1. Ino nciinshi Yehova ncaakapa basebenshi bakwe bashomeka?

YEHOVA mulusuno wakapa basebenshi bakwe bashomeka boonse lubasu mulibungano lyakwe. Nabi kwaamba ayi soonse tulicite mbasu shipusenepusene, soonse tulayandika alimwi tulayandika lucafwo kuswa kubashominyineesu. Mutumwi Paulo wakaamba sheenga shatucafwa kunyumfwishisha cancine ici ciyandika. Ino nciinshi ncetwaambila boobo?

2. Kweelana a Bene Efeso 4:16, ino nceebonshi tulyeelete kusebensela pomwi akubona ayi uli woonse alayandika?

² Bweenka mbuli maswi ali palilembo paswa mutwi uyu, Paulo wakayuminisha cancine cakwaamba ayi taakuwo weelete kulwiita mubye ayi “Toocite ncito kuli ndime.” (1 Koli. 12:21) Na tulisuni kwaamba ayi mulibungano mube luumuno, tulyeelete kusebensela pomwi akubona kwaamba ayi uli woonse alayandika mulibungano. (Amubelenge Bene Efeso 4:16.) Kusebensela pomwi mulucatano kulapa uli woonse kulinyumfwa ayi alisunikwi alimwi ici cilayumya libungano.

3. Ino nshiinshi nsheshi twiiye mumutwi uyu?

³ Ino nshiinshi nsheenga twaciita kwaamba ayi tutondeshe bulemu kubamwi mulibungano? Mumutwi uyu, tutobandika mbweenga bamanene batondeshanya bulemu. Kuboolawo, tutobandika mbweenga soonse twatondesha ayi bamakwesu abenankashi batabete mucikwati balayandika. Lyalo mukweelaako, tutokwiiya  mbweenga twatondesha kulumba kubaabo batokwiiya mushobo winemisheesu.

4. Ino Paulo wakaamba nshi nshetucana palilembo lya Bene Loma 12:10 bamanene nshobeelete kukonkela?

⁴ Bamanene boonse mulibungano balasalwa amushimu usalashi. Nacibi boobo, boonse balicite shipo shipusenepusene. (1 Koli. 12:17, 18) Bamwi mpashi bakasalwa coonoono aboobo tabacishi shiinji mbuli bamanene bamwi. Bamwi mpashi inga tabaciti shiinji ceebo ca kucembela na kuciswa. Nacibi boobo, taakuwo munene weelete kuyeeya ayi bamanene bamwi taakuwo mbobabete. Muciindi cakucita boobo, munene uli woonse alyeelete kukonkela kululika Paulo nkwaakaamba palilembo lya Bene Loma 12:10.​—Amubelenge.

5. Ino bamanene balatondeshanya buyani bulemu, alimwi ino nceebonshi ncobayandikila kucita boobo?

⁵ Bamanene balatondeshanya bulemu kwiinda mukukutika cakubikila maano umwi ndyaatokwaamba. Ici cilayandika abuumbi bunene bunene ndyebakumana kwaamba ayi babandike makani ayandika abuumbi mbuli likoto lya bamanene. Ino nceebonshi? Njashi Yamulindilishi yamu Cisungu ya October 1, 1988, yakaamba ayi: “Bamanene balicishi kwaamba ayi Klistu inga wasebensesha mushimu usalashi kupa kwaamba ayi munene uli woonse mulikoto lya bamanene aambe njiisho yamu Baibo yeenga yabacafwa kushiba shakucita na kusala kabotu. (Milimo 15:6-15) Mushimu usalashi ulacafwa bamanene boonse mulikoto, kuteshibo munene womwi.”

6. Ino nciinshi cicafwa bamanene kuba bacatene, alimwi ino libungano lilafubilamo buyani?

⁶ Munene ulemeka bamanenenyina alaleya kuba mutaanshi kwaambawo lyoonse ndyebabungana mbuli bamanene. Taambi bunene kwiinda bamwi, alimwi taashomi ayi lakwe nshaamba nsheshiluleme. Muciindi cakucita boobo, alaamba muyeeyo wakwe munshila ya kuliceesha. Alakutika cakubikila maano bamwi ndyebatokwaamba. Alimwi ciyandika abuumbi, alilibambite kubandika butanjilishi bwamu Baibo akukonkela shaamba “musebenshi  ushomeka alimwi ucite maano.” (Mate. 24:45-47) Na bamanene kabatondesha lusuno akulemekana ndyebatobandika makani, mushimu wakwe Lesa ulaakuba pakati kabo, alimwi ulakubacafwa kusala sheenga shayumya libungano.​—Jemu. 3:17, 18.

