1. Ko ká ka ko njí ri ngbǎ ndiro ko bbʉ hwè Yova dho d’e?

 ANZINGADDI di. Ni bbʉ pekee kʉ ná kado ji ni ji ná le dho, ri d’ani d’a ndirigoti ngbà na le ka le njínjí nari. Ni thí ka ndi bʉni njati ni ra ri utso d’i nari kʉ, ke li fø kado sanduku nǎ ndirigoti ke nzɨ nga ki ro ma ddi ri djo ddi ri ró! Nja chu nǎ ni nanga ka ndi jini bbo ni ra ri utsod’i nari kʉ, ke njínji ri na ndirigoti ke mbai po ni dho ri djotsina ró. Fø loroji ká ngbá lo ngaddi ko dho? Yova bbʉngʉe ndidzá ngba ko djotsina. Yova bbʉ ko dho ná bbo na mana kʉ ná kado ma, kedzá jidha ma na dho ko di mbai po ró ke nanga adi jini bbo, føri i lingʉeri ke bbʉ le ødha dhi be!​—Yoh. 3:16; Ro. 5:7, 8.

2. I lo nǎ ká ko si loti ngbá lo djo?

² Ddo da nari bbai, ko ka ko di mbai le po le ødha dhi be dho nari nga vivi. Føri kʉ ddiddi Mungu dhó kado ko li sanduku nǎ nari na. Ko kʉ hwè na ri kʉ kodhó nari dho, ro ko li ri nzá ri ka ndi njani ná ngana. Ndiro nzɨ fø lo njini ró, ko dho ringani krʉ ddo ró ko di mbai po ndirigoti ko di ngaddi Mungu ma, Kristo ma na nji ko dho ná lo krʉ djo. I lo si ko tsotso ko ndiro ko di ri nji fø d’e. I lo nǎ ko si loti ngbaribbai ma ko ka ko ba faida le ødha dhi be nǎ ro njʉnga djó ro nari djo ndirigoti ngbaribbai ma ko si faida ba ri nǎ ro gosi ná ddo na nari djo. Føri goti, ko si loti ngbaribbai ma ko ka ko dhǒ ko nanga jini Yova dhó jidha dho nari djo, bbo pli Ukumbusho njí inga ri goti si e ná ddo kana.

 NGBARIBBAI MA KO KA KO BA FAIDA NJɄNGA DJÓ RO NARI

3. Ri ká kʉ ddikpa ngbá chu nǎ ko adi faida ba le ødha dhi be nǎ ro ri?

³ Ko adi faida ba Kristo bbʉngʉe le ødha dhi be nari nǎ ro. Loroji na, le ødha dhi be djotsina Yova adi kodhó chenga zø njinji. Ke nzɨ le adi chocho ndiro ke njí ko zø d’e ri, ro ke ji ri ji nari dho. Zaburi ndi ná ke pongʉe mbai Yova dhó le zø njidha dho ɨ ndi ngori nari na: “Dhonalo ni, Ee Yova, ni kʉ bblo ndirigoti tayari le zø njidha dho.”​—Zb. 86:5; 103:3, 10-13.

4. Yova ká bbʉngʉe le ødha dhi be ie ma dhi lo dho? (Luka 5:32; 1 Timoteo 1:15)

⁴ Nja ndrŭ ka ndima ddiri Yova nzá ka ndi njí ndima zø ri. Bbʉbbʉ dhé, ko krʉ dho nzá ringani ko zø njíni ri. Mutume Paulo famungʉeri nari kʉ “ndi nzá kae le nzie ndi mutume ri.” Ndirigoti ke pongʉeri ki ɨ: “Mungu dhó nzá tso ka ndi kó le djo ná zølo chulu ma kʉ kpadjo ma kʉ nari bbai.” (1 Ko. 15:9, 10) Kodhó chenga nǎ ro ko leni le ná saa na, Yova adi ko zø njinji. Ká addudho? Ri nga kʉ ko kaka ko zø njíni nari dho ri, ro ke ji ko ji nari djotsina. Njati rie ni adi nzani ni riddi ni zø njini nzá nari dho ró, anonga nari kʉ Yova nzá bbʉngʉe le ødha dhi be nga kʉ chenga na ná ndrŭ dhi lo dho ri, ro le leni ndima dhi chenga nǎ ro ná ndrŭ dho.​—Azø Luka 5:32; 1 Timoteo 1:15.

