Tulakonkela cakubikila maano Baibo nshoyaamba ndyetutoocita Mulalilo wa Mwaami na Ciibalusho ca lufu lwakwe Yesu. (1 Bene Kolinto 11:20) Nacibi boobo, shintu shiinji bamu maceeci amwi nshobashoma akucita pa Mulalilo wa Mwaami tasheendelani a Baibo nshoyaamba.

 Tulacita Mulalilo wa Mwaami kwaamba ayi twiibaluke Yesu akutondesha kulumba pakulyaaba kwakwe ceebo ca ndiswe. (Mateyo 20:28; 1 Bene Kolinto 11:24) Bushiku bwa kucita Mulalilo wa Mwaami, teshi bushiku bwa kusekelela na kanshiyanshiya ka bupailishi kacitwa kwaamba ayi muntu alekelelwe shibiibi shakwe. a Baibo ilaiisha ayi inga twalekelelwabo shibiibi shesu kwiinda mukushoma muli Yesu, kuteshi kukonkela tunshiyanshiya tumwi twa bupailishi.​—Bene Loma 3:25; 1 Joni 2:1, 2.

 Yesu ndyakalwiita bashikwiiya bakwe kunoocita Mulalilo wa Mwaami, taakwe kubalwiita kufula kwa mankanda ndyebeelete kunoocita boobo. (Luka 22:19) Bamwi balayeeya ayi tulyeelete kunoocita mweenshi amweenshi, bamwi balacita nsondo ansondo, bushiku abushiku, mankanda aanji mu bushiku bomwi, na ciindi cili coonse muntu mwiine ncayeeya ayi cili kabotu kucita boobo. b Nacibi boobo, kuli makani amwi ngotweelete kuyeeyawo.

 Yesu wakatalika Mulalilo wa Mwaami pabushiku baJuda ndyebakalinga kusekelela Pasika na Kusotokela, lyalo wakafwa pabushiku bweenka ubu. (Mateyo 26:1, 2) Ici tacina kucitikabo cakuteengashila. Malembo alakoshanisha mulambu wakwe Yesu ku mulambu wa mwanaambelele wakalinga kulikwa pa bushiku bwa Kusotokela. (1 Bene Kolinto 5:7, 8) Kusotokela kwakalinga kucitwabo linkanda lyomwi pamwaaka. (Kulonga 12:1-6; Lefi 23:5) Beneklistu bakutaanguna abalo mbobakalinga kucita. Bakalinga kucita Ciibalusho ca lufu lwakwe Yesu linkanda lyomwi pamwaaka, c alimwi Bakamboni Bakwe Yehova balakonkela nshila iyi yeendelana a Baibo nshoyaamba.

 Cakubonenaako Yesu ncaakatutondesha ndyaakatalika Mulalilo wa Mwaami tacitucafwibo kushiba kufula kwa mankanda ndyetweelete kucita Ciibalusho, sombi cilatucafwa akushiba bushiku aciindi ndyetweelete kucita boobo. Kweelana a kalenda yamu Baibo, Yesu wakatalika Mulalilo wa Mwaami pa Nisani 14, 33 C.E., pesule lyakwaamba ayi lisuba lyapila. (Mateyo 26:18-20, 26) Bweenka Beneklistu bakutaanguna mbobakalinga kucita, andiswe tulatolelela kucita Ciibalusho ca lufu lwakwe Yesu pabushiku bweenka ubu, mwaaka amwaaka. d

 Nabi kwaamba ayi pa Nisani 14, 33 C.E pakalinga Pacisanu, Nisani 14 inga yashikila pabushiku buli boonse munsondo, mwaaka amwaaka. Kwaamba ayi tushibe bushiku bwa Nisani 14 ndyeshi bukashiike mumwaaka, tulakonkela nshila yakubelenga nshiku yeenka njobakalinga kusebensesha muciindi cakwe Yesu, kuteshi kukonkela kalenda ya baJuda isebenseshekwa munshiku shino. e

 Yesu ndyaakatalika mulalilo, wakasebensesha shinkwa itacitewo cimena, awaini isalala isho shakacaalako ndyebakalinga kucita Kusotokela. (Mateyo 26:26-28) Aswebo tulakonkela cakubonenaako cakwe Yesu kwiinda mukusebensesha shinkwa ngobatana kubikako shili shoonse nabibo cimena alimwi awaini usalala utana kusenkanishikwa ashili shoonse.