7. Ino Yesu wakalinga kubabona buyani batakalinga mucikwati?

⁷ Mulibungano muli beebene alimwi amikwashi. Nacibi boobo, mulacanika abamakwesu abenankashi baanji batabete mucikwati. Ino tulyeelete kunoobabona buyani? Amuyeeye Yesu mbwaakalinga kubona batabete mucikwati. Yesu ndyaakalinga pacishi capanshi, taakalinga kweebeteewo. Wakatolelela kuba uteebete akusebensesha bunene ciindi cakwe kukumanisha ncito njaakapekwa. Yesu taakalinga kwiisha ayi Mwineklistu alyeelete kuba mucikwati nabi sobwe. Nacibi boobo, wakaambawo ayi kuli Beneklistu bamwi beenga basala kutaba mucikwati. (Mate. 19:11, 12) Yesu wakalinga kupa bulemu abo batakalinga mucikwati. Taakalinga kubabona anga taakuwo mbobabete na anga kuli shimwi nshebatoobulisha.

8. Kweelana a 1 Bene Kolinto 7:7-9, ino Paulo wakayuminisha Beneklistu kucita nshi?

⁸ Bweenka mbuli Yesu, mutumwi Paulo alakwe taakalinga kweebeteewo. Paulo taakalinga kwiisha ayi ncibiibi Mwineklistu kweeba na kweebwa. Wakalinga kucishi ayi aya ngamakani muntu ngaeelete kulisalila mwiine. Nacibi boobo, Paulo wakayuminisha Beneklistu kubona na inga basalawo kutolelela kusebensela Yehova mbuli muntu utabete mucikwati. (Amubelenge 1 Bene Kolinto 7:7-9.) Ncakutatoonsha kwaamba ayi Paulo taakalinga kubona Beneklistu batabete mucikwati anga taakuwo mbobabete. Nceceeco ncaakapeta mukwesu wacanike Timoti uyo watakalinga kweebete incito iyandika abuumbi. * (Fili. 2:19-22) Aboobo tacibete kabotu kunoobona ayi mukwesu weelela na taana kweelela kupekwa ncito imwi ceebo cakwaamba ayi alyeebete na taaebete.​—1 Koli. 7:32-35, 38.

9. Ino kuba mucikwati na kutaba mucikwati tulyeelete kunookubona buyani?

⁹ Yesu alimwi a Paulo tabakalinga kwiisha ayi Beneklistu balyeelete kuba mucikwati na kutaba mucikwati. Aboobo ino kuba mucikwati na kutaba mucikwati tulyeelete kunookubona buyani? Njashi Yamulindilishi ya October 1, 2012,  yakaamba ayi: “Kuba mucikwati na kutaba mucikwati, shoonse nshipo kuswa kuli Lesa. . . . Yehova taaboni kutaba mucikwati anga ncintu cilensha nsoni na buumba.” Maswi aya alyeelete kutucafwa kulemeka bamakwesu abenankashi batabete mucikwati.

10. Ino inga twatondesha buyani ayi tulalemeka bamakwesu abenankashi batabete mucikwati?

¹⁰ Ino inga twatondesha buyani ayi tulalemeka bamakwesu abenankashi batabete mucikwati mbobalinyumfwa? Tulyeelete kwiibaluka kwaamba ayi Beneklistu bamwi bakasalawo kutolelela kutaba mucikwati. Beneklistu bamwi tababete mucikwati ceebo cakwaamba ayi tabana kucana muntu weelela wakweebanaakwe. Bamwi tababete mucikwati ceebo cakufwitwa. Muli moonse mweenga cabeta, sa cilibo kabotu bamwi mulibungano kunookwiipusha Beneklistu batabete mucikwati ncobatabetele mucikwati, na kutalika kubalangweta wakweebanaakwe? Ncakwiila mpashi bamwi inga basenga ayi mubacafweeko. Ano ino inga balinyumfwa buyani na twatalika kubalangweta wakweebanaakwe ndyebatana kutusenga ayi tucite boobo? (1 Tesa. 4:11; 1 Timo. 5:13) Amuleke tunyumfwe shakaamba bamakwesu abenankashi bashomeka batabete mucikwati.

11-12. Ino nshiinshi nsheenga twaciita sheenga shalefula bamakwesu abenankashi batabete mucikwati?

¹¹ Mutanjilili walubasu umwi uteebete utoosebensa kabotu abuumbi muncito yakwe, ulabona ayi kuteeba kulapa shoolwe shiinji. Nacibi boobo, wakaamba ayi tacinyumfwiki kabotu na bamakwesu abenankashi kabakwiipusha ayi: “Ino nceebonshi tamutokweeba?” Mukwesu uteebete usebensela pa ofesi ya musampi wakaamba ayi: “Cimwi ciindi bamakwesu abenankashi balampa kulinyumfwa anga bantu batabete mucikwati balanyumfwisha nkumbu. Ici cilapa kwaamba ayi cinooboneka anga kutaba mucikwati ndipenshi, kuteshi cipo.”

