tsongʉeni nari bbai nari na ri. Føri adi rili kpa é nga dhi hwè ro. Dz’ djolu gble adi ndrŭ dhó afya djó nga nja ná tengenezo dhó rapor pori nari kʉ, bí kʉ ná kpetsi kpa njini d’idhé ndima bbá isɨ ndrŭ na, kpa vó ka ndi vó ndrŭ thí ronga ná loti inga kpa njini d’idhe ndrŭ na nja kʉ ná chu nǎ. Fø di ná lo nji ná kpetsi kpa adi ndima nji bblo njini ndima bbá dhɨ na ri nja ndrŭ kana ndima é ná saa na, ro abba ndima é ró kpa adi njini ndrŭ na d’idhe. Bí kʉ ná kpetsi kpa adi pornografia nja ndirigoti føri adi rili isɨ ndrŭ mbu ndima nzá le ji nari bbai.
3. Nja kʉ ná kpetsi kpa ká adi njini ndima bbá isɨ ndrŭ na d’idhe addudho?
3 Nja kʉ ná kpetsi kpa ká adi njini ndima bbá isɨ ndrŭ na d’idhe addudho? Njaro kpadhi baba tsɨ sangʉeni bbo, føri dho kpa adi riddi d’idhe le njini lebbá le na ná føri ro nga kʉ che kʉ ná lo ri. Nja kʉ ná kpetsi kpa adi njini ndima bbá dhɨ na d’idhe ndima dhó desturi na bí kʉ ná kpa adi rinji fø nari dho. Nja kʉ ná kpetsi kpa adi rinja ringani ndima njini føri bbai ndiro ndima dhǒ ndima kʉ bbonga na isɨ ndrŭ djo nari d’e. Nja kʉ ná kpetsi kpa dho nzá le ddingʉe ri ro ndima di ndima nǎ thø tso ro cho ri. Nja kʉ ná kpetsi kpa adi pornografia nja bí ina ná føri ka ndi liri kpadhó nganjadha é che isɨ ndrŭ djo ndirigoti ngono djo. Føri kina, bbo chulo ná kpa ra riba nari kʉ, bí kʉ ná kpetsi kpa ngangʉe d’idhe ndima njini ndima bbá isɨ ndrŭ na nari tso coronavirus dhi saa na. Ro, rie ngbá lo ma kʉ ri ró kpetsi ke dho nzá ringani ndi njini d’idhe ndibbá le na ri.
4. Wakristo kʉ ná dzabai dho ká ringani ndima é krr ngbá lo djo ndirigoti addudho?
4 Wakristo kʉ ná dzabai dho ringani ndima é krr ndiro nzɨ ndima bbari i dz’ dzá ngaddidha sa ndima dhó ngaddidha isɨ ndrŭ djo ró. a Ká addudho? Fø le ripo dho ná ddikpa sababu kʉ, ddikpa le adi ndidhó ngaddidha nǎ kʉ ná lo nji. Mutume Paulo jangʉeri Roma nǎ ché na le d’ringʉe ná Wakristo dho “nzɨ kpa bba i dz’ dzá ritsi ddá chutso ndima dho.” (Ro. 12:1, 2) Roma nǎ kutaniko dho Paulo ndingʉe nga ná saa na, føri ngʉe b’lo cho da bí Wakristo kpa ngʉ nari goti ri. Ro, Paulo d’ra ná lo nǎ ko ri famu nari kʉ kutaniko nǎ nja ndrŭ ngʉe go ndima dz’ dzá desturi dyø ndirigoti go ndima kʉ dz’ dzá ngaddidha na ro. Ri kʉ føri dho i ke bbʉngʉe shauri kpa dho ndiro kpa wø ndima dhó ngaddidha ndirigoti ndima dhó nyi thika ri. Bbʉbbʉ dhé, fø shauri lø njʉ kʉ Wakristo ná dzabai ronga maddi. Njedha dhi lo kʉ, nja kʉ ná kpa adi ribba i dz’ dzá ngaddidha sa ndima dhó ngaddidha ndirigoti kpa adi njini d’idhe ndima bbá isɨ ndrŭ na. b Yova ká adi riji kpetsi ke njini ndibbá le na ngbaribbai? Fø logoti kʉ i lo dyʉ ndi ró ná andiko nǎ.