 Mumaceeci amwi, balasebensesha shinkwa ngobabikako cimena, sombi liinji mu Baibo cimena cilemikaninaako bubi akubola. (Luka 12:1; 1 Bene Kolinto 5:6-8; Bene Galatiya 5:7-9) Aboobo shinkwa itacite cimena nabi cintu cili coonse ngoweelelabo kwiimikaninaako mubili wakwe Klistu uyo utacitewo bubi. (1 Pita 2:22) Cintu acimwi ba mubupailishi bumwi ncobacita cipusene a Baibo nshoyaamba, nkusebensesha dilinki muciindi cakusebensesha waini njobatana kubikako shili shoonse. Bamwi balacita boobo ceebo cakwaamba ayi balakasha bantu kunwa waini nabi kwaamba ayi Baibo taikashiiwo kunwa waini.​—1 Timoti 5:23.

 Shinkwa itacitewo cimena alimwi awaini isho shisebenseshekwa pa Ciibalusho, nshikoshanyo sha mubili wakwe Yesu abulowa bwakwe. Pabushiku bwa Ciibalusho, tashaalukiiwo akuba mubili abulowa bwakwe Yesu munshila ya caankamiko na kusenkana abulowa amubili wakwe, mbuli bamwi mbobayeeya. Amubone Baibo nshoyaamba sheenga shatupa kushoma boobo.

•   Naakwiinga Yesu wakalwiita bashikwiiya bakwe kunonwa bulowa bwakwe, naakwiinga cakasansulula ayi wabalwiita kutanokonkela mulawo wakwe Lesa wakutalya bulowa. (Matalikilo 9:4; Milimo 15:28, 29) Sombi ici inga tacicitikiwo mukwiinga Yesu inga talwiiti bamwi ayi batanokonkela mulawo wakwe Lesa uyo waamba ayi bulowa bulisalalite.​—Joni 8:28, 29.

•   Na batumwi bakalinga kunwa bulowa bwiine bwakwe Yesu, naakwiinga taakwe kubalwiita ayi bulowa bwakwe “bweshi bukatiilwe,” kutondesha ayi paciindi ici kaatana kwaaba buumi bwakwe mbuli mulambu.​—Mateyo 26:28.

•   Yesu wakaaba buumi bwakwe ‘linkanda lyomwibo.’ (Bene Ebulu 9:25, 26) Aboobo naakwiinga shinkwa awaini shilaaluka akuba mubili abulowa bwakwe Yesu pakucita Mulilo wa Mwaami, naakwiinga abo balyako shinkwa akunwako waini balabooshawo kulyaaba nkwakalyaaba Yesu.

•   Yesu wakaamba ayi: “Kamucita bobulya mukunjibaluka,” kuteshi ayi “kamucita bobulya mukwaaba buumi bwangu.”​—1 Bene Kolinto 11:24.

 Abo bashoma ayi shinkwa awaini shilaaluka akuba mubili wakwe Yesu abulowa bwakwe, balashoma boobo ceebo ca mavesi amwi mbwaakasansululwa muma Baibo amwi. Kucakubonenaako, muma Baibo aanji maswi Yesu ngaakaamba bakaasansulula ayi: “Ubu mbulowa bwangu.” (Mateyo 26:28) Nacibi boobo, munshila imwi maswi Yesu ngaakaamba inga asansululwa ayi: “Ici cileemikaninaako bulowa bwangu,” na ayi “Ici ncikoshanyo ca bulowa bwangu.” f Kweelana ambwaakalinga kucita liinji, Yesu wakalinga kwiisha bantu kwiinda mukusebensesha shikoshanyo.​—Mateyo 13:34, 35.

 Na Bakamboni Bakwe Yehova batoocita Mulalilo wa Mwaami, mbaniinibo balyako shinkwa akunwako waini. Ino nceebonshi?

 Bulowa Yesu mbwaakatila bwakapa kwaamba ayi atalike “cipangano cipya” ico cakapyana cipangano Yehova Lesa ncaakalinga wapangana abene Isilaeli. (Bene Ebulu 8:10-13) Abo bali mucipangano cipya mbobalyako shinkwa akunwako waini. Mucipangano ici tamubete Beneklistu boonse, sombibo abo “Lesa mbaakeeta” munshila ilibetele. (Bene Ebulu 9:15; Luka 22:20) Abo mbweshi bakanokweendelesha a Yesu kwiculu alimwi Baibo ilaamba ayi bantu abo balibo 144, 000.​—Luka 22:28-30; Ciyubululo 5:9, 10; 14:1, 3.

 Mubupusano abaabo bali mu “litanga liniini” abo beshi bakeendeleshe pomwi a Klistu kwiculu, sobaanji tulalangila kuba lubasu lwa “likoto linene” lya baabo beshi bakatambule buumi butamaani pacishi capanshi. (Luka 12:32; Ciyubululo 7:9, 10) Nabi kwaamba ayi sotulangila kukala pacishi tatulyiko shinkwa nabi kunwako waini pa Ciibalusho, tulacanikaako kwaamba ayi tutondeshe kulumba pakulyaaba kwakwe Yesu ceebo ca ndiswe.​—1 Joni 2:2.