5. Ko ká ka ko ddiri nari kʉ ko krʉ dho ri kaka ko ba Yova dhó zølo? Aturinanga.

⁵ Ko kana ddikpa le dho ma nzá ddi ringani ndi ddiri nari kʉ, ndi ka ndi ba Yova dhó zølo njati rie ndi njinjí Yova dho cho bí ma ri ró. Bbʉbbʉ dhé, Yova nanga adi jini ji ko tøni chi ndi dho nari dho. (Ebr. 6:10) Yova bbʉngʉe ndi Ddu pá kʉ ná kado bbai, nga ko nji ke dho ná bblolo kobe bbʉdha dho ri. Føri dho, ri nga kʉ bblo ko di riddi ko njinjí Yova dho bicha nari dho ri kaka ko zø njíni ri. Njati ko di riddi fø ró, føri ka ndi dhori kodhó lo nzá u le ødha dhi be ri.​—Anja Wagalatia 2:21.

6. Paulo ká njingʉe Yova dzá njí kpakpanga na addudho?

⁶ Paulo chungʉeri nari kʉ ngbá ngatsi ma ndi nji Yova dzá njí nari nzá ka ndi liri ndi zø njíni ri. Nde, ke ká njingʉe Yova dzá njí kpakpanga na addudho? Ke nzá njingʉeri fø ndi kaka ndi ba Yova dhó zølo nari dho ri, ro ndiro ndi dhǒ ndi nanga jini ngbà Yova dhó nzá tso ka ndi kó le djo ná zølo dho nari d’e. (Efe. 3:7) Paulo bbai, ko adi ra anzi kpakpanga na ko njínji Yova dho nari na, nga ndiro ko ba kedhó zølo nari dho ri, ro ko dhǒ ko nanga jini ngbà ri dho nari d’e.

7. Njʉ ká ko adi faida ba le ødha dhi be nǎ ro nja ngbá chu nǎ? (Waroma 5:1; Yakobo 2:23)

⁷ Ko ka ko ba faida njʉ le ødha dhi be nǎ ro ná nja chu kʉ, ko kana nga ka ndi é chøchø Yova na ndirigoti ko ka ko é kedzá bbakau. a Anziro dae ná lo dhoeri nari bbai, ko nzɨ adi gøni gø Yova dzá bbakau ri. Ro, le ødha dhi be djotsina ko kana ka ndi é “ngoi Mungu na” ndirigoti ko kana nga ka ndi é chøchø ke na.​—Azø Waroma 5:1; Yakobo 2:23.

8. Ká addudho ringani ko po mbai Yova bbʉ sala dhi pendeleo nari dho?

⁸ Yova tso ko nganzi nari kʉ bbo na mana kʉ ná lo, ná føri ka ndi liri ko kana kau é chøchø ke na. Yova nzɨ adi kodhó sala rr nju ko nju ko tso ná saa na dhé ri, ro ko é ddiddi ro ma ró ke adi ri rr nì dhé. Sala ka ndi pɨ ko iso ndirigoti ri ka ndi bbʉ ngoi ko dho, ro ri nga kʉ føri dhé kʉ sala dhó faida  ri. Ri ka ndi liri ko kana kau é kpakpa Yova na. (Zb. 65:2; Yak. 4:8; 1 Yo. 5:14) Dz’ djó Yesu ngʉe ná saa na, ke ngʉ adi sala nji bí ina dhonalo ke chungʉeri chu nari kʉ, Yova ndidhó sala rrrr ndirigoti sala ka ndi liri ndima kana kau rá anzi ndidzá Baba na kpakpa ndi kʉ ro. (Lu. 5:16) Ko mbai po bbo Yesu bbʉngʉe ndi nari dho, ná føri ka ndi liri ko ngʉ Yova dzá bbakau ndirigoti ko tilo ke na sala chulu!

GOSI NÁ SAA DJO KO KA KO SI BA NÁ FAIDA

9. Gosi ná saa djo ká chi tøni ná ndrŭ si ngbá faida ba le ødha dhi be nǎ ro?

⁹ Gosi ná saa djo ká chi tøni ná ndrŭ si ngbá faida ba le ødha dhi be nǎ ro? Yova si cho ró nŭnŭ shinga bbʉ kpa dho. Bí kʉ ná ndrŭ adi riddi føri nzá ka ndi ka ri dhonalo ndrŭ cherieni cho bí b’lo. Ro, Yova nongʉe ndrŭ na ná kusudi ngʉe ndrŭ di theinga dho. Njati Adamu njíe chenga nzá ró, ddikpa le ro ma nzá ddi ka ndi ddieri nari kʉ, cho ró nŭnŭ le di ná føri nzá ka ndi ka ri dhonalo ndrŭ ka ndima die theinga dho. Ndirigoti ngbà mai ko ka ko ddiri ri nzá ka ndi ka ko di cho ró nŭnŭ njʉ ro, ko ka ko uri u ri si njini nji dhonalo Yova bbʉ bbo ró dzi kʉ ná ritsi ndi dzá ngba ndi bbʉ nari chulu, ná føri si rili ri kaka ko di cho ró nŭnŭ.​—Ro. 8:32.