5. Ddiddi 1 Petro 3:7 ripo nari bbai, kpetsi ke dho ká ringani ndi njini ndibbá le na ngbaribbai?
5 Azø 1 Petro 3:7. Yova rinzi kpetsi kpa bbʉ heshima ndima bbá isɨ ndrŭ dho. Nì heshima bbʉ ndibbá le dho ná ke adi njini le na bblo ndirigoti jidha na. I lo nǎ, ko si loti ngbaribbai ma kpetsi ke ka ndi bbʉ heshima ndibbá le dho nari djo. Ro, ya kwanza akotilo nzá ringani kpetsi kpa njí ndima bbá isɨ ndrŭ ró ná lo djo.
APɄ NZÁ KA NDI BBɄ HESHIMA NIBBÁ LE DHO NÁ LO NI RÓ RO
6. Yova ká adi ndi mbu ngbaribbai vuvú ndima bbá isɨ ndrŭ ró ná kpa dhi lo dho? (Wakolosai 3:19)
6 Kpetsi ke dho nzá ringani ndi vú ndibbá le ró ri. Yova nzá jirie chelo nji ná ddikpa ke ro maddi ri. (Zb. 11:5) Yova ndrorie vu kpetsi kpa vú ndima bbá isɨ ndrŭ ró nari bbo. (Mal. 2:16; azø Wakolosai 3:19.) Ddiddi kodhó lo dyʉ ndi ró ná andiko, 1 Petro 3:7 ridho nari bbai, njati ddikpa ke di njini ndibbá le na d’idhe ró, føri adi ke ma kana kau sasa Yova na. Yova nzá ka ndi rr kedhó sala maddi ri.
7. Waefeso 4:31, 32 ridho nari bbai, dzabai dho ká ringani ndima pʉ ngbǎ di ná lo ndima ti nari ndima ró ro? (Anja “Nja lo nanga le tu nari” maddi.)
7 Kpetsi ke dho nzá ringani ndi ti vó ka ndi vó ndibbá le thí ronga ná lo ri. Nja kʉ ná kpetsi kpa adi njini d’idhe ndima bbá isɨ ndrŭ na thø na ndima loti inga ká ka ndi kani ndrŭ lu ná lo ndima ti nari na. Ro, Yova ndrorie “thø ma, ka le nanga kani nari ma, ta le tá ndrŭ djó nari ma, vó ka ndi vó le thí ronga ná lo si le tso nǎ ro nari ma na bbo.” c (Azø Waefeso 4:31, 32.) Yova adi krʉ kʉ ná lo rrrr. Yova adi ngbaribbai ma kpetsi ke loti ndibbá le na nari njanja rie nga ma kpa kʉ ndrŭ kana ri ró. Nzá thonga nari bbai di loti ndibbá le na ná kpetsi ke nzɨ ndima kana kau sa ndibbá le na dhé ri, ro Yova na ma ddi.—Yak. 1:26.
8. Yova ká adi ndi mbu ngbaribbai pornografia dzá lo dho ndirigoti addudho?
8 Kpetsi ke dho nzá ringani ndi nja pornografia ri. Yova ká adi ndi mbu ngbaribbai pornografia dzá lo dho? Ke ndrorie ri ndro. Føri dho, ddikpa dzaba di nzá tsetse ná ji nja ró, fø ke ndima kana kau sa Yova na ndirigoti føri na ke ridho ndi nzɨ heshima bbʉ ndibbá le dho ri. d Yova adi riji kpetsi ke é chi ndibbá le dho, nga ndi nji ná lo chulu dhé ri, ro ndidhó ngaddidha na maddi. Yesu pongʉeri njati ddikpa kpetsi ke di ddikpa isɨle nja che kʉ ná ngaddidha na ró, fø ke nji uzinifu b’lo “ndi thí nǎ.” e—Mt. 5:28, 29.
9. Yova ká ndro nga dhi heshima ro kpetsi ke rine ndi njí ngono ndibbá le na nari addudho?
9 Kpetsi ke dho nzá ringani ndi di ndibbá le cho kpakpanga na ngono dho ri. Nja kʉ ná kpetsi kpa adi ndima bbá isɨ ndrŭ cho kpakpanga na ndiro ndima njí ngono nzá thonga ná chu nǎ d’e, ná føri adi rili ndrŭ mbu ndima nzá tsetse ri inga nzá le ji nari bbai. Yova ndrorie le lé ro le ji le nari ma, nzɨ na le ngaddi nja ndrŭ djo ná nyi ma na ndro. Ke adi riji kpetsi ke ji ndibbá le, ke njini le na bblo ndirigoti ke bbʉ heshima le ndi mbu nari dho. (Efe. 5:28, 29) Nde, ri ká ka ndi é ngbǎ rie nzá thonga ná chu nǎ Mukristo kʉ ná kpetsi ke ngono nji ndibbá le na, ke njini le na d’idhe inga pornografia ke nja ri ró? Ke ká ka ndi wø ndidhó ngaddidha ma, ndi nji ná lo ma na thika ngbaribbai?