¹² Nankashi uteebetwe usebensela pa Bethel wakaamba ayi: “Bamakwesu abenankashi bamwi balabona anga bantu batabete mucikwati boonse batolangoola wakubaakwe mucikwati, alimwi balabona ayi batabete mucikwati boonse na baya mukufwakasha pomwi abamakwesu abenankashi bamwi, nkokwaamba ayi batolangoola wakubaakwe mucikwati. Ndyendakaya mukusebensela kumusena umwi mucishi cesu, ndakashika bushiku bwa mabungano. Nankashi wakantambula wakandwiita ayi kuli bamakwesu bobilo mulibungano baciimo cangu. Wakandwiita ayi taakalinga kweelesha kuncanina mukwesu wakweebanaakwe. Ano ndyetwakashikabo pa Ŋanda ya Bwaami, wakantola kwakalinga bamakwesu bobilo kwaamba ayi tushibane. Kwaamba cakuteenda mweela, wakatulensha nsoni.”

13. Ino nshakubonenaako sha buyani shakayuminisha nankashi umwi?

¹³ Nankashi umwi uteebetwe usebensela pa Bethel wakaamba ayi: “Kuli bapainiya bacinene batabete mucikwati mboonshi, abo babikila maano abuumbi kuncito yabo, bakalyaaba kucafwa bamwi, basebensa ncito yabo calusangalalo, alimwi beshikucafwilisha abuumbi mulibungano. Balabona kutaba mucikwati kwabo munshila yeelete, tabalinyumfwi anga balinditeewo bamwi ceebo cakutaba mucikwati, na kulibona anga inga tababiiwo alusangalalo ceebo ca kuteebwa na kutaba abaana.” Aboobo cilabota abuumbi na boonse mulibungano kabalemekana. Tulicishi kwaamba ayi bamakwesu abenankashi tabatunyumfwili nkumbu na kutunyumfwila munyono, na kutusuula, alimwi tabatubooni ayi tuliindite bamwi. Tulicishi ayi balitusuni.

14. Ino inga twatondesha buyani ayi tulalemeka bamakwesu abenankashi batabete mucikwati?

¹⁴ Bamakwesu abenankashi batabete mucikwati inga banyumfwa kabotu na katubalumba  pamibo yabo ibotu mbuli kushomeka, kuteshi kubanyumfwila nkumbu ayi tababete mucikwati. Na twacita boobo bamakwesu abenankashi aba teshi bakanoolinyumfwa anga tutoobalwiita ayi: “Tamucite ncito kuli ndime.” (1 Koli. 12:21) Sombi balaakushiba ayi tulabalemeka akubabona ayi balayandika mulibungano.

15. Ino bamwi balacita buyani kwaamba ayi bacite shiinji muncito yakushimikila?

¹⁵ Mumyaaka yaconoono, beshikushimikila baanji beeya mishobo imwi kwaamba ayi bacikoonshe kucita shiinji muncito yakushimikila. Kucita boobo kulayandika kwaalulako shimwi. Bamakwesu abenankashi aba bakashiya libungano lyakumishaabo nkobaamba mushobo winemishaabo, akuya kulibungano libulishite beshikushimikila alimwi lisebensesha mushobo umwi. (Milimo 16:9) Beneklistu aba balalisalila beene kucita boobo kwaamba ayi bacite shiinji muncito yakwe Yehova. Nabi kwaamba ayi inga catola myaaka iinji kwaamba ayi baushibe kabotu mushobo upya, balacafwa libungano munshila shiinji. Mibo yabo ibotu alimwi alushibo lwabo lulacafwa bamakwesu abenankashi mulibungano. Tulalumba abuumbi pabamakwesu abenankashi aba!

16. Ino nshiinshi bamanene nshobeelete kulangaawo kwaamba ayi babone na muntu inga weelela kuba munene na musebenshi ucafwilisha?

¹⁶ Likoto lya bamanene tabeelete kwaalilwa kulumba mukwesu kwaamba ayi eelele kusebensa mbuli munene, na musebenshi ucafwilisha ceebo cakwaamba ayi taushi kabotu mushobo walibungano. Bamanene balyeelete kubikila maano kushaamba Malembo pakweelela kwa baabo basuni kuba bamanene na basebenshi bacafwilisha, kuteshi pakushiba kabotu kwaamba mushobo walibungano.​—1 Timo. 3:1-10, 12, 13; Taitasi 1:5-9.