10. Ché na le d’ri ná Wakristo ma, nja chembø ma na ká ngbá lo si njini nari b’o?

¹⁰ Nì mai cho ró nŭnŭ le di nari kʉ gosi ná saa na ko si ba ná faida ro, Yova jiri ko di ngaddi njʉnga djó ro ri djo. Ché na le d’ri ná Wakristo adi ndima si ra ra na pinyo Kristo ma na dz’ djo nari b’o. (Ufu. 20:6) Nja chembø adi b’o nari kʉ ndima si di i dz’ djó Paradiso nǎ nga dhi kpakpalo ro. (Ufu. 21:3, 4) Ni ká kʉ i dz’ djó si di ná nja chembø kana nzɨ tso si d’ø ná shinga dhi ngab’odha na ndima kʉ ro? Føri nga kʉ le isopɨdha dhi lo dhé ri! Yova nongʉe ndrŭ ndiro ndima di dz’ djó d’e. Theinga dho le di dz’ djó nari si hwè bbʉ bbo.

11-12. Ko ká ka ko ddinga Paradiso nǎ si njini ná ngbá ledha ro djo mai? (Anja ji maddi.)

¹¹ Addinga ngbaribbai ma nidhó maisha  sie Paradiso nǎ nari djo. Ni ro nzɨ do si nji dhe le nji nari ma, dhe le dhe nari ma na dho ri. (Isa. 25:8; 33:24) Yova si nidhó lo u ná lo tso gba krʉ. Ni ká jiri ni si lochu ngbá lo djo? Ni ká jirie ni si lochu zǎ djo? Miziki tɨdha djo? Inga ji thɨdha djo? Bbʉbbʉ dhé, Paradiso nǎ ri si ri u ritsi thɨdha chu ná ndrŭ ma, dza chidha chu ná ndrŭ ma, nzà bbɨdha chu ná ndrŭ ma na é bí. Føri kina, ri si ndrŭ ko bí ndima si nga tsotso ko, loroji na nga thɨdha ma, nyo ridha ma, njí njidha dhi ritsi thɨdha ma, í ronga thɨdha ma na dho. (Isa. 35:1; 65:21) Theinga dho ni si di nari kana ni si saa ba ndiro ni njí fø ritsi krʉ ndirigoti ni njí nja ri ki bbo pli.

¹² Ri sie bbò hwè ko kó ga si ga ná ndrŭ! (Mdo. 24:15) Addinga ki, ngbaribbai ma ni sie hwè na ni lochu bbo Yova djo ke nongʉe ná ritsi chulu nari djo. (Zb. 104:24; Isa. 11:9) Ndirigoti fø ritsi krʉ djolu da nari kʉ ri si kaka ni njínji Yova dho ndirigoti nidhó lo nzɨ si ri u ni kó zø ri dhonalo ni nzɨ si chenga ki ro nji ri. Ni ká ka ni be gosi ná saa na kʉ ná ledha pá i dz’ djó “da si da ná chenga hwè ni ji ni njí” nari dho? (Ebr. 11:25) Bbʉbbʉ dhé nzá! Fø ledha dada krʉ ko ka ko njí njʉ ná lo djolu. Anonga nari kʉ, Paradiso dz’ si ngʉ nari nga sie krʉ ddo ró ko sie na ná ngab’odha ri. Ri sie krʉ ddo ró ko di nanga. Fø ritsi krʉ kaka dhonalo Yova jingʉe ko bbo, føri dho ke bbʉngʉe le ødha dhi be ko djotsina!

ADHO NI MBAI PO YOVA DHÓ JIDHA DHO NARI

13. Yova dhó jidha dho ká ko ka ko po mbai ngbaribbai? (2 Wakorinto 6:1)

¹³ Ko ká ka ko po mbai Yova bbʉngʉe le ødha dhi be nari dho ngbaribbai? Kedhó njí ko li anziro kodhó maisha nǎ nari chulu. (Mt. 6:33) Føri djolu krʉ, Yesu dhengʉe ndiro “nzɨ shi di ná ndrŭ di shi ndima dho, ro kpadhi lo djotsina dhengʉe ndirigoti gangʉe ná ke dzá lo dho.” (2 Ko. 5:15) Bbʉbbʉ dhé, ko nzá ka ko jiri nzɨ ko ba Yova dhó nzá tso ka ndi kó le djo ná fø zølo ri.​—Azø 2 Wakorinto 6:1.