NGBARIBBAI MA KPETSI KE KA NDI SI CHE KɄ NÁ NYI DJOLU NARI
10. Kpetsi kpa ká ka ndima dyø Yesu dhó loroji ngbaribbai?
10 Kpetsi ke tsotso ká addu ka ndi kó ndiro ndi si che kʉ ná nyi djolu d’e? Ringani ke dyø Yesu. Nzá mai Yesu chingʉe ndoa ro, ngbaribbai ma ke ngʉ njini ndi unakpa na nari kʉ bblo kʉ ná loroji kpetsi ke dho ngbaribbai ma ke ka ndi njini ndibbá isɨ le na nari djo. (Efe. 5:25) Loroji na, anja ngbaribbai ma Yesu ngʉ adi njini ndirigoti ke ngʉ adi loti ndidhó mitume na nari nǎ ro kpetsi kpa ka ndima ba ná somo.
11. Yesu ká ngʉ njini ngbǎ ndidhó mitume na?
11 Yesu ngʉ adi njini bblo ndidhó mitume na ndirigoti ke ngʉ adi heshima bbʉ kpa dho. Ke nzɨ ngʉ adi chutso ddá kpa dho kpakpanga na ri. Nì mai ke ngʉe kpa djó bbonga ro, Yesu nzɨ ngʉ adi rili ndi unakpa nji ndi do ndidhó kpakpanga djotsina ri. Føri rɨngana, nyenyenga na ke ngʉ adi njínji kpa dho. (Yoh. 13:12-17) Ke pongʉeri ndi unakpa dho ɨ: “Anibba ma ddi longa ni dho dhonalo ma kʉ nyenyenga ma, djø lé le djø le thí ró nari ma na na ndirigoti ni si le ronga chʉdha ba ni dho.” (Mt. 11:28-30) Anonga nari kʉ Yesu ngʉe nyenyenga na. Nyenyenga na kʉ ná ke nga kʉ zaifu ri. Føri rɨngana, ke kʉ kpakpanga na dhonalo ke adi ndi ronga tso chocho. Njati ndrŭ chø ke chø ma ri ró, ke adi ndi djødjø ndirigoti ke adi ndi nǎ thø tso chocho.
12. Yesu ká ngʉ adi loti nja ndrŭ na ngbaribbai?
12 Yesu dhó lo ngʉ adi nja ndrŭ li kpakpa ndirigoti ri ngʉ adi kpa iso pɨpɨ. Ke nzɨ ngʉ adi loti thø na ndi unakpa dho ri. (Lu. 8:47, 48) Nzá jingʉe kedhó lo ná ndrŭ ngʉ ke dhudhu inga ke chøchø ná saa na, “ke nzɨ ngʉ adi logoti ngʉ dhu na ri.” (1 Pe. 2:21-23) Nja saa na, Yesu ngʉ adi go ddì, che dhé ndi tie lo nari rɨngana. (Mt. 27:12-14) Føri kʉ bblo pli kʉ ná loroji Wakristo kʉ ná dzabai dho!
13. Matayo 19:4-6 ripo nari bbai, kpetsi ke ká ka “ndi chini ndibbá le na” ngbaribbai? (Anja ji maddi.)
13 Yesu pongʉeri kpetsi kpa dho ringani ndima é chi ndima bbá isɨ ndrŭ dho. Fø lo ke bangʉe ndidzá baba dhó ro ɨ ndi pongʉeri ro, kpetsi ke dho ringani “ndi chini ndibbá le na.” (Azø Matayo 19:4-6.) Kigiriki nǎ le ripo “le chini” nari na mana kʉ “b’ab’a ndi ró nari tsi.” Føri dho kpetsi ke ma, ndibbá isɨle ma na kana kʉ ná jidha dho ringani ndi é bbo pli ndirigoti b’a ndima b’a ndima kana nari bbai. Njati kpa kana ddikpa ke inga le njí ndi lai ndoa dhi le inga ke thí ronga ka ndi vó ná lo ró, kpa krʉ ka ndima nzani nza. Bbo ji ndibbá le ná kpetsi ke nzá ka ndi nja pornografia ri. Ke ka ndi tu ndi nyǒ tse ndiro nzɨ ndi “nja nga na mana kʉ ná ritsi” ró. (Zb. 119:37) Yobu bbai, ke nzá ka ndi nja d’i isɨle che kʉ ná ngaddidha na ri.—Yob. 31:1.