17. Ino njimiipusho nshi bashali njobeelete kuyeeyawo na balongela kucishi cimwi?

¹⁷ Beneklistu bamwi bakalongela kucishi cimwi ceebo cakucica nkondo na kuya mukulangoola ncito. Aboobo mpashi baana kucikolo inga beeya mushobo upya waambwa kucishi uko. Bashali abalo inga bayandika kwiiya mushobo unene waambwa kumusena uko kwaamba ayi bacikoonshe kucana ncito. Ino mbuyani na kuli libungano nabi likoto lisebensesha mushobo winemishaabo? Ino nkulibungano lili nkobeelete kunooya? Sa balyeelete kuya kulibungano lisebensesha mushobo waambwa kucishi uko na mushobo winemishaabo?

18. Kweelana a Bene Galatiya 6:5, ino inga twatondesha buyani ayi tulalemeka shasala mutwi wamukwashi?

¹⁸ Mutwi wamukwashi ngoweelete kusala libungano kweshi kunooya mukwashi. Alimwi mukwiinga aya ngamakani akulisalila, mutwi wamukwashi alyeelete kusala kweelana asheenga shacafwa mukwashi woonse. (Amubelenge Bene Galatiya 6:5.) Tulyeelete kulemeka mutwi wamukwashi nshaasala. Inga twatondesha ayi twalemeka shasala mutwi wamukwashi  kwiinda mukutambula kabotu mukwashi uyo akubatondesha ayi tulibasuni.​—Loma. 15:7.

19. Ino nciinshi mitwi ya mikwashi ncobeelete kuyeeyawo cakubikila maano akupaililawo?

¹⁹ Mikwashi imwi inga basala kunooya kulibungano lyaamba mushobo winemishaabo, sombi baana ngobateshi kabotu. Na libungano muli mukwashi uyo lili kumusena kwaambwa mushobo baana ngobeeya kucikolo, inga caba ciyumu baana kunyumfwishisha nshebatokwiiya kumabungano alimwi ici inga capa kwaamba ayi batayi panembo lwakumushimu. Ino nceebonshi? Mukwiinga baana balaya kucikolo nkobeeya mushobo wakumusena uko, kuteshi mushobo waamba bashali baabo. Na caba boobo, mutwi wamukwashi alyeelete kuyeeyawo cakubikila maano akupaila kwaamba ayi Yehova amucaafwe kusala sheenga shacafwa baana kuya panembo lwakumushimu akusena pafwiifwi abantu bakwe Lesa. Mpashi inga bayandika kucafwa bana babo kuushiba kabotu mushobo wabashali babo na mpashi kulongela kulibungano lisebensesha mushobo baana ngobanyumfwishisha. Cili coonse nceenga mutwi wa mukwashi wasalawo, bamulibungano nkwaasala kuya balyeelete kutambula kabotu mukwashi wakwe akutondesha ayi balamulemeka.

20. Ino inga twatondesha buyani ayi tulalemeka bamakwesu abenankashi batokwiiya mushobo upya?

²⁰ Paceebo ca sheeshi shoonse nshetwabandikawo, mumabungano aanji mulacanika bamakwesu abenankashi batokweelesha kwiiya mushobo upya. Aboobo inga caba ciyumu kusansulula kabotu nshebasuni kwaamba. Ano na katutabikilibo maano mbobatokwaamba mushobo ngobatokwiiya, tulaakubona ayi balisuni kusebensela Yehova. Na twabona mibo yabo ibotu, tulaakubasuna abuumbi akubalemeka. Teshi tukaambe ayi “Tamucite ncito kuli ndime” ceebo cakwaamba ayi tabacishi kabotu kwaamba mushobo ngotwaamba.

21-22. Ino ncoolwe nshi cibotu abuumbi ncetucite?

²¹ Yehova wakatupa coolwe cibotu abuumbi cakuba alubasu mulibungano. Inga caba ayi tuli basankwa na banakashi, tuli mucikwati na tatubete mucikwati, tuli wacanike na wacinene, tulaamba kabotu mushobo umwi na tulaalilwa kwaamba kabotu, soonse tulayandika kuli Yehova akuumwi amubye.​—Loma. 12:4, 5; Kolo. 3:10, 11.

²² Atutolelele kukonkela nshotweeya kuswa kucikoshanyo ca mubili wa muntu Paulo ncakaamba. Kucita boobo kulaakutucafwa kwiibaluka nsheenga twaciita kwaamba ayi tuyuminishe bamakwesu abenankashi. Alimwi kulaakutucafwa kubatondesha lusuno akunoobalemeka lyoonse.