14. Ko ká ka ko dhǒ udha Yova dhó chutsoddadha djo ngbaribbai?

¹⁴ Ko ka ko dhǒ ko mbai po Yova dhó jidha dho nari ko udha dhǒ kedhó chutsoddadha dho nari chulu. Ká ngbaribbai? Loroji na, ko ka ko njí ná darasa inga ko ka ko njí ná njí djo ko lo nanga vʉ ná saa na ringani ko ddinga Yova ká ji ko njí ngbá lo nari djo. (1 Ko. 10:31; 2 Ko. 5:7) Udha na ko njínji ná saa na, kodhó udha ma, ko kana kʉ Yova na ná kau ma na si ngʉ kpakpa. Ndirigoti kodhó ngab’odha si ngʉ kpakpa bbo pli.​—Ro. 5:3-5; Yak. 2:21, 22.

15. Ko ká ka ko dhǒ ko nanga jini nari ngbaribbai Ukumbusho dhi saa na?

¹⁵ Ko ka ko po mbai Yova dhó jidha dho ná nja chu ki ma kʉ ddi. Ri kʉ Ukumbusho dhi ddo kana ko ridho Yova dho ngbaribbai ma ko mbai po le ødha dhi be dho nari chulu nari. Ko ko tayarisha Ukumbusho dho  nari kina, ko ka ko nzi nja ndrŭ maddi ndiro ndima si ri dhi ngana d’e. (1 Ti. 2:4) Atu Ukumbusho dhi ngana si da ná lo nanga ni nzi ná ndrŭ dho. Ni ka ni kó kpa tsotso jw.org djó ɨ djǒ ripo ná video ni dhǒ kpa dho nari na Yesu ká dhengʉe addudho? Ndirigoti Ano Yesu dzá dhe nga. Wazee dho ringani ndima nzi djødjø kiroho nǎ ná Wakristo. Anzingaddi Yova dhó vivie ná chembø ki ngʉ kedhó mia kana ró ka ndi é ra nǎ ma, dz’ djó ma ná hwè djo di! (Lu. 15:4-7) Ukumbusho dhi ngana nzɨ ko zʉ ko ronga ko kana dhé, ro bbo pli akozʉ wø ndrŭ ma inga nzá ro d’erie si bicha ná ndrŭ ma na ronga. Ko riji kpa mbu ndima bblo le ko ná ri!​—Ro. 12:13.

16. Ko dho ká ringani ko d’ra lo bbo Ukumbusho dhi saa na addudho?

¹⁶ Ni ká ka ni njínjí bbo nzá Yova dho Ukumbusho dhi saa na? Fø ni rinji nari kʉ bblo kʉ ná chu ndiro ni dhǒ Mungu ma, Kristo ma na nji ko dho ná krʉ lo dho ni nanga jini ngbà nari d’e. Bbo ko lod’ra nari kana ko si Yova ko tsotso kó nari nja ndirigoti ko lirie ko thí ke djó nari si ngʉ kpakpa. (1 Ko. 3:9) Føri kina, ni ka ni zø Ukumbusho dhi saa na le li le zø ná maandiko Ddo ró le zø ná Andiko dhi broshua nǎ le li ndi ro inga Mukristo dhó Maisha ndirigoti Lod’radha dhi njí dhi njudha dhi buku nǎ le li ná programu nǎ ro. Ni ka ni liri ni di fø verse zø nidhó funzo la pekee nǎ maddi.

17. Yova nyǒ ká ngbá lo adi tho? (Anja ɨ djǒ ripo ná kisanduku, “ Ngbaribbai ma ko ka ko po mbai Yova dhó jidha dho nari.”)

¹⁷ Bbʉbbʉ dhé, njaro ni dho nzá ri ro ka ndi ka ni njí i lo nǎ ko tilo djo ná lo krʉ ri. Anonga nari kʉ, Yova nzɨ adi ni nji ná lo ddi nja ndrŭ nji ná lo na ri; ke adi ni thí nǎ kʉ ná lo nja. Ke nanga adi jini bbo ke ni nja ni mbai po ni thí nǎ ro le ødha dhi be dhi kado dho nari dho.​—1 Sa. 16:7; Mk. 12:41-44.

18. Ko ká adi mbai po Yova Mungu ma, Kristo Yesu ma na dho addudho?

¹⁸ Ri kʉ le ødha dhi be djotsina i ko zø njini ri, ko kana kau kʉ Yova Mungu na ri ndirigoti ko kʉ cho ró nŭnŭ di ná shinga dhi ngab’odha na ri. Krʉ ddo ró akodi mbai po Yova dhó jidha dho dhonalo ri liri ko ba fø ledha krʉ. (1 Yo. 4:19) Akopo mbai Yesu dho maddi dhonalo ke jingʉe ko bbo nari dho ke bbʉngʉe ndidhó shinga ko djotsina!​—Yoh. 15:13.