Chi tøni ná ddikpa dzaba pornografia ndi nja nari gʉgʉ (Anja paragrafu 13) g
14. D’idhe e njini ndibbá le na ná kpetsi ke ká ka ndi njiri ngbǎ ndiro ndima kana nga é bblo Yova ma, ndibbá le ma na na d’e?
14 Nzɨ njini bblo ndibbá le na ndi po ná lo ma inga ndi nji ná lo ma na chulu ná kpetsi ke dho ringani ndi njí kpakpanga ndiro ndima kana nga é bblo Yova ma, ndibbá le ma na na d’e. Ri ká ngani ke njiri ngbǎ? Ya kwanza, ringani ke nonga nari kʉ ndi kʉ kpakpalo kana. Yova adi ndi nji ná lo krʉ njanja ndirigoti ke adi ndi po ná lo krʉ rrrr. (Zb. 44:21; Muh. 12:14; Ebr. 4:13) Ya pili, ringani ndi bbá d’idhe ndi njini ndibbá le na nari tso ndirigoti ndi wø ndidhó nyi thika. (Mez. 28:13) Ya tatu, ringani ke kó zø Yova ma, ndibbá le ma na tsó. (Mdo. 3:19) Ringani ke nziri Yova kó ndi tsotso ndiro ndi ti ná lo ma, ndi nji ná lo ma, ndidhó ngaddidha ma na tso njunju Yova ji ná lo na. (Zb. 51:10-12; 2 Ko. 10:5; Flp. 2:13) Ya ine, ringani ke njí ri sala nǎ ndi nzieri nari bbai ndirigoti ke ndro che kʉ ná lo krʉ ndro. (Zb. 97:10) Ya tano, ringani ke ne ndi tsotsokodha kutaniko nǎ wazee dhó ro. (Yak. 5:14-16) Ya sita, ringani ke njí ndi dho ka ná lo krʉ ndiro nzɨ ke nji fø di ná chelo ki luti ró. Pornografia nja ná kpetsi ke dho maddi ringani ndi njí iga le tilo djo ná 6 kʉ ná fø lo. Yova si ke nji ná kpakpanga ronga lele ndiro ke si che kʉ ná lo djolu d’e. (Zb. 37:5) Ro, ringani kpetsi ke bbá ndi bbá le thí ronga ndi vo nari tso. Føri kina, ringani ke di heshima bbʉ ndibbá le dho. Ke ká ka ndi njiri fø ngbaribbai?
NGBARIBBAI MA NI KA NI DHǑ JIDHA MA, HESHIMA MA NA NIBBÁ LE DHO NARI
15. Kpetsi ke ká ka ndi dhǒ jidha ndibbá le dho ngbaribbai?
15 Adho jidha nibbá le dho. Hwè na kʉ ndima dhó ndoa kana ná bí kʉ ná le-djoi adi ddikpa ritsi ro nji krʉ ddo ró ndiro ndima dhori ndima bbá isɨ ndrŭ dho nari kʉ ndima ji kpa ji. (1 Yo. 3:18) Kpetsi ke ka ndi dhǒ jidha ndibbá le dho kar lo kana dhé; le thó tso ke lø nari ma, le ndi mbʉ nari ma na chulu. Ke ka ndi chó mesaje le dho ndirigoti ndi pori le dho “ni dyu ma hwi bbo” inga ndi dhuri “dyina nga ká da ngbaribbai?” Bí ina, ke ka ndi di ngandi le dho ndiri na ndi dhǒ ngbá ngatsi ma ndi ji le nari d’e. Njati kpetsi ke di fø di ná lo nji ró, føri na ke ridho ndi heshima bbʉ ndibbá le dho ndirigoti ke ka ndi liri ndima dhó ndoa é kpakpa.
16. Ri ká ngani kpetsi ke má ndibbá le addudho?
16 Adiripo le dho le na mana kʉ bbo ni dho. Heshima bbʉ ndibbá le dho ná kpetsi ke adi le li kpakpa ndirigoti ke adi bblolo ti le djo. Føri ke ka ndi njí ná ddikpa chu kʉ ndi di mbai po le nji ndiro le kó ndi tsotso d’e ná lo krʉ dho. (Kol. 3:15) Kpetsi ke di ndibbá le máma ró, føri na ke ndibbá le li kpakpa. Njati kpetsi ke di addudho ma ndi ji ndibbá le nari po ró, le ka ndi mbu ndi bblo, ji le ji ri ndirigoti heshima le bbʉ dho ri.—Mez. 31:28.
