Ceebo cakwaamba ayi Bakamboni Bakwe Yehova balisuni Lesa abantu, balasebensa cankusu kulwiitako bantu boonse makani amu Baibo kwiilikaawo abaabo batakalinga kusuniiwo kubashimikila. (Mateyo 22:37-39) Kusuna Lesa kulatupa kunyumfwila mulawo Mwanaakwe ngwaakatupa wa ‘kushimikila makani abotu kubantu cakushinisha.’ (Milimo 10:42; 1 Joni 5:3) Kwaamba ayi tucikoonshe kucita boobo, tulashimikila makani abotu mankanda aanji bweenka bashinshimi bakwe Lesa bakalingaako kale kale mbobakalinga kucita. (Jelemiya 25:4) Ceebo cakwaamba ayi tulisuni bantu, tulasebensa cankusu kushimikila bantu boonse ‘makani abotu aamba pa Bwaami,’ kwiilikaawo abaabo batakalinga kusuniiwo kubashimikila.​—Mateyo 24:14.

 Liinji tulacana bantu basuni kukutika na twaboolelaako alimwi kubaabo batakalinga kusuniiwo kubashimikila. Amuyeeye pasheeshi shitokonkelaawo sheenga shapa kwaamba ayi tucane bantu basuni kukutika:

•   Bantu balalonga.

•   Bamwi paŋanda iyo inga kabasuni kukutika ku makani abotu.

•   Bantu balaaluka. Shicitika mucishi nabi shintu shicitikila muntu womwi awomwi inga shapa kwaamba ayi ‘ashibe ayi alayandika kutanjililwa a Lesa,’ alimwi ici inga capa kwaamba ayi asunishishe kushiba Baibo nshoyaamba. (Mateyo 5:3) Nabibo bantu batupikisha inga baaluka bweenka mbocakaba ku mutumwi Paulo.​—1 Timoti 1:13.

 Cancine ncakwaamba ayi tatukakatishiiwo muntu uli woonse kukutika ku makani abotu ngotushimikila. (1 Pita 3:15) Tulicishi ayi muntu womwi awomwi alyeelete kulisalila mwiine pamakani akupaila.​—Dutolonomi 30:19, 20.