17. Kpetsi ke ká ka ndi bbʉ heshima ndibbá le dho ngbaribbai?
17 Adinjini bblo nibbá le na ndirigoti adi heshima bbʉ le dho. Jiji ndibbá le ná kpetsi ke adi le nja mana na bbo. Ke adi le nja Yova dhó ro si ná bblo pli kʉ ná kado ni. (Mez. 18:22; 31:10) Føri ka ndi liri ke njini le na jidha na ndirigoti heshima na rie ngono ma ndima nji ná saa na ró. Ngono ndima nji ná saa na, ke nzá ka ndi cho le kpakpanga na ndiro le njí che dho le ka ndi mbu ndi ná lo inga nza ka ndi nzá ledhó zamiri ná lo ro ri. f Kpetsi ke dho ma nzaddi ringani ndi njí nzá ndidhó zamiri u ná lo ngono ndima nji ná saa na ri.—Mdo. 24:16.
18. Ri ká ngani kpetsi kpa nji ri ngbǎ? (Anja ɨ djǒ ripo ná kisanduku maddi, “ Dzaba ka ndi njí ná 4 kʉ ná lo ndiro ndi ba heshima d’e.”)
18 Kpetsi kpa, Yova nanga adi jini bbo ndi di ni nji ná kpakpanga nja ndiro ni dhǒ heshima nidhi isɨ ndrŭ dho ni po ná lo ma, ni nji ná lo ma na chulu ná saa na. Føri dho, anivʉri nzɨ ni nji che kʉ ná lo kpa ró, ni di heshima bbʉ kpa dho, ni di loti bblo kpa na ndirigoti ni di jidha dhǒ kpa dho. Fø ni rinji nari na ni ridho nari kʉ, ni ji kpa ji ndirigoti ni kpa nja mana na bbo. Anibbʉ heshima nibbá isɨ ndrŭ dho ná føri si rili ni kana kau é kpakpa Yova na.—Zb. 25:14.
DYI 131 “B’lo tso Mungu gba ddi nari”
a Dzabai ka ndima ba faida ɨ djǒ ripo ná lo ndima zø nari nǎ ro, “Ni ká adi njini isɨ ndrŭ na ddiddi Yova adi rinji nari bbai nì?” Bi 1, 2024 nǎ Dzamu dhi Munara nǎ.
b Vu ró le vú ná ndrŭ ka ndima ba faida ɨ djǒ ripo ná lo ndima zø nari nǎ ro, “Msaada kwa Wanaotendewa kwa Jeuri Nyumbani” jw.org djó ndirigoti JW Library® djó.
c NJA LO NANGA LE TU NARI: “Vó ka ndi vó le thí ronga ná lo” tsu ndi nǎ, dhu le dhu nari ndirigoti che dho ddikpa le ka ndi mbu ndi ná lo le ti nari. Føri kina, le ddikpa kedhó che kʉ ná lo dhé ti bí ina nari maddi. Føri dho, ddikpa dzaba di tsátsá kʉ ná loti inga ke di ndibbá le dhudhu ná føri kʉ vó ka ndi vó le thí ronga ná lo.
d Anja jw.org djó ndirigoti JW Library djó ɨ djǒ ripo ná lo “Ponografia Inaweza Kuiharibu Ndoa Yako.”
e Ddikpa isɨle bbá ke di pornografia nja ró, le tsotso ɨ djǒ ripo ná lo ka ndi kó “Ni ká ka ni njí addu njati ni lai ndoa dhi le inga ke nja pornografia ró?” Bi 8, 2023 nǎ Dzamu dhi Munara nǎ.
f Biblia nzá tilo ngbaribbai ma dza dhi ndrŭ ka ndima njí ngono nari djo ri. Wakristo kʉ ná dza dhi ndrŭ dho ringani ndima vʉ nanga ná lo dhori nari kʉ, ndima heshima bbʉ Yova dho, ndima njini bblo ndima kana ndirigoti ndima kʉ tsetse ná zamiri na. Bí ina, ri ngae bblo dza dhi ndrŭ di ndima dhó ndoa nǎ nzá le ka le pʉ ndrŭ kana ná lo d’ra nja ndrŭ dho ri.
g JI DJÓ LONGA LE TU NARI: Ddikpa le-djo lai nga kʉ Yova dzá Dimu ná nji dhi kpa ke cho ndiro ke nja ndima dhó pornografia djo tilo ná gazeti d’e.
